Zitondezyo Zyacikozyanyo

Kutalisya Ziiyo zya Bbaibbele Mubuzuba bwa Mujibelo Bwakusaanguna mu October

“Tuyaabuswaya basimukoboma kutegwa tubandike mubufwaafwi kujatikizya mfwulumende mbotu. Sena muyeeya kuti kufwumbwa mfwulumende ilakonzya kugwisya mapenzi aakatazya, mbuli kulwana alimwi akutalulama?” Amulindile bwiinguzi. Amumuyeezye mukamwini ŋanda kuti mu Mupailo wa Mwami, Jesu wakayiisya basikumutobela kupailila mfwulumende iili boobu, Bwami bwa Leza kuti buboole. Amubatondezye Ngazi Yamulindizi ya October 1 nkoili kunze, mpoonya mubandike ambabo mubuzyo wakusaanguna alimwi akubala lugwalo lomwe lubikkidwe. Amubaabile mamagazini, alimwi akupangana kuti mukapilukile kuzoobandika mubuzyo uutobela.

Ngazi Yamulindizi October 1

“Tuyaabubandika abasimukoboma mubufwaafwi kujatikizya majwi aaya aajanika mumupailo uuzyibidwe kapati Jesu ngwaakayiisya basikumutobela. [Amubale Matayo 6:9, 10.] Sena kuli nomwakamvwide kale bupanduluzi bubotu kujatikizya Bwami bwa Leza kuti ninzi alimwi akaambo Jesu ncaakabukankaizya kapati mukuyiisya kwakwe? [Amulindile bwiinguzi.] Magazini eeyi ilatondezya Bbaibbele ncolyaamba kujatikizya Bwami bwa Leza alimwi azilongezyo zimwi nzyobuyooleta munyika.”

Sinsimuka! October

“Tuyaabuswaya bantu kutegwa tubandike mubufwaafwi kubagwasya kujana bwiinguzi bwamubuzyo ooyu. [Amubatondezye civwumbyo camagazini.] Sena muyeeya kuti muntu weelede kuti kalimuvwubi kutegwa azwidilile ncobeni? [Amulindile bwiinguzi.] Ibbaibbele lilatondezya mbotukonzya kuzilanga munzila iiluzi zintu zyakumubili. [Amubale Luka 12:15.] Kweelana a Bbaibbele ncolyaamba, kuzwidilila kwini-kwini kulakonzyeka kumuntu uuli woonse. Magazini eeyi ilapandulula.”