To Nsa Frɛ Obiara a Sukɔm De No
1 Sɛnea odiyifo Amos ka siei no, ‘sukɔm, a ɛnyɛ nsu ankasa, na mmom Yehowa asɛm tie de,’ de adesamma abusua a ɛwɔ hɔ nnɛ no. (Amos 8:11) Nea ɛbɛyɛ na yɛaboa nkurɔfo a honhom fam sukɔm de wɔn yi no, yɛka Onyankopɔn nsiesiei a ɛne sɛ obegye nnipa a wɔyɛ setie afi bɔne ne owu mu a wɔyɛ ho mfonini wɔ Adiyisɛm nhoma no ti a etwa to mu sɛ “nkwa nsu asubɔnten” no ho asɛm kyerɛ wɔn. Yɛanya hokwan sɛ yɛbɛto nsa afrɛ obiara a trenee ho sukɔm de no no sɛ ‘ommegye nkwa nsu no kwa.’ (Adi. 22: 1, 17) Yɛbɛyɛ dɛn atumi ayɛ eyi wɔ February mu? Ɛdenam Adiyisɛm—N’awiei Koraa Abɛn! nhoma no a yɛde bɛma no so. Ebia wobɛpɛ sɛ wosɔ nsɛm a wɔka kyerɛ a edidi so yi hwɛ:
2 Esiane sɛ akwahosan ho nsɛm haw nnipa pii nti, ebia wubehu sɛ saa kwan yi yɛ nea etu mpɔn:
◼ “Ayaresa pa ho ka a ɛrekɔ soro no ho asɛm haw nnipa pii. Ebia woasusuw saa asɛm yi ho pɛn. [Twɛn ma ɔnkasa.] So saa haw yi ano aduru koraa wɔ hɔ? [Twɛn ma ommua.] Akwanhwɛ a ɛyɛ anigye bi ni.” Kenkan Adiyisɛm 22:1, 2. Afei bue mfonini a ɛwɔ Adiyisɛm Awiei nhoma no nkratafa 308-9 no, na fa kratafa 311 no nkyekyem 22 no kyerɛkyerɛ mu. Ka eyi fa wie sɛ: “Saa nhoma yi susuw Adiyisɛm nhoma no mu nkyekyem biara ho.” Fa nhoma no ma no, na yɛ nhyehyɛe sɛ wobɛsan aba hɔ.
3 Sɛ worekɔyɛ sankɔhwɛ a, wubetumi afi wo nkɔmmɔbɔ ase denam eyi a wobɛka so:
◼ “Ɛda a mebaa ha no, yɛbɔɔ nyarewa ano aduru koraa a yebenya ho nkɔmmɔ. So wususuw sɛ bere bi bɛba a, obiara renyare bio? [Twɛn ma ommua.] Hyɛ asɛm a ɛkanyan anigye yi nsow.” Kenkan Yesaia 33: 24. Afei bue Ahwehwɛde nhomawa no adesua 5 no, na munsusuw nkyekyem 5-6 no ho, na bisa ɛho nsɛm a ɛwɔ adesua no mfiase no, na monkenkan kyerɛw nsɛm a wɔde ama no bi. Ka sɛ yare ne owu a wobeyi afi hɔ no ka Onyankopɔn mfitiase atirimpɔw ma asase a ebenya ne mmamu no ho. Sɛ wode nhomawa no ma no a, yɛ nhyehyɛe sɛ wobɛsan aba ne no abesusuw adesua koro no ara nkyekyem 1-4 ne 7 no ho.
4 Sɛ amanneɛbɔ bi a ɛfa ɔpatuwu ho ho asɛm na ɛwɔ nkurɔfo adwene mu a, wubetumi afa saa kwan yi so:
◼ “Ebia woate sɛ [ka asɛm ko no]. Sɛ nkurɔfo nkwa ba awiei mpofirim saa a, nnipa pii susuw awerɛkyekye ko a wobetumi de ama wɔn a wɔawuwu no mmusua ho. Wususuw ho dɛn?” Twɛn ma ommua. Afei bue Adiyisɛm Awiei nhoma no kratafa 299, na fa owusɔre ho mfonini no kyerɛ no. Toa so sɛ: “Sɛ nnipa pii hu sɛ wobenyan atreneefo ne abɔnefo nyinaa aba nkwa mu wɔ Paradise asase so a, wɔn ho dwiriw wɔn. [Kenkan Asomafo no Nnwuma 24:15 sɛnea wɔafa mu asɛm aka wɔ kratafa 297 no nkyekyem 9 no, na afei fa nkyerɛkyerɛmu a ɛwɔ nkyekyem 10 no ma.] Saa nhoma yi ka Onyankopɔn atirimpɔw ma daakye ho nsɛm foforo a ɛyɛ anigye pii. Sɛ wopɛ sɛ wusua ho ade pii a, wubetumi agye eyi.” Yɛ nhyehyɛe sɛ wobɛsan aba, na yɛ nneɛma pɔtee a onii ko no kyerɛɛ ho anigye ne nea ɛhaw no ho kyerɛwtohɔ.
5 Sɛ wosan kɔ hɔ a, ma w’asɛm no mfa ofiewura no ho. Ebia wubetumi aka sɛ:
◼ “Ɛda a yɛkasae no, m’ani gyee asɛm bi a woka faa Onyankopɔn atirimpɔw ma asase ho no ho. [Ka asɛm a ɔkae no.] Mihuu asɛm bi a misusuw sɛ w’ani begye ho.” Bue Ahwehwɛde nhomawa no kɔ adesua 5. Kenkan na munsusuw adesua no mu nkyekyem pii ho bere dodow a wuhu sɛ ofiewura no kyerɛ ho anigye no. Fa nhomawa no ma no. Sɛ wokyerɛ bere a wobɛsan akɔ hɔ akɔtoa adesua no so wie a, ka mo asafo no nhyiam mmere kyerɛ ofiewura no. Ka Baguam Nhyiam ho asɛm, na to nsa frɛ no sɛ ɔmmra.
6 Sɛ wopɛ asɛntiaa a wɔka kyerɛ a ɛfa kratawa ho a, wubetumi aka eyi:
◼ “Mepɛ sɛ wo nsa ka kratawa a wɔato din Anidaso Bɛn na Ɛwɔ Hɔ ma Adɔfo a Wɔawuwu? yi.” Fa ma ofiewura no, na kyerɛ no sɛ onni w’akyi bere a wokenkan nkyekyem a edi kan no. Ma ommua asɛmmisa a ɛwɔ kasamu a etwa to no mu no. Kenkan nkyekyem a ɛto so abien no, na afei bue mfonini a ɛwɔ Adiyisɛm Awiei nhoma no kratafa 299 no. Toa so sɛ: “Saa nhoma yi ka owusɔre ne Bible bɔhyɛ ahorow a ɛyɛ anigye a ɛbɛba daakye no ho nsɛm pii. Wubetumi agye nea ekura me yi.” Yɛ sankɔhwɛ ho nhyehyɛe.
7 Nsa a yɛbɛto afrɛ afoforo anigye so no betumi aka wɔn ma wɔaba nkwa nsu a Yehowa de rema seesei no ho. Enti, momma yɛnse obiara a sukɔm de no sɛ, “Bra!”—Adi. 22:17.