Mulyango Mupati Wakucita Milimo Mibotu Ulijaludwe
1 Kali mukambausi wamakani mabotu musungu, Paulo cabusungu wakaunka kuzilawo kwakali kuyandika basikukambauka, cimwi cazeezi wakali munzi wa Efeso. Akaambo kakuzwidilila nkwaakabaako naakali kukambaukila kucilawo eci, wakalembela Banakristonyina kuti: “Ndajalwidwa mulyango mupati wakucita milimo mibotu.” (1 Kor. 16:9) Paulo wakazumanana kubelekela kucilawo eco alimwi wakabagwasya bana Efeso banji ikusyoma.—Inc. 19:1-20, 26.
2 Sunu, twajalwidwa mulyango mupati wakucita milimo mibotu. Twatambwa kugwasya mbungano izitakonzyi kumanizya kabotu zilawo zyazyo cakumaninina mwaka amwaka. Aboobo tulakonzya kulemununa mukuli uuli muzilawo zimwi ziyandika lugwasyo.—Amweezyanisye 2 Bakolinti 8:13-15, Ci.
3 Sena Inga Mwakonzya Kuyoobelekela Kucilawo Ciyandika Lugwasyo? Sena kuli nomwakayeeyede naa inga cakonzeka kuya kubelekela kubusena bumbi? Mulakonzya kupa lugwasyo kumbungano iiyandika lugwasyo mumunzi momuzwa. Nkaambo nzi ncomutabuzyi mulangizi wabbazu kujatikizya makani aaya akumvwa mbwayeeya? Antela mumonya mucilawo cambungano yanu kuli bantu banji ibasinke matwi naa ibabandika mulaka mweenzu ibatanakambaukilwa. Ikutegwa ipenzi eli limanisigwe, sena inga mwasoleka kwiiya mulaka wabo? Kunze lyaboobo, ndiza kuli kale kabunga kabantu naa imbungano afwaafwi ibali ‘kukumbila Mwami uuli amuunda kuti atume batebuzi ba Bwami.’ (Mt. 9:37, 38) Ikuti naa mboobo, sena inga mwakonzya kupa lugwasyo?
4 Makumi-makumi aamyaka aayinda ono-ono, izyuulu zyamikwasyi ya Banakristo bakalongela mumanyika ambi kutegwa bakatole lubazu cakumaninina mumulimo wabutebuzi. Banabukwetene bamwi ibakakonzya kucita boobo bakati: “Twakali kuyanda kubelekela Jehova kubusena nkotwakali kukonzya kugwasya bantu banji.” Ikuti naa mulaa makanze aakucita boobo alimwi mulayanda kulongela kubusena bumbi mucisi cino, cakusaanguna amubandike abaalu mumbungano nkomuzwa.
5 Ikuti naa muyanda kubuzya Sosaiti kujatikizya busena ikuyandika lugwasyo, amulembele Kkomitii Yambungano Yamulimo mwaambe makanze aanu ngomujisi. Balo bayakubikka twaambo twabo antoomwe alugwalo olo akutuma ku Sosaiti. Aboobo nociba buti, kufwumbwa kuti mulyango mupati wamulimo mubotu kaucijaludwe, toonse atuzumanane kuba basungu mumulimo wa Jehova.—1 Kor. 15:58.