Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:

• Wanem sampela samting Rut i mekim na em i stap gutpela piksa?

Rut i stap gutpela piksa long pasin bilong laikim tru Jehova, na mekim gutpela pasin sori long Naomi, na wok strong, na mekim pasin daun. Olsem na i gat gutpela as na ol man i tingim em olsem wanpela “gutpela meri.” (Rut 3:​11)​​—⁠4/15, pes 23-26.

• Olsem wanem yumi save Jehova i save tingim tru ol manmeri nating?

Jehova i tokim ol Israel em bipo ol i bin karim planti pen na hevi long Isip olsem ol i no ken mekim nogut long ol manmeri nating. (Kisim Bek 22:​21-​24) Jisas i bihainim pasin bilong Papa bilong em long tingim tru ol manmeri nating na em i makim ol man ‘i no bin skul na i man nating tasol’ long kamap ol aposel bilong em. (Aposel 4:​13; Matyu 9:​36) Yumi ken bihainim pasin bilong God long tingim ol narapela, olsem ol yangpela.​​—⁠4/15, pes 28-​31.

• I gat wanem as na yumi ken save olsem Jehova i tingim ol samting yumi mekim?

Ol stori bilong Baibel i soim olsem Jehova i save tingim ol samting ol manmeri i mekim. Em i bin tingim ofa Abel i mekim na em i save tingim ol ‘ofa yumi save givim long em. Oltaim maus bilong yumi i litimapim nem bilong en.’ (Hibru 13:15) Jehova i save olsem Enok i wok strong long amamasim em long rot bilong mekim klinpela na stretpela pasin. Na God i tingim pasin wanpela meri wanpis bilong taun Sarefat, em i no bilong lain Israel, i mekim. Em i bin givim liklik kaikai em i gat i go long profet Elaija. Jehova i save lukim tu ol pasin yumi mekim bilong kamapim bilip bilong yumi.​​—⁠5/1, pes 28-​31.

• I gat wanem as na yumi ken tok olsem ol Juda em ol i bin kamap Kristen bihain long Pentikos 33 C.E., ol i mas dediket long God?

Long 1513 B.C.E., ol Israel i kamap wanpela lain i dediketim ol yet long Jehova. (Kisim Bek 19:​3-8) Ol Juda i kamap bihain long en, ol i kamap insait long dispela lain i dediket pinis long God aninit long kontrak bilong Lo. Tasol Jehova i pinisim dispela kontrak bilong Lo long rot bilong indai bilong Krais long 33 C.E. (Kolosi 2:​14) Olsem na kirap long dispela taim, ol Juda i kamap bihain na i laik lotuim God long pasin em i laikim, ol yet i mas dediket long em na kisim baptais long nem bilong Jisas Krais.​​—⁠5/15, pes 30-31.

• Yu ting i stret long wokim smok smel insait long trupela lotu long nau?

Pasin bilong wokim smok smel em hap wok lotu long Israel bipo. (Kisim Bek 30:​37, 38; Wok Pris 16:​12, 13) Tasol indai bilong Krais i pinisim dispela kontrak bilong Lo, na pasin bilong wokim smok smel. Ol wan wan Kristen i ken skelim sapos ol bai wokim smok smel bilong mekim sampela wok em i no samting bilong lotu, tasol pasin bilong wokim smok smel em i no wanpela hap bilong trupela lotu long nau. Yumi mas tingim tu tingting bilong ol narapela long dispela samting, nogut yumi pundaunim ol.​​—⁠6/1, pes 28-​30.

• I no longtaim i go pinis, wanem nius i kamap na i bin kirapim tingting bilong planti manmeri long tingim olsem tru tru Jisas i bin i stap long graun?

Planti nius na televisen i toktok long bokis bilong ol bun em ol i bin painim long Israel. I luk olsem dispela bokis i bin i stap long taim bilong ol aposel na i gat wanpela rait long en i tok: “Jems, pikinini man bilong Josep, brata bilong Jisas.” Sampela i ting olsem dispela em i “nambawan olpela rait tru i no stap long Baibel” i soim olsem Jisas i bin i stap long graun.​​—⁠6/15, pes 3-4.

• Long wanem rot ol man i lain long laikim narapela?

Namba wan taim ol man i lain long laikim narapela, em taim ol i lukim pasin papamama i mekim na skul ol i kisim long ol. Taim man na meri i soim olsem ol i laikim na rispektim narapela narapela, ol pikinini i lain long laikim ol narapela. (Efesus 5:​28; Taitus 2:⁠4) Maski man i kamap bikpela insait long famili i no gat pasin laikim, em inap lain long kisim pasin laikim sapos em i kisim ol gutpela tok bilong Jehova i stap long Baibel, helpim bilong holi spirit, na helpim bilong lain brata Kristen.​​—⁠7/1, pes 4-7.

• Eusebius em i husat, na yumi inap lainim wanem samting long em?

Eusebius em wanpela saveman, na long yia 324 C.E., em i pinis long wokim 10-pela volium bilong buk History of the Christian Church. Eusebius i bilip olsem Papa i bin stap paslain long Pikinini, tasol long bikpela bung bilong Naisia, em i sakim dispela bilip bilong em. I luk olsem em i bin givim baksait long tok bilong Jisas olsem ol lain bilong Em “ol i no bilong dispela graun.” (Jon 17:16)​​—⁠7/15, pes 29-​31.

• Yu ting Jehova i bin senisim tingting bilong em long pasin bilong maritim planti meri?

Nogat, Jehova i no bin senisim tingting bilong em long pasin bilong maritim planti meri. (Malakai 3:⁠6) Pasin God i bin kamapim long namba wan man em olsem man i mas “pas wantaim meri bilong en” na tupela i mas kamap wanpela bodi tasol. (Stat 2:​24) Jisas i tok sapos meri bilong wanpela man em i no bin mekim pasin pamuk, na man i rausim em na i maritim narapela meri, orait dispela man yet em i mekim pasin pamuk. (Matyu 19:​4-6, 9) Tru, Jehova i bin larim dispela pasin bilong maritim planti meri, tasol dispela pasin i pinis taim kongrigesen Kristen i kamap.​​—⁠8/1, pes 28.