Vanani Vadyondzisi Va Rito Ra Xikwembu—Hi Ku Tirhisa Tibroxara
1 Nandza un’wana ni un’wana wa Yehovha la tinyiketeleke u ni vutihlamuleri byo hlanganyela entirhweni wa ku dyondzisa van’wana Rito ra Xikwembu. Nkoka wa vutihlamuleri lebyi wa vonaka loko hi xiya leswaku loyi a hi nyikeke ntirho lowu wo ‘endla vanhu va matiko hinkwawo vadyondzisiwa, ni ku va dyondzisa’ u ni vuhosi etilweni ni le misaveni. (Mt. 28:18-20) Hikwalaho, leswaku hi hlanganyela eku chumayeleni ka mahungu lamanene swi lava leswaku hi va vadyondzisi!—2 Tim. 2:2.
2 Hi August hi nga tirhisa vutshila bya hina byo dyondzisa loko hi fambisa tibroxara. Hi nga tirhisa Matsalwa man’wana lama tsakisaka eka tona kutani hi lunghiselela tinhlamuselo ti nga ri tingani leti nga hi pfunaka ku sungula bulo.
3 Loko u fambisa broxara leyi nge “Xana Xikwembu Xa Hi Khathalela Hakunene?” u nga ha ku:
◼ “Hi endzele vaakelani va wena vo tala kutani hi kuma leswaku va karhateke ngopfu hi ku andza lokukulu ka vugevenga, vutherorisi ni madzolonga. Hi ku ya hi langutelo ra wena, ha yini swilo leswi swi ri xiphiqo swonghasi? [Yimela nhlamulo.] Hina hi kuma swi hi tsakisa swinene leswi Bibele yi vhumbeke leswaku leswi swi ta humelela. [Hlaya 2 Timotiya 3:1-3.] Xiya leswaku leswi swi fanele ku humelela ‘emasikwini ya makumu.’ Leswi swi vula leswaku ku na swin’wana swi nga ta herisiwa ku nga ri khale. Xana u ehleketa leswaku ku ta humelela yini?” Yimela nhlamulo. Pfula eka tluka 22, u n’wi komba xifaniso, kutani u hlamusela tsalwa rin’we kumbe mambirhi lama tshahiweke eka tluka rolero. Fambisa broxara hi R1,00 kutani u endla malunghiselelo ya ku tlhela u vuya u ta hlamusela xivangelo lexi endlaka hi tshemba leswaku mikateko leyi yi le kusuhi swinene.
4 U nga ha tsakela ku tirhisa xingheniso lexi loko u fambisa broxara leyi nge “Xana Xikongomelo Xa Vutomi I Yini—U Nga Xi Kumisa Ku Yini?”:
◼ “Vanhu vo tala va nonon’hweriwa loko va ringeta ku kuma xikongomelo xa xiviri evuton’wini. Hambi loko vanhu va nga ri vangani va ri ni ntsako lowu nga nyawuriki, vo tala va hanya vutomi lebyi nga taleriwa hi ku hela matimba ni ku xaniseka. Xana u ehleketa leswaku leyi i ndlela leyi Xikwembu a xi kunguhate leswaku hi hanya ha yona? [Yimela nhlamulo.] Bibele yi kombisa leswaku Xikwembu xi lava leswaku hi hanya emisaveni yo fana ni leyi.” N’wi kombe xifaniso lexi nga eka tluka 21, kutani u pfula eka matluka 25 na 26, tindzimana 4-6 kutani u hlamusela leswi xi swi tshembiseke. Vutisa xivutiso lexi mi nga ta bula ha xona loko u tlhelela: “Xana hi nga tiyiseka njhani leswaku Xikwembu xi ta swi hetisisa switshembiso swa xona?”
5 U nga ha fambisa broxara leyi nge “Tsakela Vutomi eMisaveni Hi Masiku!” hi ku kombisa xifaniso hinkwaxo xa xifunengeto xa le mahlweni ni xa le ndzhaku kutani u vutisa:
◼ “Xana u nga tsakela ku hanya emisaveni leyi teleke hi vanhu lava tsakeke ku fana ni leyi? [Yimela nhlamulo.] Bibele yi hi byela leswaku Xikwembu xi rhandza vanhu naswona xi lava leswaku va hanya hi laha ku nga heriki hi ntsako emisaveni leyi.” Pfula xifaniso xa nomboro 49, kutani u hlaya rin’wana ra Matsalwa lama kombisiweke. Kutani n’wi kombe xifaniso xa nomboro 50, kutani u hlamusela leswi hi faneleke ku swi endla loko hi lava ku hanya eParadeyisini leyi. N’wi byele leswaku u ta tlhela u vuya leswaku mi ta burisana hi nkoka wa ku va ni ripfumelo eka Yesu Kreste.
6 Yehovha wa tsaka loko hi endla ‘nhluvuko lowu kombisaka ku kambisisa ku dyondzisa ka hina.’ (1 Tim. 4:15, 16) Tibroxara ta hina ti nga va mpfuno wa xiviri eka matshalatshala ya hina yo pfuna lava navelaka ku twa ‘mahungu lamanene ya swin’wana swo antswa.’—Esa. 52:7.