Ku Faneleka Ni Ku Hlomela Ku Dyondzisa Van’wana
1 Loko Muxe a vekiwe ku va muyimeri wa Yehovha, u titwe a nga faneleki ku twarisa rito ra Xikwembu eka Faro. (Eks. 4:10; 6:12) Yeremiya u vule leswaku a nga ka a nga swi koti ku tirha tanihi muprofeta wa Yehovha, hi ku byela Xikwembu leswaku yena a nga swi koti ku vulavula. (Yer. 1:6) Hambileswi eku sunguleni a va nga titshembi, vaprofeta volavo vambirhi va tikombe va ri timbhoni ta Yehovha leti nga chaviki. Xikwembu xi endle leswaku va faneleka.
2 Hikwalaho ka ku pfuniwa hi Yehovha, namuntlha hi ni leswi hi swi lavaka leswaku hi hetisisa vutirheli bya hina hi ku titshemba. (2 Kor. 3:4, 5; 2 Tim. 3:17) Ku fana ni mulunghisi wa timovha la nga ni switirho hinkwaswo, hi hlomiseriwa kahle leswaku hi endla ntirho wa vutirheli lowu hi averiweke wona hi vutshila. Hi January hi ta va hi fambisa buku leyi nge Ku Rhula Ka Ntiyiso Ni Nsirhelelo—U Nga Swi Kuma Njhani? Hambileswi xitirho lexi xa moya xi nga riki xintshwa, timhaka ta xona ta Matsalwa ta ha ri enkarhini naswona xi ta pfuna vanhu leswaku va dyondza ntiyiso. Swingheniso leswi ringanyetiweke leswi landzelaka swi nga ha twananisiwa ni ku karhateka hi swilo swo hambana-hambana loku andzeke ensin’wini ya hina.
3 Mhaka ya dyondzo yi nga ha tirhisiwa leswaku yi pfuxa ku tsakela eRitweni ra Xikwembu. U nga sungula bulo hi ku vula leswi: ◼“Namuntlha ku kandziyisiwa ngopfu xilaveko xa dyondzo leyi tlakukeke. Hi ku vona ka wena, i dyondzo ya muxaka muni leyi munhu a faneleke a va na yona leswaku a ta kuma ntsako lowukulu ni ku humelela evuton’wini? [Yimela nhlamulo.] Ntsako lowu nga heriki wu nga kumiwa hi lava nghenisaka vutivi bya Xikwembu. [Hlaya Swivuriso 9:10, 11.] Buku leyi nge Ku Rhula Ka Ntiyiso Ni Nsirhelelo—U Nga Swi Kuma Njhani? yi sekeriwe eBibeleni. Yi vulavula hi xihlovo xin’we xa vutivi lebyi nga yisaka evuton’wini lebyi nga heriki.” Kutani hlamusela ndzimana 8 eka tluka 6 ku kombisa leswaku Bibele yi hi nyika vutivi lebyi hi byi lavaka. Fambisa buku hi munyikelo wa R4,00, ivi u lunghiselela riendzo ro vuyela.
4 Loko u tlhelela eka n’wini wa muti loyi u vulavuleke na yena hi nkoka wa dyondzo ya Bibele, u nga ha ku: ◼“Eriendzweni ra mina leri hundzeke, hi bule hi Bibele tanihi xihlovo xa dyondzo leyi nga tiyisaka vumundzuku bya hina lebyi nga heriki. Kavula, swi lava matshalatshala leswaku hi dyondza leswi hi faneleke hi swi tiva eMatsalweni. [Hlaya Swivuriso 2:1-5.] Vanhu vo tala swa va nonon’hwela ku twisisa swiphemu swin’wana swa Bibele. Ndzi tsakela ku ku kombisa hi ku komisa endlelo leri hi ri tirhisaka swinene leswaku hi pfuna vanhu va dyondza swo tala malunghana ni tidyondzo ta xisekelo ta Bibele.” Loko u tirhisa buku leyi u nga n’wi siyela yona, pfula endhawini leyi faneleke ivi u kombisa maendlelo ya dyondzo ya Bibele hi ku komisa. Loko n’wini wa muti a navela ku va ni dyondzo ya nkarhi na nkarhi, hlamusela leswaku u ta tlhela u vuya ni buku leyi nge Vutivi Lebyi Yisaka eVuton’wini Lebyi Nga Heriki leyi nga buku-mpfuno ya hina yo dyondza.
5 Vanhu vo tala va karhatiwa hi ku xaniseka ka timiliyoni ta vana laha misaveni. Kumbexana u nga pfuna n’wini wa muti leswaku a vona ndlela leyi Xikwembu xi langutaka xiyimo lexi ha yona hi ku vula u ku: ◼“A swi kanakanisi leswaku u vone swiviko swa mahungu leswi vulavulaka hi vana lava nga ni ndlala, lava vabyaka ni lava nga hlayisiwiki emisaveni hinkwayo. Ha yini minhlangano leyi khumbekaka yi tsandzeka ku antswisa xiyimo lexi? [Yimela nhlamulo.] Xikwembu xi navelela vanhu leswinene. Xiya leswi xi swi tshembisaka malunghana ni vana ni lavakulu, hilaha swi tsariweke hakona eBibeleni. [Hlaya Nhlavutelo 21:4.] Buku leyi leyi nge Ku Rhula Ka Ntiyiso Ni Nsirhelelo—U Nga Swi Kuma Njhani? yi nyikela vuxokoxoko lebyi engetelekeke malunghana ni misava leyi lunghiseleriweke hi Xikwembu leyi nga riki na maxangu.” Pfula xifaniso lexi kombisaka Paradeyisi eka tluka 98, ivi u xi hlamusela. Fambisa buku hi munyikelo wa R4,00 ivi u endla lunghiselelo ra riendzo rin’wana.
6 Loko eku sunguleni u vulavule hi ku xaniseka ka vana, eriendzweni leri landzelaka u nga ha yisa bulo emahlweni hi ku vula u ku: ◼“Nkarhi lowu a ndzi ri laha, u kombise ku karhateka hi xiyimo xa vana lava xanisekaka hikwalaho ka makaya lama nga hahluka, ndlala, vuvabyi ni madzolonga. Swa chavelela ku hlaya eBibeleni hi misava leyi eka yona vana hambi ku ri vanhu lavakulu va nga ta ka va nga ha langutani ni vuvabyi, switlhavi kumbe rifu. Vuprofeta lebyi nga ebukwini ya Esaya byi hlamusela vutomi lebyinene lebyi nga ta va byi ri kona emisaveni.” Hlaya u tlhela u hlamusela Esaya 65:20-25. N’wi yise edyondzweni ya Bibele ya nkarhi lowu taka hi ku tirhisa buku leyi nge Vutivi.
7 Tanihi leswi vanhu vo tala va tshamelaka ku ehleketa hi vuhlayiseki bya munhu hi xiyexe hikwalaho ka ku andza ka vugevenga, u nga sungula bulo emhakeni leyi hi ku vula u ku: ◼“Hi vulavula ni vaakelani va hina malunghana ni mhaka ya ku hlayiseka ka munhu hi xiyexe. Ku ni vugevenga byo tala laha hi tshamaka kona, naswona byi khumba vutomi bya hina. Xana xiphiqo lexi xi nga ololoxiwa hi ndlela yihi? Xana u ehleketa leswaku munhu wihi na wihi a nga swi kota ku herisa swiphiqo leswi laha misaveni?” Yimela nhlamulo. Ku nga khathariseki leswaku nhlamulo yi ri yini u nga ha ya emahlweni u ku: “Ku vuriwa yini hiloko mufumi a ri ni timfanelo leti fanaka ni leti hlamuseriweke laha eka Esaya 9:6, 7? [Hlaya.] Xana a wu ehleketi onge leswi swi nga tisa misava leyi hlayisekeke?” Kandziyisa tinhla ku kombisa leswaku tsalwa leri ri vulavula hi Yesu Kreste. “Buku leyi leyi nge Ku Rhula Ka Ntiyiso Ni Nsirhelelo—U Nga Swi Kuma Njhani? yi wu hlamusela kahle ntshembo wa hina lowu nga woxe wa ku hlayiseka ni nsirhelelo ni ndlela leyi ‘Hosana ya Ku Rhula’ yi nga ta tisa ku rhula emisaveni hinkwayo ha yona enkarhini wa hina. Xana u nga tsakela ku dyondza swo tala malunghana ni misava leyintshwa leyi tshembisiweke?” Fambisa buku hi munyikelo wa R4,00.
8 Loko u yisa bulo ra nkarhi lowu nga hundza emahlweni malunghana ni ku hlayiseka ka munhu hi xiyexe, u nga ha ringeta xingheniso lexi: ◼“Ndzi tsakele bulo ra hina malunghana ni ku hlayiseka ka munhu hi xiyexe. Hilaha ndzi hlamuseleke hakona, Yesu hi yena ntsena mufumi la nga tisaka nsirhelelo lowu nga heriki emisaveni. U ta tsaka loko wo twa swilo swin’wana leswi a nga ta swi endlela vanhu hi nkarhi wa ku fuma ka yena.” Hlaya u tlhela u hlamusela ndzimana 20 eka tluka 42 ra buku leyi nge Vutivi, kutani u vutisa loko u nga kombisa ndlela yo dyondza Bibele hi ku tirhisa buku leyi.
9 Loko swi ta eku nyikeni ka van’wana vutivi bya Xikwembu, hi nga ha tivutisa xivutiso lexi nge, “Xana i mani loyi a faneriwaka hi ntirho lowu hinkwawo ke?” Matsalwa ma hlamula: “Hina ha faneleka.”—2 Kor. 2:16, 17, NW.