Fuatia Kupendezwa Bila Kukawia

¹ “La leo litende leo.” Wengi wanafahamu msemo huo unaotia moyo kushughulikia mambo ya lazima bila kuchelewa. Ono lifuatalo linaonyesha kwamba tunaweza kutumia kanuni hiyo katika huduma yetu.

² Dada mmoja alimwangushia mwanamume mmoja kitabu na akamwahidi kwamba angerudi. Bila kujua, dada mwingine alizuru nyumba hiyo hiyo saa moja baadaye. Mwanamume huyo akaja kwenye mlango akiwa na kitabu hicho mkononi na kumwambia: “Uliposema kwamba ungerudi, mimi sikufikiri kuwa ungerudi haraka hivyo, lakini karibu, niko tayari kwa funzo langu.”

³ Ingawa huenda rudio la haraka jinsi hiyo lisiwe ndilo jambo la kawaida, ono hilo lakazia umaana wa kuwa chonjo kufuatia kupendezwa tunakopata katika huduma yetu bila kukawia isivyo lazima. Wakati wa Machi tutakuwa tukitoa kitabu Upeo wa Ufunuo. Matukio ya ulimwengu yanafanya idhihirike kwamba kichapo hicho, kinachoeleza kitabu cha mwisho cha Maandiko ya Kigiriki ya Kikristo, ni cha kisasa kama vile habari zinazoripotiwa leo katika magazeti, redio, na televisheni kuhusu matukio ya ulimwengu ambayo yanahusu maisha za wanadamu wote kwa njia ya moja kwa moja.

⁴ Watu Wanahitaji Msaada wa Ziada: Ili kuwasaidia watu waelewe habari zilizo katika kichapo hicho na kuthamini kwamba kinahusu maisha zao na wakati ujao wao, tunahitaji kupanga kufanya ziara ya kurudia, angalau katika muda wa siku chache baada ya ziara ya kwanza. Tutafanyaje hivyo? Inaweza kuwa kwamba kumjulisha mtu huyo kwamba utarudi kutasaidia kujua kadiri ya kupendezwa wake.

⁵ Panga Kufanya Rudio: Si rahisi nyakati zote katika ulimwengu wa leo kufanya miadi ya wakati barabara, na huenda mwenye nyumba asikumbuke kutimiza miadi. Hata hivyo, ukiandika chini wakati wa rudio kama hilo halafu uhakikishe kurudi—katika muda wa siku chache ikiwezekana—utakuwa ukitimiza daraka lako la kuchukua miadi kwa uzito. Ikiwa mtu huyo hayuko nyumbani, hakikisha kwamba unaendelea kujaribu kumpata. Huenda akatiwa moyo kuchukua ziara yako kwa uzito anapoona jitihada zako za kumpata nyumbani.

⁶ Kwa sababu hatuwezi kamwe kuwa na uhakika kabisa juu ya kupendezwa kunakoonyeshwa na mtu tunapofanya ziara ya kwanza, hakikisha kwamba unarudi hata wakati inapoonekana kuwa kuna kadiri tu ya kupendezwa. Ni jambo la faida kufuatia kupendezwa kama huko bila kukawia. Huenda ukawa umechochea kupendezwa kwa mtu huyo katika kitabu Upeo wa Ufunuo, na unaporudi huenda ukashangazwa na upokezi mwema unaopata. Kwa hiyo hakikisha kufuatia kupendezwa bila kukawia!