Pas i Kam Long Australia

“Bai Mi Sindaun Arere Long Paia Nau Long Nait na Ritim”

BIKPELA hap graun i stap namel long Australia i kirapim yumi long tingim ples drai nating, hatpela san, na bikpela hap i stap nating. Tasol inap olsem 180,000 manmeri​—olsem 1 pesen bilong olgeta manmeri bilong Australia​—ol i sindaun long dispela hap.

Papamama bilong mi ol i Witnes Bilong Jehova, ol i bin kisim mi i go autim tok long dispela longwe ples long taim mi yangpela mangi yet. Em i bikpela ples tru na ol gutpela samting bilong en i kirapim tru tingting bilong mi. Na tu, mi laikim ol man bilong dispela hap em ol i gat strongpela skin na pasin isi. Nau mi gat famili bilong mi yet na mi laik bai meri bilong mi na tupela pikinini bilong mipela, em ol i gat 10-pela na 12-pela krismas, ol i ken kisim dispela kain amamas.

Wokim Plen Long Raun

Pastaim mipela i sindaun na skelim ol samting. Mipela i gat mani bilong i go inap long wanem hap? Bai mipela i raun inap hamas de? Tupela marit na tupela meri i save mekim wok bilong God fultaim long kongrigesen bilong mipela, ol i laik kam wantaim mipela. Mipela i pasim tok long taim mipela bai go​—long taim bilong malolo bilong skul namel long yia. Orait mipela i salim pas long brens ofis bilong ol Witnes Bilong Jehova long Sydney, Australia, na askim ol long makim wanpela hap mipela inap autim tok long en. Ol i tokim mipela long autim tok long hap i stap klostu long Goondiwindi, em wanpela liklik taun i stap long hap wes longwe long Brisbane inap 400 kilomita, em ples mipela i stap long en.

Mipela i kisim save olsem i gat wanpela liklik kongrigesen bilong ol Witnes Bilong Jehova i stap long Goondiwindi. Dispela em narapela gutpela samting. Em i bikpela samting tru long bungim ol brata na sista Kristen long raun bilong mipela. Mipela i toksave long kongrigesen olsem mipela bai kam. Ol i amamas na toksave long mipela olsem ol i wet long lukim mipela.

Paslain liklik long mipela i go, mipela i bung na toktok long olsem wanem mipela bai autim gutnius bilong Kingdom Bilong God long ol dispela longwe ples. Mipela i laik rispektim ol pasin bilong ples na kastam bilong ol Aborijini em mipela bai bungim ol. Olsem: Sampela lain i save tingim graun bilong ol i olsem ples bilong dispela lain olgeta. Sapos man i go insait nating long ples na ol i no singautim em, em i no gat rispek long ol.

Go Long Ples i Longwe

Orait nau dispela de i kamap. Tupela ka bilong mipela i pulap long ol man na ol samting, na mipela i go long Goodiwindi. Pastaim mipela i lukim ol gaden, na taim mipela i draiv i go moa, ples i senis na mipela i lukim ples kunai i gat wan wan diwai kumurere. Em taim bilong kol, tasol san i lait gut tru long skai i no gat klaut. Sampela aua bihain mipela i kamap long Goodiwindi na mipela i slip long ol rum mipela i rentim long wanpela hap i gat ol haus ka.

De bihain em Sande, san i lait gut tru na i gat gutpela win​—em gutpela taim bilong autim tok. Long taim bilong san long dispela hap, hat bilong san i save go antap long 40 digri samting! Namba wan ples mipela i autim tok long en em wanpela ples bilong ol Aborijini i stap longwe inap 30 kilomita samting. Ol i kisim mipela i go long Jenny, em wanpela lapun meri i gat waitpela gras, na em i bikmeri bilong ples. Em i putim gut yau long tok bilong Baibel mipela i kamapim na em i amamas long kisim buk Kisim Skul Long Bikpela Tisa.a Bihain em i tokim mipela long i go insait long ples na autim tok long ol man.

Ol liklik pikinini i ran i go pas na toksave olsem mipela i kam. Long olgeta haus mipela i go long en ol i putim gut yau long tok bilong mipela na kisim ol buk bilong Baibel. I no longtaim na ol buk samting bilong mipela i pinis, na em taim bilong mipela long i go bek long taun long miting bilong kongrigesen. Paslain long mipela i lusim ol, mipela i tok promis long kam bek lukim ol man em mipela i no bungim.

Long dispela apinun Haus Kingdom i pulap long ol man i amamas na toktok wantaim na kamap pren. Inap 25 asples Witnes i givim bel long autim tok bilong Kingdom long 11,000 samting manmeri i sindaun nabaut long dispela hap, em bikpela bilong en inap olsem 30,000 skwe kilomita. Wanpela Witnes i amamas na i tok: “Tenkyu long hatwok yupela i mekim bilong kam na helpim mipela.” Bihain long miting, mipela olgeta i go kaikai. Paslain long mipela i slip, mipela i givim kaikai long ol kapul i raun raun long hap mipela i stap long en.

“Arere Long Paia Nau Long Nait”

Long tupela de bihain, mipela i go long tupela ka na raun autim tok long ol fam i stap longwe longwe arere long boda bilong Queensland na New South Wales. Long planti hap i gat ol diwai kumurere na bikpela hap graun i gat gras we ol sipsip na bulmakau i wok long kaikai gras. Long rot mipela i lukim sampela bikpela sikau, na yau bilong ol i sanap taim ol i harim mipela. Longwe liklik, ol muruk i wokabaut insait long banis i gat das.

Long Tunde apinun mipela i bungim bikpela lain bulmakau i wokabaut isi isi i kam long rot. Inap longtaim pinis ol wokman i bin bringim ol bulmakau i kam olsem long dispela hap, na moa yet long taim bilong bikpela san na ples i drai. I no longtaim na mipela i bungim wanpela wokman i sindaun long hos bilong em na i kam. Mi putim ka long sait bilong rot na tok apinun long em. Em i bekim tok: “Gude meit.” Em lapun liklik, na dok bilong em i bihainim em, man i stop bilong toktok wantaim mipela.

Mipela i stori liklik long bikpela san na ples i drai, na nau mi kirapim tok bilong Baibel. Dispela man i tok: “Man! Laspela taim mi bin harim tok bilong Baibel em taim mi liklik mangi!” Em i ting ol hetman bilong lotu i gat asua long ol pasin nogut i stap long graun. Tasol em i gat bikpela rispek long Baibel. Mipela i toktok gut long Baibel, na bihain mi tilim buk Tru Tru Baibel i Tok Wanem? b long em. Em i kisim buk na putim long poket bilong siot bilong em na tok, “Sapos buk i tokim mi long ol samting Baibel i skulim ol man long en, bai mi sindaun arere long paia nau long nait na ritim.”

Mipela i Go Bek

Long dispela nait long Haus Kingdom, mipela i stori long ol gutpela ekspiriens bilong mipela long ol bratasista wanlotu bilong mipela. Ol i tok promis long go bek lukim ol man i laik harim tok em mipela i bin bungim ol. Taim miting i pinis, i hatwok long mipela lusim ol. Mipela i bin kamap gutpela pren. Pasin bilong bung na toktok wantaim i bin strongim mipela olgeta.​—Rom 1:12.

Long de bihain mipela i go bek long Brisbane. Taim mipela i tingting long dispela raun bilong mipela, mipela i wanbel olsem Jehova i bin blesim hatwok mipela i mekim. Mipela i pilim olsem mipela i go klostu moa long Jehova. Taim mipela i kamap long haus, mi askim ol pikinini: “Long narapela malolo bilong yumi yupela i laik go we? Yupela i laik go long ples maunten?” Ol i tok: “Nogat Papa, yumi go autim tok gen long ol longwe ples.” Meri bilong mi i wanbel na tok: “Yes, yumi mekim olsem. Dispela em i nambawan gutpela malolo yumi bin kisim!”

[Ol Futnot]