Pego ya Baboledi ba Bogosi
Mafoko A A Molemo a Bogosi go Tswa kwa Australia
MAFOKO a a molemo a Bogosi a bolelwa ka matlhagatlhaga ke Basupi ba ga Jehofa kwa Australia, fela jaaka kwa mafatsheng a mangwe a a 211. Basupi ba koo ba ba fetang 49 000 ba ipelela masego a mantsi. Batho ba le bantsi ba merafe e e farologaneng ba ile ba fudugela koo mo dingwageng di le dintsi tse di fetileng, mo eleng gore jaanong diphuthego tse 58 tsa merafe e e farologaneng di bega tirelo ya tshimo. Ofise ya lekala ya Watch Tower Society e re bolelela maitemogelo a a kgothatsang.
Motshabi wa Mo-Vietnam
Motshabi mongwe wa Mo-Vietnam, yo jaanong a nnang kwa Australia, o ne a gola a obamela badimo, a dumela mo dithutong tsa ga Confucius, le mo Bobudeng, mmogo le mo filosofing ya Botlhaba le ya Bophirima. E ne e le lesole mo mophatong wa masole wa kwa Vietnam Borwa go fitlhela ka 1975. Ka 1979 o ne a tshwanela gore a kgaolwe letsogo ka ntlha ya go tswiwa ke ntho ya kankere mo malokololong a lone a seatla. Ka 1983 o ne a tshaba kwa Vietnam ka mokoro o monnye mmogo le batho ba bangwe ba le 24, ka ntlha ya go eletsa go gololesega. Morago ga go lwa ntwa e e matlho mahibidu le dinokwane dingwe tsa mo lewatleng, mokoro wa bone o ne wa kailakaila mo Lewatleng la China Borwa ka malatsi a le marataro a a mogote, go fitlhela labofelo ba fitlha kwa Malaysia. O ne a dumelelwa go tsena mo Australia morago ga go fetsa dikgwedi di le tlhano a le mo kampeng ya batshabi. Morago ga dikgwedi di le tharo o ne a bona boammaaruri. Mafoko ano a ga Jesu a a mo go Yohane 8:32 a ne a arabela keletso e e boteng eo a neng a na nayo ya kgololesego: “Lo tla itse boamarure, me boamarure bo tla lo golola.” Bakaulengwe ba ne ba bontsha lorato lo logolo mo go ene. Gompieno ke Mosupi wa ga Jehofa mme o thusa thata mo go thuseng ba bangwe ba bantsi ba ba buang Se-Vietnam gore ba ithute boammaaruri jono jo bo gololang.
Mo-Aborigine O Arabela Mo Boammaaruring
Kwa bokone-bophirima jwa Australia mokaulengwe mongwe yo mosha yo eleng mmulatsela a na le tsala ya gagwe ba ne ba etela mosadi mongwe wa Mo-Aborigine mo lefelong lengwe la morafe oo leo le bidiwang bobeolelo jwa dinku. Morago ga a sena go utlwa seo ba neng ba etile ka sone mosadi yoo o ne a funolola selotlole mo molaleng wa gagwe mme o ne a lotlolola lebokose lengwe le legolo la tshipi. Ba ne ba gakgamala tota fa ba bona diboroutšhara tse pedi tsa Watch Tower mo teng ga lone mmogo le Bibela ya bogologolo tseo di neng di le mo gare ga dithoto tsa gagwe tse di seng kae. Ba ne ba kgona go simolola thuto ba dirisa nngwe ya diboroutšhara tseo ba ipharile fa fatshe. Lemororo mosadi yoo a ne a sa itse go buisa le go kwala, o ne a tsaya diboroutšhara tseno tseo a neng a di bona pelenyana ga moo jaaka tsa botlhokwa tota mo go ene. Jaanong o tshwarelwa thuto ka metlha, mme o ipelela seno.
Mogala O O Leditsweng ka Phoso
Mo toropong ya Sydney, e e nang le batho ba le dimilione tse tharo, mosetsana mongwe yo monnye wa dingwaga di le tharo o ne a ntse a tshameka ka mogala mme o ne a letsetsa nomore nngwe le nngwe fela e a sa e itseng. Nomore eo go ne ga diragala gore e bo e le ya Mosupi mongwe. Kgaitsadi o ne a e araba, mme pele o ne a ithaya a re yo o neng a letsa e ne e le setlogolwana sa gagwe. Mme morago o ne a utlwa lentswe la motho yo mogolo. E ne e le mmaagwe mosetsanyana yoo, mme o ne a kopela ngwana wa gagwe maitshwarelo. Go ne ga latela motlotlo, oo kgaitsadi a neng a neela bosupi mo go one. Mosadi yoo o ne a buela jaana kwa godimo: “Ke ne ke ntse ke eletsa gore ekete Basupi ba ka njela nala gape. Ke batla go nna mongwe wa Basupi ba ga Jehofa!” O ne a tswelela ka go bolela gore mo dikgweding tse pedi fela tse di fetileng, o ne a ile a etela kwa Peru mme o ne a kgatlhiwa thata ke rakgadiagwe le lelapa la gagwe bao jaanong eleng Basupi ba ga Jehofa. O ne a bolela jaana: “Bana ba balosika lwa me e ne e le bodiabolonyana ba bannye, mme jaanong ke baengelenyana ba bannye!” Go ne ga dirwa dithulaganyo tsa thuto ya Bibela, mme mosadi yoo yo o kgatlhegang o tswelela go dira kgatelopele e e molemo—seno sotlhe ka ntlha ya go letsa mogala ka phoso ga mosetsanyana wa gagwe yo monnye.