“Mi Va Dyondzisa . . . Leswi Ndzi Mi Leriseke Swona”
1 Ku endla vadyondzisiwa a ku katsa ku dyondzisa. Loko munhu a nga si va mudyondzisiwa wa Kreste, u fanele a dyondzisiwa “ku hlayisa hinkwaswo” leswi Yesu a swi leriseke. (Mt. 28:19, 20) Ndlela leyinene yo endla leswi i dyondzo ya le kaya ya Bibele.
2 Tidyondzo ta Bibele nkarhi wun’wana a swi olovi ku ti sungula. Loko swi ku tikela ku sungula dyondzo ya Bibele, u nga heli matimba. Ku humelela eku sunguleni ka tidyondzo ta Bibele ku lava ku tiyimisela ni ku navela ku byela van’wana ntiyiso.—Gal. 6:9.
3 Ku Engetela Ku Tsakela: Bulo ra wena ro rhanga ri nga ha pfuxa ku tsakela kutsongo ntsena. Vamakwerhu vo tala va ni mukhuva wo endla riendzo ro vuyela lomu va fambiseke kona buku kumbe lomu va kumeke ku tsakela ko hlawuleka ntsena. Minkarhi yo tala hi fanele hi hlakulela leswaku n’wini wa muti a tsakela ntiyiso. Kumbexana n’wini wa muti u teke xiphephana ntsena, broxara kumbe timagazini. U nga swi kota ku tirhisa xin’we xa leswi u sungula dyondzo ya le kaya ya Bibele. Loko n’wini wa muti a komba ku tsakela loku engetelekeke ka rungula, a nga ha yisiwa eka buku yin’wana leyi faneleke eka riendzo ra nkarhi lowu taka.
4 Ku lunghiselela hi xona xilotlelo xa ku humelela. Hikwalaho ka yini u nga hlawuli ka ha ri emahlweni Tsalwa leri tshahiweke exiphephanini, broxara kumbe magazini lowu u hleleke ku wu tirhisa eka riendzo ra wena ro vuyela? Hi ndlela yoleyo u ta swi kota ku nghenisa tinhlamuselo leti humaka ebukwini eka bulo ra wena. Nakambe u nga ha swi kota ku hlaya ndzimana yin’we kumbe timbirhi ebukwini.
5 U nga ha vula leswi:
◼ “Hi avelana ni vanhu rungula ra vuprofeta byo hlamarisa lebyi hetisekaka sweswi.” Hlaya Matewu 24:3, kutani u katsa ni swifaniso ni tinhlamuselo leti nga eka matluka 149-54 ya buku leyi nge Hanya Hi Masiku. Ndlela leyi fanaka yi nga tirhisiwa loko n’wini wa muti a amukele magazini, broxara kumbe xiphephana ntsena.
6 Hi fanele hi hatlisa hi landzelela ku tsakela kwihi na kwihi. Hi ringeta ku vuyela ku nga si hela vhiki leswaku n’wini wa muti a kota ku tsundzuka bulo ra nkarhi lowu hundzeke. Nkarhi wun’wana ni wun’wana loko u endza, languta tindzimana ti nga ri tingani ebukwini leyi u yi siyeke.
7 Namuntlha ka ha ri ni ntirho lowukulu entshovelweni lowukulu lowu vhumbhiweke hi Yesu. (Mt. 9:37, 38) Leswi hi hambetaka hi dyondzisa vanhu va timbilu letinene, hi ni xitiyisekiso xa Yesu lexi nyikaka matimba xa leswaku u ‘na hina masiku hinkwawo ku ko ku hela mafambiselo ya swilo.’