Kisim Stretpela Tingting Long Marimari Bilong God
DOKTA i mekim pasin sori na em i tingim gut sikmeri. Em i bin skelim gut dispela sik na em i ting ol i mas katim meri hariap, nogut em i bagarap. Tasol meri i laik save, ol bai mekim wok long blut o nogat. Na meri i tok, sapos ol dokta bai givim blut long em, em i no ken orait long ol i katim em, long wanem, dispela i no stret long bilip bilong em. Taim dokta i harim dispela tok, em i kirap nogut! Em i laik painim rot bilong helpim meri. Em i tingting i stap na nau em i ting em i painim pinis rot. Em i tokim meri: “Yu save pinis, sapos yu no kisim blut, bai yu dai. Orait, yu no laik i dai, a?”
Meri i tok: “Em i stret.”
Dokta i tok: “Tasol sapos yu kisim blut, i olsem yu sakim bilip bilong yu, na dispela tu i bikpela samting long yu. Orait, yu ken mekim olsem: Yu ken kisim blut na bai yu no ken i dai. Na bihain yu ken kamapim sin bilong yu long God na tanim bel. Long dispela rot, lotu bilong yu bai kisim yu bek.”
Dokta i ting em i painim gutpela rot bilong helpim meri. Em i save, meri i bilip olsem God bilong em i gat pasin sori, olsem na nau em i gutpela taim bilong mekim wok long marimari bilong God. Tasol dispela rot dokta i makim, em i gutpela rot o olsem wanem?
Yumi Kisim Kain Tingting Olsem?
Sampela taim ating yumi save kisim kain tingting olsem bilong dispela dokta, a? Ating ol wanskul o wanwok i kirap birua long yumi na yumi pret long ol. O sampela i laik subim yumi long mekim sampela pasin em bel bilong yumi i gat tok long en. Dispela samting i painim yumi wantu na ating yumi laik painim rot bilong abrusim hevi, na yumi tingting long mekim wanpela samting i no stret na bihain yumi ken askim God long lusim rong bilong yumi.
Na tingting nogut inap traim man, olsem: Wanpela samting i kamap na yangpela man i tingting strong long mekim pasin pamuk. Tasol em i no wok long daunim dispela laik nogut—em i bihainim laik bilong bel na em i ting bihain bai em i askim God long lusim rong bilong em. Na sampela i bin mekim bikpela rong, maski ol i save kongrigesen Kristen bai rausim ol. Ating ol i tingting olsem: ‘Bai mi wet liklik na bihain bai mi tanim bel na kongrigesen bai kisim mi bek.’
Long ol dispela stori hia, i gat tupela samting i wankain. Namba wan samting, em ol i no wok strong long daunim laik bilong skin na mekim pasin i stret—ol i bihainim tasol laik bilong skin. Namba tu samting, em ol i ting, taim ol i mekim pinis rong, ol i ken askim God long lusim rong bilong ol na em bai mekim olsem.
Wanem Tingting i Stret?
Sapos yumi mekim olsem, yu ting yumi pilim tru marimari bilong God? Orait, yumi ken tingim marimari bilong em. Jisas i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Aposel Jon i stori long marimari bilong God i wok olsem wanem, na em i tok: “Mi raitim dispela tok long yupela, bai yupela i no ken mekim sin. Na sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta.” (1 Jon 2:1) Olsem na sapos sin long skin bilong yumi i kirapim yumi long mekim rong, yumi ken singaut long God na beten askim em long tingim ofa bilong Jisas na lusim dispela rong bilong yumi.
Tasol Jon i no tok, sapos yumi mekim rong o nogat, em i no bikpela samting—bikpela samting tru em yumi mas askim God long lusim rong bilong yumi. Jon i no tok olsem, a? Em i tok: “Mi raitim dispela tok long yupela, bai yupela i no ken mekim sin.” Na Jon i tok moa long gutpela rot God i putim bilong helpim yumi taim yumi popaia. Tasol yumi mas wok strong tru long abrusim pasin bilong mekim rong. Sapos nogat, bai i olsem yumi mekim nabaut long sori bilong God, olsem ol man em Jut i tok long ol—ol i tingim marimari bilong God em i rot bilong ol long mekim pasin nogut.—Jut 4.
Yumi no ken ting marimari bilong God i olsem wanpela umben i redi i stap bilong holim yumi na helpim yumi sapos yumi pundaun. Sapos yumi mekim dispela pasin, i olsem yumi pilai long marimari bilong God, na yumi ting dispela rong yumi mekim i no bikpela rong. Dispela kain tingting i no stret liklik. Aposel Pol i tokim Taitus: “Marimari bilong God em i kamap ples klia pinis, na em inap long kisim bek olgeta manmeri. Dispela marimari bilong God em i save skulim yumi long lusim pasin bilong givim baksait long God na long lusim olgeta laik nogut bilong dispela graun, na em i skulim yumi long tingting gut na wokabaut stret.”—Taitus 2:11, 12.
Samting Pol i mekim i kamapim bel bilong em, em i pilim tru marimari bilong God. Em i tok: “Mi save paitim tru bodi bilong mi na mekim em i bihainim laik bilong mi. Nogut mi autim gutnius long ol arapela man na bihain mi yet mi no kisim prais.” (1 Korin 9:27) Pol i no ting, em bai mekim rong long sampela taim na em i no inap abrusim. Nogat. Orait, yu ting i stret yumi holim kain tingting olsem?
Tingting Bilong Jisas
Wanpela taim Jisas i kamapim tingting bilong em, em i ting olsem wanem long mekim wanpela pasin i no stret na bai em i no ken kisim hevi long ol man. Taim em i tokim ol disaipel long em i mas i dai olsem wanpela ofa, Pita i krosim em na i tok: “Bikpela, nogat tru. Dispela samting i no inap kamap long yu.” Orait, Jisas i tok wanem long Pita? Em i tok: “Satan, yu go baksait long mi. Yu laik pasim rot bilong mi. Yu no bihainim tingting bilong God. Nogat. Yu bihainim tingting bilong ol man tasol.”—Matyu 16:22, 23.
Jisas i krosim Pita na dispela i kamapim klia olsem Jisas i no laik mekim wanpela samting God i no orait long en na bai em i ken abrusim hevi, nogat. Baibel i kamapim klia olsem Jisas i bihainim stretpela rot long olgeta taim, maski em i kisim planti hevi long han bilong Satan. Na long taim bilong em long i dai, ol i tok bilas long em na paitim em nogut tru, na kilim em i dai. Tasol em i no lusim stretpela pasin o givim baksait long God. Olsem na em inap givim laip bilong em olsem ofa bilong baim bek yumi. Yumi save, Jisas i no bin karim dispela bikpela pen na hevi bambai yumi ken ‘mekim gut long yumi yet’ bilong abrusim ol hevi na traim, a?
Baibel i tok long Jisas olsem: “Yu save laikim stretpela pasin, na yu no laikim tru pasin nogut.” (Hibru 1:9) Sapos yumi bihainim rot i no gat hevi long en, ating bai yumi mekim sampela pasin nogut. Olsem na sapos yumi nolaik tru long pasin nogut—olsem Jisas—long olgeta taim bai yumi strong long bihainim pasin i stret, maski yumi kisim hevi long en. Long Sindaun 27:11 Jehova i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Jehova i belgut tru long pasin bilong Jisas, em i no lusim stretpela rot. Na yumi tu i ken mekim bel bilong Jehova i amamas sapos yumi bihainim pasin bilong Jisas long sanap strong na holimpas bilip.—1 Pita 2:23.
Pasin Bilong Sanap Strong
Aposel Pita i tok: “Nau long liklik taim tasol, ating kain kain traim bai i kamap na givim pen long yupela. . . . Olsem na sapos ol kain kain traim i kamap long yupela, em i bilong traim bilip na soim olsem, yupela i bilip tru long Krais. Na long las de, taim Jisas Krais i kamap ples klia, em bai i amamas tru long yupela na givim biknem long yupela.” (1 Pita 1:6, 7) Yumi gat sin, na yumi stap long dispela graun em Satan i bosim, olsem na ol traim na hevi bai painim yumi long olgeta taim. Tasol olsem Pita i tok, ol dispela hevi inap kamapim gutpela wok—ol bai traim bilip bilong yumi, em i strong o nogat.
Na ol traim na hevi i skulim yumi tu. Jisas i “karim pen, na dispela i skulim em tru long pasin bilong bihainim tok bilong God.” (Hibru 5:8) Na sapos yumi sanap strong na winim ol traim, yumi tu inap lain long bihainim tok bilong Jehova na wetim em. Na yumi mas lain i go yet inap long pinis. Pita i tok: “Bai yupela i karim pen sotpela taim tasol, na bihain bai [God] yet i . . . strongim bilip bilong yupela na mekim yupela i sanap strong oltaim.”—1 Pita 5:10.
Tasol taim traim i painim yumi, sapos yumi mekim pasin i no stret bambai yumi ken abrusim hevi, dispela i makim olsem yumi no gat bun, na yumi no laikim tru Jehova na stretpela pasin, na yumi no inap bosim skin. Na bai yumi no pas gut moa wantaim God. Na ating samting bai painim yumi olsem Pol i tok: “Sapos yumi kisim save pinis long tok tru bilong Krais, na bihain, long laik bilong yumi yet yumi wokabaut long pasin bilong sin, orait i no gat narapela ofa moa i stap bilong tekewe dispela sin.” (Hibru 10:26) Olsem na nogut yumi larim laik nogut bilong skin i pulim yumi long mekim rong na bihain bai yumi lus long kisim laip i stap oltaim!
Mas Strong Long Holimpas Bilip
Long taim bilong profet Daniel, bikpela traim i painim 3-pela Hibru: Sapos ol i no lotu long piksa gol, ol man bai tromoi 3-pela i go long paia. Orait, 3-pela i tok wanem? “Sapos yu mekim long mipela olsem yu tok, orait God bilong mipela em inap long helpim mipela long abrusim paia . . . Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim.”—Daniel 3:17, 18.
Tripela i sanap strong, long wanem, ol i laik bihainim pasin i stret. Sapos ol i mas i dai, ol i orait long en. Ol i bilip strong long ol man i dai pinis bai kirap bek. Tru, sapos God i helpim ol, em gutpela. Tasol ol i laik sanap strong na i no ken surik. Ol wokman bilong God i mas mekim olsem long olgeta taim.
Long taim bilong yumi, sampela i bin sanap strong na i no laik brukim lo bilong God, olsem na ol man i kalabusim ol na givim bikpela pen long ol na kilim i dai sampela. Na sampela i orait long i stap rabis na ol i no laik kamap maniman long rot bilong sakim ol stretpela lo. Na olsem wanem long dispela meri Kristen yumi bin stori long em pastaim? Em i save dokta i laik helpim em. Tasol meri i holimpas bilip na em i no surik. Em i laik daun long lo bilong Jehova na em i no orait long ol dokta i katim em. Bihain em i kamap orait gen na em i wok yet long mekim wok bilong Jehova. Taim em i bin tokaut long dokta long bilip bilong em long blut, em i no bin save wanem samting bai painim em, tasol em i putim dispela hevi bilong em long han bilong Jehova.
Wanem samting i mekim na meri i sanap strong na sakim dispela traim? Em i no laik mekim long strong bilong em yet, na ol narapela wokman bilong God tu i no ken mekim olsem. Baibel i tok: “God em i ples hait bilong yumi, na em i save strongim yumi oltaim.” (Song 46:1) Taim traim i painim yumi, yumi mas singaut long God long helpim yumi. I no gutpela sapos yumi mekim rong na bihain yumi mas askim God long marimari long yumi.
Tru tumas, yumi no ken mekim nabaut long marimari bilong God! Yumi mas lainim bel na bai yumi gat laik long mekim pasin i stret, maski hevi i painim yumi. Dispela bai helpim yumi long pas gut wantaim Jehova, na lainim yumi long ran long resis bilong kisim laip oltaim, na kamapim klia olsem yumi pilim tru marimari bilong God. Sapos yumi mekim olsem, Papa bilong yumi long heven bai i belgut tru.
[Piksa long pes 24]
Tripela Hibru i bilip strong long ol man i dai pinis bai kirap bek, na dispela i helpim ol long holimpas bilip