Kwadwom

2 O hwɛ sɛdeɛ Yehowa abufuo akata Sion so sɛ mununkum!+

Wato Israel ahoɔfɛ+ afiri soro ahwe fam.+

Wankae ne nan ntiasoɔ+ n’abufuo da no.

 2 Yehowa amene Yakob tenabea, wanhu mmɔbɔ.+

Wadwiri Yuda babaa nkuro denden agu fam,+ n’abufuo mu.

Ɔde no ato fam,+ na wagu n’ahennie+ ne ne mpanimfoɔ ho fĩ.+

 3 N’abufuo mu na watwitwa Israel mmɛn nyinaa aguo.+

Wayi ne nsa nifa ato n’akyi, yɛn atamfo anim;+

Na wadɛre wɔ Yakob so sɛ gya a ɛrehye hyia.+

 4 Wakuntunu n’agyan mu sɛ ɔtamfo.+ Wayɛ ne nsa nifa+ krado

Sɛ ɔsɛefoɔ,+ na ɔkunkum deɛ ɛyɛ fɛ wɔ nnipa ani so nyinaa.+

Wahwie n’abufuo agu Sion ntomadan+ mu sɛ gya.+

 5 Yehowa ayɛ sɛ ɔtamfo.+ Wamene Israel.+

Wamemene n’aban atenten nyinaa;+ wasɛe ne nkuro denden no.+

Wama awerɛhoɔ ne adwotwa abu so wɔ Yuda babaa mu.+

 6 Wabubu ne sese+ basabasa sɛ mfikyifuo.+ Wasɛe n’afahyɛ.

Yehowa ama wɔn werɛ afiri afahyɛ+ ne homeda wɔ Sion,

Na n’abufuo kɛseɛ mu, wammu ɔhene ne ɔsɔfoɔ.+

 7 Yehowa ato n’afɔrebukyia atwene.+ Wahura ne kronkronbea ho.+

Ɔde ne tenabea aban no ahyɛ atamfo nsa.+

Wɔama wɔn nne so wɔ Yehowa fie sɛ afahyɛ da.+

 8 Yehowa abɔ ne tirim sɛ ɔbɛsɛe Sion babaa afasuo.+

Watwe susuhoma+ mu. Ɔnyii ne nsa mfirii ɔsɛeɛ ho.+

Wama pampim ne ɔfasuo redi awerɛhoɔ.+ Ne nyinaa agyigya.

 9 N’aponkɛseɛ+ amemem kɔ asase yam. Wasɛe ne mmeamu abubu mu.

Ne hene ne ne mpanimfoɔ wɔ amanaman no mu.+ Mmara bi nni hɔ.+

N’adiyifoɔ nso nnyaa anisoadehunu bi mfirii Yehowa hɔ.+

10 Sion babaa mpanimfoɔ tete fam, na wɔayɛ komm wɔ hɔ.+

Wɔde dɔteɛ agu wɔn atifi.+ Wɔfirafira atweaatam.+

Yerusalem mmaabunu tiri sisi fam.+

11 Nisuo ama m’ani abrɛ.+ Me nsono mu hyehye me.+

Me man babaa asehweɛ nti,+ wɔahwie me berɛboɔ agu fam,+

Ɛfiri sɛ mmɔfra ne nkɔkoaa atotɔ piti wɔ kuro mmɔnten so.+

12 Piti a wɔtotɔ wɔ kuro mmɔnten so sɛ atɔfoɔ

Ne wɔn kra a wɔrehwie gu wɔn maamenom kokom nti,

Wɔbisa wɔn maamenom sɛ: “Ɛhe na aduane ne bobesa wɔ?”+

13 O Yerusalem babaa, ɛdeɛn na memfa nyɛ adanseɛ mma woɔ? Ɛdeɛn ho na memfa wo ntotoɔ?+

O Sion babaa, ɔbaabunu, ɛdeɛn na memma ɛne wo nsɛ na menkyekyere wo werɛ?+

W’asehweɛ+ sõ sɛ ɛpo. Hwan na ɔbɛtumi asa wo yareɛ?+

14 Ahuhudeɛ ne nnaadaa anisoadeɛ na w’adiyifoɔ hunu maa woɔ,+

Wɔanyi wo mfomsoɔ adi ankyerɛ wo, anka woankɔ nkoasom mu.+

Ahuhudeɛ ne nnaadaa atemmuo na wɔhunu maa woɔ.+

15 Wɔn a wɔtwam kwan so nyinaa bobɔ wɔn nsam+ gu wo so.

Wɔabɔ hwerɛma+ awoso wɔn ti+ agu Yerusalem babaa so sɛ:

“Kuro a anka wɔfrɛ no ‘Ahoɔfɛ a ɛwie pɛyɛ, asase nyinaa anika’ no nie?”+

16 W’atamfo nyinaa abue wɔn anom wɔ wo so.+

Wɔbɔ hwerɛma, na wɔtwɛre wɔn sẽ.+ Wɔka sɛ: “Yɛbɛmene no.+

Ɛda a yɛhwɛɛ kwan no nie.+ Yɛanya! Yɛahunu!”+

17 Yehowa ayɛ deɛ ɔsusuiɛ no.+ Wawie deɛ ɔkaeɛ no,+

Deɛ ɔfiri tete nna mu hyɛeɛ no.+ Wadwiri agu, na wanhunu mmɔbɔ.+

Wo so na wama ɔtamfo adi ahurisie.+ Wama w’atamfo mmɛn so kɔ soro.+

18 O Sion babaa fasuo,+ wɔn akoma asu afrɛ Yehowa.+

Ma nisuo nsene awia ne anadwo sɛ asubɔnten.+

Ntena hɔ dinn. Mma w’ani kosua nnyɛ komm.

19 Sɔre! Bɔ abubuo anadwo awɛmfoɔ dɔn+ mfitiaseɛ.

Hwie w’akoma gu+ Yehowa anim+ sɛ nsuo.

Ma wo nsa so kyerɛ soro,+ wo mma kra nti,

Wɔn a mmɔnten ntwea so kɔm ama wɔatotɔ piti no nyinaa nti.+

20 O Yehowa, hwɛ na hunu+ deɛ wo ne no adi no yayaaya saa no.

Ɛsɛ sɛ mmaa we wɔn yafumma, wɔn mma ahoɔdenfoɔ a wɔawo wɔn no?+

Anaa Yehowa kronkronbea hɔ na ɛsɛ sɛ wɔkum ɔsɔfoɔ ne odiyifoɔ?+

21 Mmarimaa ne nkɔkoraa+ deda fam mmɔnten so.+

Me mmaabunu ne me mmeranteɛ atotɔ nkrantɛ ano.+

W’abufuo da na wokum wɔn.+ Woakunkum wɔn;+ woanhunu mmɔbɔ.+

22 Woafrɛfrɛ wɔn afiri baabi a wɔkɔsoɛeɛ nyinaa aba sɛ afahyɛ da.+

Yehowa abufuo da no, obi amfiri mu amfi, na obi anka;+

Ahoɔdenfoɔ a mewoo wɔn na meyɛn wɔn no, m’atamfo ama wɔn ase ahye.+