Kuboresha Ustadi Wetu Katika Huduma—Kutoa Kitabu Biblia Inafundisha

Kwa Nini Ni Muhimu: Kitabu Biblia Inafundisha ni kifaa muhimu cha kufundishia. Lakini, kabla ya kuanza kukitumia kujifunza na mtu anayependezwa, lazima kwanza tumwachie. Kwa hiyo, sote tunapaswa kujitahidi kuwa stadi katika kutoa kitabu Biblia Inafundisha. (Met. 22:29) Kuna mapendekezo mengi, hata hivyo, wahubiri wanapaswa kutumia pendekezo lenye matokeo.

Jinsi ya Kufanya Hivyo:

Uliza swali linaloamsha upendezi ili kumwelekeza mwenye nyumba katika sura hususa kwenye kitabu. Ukipenda unaweza kuchagua mojawapo ya maswali yaliyo mwanzoni mwa kila sura. Baada ya kusikiliza maoni ya mwenye nyumba, soma andiko linalofaa halafu umwonyeshe fungu linaloelezea jambo hilo, na ikiwezekana mlizungumzie kifupi.
Pendekezo lingine ni kutumia kurasa za kwanza ili kuamsha upendezi na kumwonyesha mwenye nyumba mahali ambapo jibu la Biblia linapatikana katika kitabu hicho. Kwa mfano, unaweza kutaja msiba ambao umetukia karibuni na umezungumziwa katika vyombo vya habari na umwambie kwamba wengi wamejiuliza maswali yanayopatikana katika ukurasa wa 3. Au unaweza kusema kwamba tunawatembelea majirani wetu ili kuzungumzia kuhusu tumaini la wakati ujao. Kisha mwonyeshe picha zilizo kwenye ukurasa wa 4-5 na umwulize hivi: “Ungependa kuona ahadi gani ikitimizwa?” Pia, unaweza kusema kwamba unawatembelea watu kifupi ili kuwasaidia wapate majibu ya maswali muhimu maishani. Halafu mwonyeshe mwenye nyumba maswali yaliyo kwenye ukurasa wa 6, na umwulize angependa kupata jibu la swali gani hasa.
Tumia njia ya moja kwa moja kuanzisha funzo la Biblia. Unaweza kusema hivi: “Tunawaonyesha majirani wetu kitabu hiki cha kujifunzia Biblia. Je, umewahi kukiona? [Mruhusu ajibu.] Ikiwa una dakika chache, ningependa kukuonyesha jinsi tunavyoweza kujifunza kwa kutumia Biblia yako.”

Tumia Dokezo Hili kwa Mwezi Mzima:

Fanyeni mazoezi wakati wa ibada yenu ya familia.
Unapokuwa katika utumishi, waeleze wahubiri wengine utangulizi uliopanga kutumia. (Met. 27:17) Badili utangulizi wako ikiwa hupati matokeo.