Kugwasya Mikwasyi Kuti Ibe Abuumi Butamani Kumbele
1 “Bulyato bulagwasya,” obo mbwaakaambila basicikolo bamwi bakamanizya lwiiyo lwabo umwi mulangi wamali, wakayungizya kuti: “Ulakonzya koli mulyato pele kokkomana azintu nzyocita.” Oobo mbombubo nyika yoonse mboikulwaizya kuliyanda mukucita kuti muntu akakkale kabotu kumbele. Pele kwiindana amuzeezo oyu, walo Jesu wakali kuyiisya kuti Munakristo weelede “aliimye . . . Nkaambo nimpindunzi njajana muntu nikuba kuti wavuba nyika yoonse anukuti wanyanzigwa buumi bwakwe?” (Mt. 16:24-26) Kutegwa muntu akajane buumi butamani kumbele, buumi bwakwe boonse bweelede kuba bwakucita luyando lwa Leza—imbaakani mpati kwiinda yamikwasyi sunu. (Int. 143:10; 1 Tim. 4:8) Aayo makani alaambwa mucibalo camamanino aabbuku lya Inzila Yakujana Lukkomano Mumukwasyi. Eeli bbuku lipya ligwasya bantu kubona cintu cipati cini-cini mubuumi alimwi ambobanga babweza ntaamu zigwasya mikwasyi yabo. Twanoozumanana kukambauka makani mabotu koonse-koonse, ncinzi ncotunga twaamba icitikakulwaizye baabo mbotuswaangana kubala bbuku lya Lukkomano Mumukwasyi? Ngaaya malailile:
2 Mulakonzya mwabelesya katilakiti kakuti “Amutangale Abuumi Mumukwasyi” aamulyango alimwi anomuli mumugwagwa ikutalisya mibandi. Mulakonzya mwabuzya kuti:
◼ “Ikuti twalanga mapenzi oonse aatulibilisya mubuumi bwasunu, sena muyeeya kuti cilakonzeka kubaa lukkomano lwini-lwini mubuumi bwamukwasyi? [Amulindile kwiingula.] Aaka katilakiti katusyomezya kuti cilakonzeka. Sena mulayanda kukabala?” Ikuti naa katambulwa, mulakonzya kuzumanana kwaamba kuti: “Mbwaanga mulaayanda makani aaya, mulakonzya mwaliyanda alyalo bbuku eeli ilipa malailile manji aajatikizya mbotunga twajana lukkomano mumukwasyi.” Amutondezye mulongo wamitwe yamakani aali mubbuku lya Lukkomano Mumukwasyi. Amutondezye mitwe yazibalo iikulwaizya. Amujalule kupeeji 10, mubale kuzwa amajwi aamamanino aamuncali 17 kuyakusika kumamanino aamuncali wa 18. Amulombe kusiya bbuku. Amupandulule kuti mujisi aambi makani aakubandika, akubuzya naa ndiilili nomunga mwapilukila.
3 Mulakonzya mwazumanana amubandi wanu ngomwakatalisya walukkomano mumukwasyi akwaamba kuti:
◼ “Njanda kumutondezya cimwi cintu mubbuku ndyomwakabweza ncondiyeeya kuti cilamukonda. Cibalo camamanino cibandika nzila yeni-yeni yakujana lukkomano mumukwasyi. [Amubale muncali wa 2 apeeji 183.] Amubone kuti ikubelekela antoomwe mukucita luyando lwa Leza ncecintu cilikke cinga cagwasya. Tukulwaizya kuti mikwasyi iiye Bbaibbele antoomwe kutegwa izibe luyando lwa Leza mbolubede alimwi ambobanga balutobela muŋanda. Tulomba kumugwasya kucita ciiyo ca Bbaibbele icitabbadelwi icitola buyo myezi misyoonto kumana. Ikuti naa mwandizumizya, ndilamutondezya mbocicitwa.” Amujokele abroshuwa yakuti Ncinzi Leza Ncayanda Kulindiswe? naa bbuku lya Luzibo, kufwumbwa linga lyeelela.
4 Nomubandika aabasicikolonyoko kucikolo naa bakubusi bamucilawo ncomupedwe, ulakonzya wabeleka mubuzyo wakuti:
◼ “Ciyandika kapati buti kubazyali abana babo kukulwaizya muuya wakubandika akati kabo? [Amulindile kwiingula.] Amubone ncolyaamba bbuku eeli lyabuumi bwamukwasyi kujatikizya makani aa ‘kusyomeka alimwi akukulwaizya kubandika.’ [Amubale muncali woonse wa 4 alimwi amajwi aakusaanguna aamuncali wa 5 aapeeji 65 mubbuku lya Lukkomano Mumukwasyi.] Imincali iitobela ipa malailile aagwasya kujatikizya mbotunga twakulwaizya kubandika mumukwasyi. Eeli bbuku ndyamutwe wakuti Inzila Yakujana Lukkomano Mumukwasyi. Kuti kamuyanda kulibala alimwi mwasyomezya kucita boobo, ndakonzya ndamusiila bbuku eeli lyaba lyenu akusanga kwa K1,000 buyo.” Amupandulule kuti muyoopilukila aakale kutegwa mukamvwe ncayeeya kuzintu nzyatikabale.
5 Mulakonzya mwayungizya aamubandi wanu wamatalikilo ngomwakajisi amukubusi uujatikizya kubandika akati kamuzyali amwana kwiinda mukwaamba kuti:
◼ “Cakandikonda kubona mboyandisisya makani aajatikizya mbokuyandika kubandika kabotu mumukwasyi wako. Makani nzi ngoyeeya kuti alayandika kapati kubandikwa akati kabazyali abana?” [Amulindile kwiingula.] Mpoona mujalule kupeeji 68 mubbuku lya Lukkomano Mumukwasyi, mubale kwiingula kujanwa mucisela camuncali wa 11 camatalikilo. “Ikubaa ciiyo ca Bbaibbele cansondo ansondo ninzila mbotu kapati yakujana luzibo lwa Leza.” Amutondezye broshuwa yakuti Ncinzi Leza Ncayanda Kulindiswe? Amupandulule kuti ziiyo zili 16 izijanwa mukati zibandika makani aa Bbaibbele aantalisyo. Amubale makani aamatalikilo aakupeeji 2, mubandike ciiyo camatalikilo antoomwe.
6 Kuti naa mwaswaangana muzyali mumulimo wakukambauka waŋanda aŋanda, naa wamumugwagwa naa kumusyika, mulakonzya mwakulwaizya mubandi kwiinda mukwaamba kuti:
◼ “Ndasyoma mulazumina kuti kukomezya bana sunu nciyumu cini-cini. Ncinzi ncomuyeeya kuti inga cakwabilila mukwasyi wanu kuzintu zinga zyaunyonyoona? [Amulindile kwiingula.] Ngaaya malailile mabotu aandigwasya.” Amupandulule cikozyanyo cili mumuncali wa 1 akubala muncali wa 2 apeeji 90 mubbuku lya Lukkomano Mumukwasyi. Amupandulule mbolipa malailile aamaanu aagwasya cini-cini kukwabilila mikwasyi kuzintu zinga zyaunyonyoona. Amulombe kusiya bbuku, alimwi akwaamba kuti mulilibambilide kupilukila kwiingula mibuzyo kufwumbwa njobanoojisi.
7 Ciindi nomwapilukila kumuzyali wakatambula bbuku lya “Lukkomano Mumukwasyi,” mulakonzya kuzumanana amubandi munzila eyi:
◼ “Kusaanguna notwakaswaangana, ndakabona kuti mulababikkila maanu bana banu cini-cini alimwi akuti mulayanda kucita kufwumbwa mbomukonzya kubakwabilila kuzintu zitaluzi. Mulakonzya ambweni teemwakalibala, pele kuli kaambo kapati kabandikwa mubbuku ndyondakamusiila nkomweelede kulanga. [Amubale muncali wa 19 apeeji 59.] Ikubaa cilongwe a Leza kuyandika kuti twamuziba kwiinda mu Jwi lyakwe lyakalembwa, Ibbaibbele. Sena mulayanda kuti ndimutondezye mbotwiiya Bbaibbele amukwasyi?”
8 Basikulaya banyika tabakonzyi kutondezya mikwasyi inzila yakujana lukkomano pele balaisiya kaityompedwe. Atulimwaye kapati bbuku lya Lukkomano Mumukwasyi kutegwa bantu koonse-koonse bagwasigwe a Jwi lya Leza kujana buumi butamani kumbele.—1 Tim. 6:19.