Jinsi ya Kutoa Ushahidi kwa Kutumia Meza na Vigari Vyenye Machapisho

Kutoa ushahidi kwa kutumia meza au vigari vyenye machapisho, kumekuwa njia yenye matokeo sana ya kuwavuta watu wanyoofu wajifunze Biblia. (Yoh. 6:44) Hivyo, wazee wamekuwa wakitiwa moyo kupanga mahubiri ya hadharani katika maeneo ya kutaniko yenye watu wengi. Kwa kuwa meza au vigari vyenye machapisho vinaweza kuhamishwa, kwa kawaida si lazima kuomba ruhusa kutoka kwa wenye mamlaka. Ni nani wanaostahili kushiriki? Ni wahubiri wanaonyesha busara, wanaovalia kwa heshima na kiasi, na wenye uwezo wa kuanzisha na kuendeleza mazungumzo. Ili kuwasaidia wahubiri wapate mafanikio zaidi kuna mambo yafuatayo tunayopaswa kufanya na tusiyopaswa kufanya.

Mambo ya Kufanya:

Uwe mwenye urafiki, mkaribishaji, na tayari kuwahudumia wengine. Wahubiri wengine hutabasamu kwa uchangamfu na huwasalimu wapita-njia kwa urafiki. Ikiwa mpita-njia anatazama machapisho anapopita, unaweza kusema, “Unakaribishwa kuchukua chapisho lolote unalopenda.”
Simama umbali unaofaa kutoka kwenye meza au kigari chenye machapisho. Katika baadhi ya maeneo wahubiri hupata matokeo wanaposimama mbali kidogo kutoka kwenye meza au kigari chenye machapisho. Wahubiri wengine huona kwamba kufanya hivyo huwafanya wapita-njia wasitesite kusimama, kwa hiyo wao husimama mbali zaidi na kusubiri hadi mtu akaribie meza yenye machapisho. Mara tu mtu anapokaribia meza yenye machapisho, jaribu kuanzisha mazungumzo pamoja naye, labda kwa kumuuliza hivi, “Je, umewahi kujiuliza swali hili?”
Tumia Biblia mara nyingi iwezekanavyo.
Mtu anapochukua mojawapo kati ya machapisho ya kujifunzia Biblia kama vile kitabu Biblia Inafundisha, mweleze kuhusu mpango wa kujifunza. Mwonyeshe video Kwa Nini Ujifunze Biblia? kwa kutumia simu au kifaa kingine.
Ikiwa inafaa, mwombe mtu anayependezwa namba ya simu au anwani yake. Iwapo mtu huyo haishi katika eneo lenu, jaza fomu Tafadhali Fuatia Upendezi (S-43), na kumpa mwandishi haraka iwezekanavyo.