Nongonoko Lowuntshwa Wa Nhlengeletano Ya Xifundzha
Ha swi tiva leswaku Yehovha Xikwembu u faneriwa hi rirhandzu ni ku tinyiketela ka hina loku hlawulekeke. Kambe, misava yi lava ku hi yenga leswaku hi nga tshami hi ri ni vuxaka lebyikulu na yena. (Yoh. 17:14) Leswaku wu tiyisa rirhandzu ra hina eka Yehovha ni ku hi tiyisa leswaku hi lwa ni swilo swa misava leswi vekaka vumoya bya hina ekhombyeni, nongonoko lowuntshwa wa nhlengeletano ya xifundzha ya lembe ra ntirho ra 2001 wu ta va ni xihloko lexi nge “Rhandza Xikwembu—Ku Nga Ri Swilo Swa Misava.”—1 Yoh. 2:15-17.
Ku rhandza Yehovha hi mbilu hinkwayo swi hi susumetela ku nyikela vumbhoni ha yena. Nilokoswiritano, a swi va oloveli vanhu vo tala va Xikwembu ku endla ntirho wa nsimu. Eka nkulumo leyi nge “Ku Rhandza Xikwembu Ka Hi Susumeta eVutirhelini Bya Hina,” dyondza leswaku i vangani lava hluleke tingana ni swihinga swin’wana leswaku va hlanganyela hi xitalo entirhweni lowu.
Xana mimpimanyeto ya misava leyi yaka yi hohloka yi hi khumba njhani? Swilo leswi khale a swi tekiwa swi bihile, sweswi swi tekiwa swi ri mahanyelo lamanene. Nkulumo leyi nge “Varhandzi Va Yehovha Va Venga Leswo Biha” ni nxaxamelo lowu nge “Swilo Swa Misava—Hi Swi Languta Njhani?” ti ta tiyisa ku tiyimisela ka hina ku ala ku navela ko biha.
Xikolo Xa Vutirheli Bya Le Tilweni ni Nhlangano Wa Ntirho, leswi nga swikombiso, swi ta katsiwa enongonokweni, swin’we ni nkatsakanyo wa Dyondzo ya vhiki rero ya Xihondzo xo Rindza. Nkulumo ya le rivaleni leyi nge “Ndlela Leyi Rirhandzu Ni Ripfumelo Swi Hlulaka Misava Ha Yona,” yi ta hi khutaza leswaku hi tekelela Yesu hi ku lwisana ni mintshikilelo ya misava. (Yoh. 16:33) Tiyiseka leswaku u rhamba swichudeni swa wena swa Bibele leswaku swi va kona. Hinkwavo lava lavaka ku khuvuriwa va fanele ku byela mulanguteri la ungamelaka hi ku hatlisa hilaha va nga swi kotaka hakona leswaku ku ta endliwa malunghiselelo lama faneleke.
Nhlengeletano leyi ya xifundzha, yi ta yisa nyingiso wa hina emhakeni ya leswaku hi kwihi laha hi ku kongoma rirhandzu ra hina ri faneleke ri kongomisiwa kona leswaku hi kota ku tsakela mikateko leyi fuweke ya Yehovha. Ku amberiwa i ku tsoniwa!