Panua Hazina Yako ya Utumishi wa Ufalme
1 Yesu alifananisha tumaini la Ufalme na hazina yenye thamani kubwa. (Mt. 13:44-46) Je, sisi ni kama wale watu kwenye vielezi vya Yesu waliouza mali zao zote ili kununua kitu chenye thamani kubwa zaidi? Ikiwa ndivyo, tutaupa Ufalme wa Mungu nafasi ya kwanza, hata ingawa huenda ikahusisha usumbufu na kujikana wenyewe.—Mt. 6:19-22.
2 Kwa kuwa utumishi wetu wa Ufalme ni hazina, inapasa kuwa tamaa yetu kuupanua. Mwendo wetu wa kibinafsi wa maisha waonyesha nini? Je, twapanua utendaji wetu wa Ufalme? Twaweza kufanya hivyo kwa kushiriki sehemu mbalimbali za huduma, kutia ndani mahubiri ya nyumba kwa nyumba, kufanya ziara za kurudia, kuongoza mafunzo ya Biblia na kutoa ushahidi kivivi-hivi.
3 ‘Naweza Kupanuaje Ushiriki Wangu?’ Mwaka mpya wa utumishi uanzapo, ni vizuri kila mmoja apitie utendaji wake wa kibinafsi ili aone analoweza kufanya ili kuongeza wakati anaotumia katika huduma ya shambani na aulize: ‘Je, naweza kupanga mambo yangu ili nijiandikishe niwe painia-msaidizi mara kwa mara au hata kwa kuendelea? Kukiwa na marekebisho machache, naweza kuingia utumishi wa painia wa kawaida?’ Mapainia wapya wanaojiandikisha kufikia Septemba 1 watastahili kuhudhuria Shule ya Utumishi wa Painia mwaka ujao.
4 Wahubiri fulani wameweka mradi wa kibinafsi wa kutoa ushahidi wa vivi-hivi zaidi. Mara nyingi utendaji huu huzaa matunda bora. Huenda wengine wakahisi uhitaji wa kuboresha namna ya kutoa ushahidi wa magazeti au kufanya ziara za kurudia zenye matokeo au kuanzisha mafunzo ya Biblia mapya.
5 Tukiamua kwamba utumishi wetu umepunguka kwa njia fulani, twaweza kufanya nini ili tuupanue? Wale ambao wamefanikiwa katika miradi ya juu wanapendekeza kwamba kwanza tuazimie kutanguliza masilahi ya Ufalme hata nini kitokee. (Mt. 6:33) Imani na kumtegemea Yehova kikamili vyahitajiwa. (2 Kor. 4:7) Tafuta msaada wake kupitia sala ya moyo mnyoofu na ya kuendelea. (Lk. 11:8, 9) Twaweza kuwa na uhakika kwamba Yehova atabariki jitihada zetu za kweli za kuongeza ushiriki wetu katika utumishi wake.—1 Yoh. 5:14.
6 Zungumza pamoja na ndugu na dada wengine ambao wamepanua huduma yao kwa mafanikio. Waulize jinsi walivyoweza kushinda vizuizi bila kuvunjika moyo. Maono yao ya kibinafsi yaweza kuwa tu yale yanayohitajiwa ili kukuhakikishia kwamba utumishi uliopanuliwa sio usiofikilika.
7 Unaposoma makala zilizo katika Mnara wa Mlinzi au Huduma ya Ufalme Yetu zinazoshughulika na utumishi wa shambani, fikiria kwa sala jinsi unavyoweza kutumia madokezo hayo katika huduma yako. Fanya vivyo hivyo unapohudhuria mikutano ya kutaniko au makusanyiko. Madokezo yanayotolewa kwenye makala hii yanategemea mazungumzo yaliyokuwa sehemu ya programu ya kusanyiko la mzunguko la mwaka uliopita. Ni sehemu ya kwanza ya mfululizo wa makala zilizotayarishwa zitusaidie tuendelee na tutumie kitia-moyo kilichotolewa na programu hiyo.
8 Yesu alichukua huduma yake kwa uzito sana, akiifanya kuwa hangaikio kuu. Yeye alitangaza: “Chakula changu ndicho hiki, niyatende mapenzi yake aliyenipeleka.” (Yn. 4:34) Je, sisi twahisi vivyo hivyo? Ikiwa ndivyo, kwa hakika tutatafuta njia za kupanua utendaji wetu na kushiriki “yaliyo mema” pamoja na wengine katika ghala yetu ya hazina.—Mt. 12:35; Lk. 6:45.