Mpango Mpya Kuhusu Kujikumbusha Programu za Mikusanyiko

Kwa kuwa ulimwengu wa Shetani unaendelea kutoka ubaya mpaka ubaya zaidi, Yehova anatutia nguvu “kukataa kabisa kutomwogopa Mungu na tamaa za ulimwengu na tuishi kwa utimamu wa akili na uadilifu na ujitoaji-kimungu katikati ya mfumo wa mambo wa sasa.” (Tito 2:12) Kati ya mipango ambayo anafanya kupitia “mtumwa mwaminifu na mwenye busara” ni programu za mkusanyiko wa mzunguko na kusanyiko la pekee la siku moja. (Mt. 24:45) Mikusanyiko hii ya kiroho ni yenye kuimarisha sana.

Ili kutusaidia tulinde akilini na kutumia maagizo yanayotolewa, mpango mpya kuhusu kujikumbusha programu za mikusanyiko hii utatumiwa mnamo mwaka wa utumishi wa 2005. Nyongeza hii, kwenye ukurasa wa 5-6, mna makala zinazotupatia mtazamo kimbele wa yale yatakayotolewa kwenye programu za mikusanyiko na pia maulizo ya kujikumbusha kwa ajili ya kila programu ya mkusanyiko. Kabla tu, na mapema zaidi baada ya kuhudhuria mikusanyiko, makutaniko yatachunguza habari hii kwenye Mkutano wa Utumishi. Mpango huo utafanywaje?

Juma moja au mawili kabla ya kutaniko kuhudhuria mkusanyiko wa mzunguko, hotuba ya dakika kumi yenye kutegemea habari “Programu Mpya ya Mkusanyiko wa Mzunguko” itatolewa kwenye Mkutano wa Utumishi ili kutayarisha watu kiakili kuhusu programu. Msemaji ataelekezea uangalifu kwenye maulizo ya kujikumbusha na kuwatia moyo wote wachukue maandishi wakati wa mkusanyiko kwa ajili ya kujikumbusha kutakakofuata majuma machache baada ya mkusanyiko.

Mnamo majuma machache baada ya mkusanyiko, kujikumbusha kwa dakika 15 kuhusu siku ya kwanza ya programu ya mkusanyiko kutatolewa kwenye Mkutano wa Utumishi. Majuma yafuatayo, kutakuwa na dakika 15 ili kujikumbusha siku ya pili ya programu. Mazungumzo hayo yatategemea maulizo ya kujikumbusha yanayotolewa katika nyongeza hii. Kujikumbusha kunapaswa kukazia jinsi habari hiyo inavyoweza kutumiwa maishani. Wazee wanaweza kufanya mipango ya kufupisha, kuondoa, au kupanga upya sehemu nyingine za Mkutano wa Utumishi ili sehemu hizi za kujikumbusha zipatane na programu.

Mpango uleule utafuatwa kuhusiana na programu ya kusanyiko la pekee la siku moja, tofauti ni kwamba kutakuwa sehemu moja tu ya dakika 15 ili kujikumbusha programu nzima. Sisi sote tutataka kuchunga nyongeza hii na kuitumia ili kufaidika sana na maagizo mazuri ambayo Yehova anatoa.—Isa. 48:17, 18.