Yeremia

27 Yosia ba Yehoiakim a ɔyɛ Yuda hene no ahennie mfitiaseɛ no, asɛm yi firi Yehowa hɔ baa Yeremia nkyɛn sɛ: 2 “Deɛ Yehowa aka akyerɛ me nie, ‘Yeyɛ kɔndua ne nhoma a wɔde sosɔ mu, na fa gu wo kɔn ho. 3 Afei fa ma asomafoɔ a wɔaba Yuda hene Sedekia nkyɛn wɔ Yerusalem no na wɔmfa nkɔma Edom+ hene ne Moab+ hene ne Ammonfoɔ+ hene ne Tiro+ hene ne Sidon+ hene. 4 Fa ahyɛdeɛ yi ma wɔn na wɔmfa nkɔma wɔn wuranom sɛ:

“‘“Deɛ asafo Yehowa, Israel Nyankopɔn no aka nie; deɛ monkɔka nkyerɛ mo wuranom nie, 5 ‘Me na mede m’ahoɔden kɛseɛ ne me basa a matene mu yɛɛ asaase ne nnipa ne mmoa a ɛwɔ asaase so, na mede ma obiara a mepɛ.*+ 6 Na mede nsaase yi nyinaa ahyɛ m’akoa Babilon hene Nebukadnesar nsa;+ mede wuram mmoa mpo ama no sɛ wɔnsom no. 7 Aman nyinaa bɛsom no, ɔne ne ba, ne ne banana, akɔsi sɛ ɔno ara nso n’asaase berɛ bɛso+ ama aman ne ahemfo akɛseɛ pii de no ayɛ wɔn akoa.’+

8 “‘“‘Sɛ ɔman ne ahennie bi ansom Babilon hene Nebukadnesar, na wɔamfa wɔn kɔn anhyɛ Babilon hene kɔndua ase a, mede sekan+ ne ɛkɔm ne nsanyareɛ a ɛdi awuo bɛtwe saa ɔman no aso,’ Yehowa asɛm nie, ‘akɔsi sɛ mɛfa ne nsa so ama wɔn nyinaa asã.’

9 “‘“‘Ɛno nti, mo adiyifoɔ, ne wɔn a mokɔ wɔn nkyɛn abisa, ne mo adaeɛsofoɔ ne mo nkonyaayifoɔ ne mo asumanfoɔ a wɔka kyerɛ mo sɛ: “Morensom Babilon hene” no, monntie wɔn. 10 Ɛfiri sɛ wɔhyɛ nkɔm a ɛnyɛ nokorɛ kyerɛ mo, sɛdeɛ ɛbɛyɛ a wɔbɛfa mo afiri mo asaase so akɔ akyirikyiri na wɔabɔ mo ahwete, na moayera.

11 “‘“‘Na ɔman a wɔde wɔn kɔn bɛhyɛ Babilon hene kɔndua ase na wɔasom no no deɛ, mɛma wɔakɔ so atena* wɔn asaase so,’ Yehowa asɛm nie, ‘na wɔbɛdɔ so na wɔatena so.’”’”

12 Yuda hene Sedekia+ nso, saa ara na meka kyerɛɛ no sɛ: “Momfa mo kɔn nkɔhyɛ Babilon hene kɔndua ase na monsom ɔne ne man, na mobɛkɔ so atena nkwa mu.+ 13 Adɛn nti na ɛsɛ sɛ wɔde sekan+ ne ɛkɔm+ ne nsanyareɛ a ɛdi awuo+ kunkum wo ne wo manfoɔ, sɛdeɛ Yehowa kaa sɛ ɛbɛto ɔman a wɔrensom Babilon hene no? 14 Adiyifoɔ a wɔka kyerɛ mo sɛ, ‘Morensom Babilon hene’ no, monntie wɔn,+ ɛfiri sɛ nkɔm a wɔhyɛ kyerɛ mo no nyɛ nokorɛ.+

15 “‘Mensomaa wɔn,’ Yehowa asɛm nie, ‘na nkɔm a ɛnyɛ nokorɛ na wɔhyɛ wɔ me din mu sɛdeɛ ɛbɛyɛ a mɛbɔ mo ahwete, na moayera, mo ne adiyifoɔ a wɔhyɛ nkɔm kyerɛ mo no nyinaa.’”+

16 Asɔfoɔ ne ɔman yi nyinaa nso, meka kyerɛɛ wɔn sɛ: “Deɛ Yehowa aka nie, ‘Mo adiyifoɔ a wɔhyɛ nkɔm kyerɛ mo sɛ: “Hwɛ! Ɛrenkyɛ koraa, wɔde Yehowa fie nneɛma no bɛfiri Babilon aba!” no, monntie wɔn nsɛm no,+ ɛfiri sɛ nkɔm a wɔhyɛ kyerɛ mo no nyɛ nokorɛ.+ 17 Monntie wɔn. Monsom Babilon hene, na mobɛkɔ so atena nkwa mu.+ Adɛn nti na ɛsɛ sɛ kuro yi dane amamfo? 18 Na sɛ wɔyɛ adiyifoɔ ampa, na sɛ Yehowa asɛm na wɔka a, ɛnneɛ momma wɔnsrɛ asafo Yehowa, sɛdeɛ ɛbɛyɛ a wɔremmɛfa nneɛma a aka wɔ Yehowa fie, ne Yuda hene fie,* ne Yerusalem no nkɔ Babilon.’

19 “Ɛfiri sɛ wei ne deɛ Yehowa aka wɔ adum+ ne Ɛpo no*+ ne trɔk a wɔde twe nsuo+ ne nneɛma a aka wɔ kuro yi mu no ho, 20 nneɛma a Babilon hene Nebukadnesar gyaeɛ berɛ a ɔfaa Yehoiakim ba Yekonia a ɔyɛ Yuda hene no ne Yuda ne Yerusalem adehyeɛ nyinaa firii Yerusalem kɔeɛ no;+ 21 aane, deɛ asafo Yehowa, Israel Nyankopɔn no aka afa nneɛma a aka wɔ Yehowa fie ne Yuda hene fie* ne Yerusalem nyinaa ho nie: 22 ‘“Babilon na wɔde bɛkɔ,+ na ɛhɔ na ɛbɛwɔ de akɔsi da a mɛdane m’ani aba so,” Yehowa asɛm nie. “Afei mɛsan akɔfa na mede aba ha.”’”+