Hoko ko e Faʻifaʻitakiʻanga ʻi he Leá Pea ʻi he ʻUlungaangá
1 Naʻe akonaki ʻa e ʻaposetolo ko Paulá kia Tīmote ke hoko ko e faʻifaʻitakiʻanga ʻi he leá pea ʻi he ʻulungaangá. (1 Tīm. 4:12) ʻOku totonu ke tau fakahāhā foki ʻa e faʻifaʻitakiʻanga ʻi he leá mo e ʻulungaangá, tautefito ʻi heʻetau kau ki he ngāue fakafaifekaú, koeʻuhi ʻi heʻetau fai peheé ʻe fakapapauʻi nai ai pe ʻoku tau aʻu ki he loto ʻo e faʻahinga ʻoku tau fetaulakí pe ʻikai.
2 ʻOku fiemaʻu ke tau fakahāhā ʻa e ngaahi tafaʻaki ʻo e ngaahi anga-lelei kotoa pē, kau ki ai ʻa e anga-fakaʻapaʻapa, fakaʻatuʻi, anga-ʻofa, anga-maau, mo e anga-fakapotopoto. ʻI hono tapua atu ʻa e ngaahi angá ni, ʻoku tau fakahā ai ʻoku tau lāuʻilo ki he anga hono uesia ʻe heʻetau ngaahi ngāué ʻa e ngaahi ongoʻi ʻa e niʻihi kehé. Ko e anga-lelei ʻi he ngāue fakafaifekaú ʻe fakahoa nai ia ki he ngaahi meʻa-fakaifo-meʻakai ʻa ia ʻoku ngāueʻaki ke fakalahi ʻa e ifo ʻo e meʻakaí. Kapau naʻe ʻikai kinautolu, ko e meʻakai leleí ʻe lava ke taʻeifo mo kovi. Ko e ʻikai ke fakahāhā ʻa e ngaahi anga-leleí ʻi heʻetau feangai mo e niʻihi kehé ʻe lava ke maʻu ai ha nunuʻa meimei tatau.—Kol. 4:6.
3 Hoko ko e Faʻifaʻitakiʻanga ʻi he Leá: Ko ha malimali anga-fakakaumeʻa mo ha fakafeʻiloaki māfana, ko e ongo kupu mātuʻaki mahuʻinga ia ʻo ʻetau tuʻuaki atu ʻa e ongoongo leleí. ʻI he taimi ʻoku tau fakaifo ai ʻetau lea fakafeʻiloakí ʻaki ʻa e loto-māfaná mo e loto-totonú, ʻoku tau ʻai ai ke ʻilo ʻe he tokotaha-ʻapí ʻoku tau mahuʻingaʻia moʻoni ʻiate ia. ʻI he taimi ʻokú ne lea aí, fanongo tokanga pea fakahā ʻa e fakaʻapaʻapa ki heʻene fakakaukaú. ʻI he taimi ʻokú ke lea aí, fai ia ʻi he anga-fakapotopoto mo e anga-ʻofa.—Fakafehoanaki mo Ngāue 6:8.
4 ʻI he taimi ki he taimi ʻoku tau fetaulaki mo ha faʻahinga ʻoku ʻikai nai te nau anga-fakakaumeʻa, ʻoku aʻu ʻo anga-fakafili. ʻOku totonu ke fēfē ʻetau talí? ʻOku akonaki mai ʻa Pita kiate kitautolu ke tau lea ʻi ha founga te ne fakahāhā ʻa e “angavaivai mo e tailiili.” (1 Pita 3:15; Loma 12:17, 18) Naʻe pehē ʻe Sīsū kapau ʻe talitekeʻi anga-fefeka ʻe he tokotaha-ʻapí ʻa e pōpoaki ʻo e Puleʻangá, ʻoku totonu ke tau hanga ai pē ʻo ‘tūtuuʻi ʻa e efú mei hotau vaʻé.’ (Mt. 10:14) ʻI hono fakahāhā hotau ngaahi anga-faʻifaʻitakiʻangá ʻi he ngaahi tuʻunga peheé, ʻe faai atu nai ʻo molū hifo ai ʻa e loto ʻo e tokotaha fakafepakí.
5 Hoko ko e Faʻifaʻitakiʻanga ʻi he ʻUlungaangá: Ko hono malangaʻi ʻa e ongoongo leleí ʻi he ngaahi hala moʻumoʻuá pea ʻi he ngaahi feituʻu kakaí, ʻoku fiemaʻu ke tau hoko ʻo tokanga, ʻoua ʻaupito ʻe longoaʻa pe fakamatematē, pea ʻi heʻene peheé ʻe ʻikai te tau kaunoa ʻi he fefonongaʻaki holo ʻa e kakaí. ʻI he taimi ʻoku tau ʻi he ngaahi ʻapi ai ʻo e faʻahinga mahuʻingaʻiá, ʻoku taau ke tau tauhi maʻu ʻa e anga-tāú pea ʻai kitautolu ko e kau fakaafe anga-ʻofa, ʻo fakahā ʻa e houngaʻia ki heʻenau anga-talitali kakaí. Kapau ʻoku ʻi ai ha fānau ʻoku nau ngāue fakataha mo kitautolu, kuo pau ke nau fakahā ʻa e anga-fakaʻapaʻapa ki he tokotaha-ʻapí pea mo ʻene koloá, pea ʻoku totonu ke nau anga-lelei mo tokanga ʻi he taimi ʻoku tau pōtalanoa aí. Kapau ʻoku puleʻingataʻa ʻa e fānaú, ʻe hoko heni ha ongoʻi taʻefakafiemālie.—Pal. 29:15.
6 Ko hotau fōtunga fakafoʻituituí ʻoku totonu ke hā mahino ki he niʻihi kehé ko e kau faifekau kitautolu ʻo e Folofola ʻa e ʻOtuá. ʻI hotau valá mo e teuteú, ʻoku totonu ke ʻoua ʻe taʻemaau mo mafuefue pe teu fakahāhā. Ko hotau fōtungá ʻoku totonu maʻu pē ke taau mo e ongoongo leleí. (Fakafehoanaki mo Filipai 1:27, PM.) ʻI hono fai ha tokanga lelei ki hotau fōtungá mo ʻetau nāunaú, ʻe ʻikai te tau ʻoange ai ki he niʻihi kehé ha fakatupungaʻanga ke nau tūkia ai pe maʻu ha luma ki heʻetau ngāue fakamalangá. (2 Kol. 6:3, 4) Ko ʻetau faʻifaʻitakiʻanga ʻi he leá mo e ʻulungaangá, ʻoku tānaki atu ai ha ʻulungaanga fakamānako ki he pōpoaki ʻo e Puleʻangá, ʻo ʻomai ai ʻa e lāngilangi kia Sihova.—1 Pita 2:12.