ኣብ ኣገልግሎት ክእለትካ ኣመሓይሽ —ኣብ ቦታታት ንግዲ መስክር

ኣገዳሲ ዝዀነ ስለምንታይ እዩ፧ ብዙሓት ሰባት ነዊሕ ሰዓታት ስለ ዚሰርሑ፡ መብዛሕትኡ ግዜ መልእኽቲ መንግስቲ ኣምላኽ ከነብጽሓሎም እንኽእለሉ ዝበለጸ መገዲ ኣብ ቦታ ስራሖም ምምስካር እዩ። ኣብ ቦታ ስራሕ ምምስካር ዜሐጕስን ውጽኢታውን ኪኸውን ይኽእል እዩ። ከመይሲ፡ ኣብ ቦታ ስራሕ ሰባት ኣይንስእንን ኢና፣ እቶም ሰራሕተኛታት ድማ ነቶም ናብኦም ዚመጹ ሰባት፡ ዓማዊሎም ኪዀኑ ስለ ዚደልይዎም፡ ምቕልል ኢሎም እዮም ዚቕበልዎም። ኣስፋሕቲ ውጽኢታውያን ምእንቲ ኪዀኑ፡ መስተውዓልቲ፡ ብኣከዳድናኦምን ብኣመለኻኽዖምን ድማ ኣብነታውያን ኪዀኑ ኣለዎም። (2 ቈረ. 6:3) ስለዚ፡ ሓላው ኣገልግሎት፡ ቦታታት ንግዲ ኣብ ከክንደይ ግዜ ኺዕየ ኸም ዘለዎን ብመን ኪዕየ ኸም ዘለዎን ኪከታተል ኣለዎ።

እንታይ ክትገብር ኣሎካ፧

ሕጽር ዝበለ ኣቀራርባ ተዳሎ። ነቲ ሰራሕተኛ ኣዝዩ ብዙሕ ግዜኡ ንወስደሉ እንተ ደኣ ዄንና፡ ካልእ ግዜ ምስኡ ንኽንዘራረብ ኣጋጣሚ ኸይህበና ይኽእል እዩ።
ብዙሕ ስራሕ ኣብ ዘይህልወሉ ሰዓታት ክትከይድ ምረጽ። ንኣብነት፡ እቲ ናይ ስራሕ ቦታ ኣብ ዚኽፈተሉ ሰዓታት ዝሓሸ ኪኸውን ይኽእል እዩ።
ፈለማ ንሓላፊ እቲ ናይ ስራሕ ቦታ ንምዝርራብ ጻዕሪ ግበር። ምቕሉልን ተቐራብን ኩን። ከምዚ ዚስዕብ ክትብል ትኽእል ኢኻ፦ “ንሰባት ኣብ ቤቶም ክንረኽቦም ኣጸጋሚ ስለ ዝዀነ ኢና ኣብ ቦታ ስራሖም፡ ሓጺር ምብጻሕ እንገብረሎም ዘሎና።” ሓጺር ኣቀራርባ ተጠቒምካ፡ ትራክት፡ መጽሔታት፡ ወይ ካልእ ንኣሽቱ ጽሑፋት ኣበርክተሉ። ነጋዶ ዘይምዃንና ምእንቲ ኸነርኢ፡ ዕዮና ብኸመይ ከም ዚምወል እንተ ዘይተሓቲትና፡ ብዛዕባ ወፈያ እንተ ዘይጠቐስና ዝሓሸ እዩ።
እቲ ሓላፊ ስራሕ ምቕሉል እንተ ዀይኑ፡ ነቶም ካልኦት ሰራሕተኛታት ኣሕጽር ኣቢልካ ንኸተዘራርቦም ፍቓድ ሕተቶ። ኣብ ገሊኡ ቦታታት ንግዲ፡ ኣብቲ እቶም ሰራሕተኛታት ዜዕርፉሉ ኽፍሊ እተወሰነ ጽሑፋት ከተቐምጥ ፍቓድ ምሕታት ዝሓሸ ኪኸውን ይኽእል እዩ።
መስተውዓልን ተዓጻጻፍን ኩን። ንኣብነት፡ ሓደ ሰራሕተኛ ምስ ዓሚሉ ይዘራረብ እንተ ኣልዩ ወይ ብስራሕ ትሑዝ እንተ ዀይኑ፡ ናብኡ ቐሪብካ ቕድሚ ምዝርራብካ፡ ስራሑ ኽሳዕ ዚውድእ ተጸበዮ።

ኣብዛ ወርሒ እዚኣ፡ ነዚ ፈትኖ፦

ኣምልኾ ስድራ ቤት ኣብ እትገብሩላ ምሸት፡ ኣብ ቦታታት ንግዲ ኽትዓዪ ኸለኻ ኽትጥቀመሉ እትኽእል ሓጺር ኣቀራርባ ተለማመድ።