Kingdom News Yo Hlawuleka Ya Un’wana Ni Un’wana

¹ Ku sukela hi April 24, hi sungule ku hangalasa Kingdom News yo hlawuleka leyi pfuxeke ku tsakela ka vanhu lava karhatekaka kun’wana ni kun’wana! Rungula ra xiphephana lexi a ri le nkarhini ntsena kambe i ra xihatla. Vahuweleri va vandlha rin’wana ni rin’wana va kombise nseketelo wa mbilu hinkwayo, va lava leswaku rungula leri ri kumiwa hi magidi ya vanhu. Xana u tikarhatela ku hlanganyela hi laha ku teleke?

² Ku rhumeriwe Kingdom News eka vandlha rin’wana ni rin’wana, ku phakeriwa kwalomu ka 50 wa swona eka muhuweleri un’wana ni un’wana na 250 eka phayona rin’wana ni rin’wana. Xana se u kote ku hangalasa swingani? Loko u nga swi kotanga ku endla hi laha a wu ehlekete ha kona, xana se u anakanye hi tindlela to endla leswi engetelekeke ku nga si hela ku hangalasiwa hi May 14? Xana ku vuriwa yini hi ku tsarisa tanihi phayona ra nkarhinyana? Xana u nga tirhisa minhlangano leyi engetelekeke ya nsimu exikarhi ka vhiki, yo tanihi leyo veka vumbhoni nimadyambu?

³ Vakulu va ta va va kambisisa hi vukheta ku hlanganisiwa ka nsimu. Loko vandlha leri averiweke ri nga ta swi kota ku tirha swiphemu swo karhi, vakulu va fanele ku vulavurisana ni mavandlha ya le kusuhi leswaku ma pfuna. Matshalatshala ya hina yo huma embilwini, xikan’we ni ku khomisana lokunene ka mavandlha swi fanele swi endla leswaku ntirho wu endliwa.

⁴ U nga ha va u ve ni ntsako lowu engetelekeke entirhweni lowu hikwalaho ka leswi vo tala va swi koteke ku hlanganyela, ku katsa ni vahuweleri lavantshwa ni vana. Ha tshemba leswaku moya lowu wa ntsako wu ta hlayisiwa, wu khutaza hinkwavo ku landzelela ku tsakela hi ku endla maendzo yo vuyela eka lava va anguleke kahle. Hi khutaziwe ku hlayisa rhekhodo leyinene ya yindlu na yindlu, hi tsala ehansi lava kombiseke ku tsakela. Xiphemu xo hetelela xa May xi ta va nkarhi lowunene wo tirhela ku endla maendzo yo vuyela hi langutelo ro sungula tidyondzo letintshwa.

⁵ I yini leswi hi nga swi vulaka loko hi tlhelela? U nga ha swi kuma swi pfuna ku vula leswi: “Ndza tshemba wa ha ri tsundzuka rungula leri kandziyisiweke leri ndzi ku siyeleke rona ku nga ri khale; ndza tshemba u ve ni nkarhi wo ri hlaya ni ku anakanyisisa hi rona. Hungu ra rona ri pfuxe mabulo yo tala evanhwini va ka hina, tanihi leswi ri khumbaka timhaka ta nkoka leti vanhu hinkwavo va langutaneke na tona.” Vulavula hi marito man’wana lama tlhontlhaka mianakanyo eka tluka ra vumbirhi, kutani u vutisa: “Xana u ehleketa leswaku i yini lexi hi faneleke ku xi endla leswaku hi tiyiseka leswaku hi lunghekele leswi nga ta ta enkarhini lowu taka?” Yimela nhlamulo. Loko ku tsakela ku kombisiwa, bula hi tinhla tin’wana leti nga eka matluka 2-⁠4 ya Kingdom News, kutani u nyikela dyondzo ya Bibele kumbe loko sweswo swi nga koteki u fambisa timagazini ta sweswinyana.

⁶ Loko u tirha ensin’wini ya vandlha rin’wana, tiyiseka leswaku u nyika vandlha rolero mavito ya vanhu lava tsakelaka lava u va kumeke leswaku vahuweleri va vandlha rolero va ta endla maendzo yo vuyela. Hi ku fanana, loko u komberiwe ku endla maendzo yo vuyela, u nga tsandzeki ku tlhelela hi ku hatlisa.

⁷ Ku hangalasiwa ko hlawuleka ka Kingdom News ku pfuxe nyanyuko ku tlhela ku hi khutaza hinkwerhu leswaku hi tiyisa matshalatshala ya hina entirhweni wo chumayela hi Mfumo. Hi nga ha tiyiseka leswaku ku ta humelela swinene, ku endla vanhu va tindhawu hinkwato va xiya vito ra Yehovha lerikulu ni xikongomelo xa yena. (Esa. 12:​4, 5) Loko hi kota ku tirha ngopfu, hi ta va ni ntsako lowukulu.​—⁠Ps. 126:⁠3.