Kuboresha Ustadi Wetu Katika Huduma—Kuanzisha Mazungumzo ili Kutoa Ushahidi Isivyo Rasmi

Kwa Nini Ni Muhimu: Tunapohubiri nyumba kwa nyumba, mara nyingi sisi hatuwapati watu wengi katika nyumba zao. Hata hivyo, tunaweza kukutana na watu hao tunapotumia usafiri wa umma, tunaposubiri kumwona daktari, tunapokuwa mapumziko kazini au shuleni, na mahali kwingineko. Ni mapenzi ya Yehova kwamba watu wote, wapate fursa ya kusikia ujumbe wa Ufalme. (1 Tim. 2:3, 4) Kwa kawaida, ili kutoa ushahidi, ni lazima tuchukue hatua ya kwanza kuanzisha mazungumzo.

Jinsi ya Kufanya Hivyo:

Uwe mteuzi. Je, mtu huyo anaonekana kuwa mwenye urafiki na yuko tayari kuzungumza? Je, hali zinaruhusu mazungumzo yenye kustarehesha? Baadhi ya wahubiri humtazama kwanza mtu huyo, na kisha hutabasamu. Ikiwa mtu huyo pia anatabasamu, wao hujaribu kuanzisha mazungumzo.
Toa sala fupi ya kimya kimya, ikiwa unakosa ujasiri wa kuzungumza.—Neh. 2:4; Mdo. 4:29.
Anza kwa utangulizi rahisi, labda kwa salamu. Yesu hakuanza mazungumzo na yule mwanamke Msamaria kwa kumweleza kuhusu Ufalme. (Yoh. 4:7) Nyakati fulani tunaweza kuanzisha mazungumzo kwa kutoa pongezi. Kwa mfano, unaweza kusema hivi: “Watoto wako wana adabu sana!” Njia nyingine tunayoweza kutumia kuanzisha mazungumzo ni kuuliza maswali kama vile: “Je, ulitazama taarifa ya habari jana usiku?”
Mkishaanza mazungumzo, tafuta fursa ya kumweleza kuhusu habari njema, lakini usiwe na haraka kufanya hivyo. Ruhusu mazungumzo yaendelee kwa njia ya kawaida. Labda unaweza kutaja jambo fulani ambalo litaamsha upendezi wake, na hivyo kumchochea aulize maswali. Kwa mfano, ikiwa mazungumzo ni kuhusu mambo ya familia, unaweza kusema hivi, “Nimepata ushauri unaotegemeka kuhusu jinsi ya kulea watoto.” Ikiwa unazungumzia jambo fulani kutoka katika vyombo vya habari, unaweza kusema, “Hivi karibuni nilifurahia kusoma habari njema.” Usivunjike moyo iwapo mazungumzo yanafikia mwisho kabla ya kutoa ushahidi.
Beba trakti au machapisho ambayo unaweza kumpa mtu anayependezwa.

Jaribu Dokezo Hili kwa Mwezi Mzima:

Kila juma jaribu kuanzisha mazungumzo angalau mara moja, kwa lengo la kutoa ushahidi isivyo rasmi.