“Xana Ndzi Nga Wu Kuma Kwihi Nkarhi?”
1 Lexi i xirilo xa un’wana ni un’wana wa hina hikuva hi tshama hi khomekile. Nkarhi wu tekiwa tanihi rifuwo ra hina ra risima kambe leri hi nga kotiki ku ri hlayisa nkarhi wo leha. Kutani hi nga wu kuma kwihi nkarhi wa swilo leswi hakunene swi nga swa risima, swo kota ku hlaya ni ku dyondza Rito ra Xikwembu?—Filp. 1:10.
2 Xa nkoka, i ku endla xiboho xa leswi hi lavaka ku swi endla hi nkarhi lowu hi nga na wona, ku nga ri ku lava nkarhi lowu engetelekeke. Hinkwerhu hi ni tiawara ta 168 hi vhiki, eka tona hi heta ta 100 hi etlele kumbe hi ri eku tirheni. Xisweswo hi nga ti tirhisa njhani tiawara leti seleke hi ndlela leyi vuyerisaka? Vaefesa 5:15-17 yi bumabumela leswaku ndlela leyi hi fambaka ha yona ‘yi nga fani ni ya lava nga tlharihangiki, kambe yi fana ni ya vanhu lava tlhariheke, hi tixavela nkarhi lowunene naswona hi twisisa leswi ku rhandza ka Yehovha ku nga swona.’ Leswi swi kombisa leswaku hi fanele ku wu tirhisa hi xitalo nkarhi wun’wana ni wun’wana leswaku hi endla swilo leswi Yehovha a vulaka leswaku i swa nkoka.
3 Yesu u pimanise masiku ya hina ni ya le nkarhini wa Nowa. (Luka 17:26, 27) Vanhu va nkarhi wolowo a va khomekile hi swilo swa vona swa siku ni siku. Hambiswiritano, Nowa u tinyike nkarhi wa ku aka ngalava leyikulu ni wa ku chumayela. (Hev. 11:7; 2 Pet. 2:5) Hi ndlela yihi? Hi ku rhangisa ku rhandza ka Xikwembu ni ku xi yingisa hi ku endla swilo ‘hi ndlela leyi a lerisiweke ha yona.’—Gen. 6:22.
4 I Yini Lexi Faneleke Xi Rhangisiwa? Yesu u te: “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.” (Mat. 4:4) Vhiki rin’wana ni rin’wana hi kuma “mpimo wa . . . mphakelo wa swakudya [swa moya] hi nkarhi lowu faneleke.” (Luka 12:42) Leswaku hi kota ku swi gayela hinkwaswo, hi fanele ku va ni xiyimiso xa minkarhi hinkwayo xa ku hlaya ni xa dyondzo ya munhu hi yexe, hi ndlela yoleyo hi ta vuyeriwa hakunene. Ku kombisa leswaku ha swi tlangela swakudya swa moya, a hi nge swi dyi ku fana ni swakudya swo khomisa nyoka, leswi munhu a swi dyaka a yime hi milenge. Ematshan’weni ya sweswo, loko ku ri leswaku ha swi tlangela hakunene, hi ta tinyika nkarhi wa ku dyondza ni ku tiphina hi swilo swa moya.
5 Ku dya swakudya swa moya ku ta hi yisa evuton’wini lebyi nga heriki. (Yoh. 17:3) Swi fanele swi rhangisiwa emintirhweni ya hina ya siku ni siku. Xana hi nga swi kota ku tinyika nkarhi wa ku hlaya Bibele siku ni siku ni ku lunghiselela minhlangano ya Vukreste? Ina hi nga swi kota. Kutani hi ta kuma “hakelo leyikulu” leyi tisiwaka hi ku tiva ni ku endla ku rhandza ka Xikwembu.—Ps. 19:7-11.