Xana Wa Ti Tlangela Tibuku Ta Hina?

¹ Tidayimani ni maribye man’wana ya nkoka ma ni ntikelo ku nga ri hi mhaka ya ku xonga ka wona ntsena kambe ni hi mhaka ya ntirho lowukulu wa ku ma kuma ni ku ma cela. Vutivi bya Yehovha na Yesu Kreste byona byi ni ntikelo lowu tlulaka wolowo, naswona tibuku ta hina hi tona ntsena emisaveni leti hlamuselaka rifuwo leri ra moya hi vuenti ni hi vutlharhi bya Xikwembu. (Rhom. 11:33; Flp. 3:8) Hi nga ku kombisa njhani ku tlangela tibuku ta hina ka ntiyiso?

² Ndlela yin’wana ya ku kombisa ku tlangela i ku fambisa tibuku ta hina eka vanhu lava hi va kumaka entirhweni wa nsimu. Vanhu vo tala va nga tsaka loko munhu o va nyika dayimani kumbe ribye ra nkoka. I ntiyiso, va nga ha rhanga hi ku languta tibuku ta hina hi ndlela leyi hambaneke ni leyi a va ta languta dayimani ha yona, kambe lava khathalelaka xilaveko xa vona xa moya va ta hatla va wu vona ntikelo wa tona wa ntiyiso. Loko hi fambisa tidyondzo hi tibuku ta hina, vanhu va pfuneka leswaku va dyondza leswi Bibele yi swi dyondzisaka naswona ndlela yi va pfulekerile leswaku va aka vuxaka na Yehovha. Mpfuno wa ntiyiso lowu wu nga ha kumiwaka etibukwini ta hina, wu titshege eka ndlela leyi ti tirhisiwaka ha yona.

³ Nakambe hi fanele hi xalamukela minkarhi yo tala leyi hi nga vaka na yona ya ku fambisa tibuku hi vumbhoni bya xitshuketa. A hi ehleketeni hi tindlela ta ku vula vumbhoni eka vaendzi, maxaka, vatirhi-kulorhi, vadyondzi-kulorhi, vanhu lava hi hlanganaka na vona loko hi xava ni lava hi hlanganaka na vona endleleni loko hi ri entirhweni wa nsimu. Kunguhata ka ha ri emahlweni, u va ni tibuku ta ku ti fambisa hi minkarhi yo tano. Hakanyingi a swi nonon’hwi leswaku hi famba ni buku yin’we leyitsongo kumbe to talanyana. Hi nga endla leswinene hi ku nyikela vumbhoni hi xitshuketa.—1 Pet. 3:15.

⁴ Hambi loko hi tirhisa ngopfu nyiko ya n’hweti leyi, nkarhi wun’wana hi nga ha ehleketa hi ku tirhisa buku yin’wana. Eku endleni ka vutirheli bya hina, hi lava ku pfuna lava fanaka ni tinyimpfu leswaku va nghena endleleni leyi yisaka evuton’wini. Tibuku ti nga ha pfuna ku endla sweswo. Loko hi bula hi Matsalwa swin’we ni munhu la tsakelaka, hi nga ha kuma leswaku u tsakisiwa hi nhloko-mhaka yo karhi. Loko hi tolovelane kahle ni rungula ra nkoka leri nga eminkandziyisweni yo hambana-hambana, hi ta swi kota ku hundzula rungula ra hina ivi hi fambisa buku leyi hlamuselaka hi ku kongoma ku tsakela ka munhu loyi hi vulavulaka na yena. Leswi swi nga ha lava leswaku u endla riendzo ro vuyela u ri ni buku leyi faneleke.

⁵ Buku leyi hi yi siyaka eHolweni ya Mfumo kumbe ekaya a yi xi hetisisi xikongomelo xa yona, naswona ntikelo wa yona a wu voniwi. Hambi ku ri minkandziyiso ya khale ya timagazini, tibroxara, tibuku letikulu ni swiphephana, yi fanele yi tirhisiwa kahle. Xana hi hetelele rini ku kamba mphakelo wa tibuku leti hi nga na tona? Hi nga hlamala loko ho vona leswaku i tingani leti ti nga pakelana. Xana tibuku leti hi nga na tona ta ha languteka—xana a ti hundzukanga muvala hi mhaka ya ku tshama nkarhi wo leha, xana a ti handzukanga kumbe ku cheriwa hi misava? Loko ta ha languteka hi fanele hi endla matshalatshala ya ku ti fambisa evutirhelini bya nsimu. Tibuku leti onhakeke hi nga ha ti veka leswaku hi ti tirhisa kumbe hi ti cukumeta.

⁶ Nkarhi hinkwawo anakanyisisa kahle hi tibuku leti u nga ta ti lava ensin’wini. Minkarhi yin’wana hi nga ha honisa ku kuma nyiko ya n’hweti yo karhi ka ha ri ni nkarhi exivandleni xa tibuku. Ku laveka ku lunghiselela ni ku kunguhata lokunene ku tiyiseka leswaku hi ni mphakelo lowunene wa nyiko ya n’hweti ni tibuku tin’wana leti lavekaka ensin’wini ya hina. Leswi i swa nkoka ngopfu, loko u tirha tanihi phayona ra nkarhinyana kumbe ra nkarhi hinkwawo evandlheni.

⁷ Tibuku ta hina ti ni ntikelo swinene loko hi ti fambisela vanhu lava tlangelaka Rito ra Xikwembu ra ntiyiso. Hikwalaho, onge hinkwerhu hi nga kombisa leswaku hi ti tlangela swinene tibuku ta hina.