Pas Bilong Ol Man

Hevi Bilong Kaikai Sapos yupela i bin raitim dispela stori, “Helpim Ol Manmeri i Gat Pasin Kranki Long Kaikai,” (Disemba 8, 1992) long planti yia i go pinis, na ol famili bilong mi i bin kaunim, em bai gutpela moa. Mi gat sik anoreksia inap 35 yia pinis. Dispela nius i stori gut na kolim stret ol bikpela hevi bilong dispela sik. Yupela i stori long ol samting em planti yia ol dokta i bin stori wantaim famili bilong mi long en, na nau tasol ol i save bilong wanem dispela sik i painim mi! Mi save dispela stori bai helpim planti manmeri na ol famili, em sampela long famili i gat hevi long dispela sik.

C. S., long Amerika

Pikinini Long Bel Inap planti yia nau, mi amamas long kaunim ol stori yupela i raitim long ol samting bilong saiens, na ol diwai na animal samting. Tasol dispela stori long “Pikinini i Kirap Lain Taim Em i Stap Long Bel,” i kirapim tru tingting bilong mi. (Oktoba 8, 1992) Kru bilong yumi em i narapela kain samting tru, na yumi ken amamas long dispela samting. Na piksa bilong dispela pikinini em i stap long bel bilong mama taim em i gat 8-pela wik tasol, em i naispela tru. Dispela stori i kirapim mi long pilim tru olsem God i bin wokim gut tru skin bilong yumi.

J. J., long Amerika

Ol Kokros Inap 8-pela yia pinis, mi bin kaunim ol nius Kirap!, na mi laik tok olsem yupela i mekim gutpela wok tru long kamapim ol stori bilong kain kain samting, olsem stori bilong ol wok long haus samting. Mi tingim dispela stori bilong “Kokros i Gat Strong.” (Oktoba 8, 1992) Yupela i kamapim gutpela stori, na yupela i stori tu long pasin bilong kilim dispela binatang. Mi save olsem, taim mi bihainim ol dispela toksave, bai mi no gat ol kokros moa long haus bilong mi.

A. F. A. A., long Brasil

Spot Mi wanpela tisa, na mi save lainim ol manki long pasin bilong pilai spot. Olsem na taim yupela i raitim dispela stori “Kisim Stretpela Tingting Long Ol Spot” (Mas 8, 1992), mi kaunim gut dispela stori. Yupela i stori gut long ol pasin nogut na ol hevi i save kamap long ol spot long nau; olsem pasin bilong tingting tasol long winim ol narapela, na pasin bilong mekim wok bisnis long spot, na pasin bilong pait, na pasin giaman. Tasol pasin bilong pilai spot long hap bilong Yurop na Amerika em i narapela kain liklik; ol stori yupela i kamapim i stori tasol long ol spot long Amerika.

S. O., long Frans

Planti taim nius “Kirap!” i save stori long spot i kamap long olgeta hap bilong graun. Sampela taim dispela nius i save stori long ol tok em ol man bilong pilai spot long hap bilong Yurop, na Afrika, na Sentral na Saut Amerika i mekim. Na maski nius i kamapim planti stori bilong ol spot i kamap long Amerika, dispela stori inap helpim ol man i stap long narapela hap sapos ol i bihainim ol tok bilong Baibel em dispela nius i kamapim.​—ED.

Mi save gut olsem pasin bilong “trening oltaim” long strongim bodi, em inap “helpim yumi liklik” tasol. Taim mi stap long skul mi save pilai volibal long tim bilong skul. Mipela i save pilai strong tru bilong winim ol narapela. Mi raun wantaim ol poroman nogut, na mi no strong moa long ol samting bilong spirit. Olsem na bikpela hap taim i lus nating. Taim mi pinis long skul, mi pasim tok long dediket long Jehova na mi kirap long mekim wok bilong em inap oltaim. Nau mi amamas, long wanem, pasin bilong givim bel long God inap helpim yumi inap oltaim.​—1 Timoti 4:8.

P. G., long Brasil