Nius i Kam Long Olgeta Hap

Taim ol i askim ol manmeri bilong Ajentina long makim wanpela rot bilong litimapim kantri bilong ol, 56 pesen bilong ol, em krismas bilong ol i namel long 10 na 24, ol i tok ol i laik putim T-siot bilong soka tim bilong kantri bilong ol.—LA NACIÓN, AJENTINA.

Ripot ol i kisim long wanpela wok painimaut i tok, “inap olsem 30 pesen bilong ol kaikai ol i bin kamapim bilong ol man, dispela ol kaikai i save bagarap o ol i westim nating. Sapos yumi bungim olgeta em bai inap olsem 1.3 bilion ton long olgeta wan wan yia.”—FOOD AND AGRICULTURE ORGANIZATION OF THE UNITED NATIONS, ITALI.

Lain bilong National Office Against Pornographic and Illegal Publications i tok, sampela mun bihain long ol i kirapim wanpela kempein bilong pasim ol Intenet web-sait bilong ponografi, ol bikman bilong Saina i bin kirap pinis long “pasim olsem 60,000 web-sait bilong ponografi.”—CHINA DAILY, SAINA.

“Winim 215 milion manmeri—o 3 pesen bilong olgeta manmeri bilong graun—nau ol i stap long ol narapela kantri.”—UNITED NATIONS INTERNATIONAL FUND FOR AGRICULTURAL DEVELOPMENT, ITALI.

Pasin Bilong Wok, Stap Helti

Ol saveman i tok, man i sindaun longpela taim long ples wok, skul, o lukluk long televisen na i no mekim sampela wok, dispela inap givim bikpela sik long em. Nius Vancouver Sun i tok: “Sapos man i sindaun longpela taim tumas, strong bilong marasin ensaim i stap insait long bodi we i save rausim ol gris long blut, wok bilong em bai go slek.” Nius i tok, i no olsem yumi mas mekim ol strongpela eksasais we klok bilong yumi i wok strong na em tasol, nogat. ‘Long olgeta de yumi mas mekim sampela wok bambai bodi bilong yumi i ken wok gut.’

Gutpela Taim Long Lukim Jas

Yu ting ol narapela samting inap stiaim tingting bilong jas taim em i wokim disisen? Wanpela wok painimaut i soim olsem dispela inap kamap. Wanpela lain saveman i bin skelim inap 1,000 samting kot keis bilong ol kalabusman em ol jas bilong Israel i bin wokim ol disisen long en. Na ol i kisim save olsem, bihain stret long lans o ti brek, namba bilong ol kalabusman em ol jas i orait long ol i go fri em 65 pesen na isi isi em i go daun klostu long siro pesen, tasol bihain long ol i kisim narapela ti brek gen namba i save sut i go antap gen long 65 pesen. Dispela lain i tok sampela taim ol evidens na lo i no as bilong ol disisen ol jas i wokim, tasol “ol narapela samting inap stiaim ol long mekim disisen.”