Amwaabelesye Mabroshuwa Kukulwaizya Miyeeyo Amyoyo Yabantu
1 Ikasimpe kamu Bbaibbele keelede kupegwa munzila iikulwaizya moyo amiyeeyo yabantu. Jesu naakapandulula kasimpe kubaswiilizi bakwe, wakasala mitwe yamakani njobakali kuyanda kuswiilila alimwi iyakabanjila mumyoyo. (Lk. 24:17, 27, 32, 45) Ikuzwidilila mumulimo wesu ikapati kuyeeme aabunkutwe mbotujisi mukuzyiba zintu zyakumuuya baswiilizi besu nzyobayandika.
2 Imabroshuwa nzibelesyo izinga zyazwidilila kapati kukulwaizya miyeeyo amyoyo yabaabo mbotuyaanaabo mumulimo. Amubayeeyele limwi ibantu ibanga balautambula mulumbe uuli mubroshuwa yomwe-yomwe akati kayaayo aamwaigwa mu August:
—Sena Ncobeni Leza Ulatulanganya? Ibantu bacete naa ibakazwaa kubaa ntenda iili yoonse bayooukkomanina mulumbe oyu uuwamba zyakumbele kunoonyina mapenzi.
—Ino Buumi Bujisi Mulimonzi—Mbubuti Mbomunga Mwabujana? Ibakubusi ibayeeyesya zyabukkale bwabo bwakumbele balakonzya kugwasigwa kwiinda mubwiinguzi bwamu Bbaibbele ibujanika mubroshuwa eyi.
—Mutangale Abuumi Butamani a-Nyika! Izifwanikiso zinjaanji alimwi amagwalo aambidwe ziyoobagwasya bana basyoonto alimwi abaabo ibatakonzyi kubala kabotu kuti bazyibe makanze aa Leza.
—Imfulumende Eeyo Iiyooleta Paradaiso. Imuntu uli woonse uuswaangene munzila ili yoonse amfwulumende ulakonzya kuukkomanina mulumbe oyu waamba mbuli Bwami bwa Leza mbobuyoomanizya mapenzi aakatazya bantu.
—Iciindi Muntu Ngomuyanda Nafwa. Ibunji bwabaabo ibajisi mukuli wabweendelezyi bwamadilwe balayandisisya ikubaa mabroshuwa aya aali mbwaabede kuti bape mukwasyi wasikwaazwa. Basikumwaya ibakambaukila kunamaumbwe babelesya broshuwa eyi ikuumbulizya basidilwe. Ibacizi bamwi bobile bakasikila mukwasyi umwi wabantu ibali ciloba ibakali kupaila acuumbwe. Kwiinda mukubaambila mulumbe waluumbulizyo kuzwa mubroshuwa eyi, iciiyo ca Bbaibbele cakatalisigwa kumutumbu mumukwasyi oyo buzuba bwakatobela!
—Should You Believe in the Trinity? Imuntu mukombi ulakonzya kukatambula kasimpe ikajanika mubuyubunuzi bwanjiisyo mpati ya Kristendomu obu bulembedwe kabotu-kabotu mubroshuwa eyi.
3 Amwaabale akuzizyiba kabotu zili mubroshuwa yomwe-yomwe, mpoona amuyeeye mbomunga mwaibelesya kabotu mucilawo canu. Ikuti kamuyanda ntalisyo zyamakani, amubone kupeeji lyakumamanino lya Mulimo Wesu Wabwami wa July 1998. Jehova aleleke kusoleka kwanu kwakukulwaizya miyeeyo alimwi amyoyo yabantu.—Mk. 6:34.