LEVITIKO

1 Li Jeovae la stak ta ikʼel li Moisese, te la skʼopon tal ta karpana sventa tsobobbail,+ xi laj yalbee: 2 «Chiʼino ta loʼil li j-israeletike,* xi xavalbe yaʼiike: ‹Mi oy buchʼu junukal avuʼunik ti chavakʼbeik ta matanal jkotuk atsʼunbal chonbolomik li Jeovae, skʼan jaʼ xavakʼbeik jkotuk vakax o jkotuk chij.+

3 »›Mi jaʼ jkot vakax ti chakʼ ta chikʼbil matanale, skʼan jaʼuk jkot tot vakax ti muʼyuk ipe.*+ Skʼan xlokʼ ta yoʼonton stuk+ ti chichʼbe batel Jeova li ta yochebal karpana sventa tsobobbaile. 4 Akʼo yakʼ skʼob ta sjol li chikʼbil matanale, vaʼun ta xchʼambat yuʼun Dios li smotone xchiʼuk ta xchʼaybat li smule.

5 »›Te akʼo yichʼ milel ta yeloval Jeova li chʼiom tot vakaxe, li xnichʼnabtak Aaron ti jaʼ paleetike+ ta xichʼbeik batel Dios li xchʼichʼele, laje te tsvijbeik ta xokontak li skajleb matanal+ ti te oy ta yochebal karpana sventa tsobobbaile. 6 Skʼan slokʼesbeik snukulil xchiʼuk skʼan sbikʼtal bojilanik+ li chikʼbil matanale. 7 Li xnichʼnabtak Aaron ti jaʼ paleetike skʼan stsanbeik skʼakʼal li skajleb matanale,+ vaʼun akʼo yakʼbeik siʼil li kʼokʼe. 8 Li ta skajleb matanal ti oy siʼil xchiʼuk oy skʼakʼale jaʼ te akʼo slatsik ta sba li kʼusitik bikʼtal bojilanbile,+ jmoj akʼo yakʼik xchiʼuk sjol xchiʼuk li xepuʼale,* jaʼ tslatsik li xnichʼnabtak Aaron ti jaʼ paleetike. 9 Chichʼ sapel ta voʼ li sbikiltak xchiʼuk yoʼtake, li pale une akʼo xchikʼ skotol ta sba skajleb matanal yoʼ xtometuk muyel xchʼailal* yuʼun. Jaʼ jun matanal ti chichʼ chikʼel ta kʼokʼ ti lek xmuet yikʼ* chaʼi li Jeovae.+

10 »›Mi jaʼ jkot chij ti chakʼ ta chikʼbil matanale,+ skʼan jaʼuk jkot stot ti muʼyuk ipe,*+ jaʼuk jkot chʼiom tot chij o jkot chʼiom tot tentsun. 11 Te akʼo yichʼ milel ta yeloval Jeova ta xokon skajleb matanal li ta stukʼil nortee. Li xnichʼnabtak Aaron ti jaʼ paleetike te akʼo svijbeik xchʼichʼel li ta jujujot xokon skajleb matanale.+ 12 Skʼan sbikʼtal bojilan, mi laje, li palee te akʼo slats li ta skajleb matanal ti oy siʼil xchiʼuk oy skʼakʼale, jmoj akʼo yakʼbe li sjol xchiʼuk xepuʼale.* 13 Tsapbe ta voʼ li sbikiltak xchiʼuk yoʼtake, li palee chakʼbe skotol li Diose, mi laje, te chchikʼ ta skajleb matanal sventa xtometuk muyel xchʼailal* yuʼun. Jaʼ jun chikʼbil matanal, jun matanal ti chichʼ chikʼel ta kʼokʼ ti lek xmuet yikʼ* chaʼi li Jeovae.

14 »›Pe mi jaʼ jkot mut chakʼ ta chikʼbil matanal sventa Jeovae, skʼan jaʼuk xakʼ jkot tortola* o jkot chʼiom paloma.+ 15 Li palee te chikʼ batel ta skajleb matanal, mi laje, chtuchʼbe ta sniʼ yichʼak li sjole xchiʼuk te chchikʼ ta skajleb matanal sventa xtometuk muyel xchʼailal* yuʼun, pe li xchʼichʼele skʼan te xichʼ malel ta xokon li skajleb matanale. 16 Skʼan slokʼesbe li xvuche* xchiʼuk li skʼukʼumale, akʼo sjip batel ta yavil tan* ta xokon skajleb matanal,+ jaʼ li ta stukʼil slokʼeb kʼakʼale. 17 Akʼo sjavbe ta oʼlol spat ti bu tsakajtik li xikʼtake, pe mu me xtuchʼ-o ta j-echʼel. Li ta skajleb matanal ti oy siʼil xchiʼuk oy skʼakʼale, li palee te akʼo xchikʼ sventa xtometuk muyel xchʼailal* yuʼun. Jaʼ jun chikʼbil matanal, jun matanal ti chichʼ chikʼel ta kʼokʼ ti lek xmuet yikʼ* chaʼi li Jeovae.

2 »›Mi oy buchʼu junukal ti jaʼ chakʼbe ta chikʼbil matanal sat tsʼunobiletik li Jeovae,+ jaʼuk akʼo yakʼ ta matanal li arina ti lek nine. Skʼan xakʼbe aseite xchiʼuk sakil pom* ta sba.+ 2 Akʼo yichʼbe talel xnichʼnabtak Aaron ti jaʼ paleetike, li pale une tstsak jopuk li arina ti lek nine, li aseitee xchiʼuk skotol li sakil pome, laje chchikʼ ta skajleb matanal sventa xtometuk muyel xchʼailal* yuʼun,+ taje jaʼ jvokʼ matanal ti chtun sventa xichʼ vulesel ta jolile.* Jaʼ jun matanal ti chichʼ chikʼel ta kʼokʼ ti lek xmuet yikʼ* chaʼi Jeovae. 3 Li skomenal* matanal sat tsʼunobil une jaʼ yuʼun chkʼot li Aaron xchiʼuk xnichʼnabtake,+ jaʼ jun matanal ti toj echʼ xa noʼox chʼul+ sventa Jeova ti chikʼbil ta kʼokʼe.

4 »›Mi jaʼ chavakʼ ta matanal li kʼusi taʼajesbil ta ornoe, skʼan pasbiluk ta arina ti lek nine, set-set panetik ti muʼyuk slevadurail* ti yichʼoj aseitee o jayal gayetaetik ti muʼyuk slevadurail ti bonbil ta aseitee.+

5 »›Mi jaʼ chavakʼ ta matanal li sat tsʼunobiletik ti te pasbil ta lechlech takʼine,+ skʼan pasbiluk ta arina ti lek nine, ti muʼyuk slevadurail ti yichʼoj aseitee. 6 Skʼan xaxutilan* xchiʼuk skʼan xamalbe aseite ta sba.+ Jaʼ matanal sat tsʼunobiletik.

7 »›Mi jaʼ chavakʼ ta matanal li sat tsʼunobiletik ti te pasbil ta xaltene, skʼan pasbiluk ta arina ti lek nin ti yichʼoj aseitee. 8 Ichʼbo talel Jeova li matanal sat tsʼunobiletik ti laj yichʼ pasele, vaʼun chichʼ akʼbel li pale ti jaʼ chichʼ batel li ta skajleb matanale. 9 Li pale une tstsak jlomuk li matanal sat tsʼunobiletik ti jaʼ sventa snaʼobile,+ laje chchikʼ ta skajleb matanal sventa xtometuk muyel xchʼailal* yuʼun. Jaʼ jun matanal ti chichʼ chikʼel ta kʼokʼ ti lek xmuet yikʼ* chaʼi Jeovae.+ 10 Li skomenal* matanal sat tsʼunobile jaʼ yuʼun chkʼot li Aaron xchiʼuk xnichʼnabtake, jaʼ jun matanal ti toj echʼ xa noʼox chʼul sventa Jeova ti chikʼbil ta kʼokʼe.+

11 »›Skʼan muʼyukuk slevadurail li matanal sat tsʼunobil chavakʼbeik li Jeovae,+ yuʼun mu stakʼ xachikʼik sventa xtometuk muyel xchʼailal* li levadura o pom* ti chkʼot ta chikʼbil matanal sventa li Jeovae.

12 »›Xuʼ xavakʼbeik ta smoton Jeova kʼuchaʼal sba sat tsʼunobil,+ pe mu stakʼ xavichʼik tal ta skajleb matanal sventa lek xa xmuet yikʼe.*

13 »›Skʼan oyuk lek yatsʼamil skotol li matanal sat tsʼunobiletik chavakʼe; jech xtok persa me xavakʼbe yatsʼamil li matanal sat tsʼunobiletik ti jaʼ tsvulesbot ta ajol li strato Diose. Skotol li matanal chavakʼe skʼan oyuk yatsʼamil.+

14 »›Kʼalal jaʼ chavakʼbe Jeova ta matanal sat tsʼunobiletik li sba sat kʼusitik atsʼunoj ti lek xa yijike, jaʼ xavakʼ li achʼ sat tsʼunobil* ti bakubtasbil ta kʼokʼe, achʼ sat tsʼunobiletik ti jutuk noʼox juchʼbile. Jaʼ chkʼot ta matanal li sba sat kʼusitik chlokʼ avuʼun ti lek xa yijike.+ 15 Skʼan xavakʼbe aseite xchiʼuk sakil pom ta sba. Jaʼ matanal sat tsʼunobiletik. 16 Li palee chchikʼ yoʼ xtometuk muyel xchʼailal* sventa xkʼot ta jvokʼ matanal ti chtun sventa xichʼ vulesel ta jolile,+ jaʼ xkaltik, jaʼ chchikʼ jlomuk li sat tsʼunobiletik ti jutuk noʼox juchʼbile, li aseitee xchiʼuk skotol li sakil pom ti chkʼot ta chikʼbil matanal sventa li Jeovae.

3 »›Mi jaʼ jun milbil matanal sventa jun oʼontonal+ li kʼusi chakʼe, mi jaʼ jkot tot vakax o meʼ vakaxe, skʼan me muʼyukuk ip* ti chichʼ talel ta stojolal li Jeovae. 2 Akʼo yakʼ skʼob ta sjol li kʼusi chakʼ ta matanale, mi laje, akʼo yichʼ milel ta yochebal karpana sventa tsobobbail; li xnichʼnabtak Aaron ti jaʼ paleetike akʼo svijbeik xchʼichʼel ta xokontak li skajleb matanale. 3 Li milbil matanal sventa jun oʼontonale chakʼbe jlomuk Jeova ta matanal ti chichʼ chikʼel ta kʼokʼe:+ li xepuʼal+ xchʼute, skotol li xepuʼal sbikile, 4 li chaʼpʼej srinyon xchiʼuk xepuʼal ti te nopol oy ta slomoe. Jech xtok, kʼalal tslokʼesbe li chaʼpʼej srinyone,+ jmoj akʼo slokʼesbe xchiʼuk li xepuʼal sekube. 5 Li xnichʼnabtak Aaron ti jaʼ paleetike akʼo xchikʼik ta skajleb matanal sventa xtometuk muyel xchʼailal* yuʼunik, te akʼo yakʼik ta sba li chikʼbil matanal ti te oy ta sba li siʼ ti tsanal skʼakʼale;+ jaʼ jun matanal ti chichʼ chikʼel ta kʼokʼ ti lek xmuet yikʼ* chaʼi Jeovae.+

6 »›Mi jaʼ jkot chij chakʼbe Jeova ta milbil matanal sventa jun oʼontonale, jaʼ akʼo yakʼbe jkotuk stot o jkotuk smeʼ ti muʼyuk ipe.*+ 7 Mi jaʼ jkot chʼiom tot chij chakʼ ta matanale, te akʼo yakʼ ta yeloval Jeova. 8 Akʼo yakʼ skʼob ta sjol li matanal chakʼe, mi laje, akʼo yichʼ milel ta yochebal karpana sventa tsobobbail. Li xnichʼnabtak Aarone akʼo svijbeik xchʼichʼel ta xokontak li skajleb matanale. 9 Li xepuʼal milbil matanal sventa jun oʼontonale akʼo yakʼbe Jeova ta matanal ti chichʼ chikʼel ta kʼokʼe.+ Akʼo slokʼesbe sjunul li sne ti lek jupʼeme xchiʼuk akʼo slokʼesbe li xepuʼal xchʼute, skotol li xepuʼal sbikile, 10 akʼo slokʼesbe li chaʼpʼej srinyon xchiʼuk xepuʼal ti te nopol oy ta slomoe. Jech xtok, kʼalal tslokʼesbe li chaʼpʼej srinyone,+ jmoj akʼo slokʼesbe xchiʼuk li xepuʼal sekube. 11 Li palee akʼo xchikʼ ta skajleb matanal sventa xtometuk muyel xchʼailal* ti jaʼ chkʼot ta veʼlile,* jaʼ jun matanal ti chichʼ chikʼel ta kʼokʼ sventa li Jeovae.+

12 »›Mi jaʼ jkot tentsun chakʼ ta matanale, te akʼo yakʼ ta yeloval Jeova. 13 Akʼo yakʼ skʼob ta sjol li matanale, mi laje, akʼo yichʼ milel ta yochebal karpana sventa tsobobbail; vaʼun li xnichʼnabtak Aarone akʼo svijbeik xchʼichʼel ta xokontak li skajleb matanale. 14 Li xepuʼal xchʼute, skotol li xepuʼal sbikile,+ jaʼ akʼo yakʼbe Jeova ta matanal ti chichʼ chikʼel ta kʼokʼe 15 xchiʼuk li chaʼpʼej srinyon xchiʼuk xepuʼal ti te nopol oy ta slomoe. Jech xtok, kʼalal tslokʼesbe li chaʼpʼej srinyone, jmoj akʼo slokʼesbe xchiʼuk li xepuʼal sekube. 16 Li palee akʼo xchikʼ ta skajleb matanal sventa xtometuk muyel xchʼailal* ti jaʼ chkʼot ta veʼlile,* jaʼ jun matanal ti chichʼ chikʼel ta kʼokʼ ti lek xmuet yikʼe.* Jaʼ yuʼun Jeova skotol li xepuʼe.+

17 »›Jaʼ jun mantal sbatel osil avuʼunik xchiʼuk li jaykʼol kuxlejal chtal avuʼunike, buyuk noʼox ti chanakiike mu me xatiʼik li xepuʼe xchiʼuk li chʼichʼe›».+

4 Li Jeovae xi to laj yalbe li Moisese: 2 «Xi xavalbe li j-israeletike: ‹Xi skʼan pasel mi oy buchʼu la sta smul ta skoj ti mu yaleluk la spas+ jtosuk li kʼusitik yaloj Jeova ti mu stakʼ pasele:

3 »›Mi jaʼ la saʼ smul li pale ti tʼujbile+ xchiʼuk mi jaʼ tsta-o smul+ yuʼun li jteklume, skʼan xikʼbe talel Jeova jkot chʼiom tot vakax ti muʼyuk ip* yoʼ xakʼ ta matanal sventa li smule.+ 4 Akʼo yikʼ talel ta yeloval Jeova li ta yochebal karpana sventa tsobobbaile,+ vaʼun chakʼ skʼob ta sjol li tot vakaxe. Mi laje, akʼo smil ta yeloval Jeova.+ 5 Li pale ti tʼujbile+ tstsakbe jutuk li xchʼichʼel tot vakaxe, chichʼ ochel li ta yut karpana sventa tsobobbaile. 6 Li palee tstsʼaj sniʼ skʼob li ta xchʼichʼel+ tot vakaxe, vukub velta+ tsvij batel jutebuk ta stojolal Jeova li ta yeloval skortinail ti bu chʼule. 7 Jech xtok, li palee akʼo sbonbe jutebuk xchʼichʼel li ta xulubtak skajleb matanal sventa xchikʼobil pom ti oy sperfumeale+ ti te oy ta yeloval Jeova li ta karpana sventa tsobobbaile. Skotol li skomenal* xchʼichʼel tot vakaxe te akʼo smal li ta snakleb xchikʼobil matanal+ ti te oy li ta yochebal karpana sventa tsobobbaile.

8 »›Akʼo slokʼesbe skotol li xepuʼal tot vakax ti chtun ta matanal sventa mulile, jech xtok, tslokʼesbe li xepuʼal xchʼute xchiʼuk skotol li xepuʼal sbikile, 9 li chaʼpʼej srinyon xchiʼuk xepuʼal ti te nopol oy ta slomoe. Jech xtok, kʼalal tslokʼesbe li chaʼpʼej srinyone,+ jmoj akʼo slokʼesbe xchiʼuk li xepuʼal sekube. 10 Li kʼusi tslokʼesbee jaʼ koʼol li kʼusi la slokʼesbe li tot vakax chichʼ akʼel li ta milbil matanal sventa jun oʼontonale.+ Li palee akʼo xchikʼ ta skajleb chikʼbil matanal sventa xtometuk muyel xchʼailal* yuʼun.

11 »›Pe li snukulil tot vakaxe, li sjol xchiʼuk skotol li sbekʼtale, li yoʼtake, li sbikiltake xchiʼuk li yikʼobale*+ 12 —skotol li skomenal* tot vakaxe— akʼo yichʼ batel ta spat li karpanaetike. Te akʼo yichʼ batel ti bu lek sake, ti bu yavil tane.* Te chchikʼ ta sba li siʼ ti oy skʼakʼale.+ Te akʼo yichʼ chikʼel ti bu chichʼ jipel tane.

13 »›Mi jaʼ la saʼ smul sjunul li tsobobbail yuʼun Israel ta skoj ti oy kʼusi mu yaleluk la spasike,+ pe ti mu toʼox snaʼik mi oy kʼusi chopol la spasik ti yaloj Jeova akʼo mu spasike+ 14 xchiʼuk mi ta tsʼakal to la snaʼik ta sventa li mulile, li tsobobbaile akʼo yikʼ talel jkotuk chʼiom tot vakax yoʼ xkʼot ta matanal sventa mulil. Akʼo yikʼ talel ta yeloval li karpana sventa tsobobbaile. 15 Li moletik ta tsobobbail yuʼun Israele chakʼ skʼobik ta sjol li tot vakaxe, te ta yeloval Jeova. Te akʼo yichʼ milel ta yeloval Jeova.

16 »›Li pale ti tʼujbile tstsakbe jutuk li xchʼichʼel tot vakaxe, chichʼ ochel li ta yut karpana sventa tsobobbaile. 17 Li palee tstsʼaj sniʼ skʼob li ta xchʼichʼel tot vakaxe, vukub velta tsvij batel jutebuk ta stojolal Jeova li ta yeloval kortinae.+ 18 Jech xtok, akʼo sbonbe jutebuk xchʼichʼel li ta xulubtak skajleb matanal+ ti te oy ta yeloval Jeovae, jaʼ li skajleb matanal ti te oy ta karpana sventa tsobobbaile. Skotol li skomenal* xchʼichʼel tot vakaxe te akʼo smal li ta snakleb xchikʼobil matanal ti te oy li ta yochebal karpana sventa tsobobbaile.+ 19 Tslokʼesbe skotol li xepuʼale xchiʼuk chchikʼ ta skajleb matanal sventa xtometuk muyel xchʼailal* yuʼun.+ 20 Jech kʼuchaʼal la spasbe li yan tot vakax ti laj yichʼ akʼel ta matanal sventa li mulile, jaʼ jech skʼan spasbe li tot vakax liʼe. Taje jaʼ jech tspas li palee sventa sta perton li jteklume,+ vaʼun chichʼik akʼel ta perton. 21 Li tot vakaxe te akʼo yichʼ ikʼel batel ta spat li karpanaetike. Te akʼo yichʼ chikʼel jech kʼuchaʼal li baʼyel tot vakaxe.+ Jaʼ jun matanal sventa mulil ta stojolal li tsobobbaile.+

22 »›Mi oy la sta smul jun bankilal ta jteklum+ ta skoj ti mu yaleluk la spas jtosuk li kʼusitik yaloj Jeova Dios ti mu stakʼ pasele, ti oy xa smul kome, 23 o mi laj yakʼ venta ti la saʼ smul ta skoj ti muʼyuk la xchʼun jtosuk mantale, skʼan xikʼ talel jkot chʼiom tot tentsun ti muʼyuk ip* sventa xakʼ ta matanale. 24 Akʼo yakʼ skʼob ta sjol li chʼiom tot tentsune, mi laje, akʼo smil ta yeloval Jeova+ jaʼ ti bu onoʼox chichʼ milel li chikʼbil matanale. Jaʼ jun matanal sventa mulil. 25 Li palee tstsak jutuk ta sniʼ skʼob li xchʼichʼel matanal sventa mulile, ta sbonbe li xulubtak+ skajleb chikʼbil matanale. Skotol li skomenal* xchʼichʼel tot vakaxe te akʼo smal li ta snakleb xchikʼobil matanale.+ 26 Skotol li xepuʼale te chchikʼ ta skajleb matanal sventa xtometuk muyel xchʼailal* yuʼun, jech chchikʼ kʼuchaʼal li xepuʼal milbil matanal sventa jun oʼontonale;+ taje jaʼ jech skʼan spas li palee sventa sta perton li bankilale, vaʼun chichʼ akʼel ta perton.

27 »›Mi oy buchʼu junukal ta jteklum la sta smul ta skoj ti mu yaleluk la spas jtosuk li kʼusitik yaloj mantal Jeova ti mu stakʼ pasele+ 28 o mi laj yakʼ venta ti spasoj jtosuk smule, skʼan xikʼ talel jkot chʼiom meʼ tentsun ti muʼyuk ip* sventa xakʼ ta matanal ta skoj li smule. 29 Akʼo yakʼ skʼob ta sjol li matanal sventa mulile, mi laje, te akʼo smil ti bu onoʼox chichʼ milel li chikʼbil matanale.+ 30 Li palee tstsak jutuk ta sniʼ skʼob li xchʼichʼele, ta sbonbe li xulubtak skajleb chikʼbil matanale. Skotol li skomenal* xchʼichʼel chʼiom meʼ tentsune te akʼo smal li ta snakleb skajleb matanale.+ 31 Tslokʼesbe skotol xepuʼal+ jech kʼuchaʼal chichʼ lokʼesbel xepuʼal li milbil matanal sventa jun oʼontonale.+ Li palee ta xchikʼ ta skajleb matanal sventa xtometuk muyel xchʼailal* yuʼun ti lek xmuet yikʼ* chaʼi Jeovae. Jaʼ jech skʼan spas li palee sventa sta perton li jpasmulile, vaʼun chichʼ akʼel ta perton.

32 »›Pe mi jaʼ chakʼ ta matanal jkotuk chʼiom chij sventa li smule, jaʼ akʼo yikʼ talel jkotuk chʼiom meʼ chij ti muʼyuk ipe.* 33 Akʼo yakʼ skʼob ta sjol li matanal sventa mulile, mi laje, te akʼo smil ti bu onoʼox chichʼ milel li chikʼbil matanale+ yoʼ xkʼot ta matanal sventa mulil. 34 Li palee tstsakbe jutuk ta sniʼ skʼob li xchʼichʼel matanal sventa mulile, ta sbonbe li xulubtak skajleb chikʼbil matanale.+ Skotol li skomenal* xchʼichʼele te akʼo smal li ta snakleb skajleb matanale. 35 Tslokʼesbe skotol xepuʼal jech kʼuchaʼal chichʼ lokʼesbel xepuʼal li chʼiom tot chij ti chichʼ akʼel ta milbil matanal sventa jun oʼontonale. Li palee ta xchikʼ ta skajleb matanal sventa xtometuk muyel xchʼailal* yuʼun, te chakʼ ta sba li matanaletik sventa Jeova ti chikʼbil ta kʼokʼe.+ Jaʼ jech skʼan spas li palee sventa sta perton li jpasmulile, vaʼun chichʼ akʼel ta perton.+

5 »›Mi oy buchʼu kʼot ta testigo ta skoj ti laj yil o laj yaʼi ti oy buchʼu la spas smule,+ pe mi mu skʼan xal kʼalal chtakat ta ikʼel sventa chbat yalbe li smule, laj xa sta smul ek. Skʼan me stoj li smule.

2 »›Mi oy jun krixchano la sta ta tijel kʼusiuk noʼox ti ibal sbae,* mi jaʼ sbekʼtal chamem teʼtikal chonbolom ti ibal sbae o jkotuk tsʼunbal chonbolom ti ibal sbae o jkotuk bikʼit chon ti ibal sbae,+ ibal me sba chkom ek xchiʼuk oy smul chkom akʼo mi mu xakʼ venta. 3 O mi oy buchʼu muʼyuk xakʼ venta ti la sta ta tijel junuk krixchano o yan kʼusi ti ibal sba+ ta sat li Diose xchiʼuk mi laj yaʼi ta tsʼakal ti la stije, oy me smul chkʼot.

4 »›O mi oy junuk krixchano ti anil noʼox laj yakʼ ye ti oy kʼusi tspase —akʼo mi lek o mi chopol, buyuk noʼox ta xchibal—, pe ti muʼyuk laj yaʼi sba kʼalal jech laj yale, oy me smul chkʼot*+ mi laj yakʼ venta ta tsʼakal ti ta anil noʼox laj yakʼ yee.

5 »›Mi la sta smul ta skoj ti la spas jtosuk li kʼusitik taje, skʼan xal ta jamal+ ti kʼuxi la sta smule. 6 Jech xtok, skʼan xikʼbe talel Jeova jkotuk matanal sventa skʼan perton ta skoj li smul la spase,+ skʼan xikʼ talel jkotuk meʼ chij, xuʼ jaʼ jkotuk chʼiom meʼ chij o jkotuk chʼiom meʼ tentsun, jaʼ jun matanal sventa mulil. Vaʼun, li palee chakʼ ta matanal sventa sta perton li jpasmulile.

7 »›Yan mi mu xlokʼ-o stojol yuʼun sventa jkotuk chije, akʼo yikʼbe talel Jeova chaʼkotuk tortola* o chaʼkotuk chʼiom paloma+ yoʼ xkʼot ta matanal sventa skʼan perton ta skoj li smul la spase, li jkote jaʼ chkʼot ta matanal sventa mulil, li yane jaʼ sventa chikʼbil matanal.+ 8 Akʼo yikʼbe talel li palee. Li palee jaʼ baʼyel chakʼ li jkot ti chtun ta matanal sventa mulile, akʼo xtuchʼbe ta sniʼ yichʼak li sjole, te akʼo xtuchʼbe ta snukʼ, pe mu me xtuchʼ-o ta j-echʼel. 9 Li xchʼichʼel matanal sventa mulile akʼo svijbe jutebuk ta xokon li skajleb matanale, pe li skomenal* xchʼichʼele te akʼo yichʼ malel li ta snakleb skajleb matanale.+ Jaʼ jun matanal sventa mulil. 10 Li jkote jech akʼo spasbe kʼuchaʼal li chikʼbil matanal ti kʼu onoʼox yelan chichʼ pasele;+ jaʼ jech skʼan spas li palee sventa sta perton li jpasmulile, vaʼun chichʼ akʼel ta perton.+

11 »›Mi mu xlokʼ-o stojol yuʼun sventa chaʼkot tortola* o chaʼkot chʼiom paloma yoʼ xakʼ ta matanal sventa mulil ta skoj li smul spasoje, akʼo yichʼ talel jvokʼ ta lajunvokʼ li jun efa*+ arina ti lek nine. Mu me xakʼbe aseite ta sba mi jaʼuk sakil pom,* yuʼun jaʼ jun matanal sventa mulil. 12 Akʼo yichʼbe talel li palee, li palee akʼo stsakbe jopuk sventa xkʼot ta jvokʼ matanal ti chtun sventa xichʼ vulesel ta jolile.* Vaʼun, akʼo xchikʼ ta sba li matanal chikʼbil ta kʼokʼ ti jaʼ sventa Jeova li ta skajleb matanale yoʼ xtometuk muyel xchʼailal* yuʼun. Jaʼ jun matanal sventa mulil. 13 Jaʼ jech skʼan spas li palee sventa sta perton li buchʼu la spas smule, kʼusiuk noʼox mulil, jech ta sta perton.+ Li skomenal* matanale jaʼ chichʼ li palee+ jech kʼuchaʼal chichʼbe skomenal li matanal sat tsʼunobiletike›».+

14 Li Jeovae xi to laj yalbe li Moisese: 15 «Mi oy buchʼu mu yolbajuk muʼyuk la stsak ta venta li mantal ta sventa li kʼusitik chʼul ti jaʼ yuʼun Jeovae,+ akʼo yikʼbe talel Jeova jkot tot chij ti muʼyuk ipe* yoʼ xkʼot ta matanal sventa skʼan perton ta skoj li smule;+ ti kʼu yepal sbalil ta siklo* platae jaʼ ti kʼu yepal yalal jujun siklo ti bu chʼule.+ 16 Akʼo stoj li smul la sta ta stojolal li bu chʼule xchiʼuk akʼo to yakʼ jun ta voʼob ti kʼu yepal stojole.+ Akʼo yakʼbe li palee, vaʼun li palee jaʼ tstunes li tot chij ti laj yichʼ akʼel ta matanal sventa sta perton li jpasmulile,+ vaʼun chichʼ akʼel ta perton.+

17 »Mi oy buchʼu la sta smul ta skoj ti la spas jtosuk li kʼusitik yaloj mantal Jeova ti mu stakʼ pasele akʼo mi mu xakʼ venta ti la sta smule, oy me smul chkʼot xchiʼuk skʼan me stoj li smule.+ 18 Akʼo yikʼbe talel pale jkotuk tot chij ti muʼyuk ipe* jaʼ ti kʼu yepal albil stojole yoʼ xkʼot ta matanal sventa skʼanel perton.+ Li palee chakʼ ta matanal sventa sta perton li buchʼu muʼyuk xakʼ venta ti la spas smule, vaʼun chichʼ akʼel ta perton. 19 Jaʼ jun matanal sventa skʼanel perton. Ta melel, la sta smul ta stojolal Jeova».

6 Xi to albat yuʼun Jeova li Moisese: 2 «Mi oy buchʼu la saʼ smul xchiʼuk muʼyuk xa tukʼ chakʼ sba ta stojolal Jeova+ ta skoj ti mu xa jamaluk chal ta sventa li kʼusi akʼbat sbain yuʼun xchiʼil ta krixchanoale+ o ta sventa mi oy kʼusi akʼbat skʼeje,* o mi elkʼaje, o mi ta smanyail oy kʼusi laj yelkʼanbe li xchiʼil ta krixchanoale, 3 mi oy kʼusi chʼayem la sta, pe ti mu xal ta jamal ti la stae xchiʼuk ti jecheʼ tsvaʼan sba ta yalel ti muʼyuk la spas jtosuk li mulil liʼe,+ xi skʼan spase: 4 mi la spas jtosuk li kʼusitik taje xchiʼuk mi oy smul kome, skʼan sutes li kʼusi laj yelkʼane, li kʼusi la stsatsal kʼane, li kʼusi laj yelkʼan ta smanyaile, li kʼusi akʼbat sbaine, li kʼusi chʼayem la stae 5 o kʼusiuk noʼox ti la svaʼan sba ta yalel ti maʼuk la spase, jech xtok, skʼan tsʼakal xakʼbe xkʼexol+ xchiʼuk akʼo to yakʼ jun ta voʼob ti kʼu yepal stojole. Jaʼo chakʼbe yajval ti kʼusi kʼakʼalil vinaj li smule. 6 Akʼo yikʼbe talel pale jkotuk tot chij ti muʼyuk ip* yoʼ xakʼbe Jeova sventa skʼan perton ta skoj li smule, jaʼ ti kʼu yepal sbalil albile. Chtun ta matanal sventa skʼanel perton.+ 7 Li palee chakʼ ta matanal sventa x-akʼat ta perton yuʼun Jeova li jpasmulile, vaʼun chichʼ akʼel ta perton kʼusiuk noʼox ti smul spasoje».+

8 Li Jeovae xi to laj yalbe li Moisese: 9 «Xi xavalbe mantal li Aaron xchiʼuk xnichʼnabtake: ‹Liʼe jaʼ smantalil li chikʼbil matanale:+ li chikʼbil matanale skʼan te oyuk-o ta kʼokʼ sjunul akʼobal kʼalal to ta sob li ta skajleb matanale, skʼan tsanaluk-o skʼakʼal li skajleb matanale. 10 Li palee tslap li kʼuʼil pokʼil sventa pale ti pasbil ta linoe+ xchiʼuk tslap li xkʼox vex pasbil ta linoe.+ Vaʼun, tslokʼesbe stanil*+ li chikʼbil matanal ti kʼakʼ ta sba li skajleb matanale, te chakʼ ta xokon skajleb matanal. 11 Mi laje, tslokʼ li skʼuʼ spokʼtake,+ tslap yan kʼuʼil pokʼiletik sventa xichʼ batel ta spat karpanaetik+ li tane, te chichʼ batel ti bu lek sake. 12 Skʼan tsanaluk-o li kʼokʼ ta skajleb matanale. Mu me xtupʼ. Li palee jujun sob skʼan xakʼbe siʼil+ xchiʼuk te akʼo slats li chikʼbil matanal ta sbae, jech xtok, akʼo xchikʼbe li xepuʼal matanal sventa jun oʼontonale yoʼ xtometuk muyel xchʼailal* yuʼun.+ 13 Tsanaluk-o me li kʼokʼ ta skajleb matanale, mu me xtupʼ.

14 »›Liʼe jaʼ li smantalil matanal sat tsʼunobiletike:+ voʼoxuk li xnichʼnabtak Aarone skʼan xavichʼik ochel ta yeloval Jeova ta stukʼil li skajleb matanale. 15 Jun xnichʼon Aaron akʼo stsak jopuk li arina ti lek nin ti laj yichʼ akʼel ta matanal sat tsʼunobiletike, jech xtok, ta stsakbe jutebuk li s-aseiteale xchiʼuk skotol li sakil pom* oy ta sba li matanal sat tsʼunobiletike. Te chchikʼ ta sba skajleb matanal yoʼ xtometuk muyel xchʼailal* yuʼun ti lek xmuet yikʼ* sventa xkʼot ta jvokʼ matanal ti chtun sventa svulesobil ta sjol* li Jeovae.+ 16 Li skomenale* jaʼ tslajesik+ li Aaron xchiʼuk xnichʼnabtake. Akʼo spasik ta pan ti muʼyuk slevadurail* ti bu chʼule, te akʼo slajesik ta yamakʼil* li karpana sventa tsobobbaile.+ 17 Mu me jmojuk xichʼ taʼajesel xchiʼuk li kʼusi yichʼoj slevaduraile,+ yuʼun kakʼojbeik li jmoton ti chikʼbil ta kʼokʼe.+ Toj echʼ xa noʼox chʼul kʼotem+ jech kʼuchaʼal li matanal sventa mulil xchiʼuk li matanal sventa skʼanel pertone. 18 Li matanaletik sventa Jeova ti chikʼbil ta kʼokʼe+ xuʼ slajesik skotol li viniketik ti jaʼ xnichʼnabtak Aarone,+ jaʼ sparteik kʼotem sventa sbatel osil ti jaykʼol kuxlejal chtal avuʼunik ta tsʼakale. Chʼul chkom skotol li buchʼu tspik li matanaletike›».

19 Li Jeovae xi laj yalbe yan velta li Moisese: 20 «Li matanal chakʼbeik Jeova li Aaron xchiʼuk xnichʼnabtak kʼalal chichʼ tʼujel li Aarone,+ jaʼ liʼe: chakʼik jvokʼ ta lajunvokʼ jun efa*+ arina ti lek nine, j-oʼlol chakʼik ta sob xchiʼuk j-oʼlol chakʼik kʼalal chʼayem xa ox batel kʼakʼale. Jech chakʼik kʼuchaʼal onoʼox li matanal sat tsʼunobiletike.+ 21 Kapo lek ta aseite, ta tsʼakale te xavakʼ taʼajuk ta lechlech takʼin.+ Xutilano* jech kʼuchaʼal kʼalal chichʼ taʼajesel ta orno li matanal sat tsʼunobiletike. Lek kapbil ta aseite xavichʼ tal. Ichʼo tal sventa xkʼot ta matanal ti lek xmuet yikʼ* chaʼi li Jeovae. 22 Jaʼ jech tspas li pale ti tʼujbil ta xkʼexol Aaron ti jaʼ junuk xnichʼnabe.+ Jaʼ jun mantal sbatel osil: chichʼ chikʼel skotol sventa xkʼot ta matanal ti xtomet muyel xchʼailal* ta stojolal Jeovae. 23 Li matanal sat tsʼunobiletik chakʼ li jun palee chichʼ chikʼel skotol. Mu me stakʼ lajesel».

24 Li Jeovae xi to laj yalbe yan velta li Moisese: 25 «Xi xavalbe li Aaron xchiʼuk xnichʼnabtake: ‹Liʼe jaʼ smantalil li matanal sventa mulile:+ ta yeloval Jeova akʼo yichʼ milel li matanal sventa mulile, jaʼ ti bu onoʼox chichʼ milel li chikʼbil matanale.+ Toj echʼ xa noʼox chʼul. 26 Li pale ti jaʼ chakʼ li matanal sventa mulile jaʼ akʼo slajes.+ Te akʼo slajes ti bu chʼule, te ta yamakʼil* karpana sventa tsobobbail.+

27 »›Skotol li kʼusitik tsta ta tijbel sbekʼtale chʼul chkom. Jech xtok, mi oy buchʼu laj yatin skʼuʼ spokʼ li xchʼichʼele, te xachukʼ ti bu chʼul li kʼusi laj yatin chʼichʼe. 28 Mi ta lumal pʼin laj yichʼ taʼajesele, akʼo yichʼ vokʼel. Yan mi ta kovre pʼin laj yichʼ taʼajesele, skʼan lek xichʼ juxel xchiʼuk skʼan pokel lek ta voʼ.

29 »›Skotol li viniketik ti jaʼ paleetike ta slajesik.+ Toj echʼ xa noʼox chʼul.+ 30 Pe mi laj yichʼ tikʼel ochel jutebuk li xchʼichʼel matanal sventa mulil li ta karpana sventa tsobobbail ti jaʼ li matanal ti laj yichʼ-o tael perton ti bu chʼule,+ mu me xuʼ xichʼ tiʼel. Skʼan chikʼel ta kʼokʼ.

7 »›Liʼe jaʼ smantalil li matanal sventa skʼanel pertone:+ toj echʼ xa noʼox chʼul. 2 Li matanal sventa skʼanel pertone te chichʼ milel ti bu chichʼ milel li chikʼbil matanaletike. Li xchʼichʼele+ te chichʼ vijel li ta xokontak skajleb matanale.+ 3 Akʼo yichʼbe talel Dios skotol li xepuʼale+ xchiʼuk li sne ti lek jupʼeme, li xepuʼal sbikile, 4 li chaʼpʼej srinyon xchiʼuk xepuʼal ti te nopol oy ta slomoe. Jech xtok, kʼalal tslokʼesbe li chaʼpʼej srinyone,+ jmoj tslokʼesbe xchiʼuk li xepuʼal sekube. 5 Li palee chchikʼ ta skajleb matanal sventa xtometuk muyel xchʼailal* yuʼun yoʼ xkʼot ta matanal ti chikʼbil ta kʼokʼ sventa li Jeovae.+ Jaʼ jun matanal sventa skʼanel perton. 6 Skotol li viniketik ti jaʼ paleetike ta slajesik.+ Te ta slajesik ti bu chʼule. Toj echʼ xa noʼox chʼul.+ 7 Koʼol smantalil li matanal sventa mulil xchiʼuk li matanal sventa skʼanel pertone; li matanale jaʼ yuʼun chkʼot li pale ti jaʼ la stunes sventa sta perton li jpasmulile.+

8 »›Kʼalal chakʼ chikʼbil matanal li pale ta sventa li jun krixchanoe, jaʼ yuʼun chkʼot li snukulil+ chikʼbil matanal ti laj yichʼ ichʼbel talel li palee.

9 »›Skotol li matanal sat tsʼunobiletik ti chtaʼaj ta orno o ti laj yichʼ meltsanel ta xalten o ta lechlech takʼine+ jaʼ yuʼun chkʼot li pale ti laj yichʼbe talel Diose. Jaʼ yuʼun chkʼot.+ 10 Pe skotol li matanal sat tsʼunobiletik ti kapbil ta aseite+ o ti takine+ jaʼ yuʼun chkʼot li xnichʼnabtak Aarone; koʼol yepal chichʼik jujun.

11 »›Liʼe jaʼ smantalil li milbil matanal sventa jun oʼontonal+ ti chichʼ akʼbel li Jeovae: 12 mi jaʼ sventa stojel ta vokol+ li milbil matanal chakʼe, jmoj akʼo yakʼ xchiʼuk set-set panetik ti muʼyuk slevadurail* ti yichʼoj aseitee, jayal gayetaetik ti muʼyuk slevadurail ti bonbil ta aseitee xchiʼuk set-set panetik ti pasbil ta arina ti lek nin xchiʼuk ti lek kapbil ta aseitee. 13 Jech xtok, akʼo yakʼ set-set panetik ti oy slevaduraile, jmoj akʼo yakʼ xchiʼuk li milbil matanal sventa stojel ta vokol ti jaʼ li milbil matanal sventa jun oʼontonale. 14 Chichʼbe talel Dios jun ta jujutos li matanal chakʼe, jaʼ jun chʼul matanal sventa Jeova. Jaʼ yuʼun chkʼot li pale ti tsvijbe li xchʼichʼel milbil matanaletik sventa jun oʼontonale.+ 15 Li sbekʼtal milbil matanal sventa stojel ta vokol ti jaʼ li milbil matanal sventa jun oʼontonale akʼo yichʼ lajesel ti kʼusi kʼakʼalil laj yakʼe, mu me skʼej* jutebuk kʼalal to ta yokʼomal.+

16 »›Mi jaʼ sventa oy kʼusi chakʼ ye+ spasel ti chakʼ li milbil matanale o mi lokʼ noʼox ta yoʼonton stuke,+ ta xichʼ tiʼel ti kʼusi kʼakʼalil laj yakʼ li milbil matanale. Jech xtok, xuʼ to xichʼ tiʼel ta yokʼomal mi komenaje.* 17 Yan mi oy to kʼusi komenaj* ta yoxibal kʼakʼal li kʼusi laj yichʼ akʼel ta milbil matanale, skʼan xichʼ chikʼel ta kʼokʼ.+ 18 Mi yuʼun oy to kʼusi komenaj* ta yoxibal kʼakʼal li kʼusi laj yichʼ akʼel ta milbil matanal sventa jun oʼontonal xchiʼuk mi laj yichʼ tiʼele, muʼyuk xa me lek ch-ilat li buchʼu laj yakʼe. Muʼyuk tstabe sbalil li matanal laj yakʼe; kʼajomal xa noʼox chopol chkʼot li skomenal matanale; jech xtok chichʼ kastigo+ li buchʼu tstiʼe. 19 Mi laj yatin kʼusi ibal sba* li skomenal* matanale, mu stakʼ tiʼel. Skʼan chikʼel ta kʼokʼ. Li sbekʼtal ti chʼabal xchopolile jaʼ noʼox xuʼ stiʼ li buchʼu chʼabal xchopolile.

20 »›Mi oy junuk krixchano ti ibal sba ti tstiʼ li bekʼet ti jaʼ sventa Jeova ti laj yichʼ akʼel ta milbil matanal sventa jun oʼontonale, skʼan xichʼ milel li ta steklumale.+ 21 Mi oy buchʼu la sta ta tijel kʼusiuk noʼox ti ibal sbae, mi jaʼ jun krixchano+ o jkotuk chonbolom+ ti ibal sbae o kʼusiuk noʼox ti ibal sba ti chakʼ ib oʼontone+ xchiʼuk ti tstibe xtok li sbekʼtal milbil matanal sventa jun oʼontonal ti jaʼ sventa Jeovae, skʼan xichʼ milel li ta steklumale›».

22 Li Jeovae xi to laj yalbe li Moisese: 23 «Xi xavalbe li j-israeletike: ‹Mu me xatibeik li xepuʼal+ tot vakaxe, li xepuʼal chʼiom tot chije mi jaʼuk li xepuʼal tentsune. 24 Li xepuʼal chonbolom ti chamem laj yichʼ taele o li xepuʼal jkotuk chonbolom ti laj yichʼ milel ta yan chonbolome xuʼ xatunesik ta yan kʼusitik, pe mu xuʼ xatiʼik.+ 25 Buchʼuuk noʼox ti tstibe xepuʼal jkotuk chonbolom ti chakʼ ta matanal ti chichʼ chikʼel ta kʼokʼ sventa li Jeovae skʼan xichʼ milel li ta steklumale.

26 »›Mu me xatiʼik jutebuk chʼichʼ+ ti butik chanakiike akʼo mi jaʼ xchʼichʼel mutetik o yan chonbolometik. 27 Skʼan xichʼ milel+ ta steklumal buchʼuuk noʼox ti tstiʼ jutebuk chʼichʼe›».

28 Li Jeovae xi to laj yalbe li Moisese: 29 «Xi xavalbe li j-israeletike: ‹Mi oy buchʼu chichʼbe talel Jeova milbil matanal sventa jun oʼontonale, skʼan xakʼbe jlomuk Jeova li milbil matanale.+ 30 Chichʼ talel ta skʼob stuk li xepuʼal+ xchiʼuk li stiʼ yoʼontone, jaʼ jun matanal ti chichʼ chikʼel ta kʼokʼ sventa li Jeovae, vaʼun tsyeʼilan ta jujujot sventa xkʼot ta yebil matanal ta stojolal Jeova.+ 31 Li palee chchikʼbe xepuʼal ta skajleb matanal yoʼ xtometuk muyel xchʼailal* yuʼun,+ yan li stiʼ yoʼontone jaʼ yuʼun chkʼot li Aaron xchiʼuk xnichʼnabtake.+

32 »›Li sbatsʼi-oʼ milbil matanal sventa jun oʼontonal+ chavakʼike jaʼ chkʼot ta yuʼun pale kʼuchaʼal chʼul matanal. 33 Li xnichʼon Aaron ti jaʼ chakʼbe Dios li xchʼichʼel xchiʼuk xepuʼal milbil matanal sventa jun oʼontonale jaʼ chichʼbe li sbatsʼi-oʼe.+ 34 Yuʼun voʼon chkichʼbe li stiʼ yoʼonton yebil matanale xchiʼuk li yoʼ chʼul matanal ti laj yakʼik ta matanal j-israeletik sventa jun oʼontonale, vaʼun jaʼ chkakʼbe li pale Aaron xchiʼuk xnichʼnabtake, jaʼ jun mantal sbatel osil sventa li j-israeletike.+

35 »›Taje jaʼ li kʼusi chichʼ chʼakel komel li ta matanal ti chichʼ chikʼel ta kʼokʼ sventa Jeova ti jaʼ chkʼot ta yuʼun li paleetike, li Aaron xchiʼuk xnichʼnabtake, jaʼ jech mantal kom ti kʼusi kʼakʼalil nopajesatik sventa xtunik ta paleal ta stojolal Jeovae.+ 36 Ti kʼusi kʼakʼalil laj yichʼik tʼujele+ jaʼo laj yal mantal Jeova ti jaʼ akʼo yichʼik akʼbel paleetik li kʼusitik chichʼ chʼakel komel li ta matanal chakʼ j-israeletike. Jaʼ jun mantal sbatel osil avuʼunik xchiʼuk li jaykʼol kuxlejal chtal yuʼunik ta tsʼakale›».

37 Taje jaʼ smantalil li chikʼbil matanale,+ li matanal sat tsʼunobiletike,+ li matanal sventa mulile,+ li matanal sventa skʼanel pertone,+ li milbil matanal sventa svaʼanel paleetike+ xchiʼuk li milbil matanal sventa jun oʼontonal+ 38 jech kʼuchaʼal albat mantal yuʼun Jeova li Moises ta vits Sinai+ kʼalal laj yalbe mantal j-israeletik ti akʼo yichʼbeik talel smoton Jeova kʼalal te toʼox oyik ta takixokol balumil ta Sinaie.+

8 Li Jeovae xi to laj yalbe li Moisese: 2 «Ikʼo talel li Aaron xchiʼuk xnichʼnabtake+ xchiʼuk ichʼo talel li kʼuʼil pokʼiletike,+ li aseite ti chtun kʼalal oy buchʼu chichʼ tʼujele,+ li tot vakax chichʼ akʼel ta matanal sventa mulile, li chaʼkot tot chije, li moch ti bu tikʼil panetik ti muʼyuk slevaduraile*+ 3 xchiʼuk tako ta ikʼel sjunul li jteklum ta yochebal karpana sventa tsobobbaile».

4 Li Moisese jech la spas kʼuchaʼal albat mantal yuʼun li Jeovae, vaʼun te tal skotolik ta yochebal karpana sventa tsobobbail. 5 Li Moisese xi laj yalbe li tsobobbaile: «Jech laj yal mantal Jeova ti skʼan jpastike». 6 Jaʼ yuʼun, li Moisese nopajik tal yuʼun li Aaron xchiʼuk xnichʼnabtake xchiʼuk la spokan ta voʼ.*+ 7 Laj yakʼbe slap li jlik kʼuʼil pokʼil+ ti oy skuadroaltake xchiʼuk la skʼambe ta xchʼut li xchuke,+ laje laj yakʼbe slap li jlik natil kʼuʼil pokʼil ti muʼyuk skʼobe+ xchiʼuk laj yakʼbe slap li mokankʼuʼile,+ vaʼun la stsinbe lek li jalbil chukil*+ ti te napʼal ta mokankʼuʼile, lek la stsinbe. 8 Laje, te la snapʼan ta sba mokankʼuʼil li smak stiʼ oʼontonale+ xchiʼuk te laj yakʼ li Urim xchiʼuk Tumime.+ 9 Vaʼun, la stsʼotbe ta sjol li stsʼotobil sjole,+ laje te laj yakʼbe ta yeloval stsʼotobil sjol li jpech chʼul lamina ta oro ti solel stsʼayayete*+ jech kʼuchaʼal albat mantal yuʼun Jeova li Moisese.

10 Li Moisese la stsak li aseite ti chtun kʼalal oy buchʼu chichʼ tʼujele, laj yakʼbe li karpanae xchiʼuk skotol li kʼusitik te oye,+ jech la spas sventa xchʼultajes. 11 Laje, la stsak jutebuk li aseitee, la svijbe vukub velta li skajleb matanal xchiʼuk skotol li kʼusitik te chtune xchiʼuk li perol xchiʼuk snaklebe, jaʼ sventa xchʼultajes ti jech la spase. 12 Ta slajebal xae, la svijbe ta sjol Aaron jutebuk li aseite ti chtun kʼalal oy buchʼu chichʼ tʼujele, jech la stʼuj sventa xchʼultajes.+

13 Li Moisese nopaj tal yuʼun li xnichʼnabtak Aarone, laj yakʼbe slap li skʼuʼ spokʼike xchiʼuk la skʼambe ta xchʼutik li xchukike, la stsʼotbe ta sjolik li xpix sjolike+ jech kʼuchaʼal albat mantal yuʼun Jeova li Moisese.

14 Laje, laj yikʼ talel li tot vakax ti chichʼ akʼel ta matanal sventa mulile, vaʼun li Aaron xchiʼuk xnichʼnabtake laj yakʼ skʼobik ta sjol li tot vakax ti chichʼ akʼel ta matanal sventa mulile.+ 15 Li Moisese la smil li tot vakaxe xchiʼuk la stsak jutuk ta sniʼ skʼob li xchʼichʼele,+ la sbonbe li xulubtak skajleb matanal ti te oy ta jujujot xchikine. Jech la sakubtas ta mulil li skajleb matanale, pe li skomenal* xchʼichʼele te la smal batel li ta snakleb skajleb matanale sventa xchʼultajes yoʼ te xichʼ akʼel milbil matanale. 16 Laje, li Moisese la stsakbe skotol li xepuʼal sbikile, li xepuʼal sekube, li chaʼpʼej srinyon xchiʼuk xepuʼaltake, la xchikʼ ta skajleb matanal sventa xtometuk muyel xchʼailal* yuʼun.+ 17 Li skomenal* tot vakaxe, jaʼ xkaltik, li snukulile, li sbekʼtale xchiʼuk li yikʼobale* laj yakʼ ta chikʼel ta spat ti bu spasoj skarpanaik+ jech kʼuchaʼal albat mantal yuʼun Jeova li Moisese.

18 Li Moisese la snopajes talel xtok li tot chij ti chtun ta chikʼbil matanale, vaʼun li Aaron xchiʼuk xnichʼnabtake laj yakʼ skʼobik ta sjol li tot chije.+ 19 Li Moisese la smil li tot chije xchiʼuk la svijbe ta xokontak skajleb matanal li xchʼichʼele. 20 Li Moisese la sbikʼtal bojilan li tot chije, laje la xchikʼbe li sjole, li sbekʼtal ti bikʼitik la sbojilane xchiʼuk li xepuʼale* sventa xtometuk muyel xchʼailal* yuʼun. 21 La sapbe ta voʼ li sbikiltak xchiʼuk yoʼtake, li Moises une la xchikʼ li tot chij ta skajleb matanal sventa xtometuk muyel xchʼailal* yuʼun. Jaʼ jun chikʼbil matanal ti lek xmuet yikʼe.* Jaʼ jun matanal sventa Jeova ti chikʼbil ta kʼokʼ jech kʼuchaʼal albat mantal yuʼun Jeova li Moisese.

22 Laje, laj yikʼ talel li xchaʼkotal tot chije, jaʼ li chij ti chtun sventa chichʼ vaʼanel paleetike,+ vaʼun li Aaron xchiʼuk xnichʼnabtake laj yakʼ skʼobik ta sjol li tot chije.+ 23 Li Moisese la smil li tot chije xchiʼuk la stsakbe juteb li xchʼichʼele, la sbonbe ta svelvelul sbatsʼichikin li Aarone xchiʼuk ta smeʼ sbatsʼikʼob xchiʼuk ta smeʼ sbatsʼi-ok. 24 Ta tsʼakal li Moisese la snopajes talel li xnichʼnabtak Aarone xchiʼuk la sbonbe ta svelvelul sbatsʼichikinik li chʼichʼe xchiʼuk la sbonbe ta smeʼ sbatsʼikʼobik xchiʼuk ta smeʼ sbatsʼi-okik; pe li skomenal* chʼichʼe te la svij batel li ta xokontak skajleb matanale.+

25 Laje, la stsakbe li xepuʼale, li sne ti lek jupʼeme, skotol li xepuʼal sbikile, li xepuʼal sekube, li chaʼpʼej srinyon xchiʼuk xepuʼale xchiʼuk li sbatsʼi-oʼe.+ 26 La stsak lokʼel jun set-set pan ti muʼyuk slevadurail li ta xmochal pan ti muʼyuk slevadurail ti te oy ta yeloval Jeovae,+ jun set-set pan ti yichʼoj aseitee+ xchiʼuk la stsak jpech jayal gayeta. Te laj yakʼ ta sba li jujutuchʼ xepuʼe xchiʼuk ta sba li sbatsʼi-oʼ tot chije. 27 Laje, laj yakʼbe skotol ta skʼob li Aarone xchiʼuk ta skʼob li xnichʼnabtake, te lik syeʼilan ta jujujot sventa xkʼot ta yebil matanal ta stojolal Jeova. 28 Li Moisese la stsakbe sutel li ta skʼobike, te laj yakʼ ta sba li chikʼbil matanale, la xchikʼ ta skajleb matanal sventa xtometuk muyel xchʼailal* yuʼun. Jaʼ jun milbil matanal ti lek xmuet yikʼ* ti jaʼ sventa svaʼanel paleetike. Jaʼ jun matanal ti chichʼ chikʼel ta kʼokʼ sventa Jeovae.

29 Li Moisese la stsakbe li stiʼ yoʼontone, te lik syeʼilan ta jujujot sventa xkʼot ta yebil matanal ta stojolal Jeova.+ Li stiʼ yoʼonton tot chij ti chtun sventa chichʼ vaʼanel paleetike jaʼ kʼot ta yuʼun li Moises jech kʼuchaʼal albat mantal yuʼun Jeova li Moisese.+

30 Li Moisese la stsak juteb aseite ti chtun kʼalal oy buchʼu chichʼ tʼujele+ xchiʼuk la stsak juteb li chʼichʼ ti te oy ta sba skajleb matanale, la svijbe ta sba li Aaron xchiʼuk skʼuʼ spokʼtake xchiʼuk la svijbe li xnichʼnabtak+ xchiʼuk li skʼuʼ spokʼike. Jaʼ jech la xchʼultajes li Aaron xchiʼuk skʼuʼ spokʼtake, jech la xchʼultajes ek li xnichʼnabtak xchiʼuk skʼuʼ spokʼike.+

31 Vaʼun, li Moisese xi laj yalbe li Aaron xchiʼuk xnichʼnabtake: «Te xalakanik+ ta yochebal karpana sventa tsobobbail li sbekʼtale, te xatiʼik li bekʼete xchiʼuk li pan ti te tikʼil ta xmochal pan sventa svaʼanel paleetike, jech kʼuchaʼal xi laj kichʼ albel mantale: ‹Akʼo stiʼik+ li Aaron xchiʼuk xnichʼnabtake›. 32 Li skomenal* bekʼet xchiʼuk pane skʼan me xachikʼik ta kʼokʼ.+ 33 Vukub kʼakʼal mu me xanamajik li ta yochebal karpana sventa tsobobbaile, jaʼ to mi tsʼaki ti kʼu sjalil chavichʼik-o vaʼanel ta paleale, yuʼun chjalij vukub kʼakʼal ti chavichʼik vaʼanel ta paleale.*+ 34 Jech laj yal mantal Jeova li kʼusitik laj xa jpastik avi sventa xataik pertone.+ 35 Te chakomik ta kʼakʼal akʼobal li ta yochebal karpana sventa tsobobbaile, jech xapasik vukub kʼakʼal.+ Sventa mu xachamike, pasik li kʼusi yakʼoj abainik Jeovae,+ yuʼun jaʼ jech laj kichʼ albel mantal».

36 Li Aaron xchiʼuk xnichʼnabtake jech tajek la spasik skotol jech kʼuchaʼal albat mantal yuʼun Jeova li Moisese.

9 Li ta xvaxakibal kʼakʼale,+ li Moisese la stak ta ikʼel li Aaron xchiʼuk xnichʼnabtake xchiʼuk li moletik ta Israele. 2 Xi laj yalbe li Aarone: «Tsako jkot chʼiom tot vakax ti chtun avuʼun ta matanal sventa mulile+ xchiʼuk jkot tot chij ti chtun ta chikʼbil matanale, muʼyukuk ipik* li chonbolometik taje, vaʼun ikʼo tal ta yeloval Jeova. 3 Pe xi xavalbe li j-israeletike: ‹Tsakik jkot tot tentsun ti chtun ta matanal sventa mulile xchiʼuk jkot chʼiom tot vakax xchiʼuk jkot chʼiom tot chij ti jun to jabil svokʼelike xchiʼuk ti muʼyuk ipike* sventa xtun ta chikʼbil matanal 4 xchiʼuk ikʼik tal jkot tot vakax xchiʼuk jkot tot chij ti chtun ta matanaletik sventa jun oʼontonal+ yoʼ xamilik ta yeloval Jeovae, jech xtok, ichʼik talel matanal sat tsʼunobiletik+ ti kapbil ta aseitee, yuʼun chakʼ sba ta ilel Jeova ta atojolalik li avie›».+

5 Jaʼ yuʼun, laj yichʼik talel ta yeloval karpana sventa tsobobbail li kʼusi laj yal Moisese. Vaʼun, nopaj talel sjunul li tsobobbaile xchiʼuk te vaʼal komik ta yeloval Jeova. 6 Xi laj yal li Moisese: «Sventa xakʼ ta ilel smukʼulal Jeova ta atojolalike,+ jech yaloj mantal Jeova ti akʼo xapasike». 7 Xi albat yuʼun Moises li Aarone: «Sventa xata perton+ xchiʼuk li avutsʼ avalale, nopajan batel ta skajleb matanal xchiʼuk te xavakʼ li matanal sventa mulil avuʼune xchiʼuk li chikʼbil matanal avuʼune,+ jech xtok, te xavakʼ li matanal chichʼ talel jteklume+ sventa staik perton+ jech kʼuchaʼal laj yalbot mantal li Jeovae».

8 Anil noʼox nopaj batel ta skajleb matanal li Aarone xchiʼuk la smil li chʼiom tot vakax ti chakʼ ta matanal sventa smule.+ 9 Li xnichʼnabtak Aarone jaʼ laj yichʼbeik batel li chʼichʼe,+ vaʼun la stsʼaj sniʼ skʼob li ta chʼichʼe, laje la sbonbe li xulubtak skajleb matanale, pe skotol li skomenal* chʼichʼe te la smal li ta snakleb skajleb matanale.+ 10 Sventa xtometuk muyel xchʼailal* yuʼun li xepuʼale, li srinyontake xchiʼuk li xepuʼal sekub ti chtun ta matanal sventa mulile, la xchikʼ ta sba skajleb matanal jech kʼuchaʼal albat mantal yuʼun Jeova li Moisese.+ 11 Li sbekʼtal xchiʼuk snukulile te la xchikʼ ta kʼokʼ ta spat ti bu spasoj skarpanaike.+

12 Vaʼun, la smil li chikʼbil matanale, laje li xnichʼnabtak Aarone laj yichʼbeik batel li xchʼichʼele, te la svij ta xokontak li skajleb matanale.+ 13 Laj yichʼbeik tal xtok li sjole xchiʼuk li sbekʼtal ti bikʼitik bojilanbil ti chtun ta chikʼbil matanale, jech la xchikʼ ta sba skajleb matanal sventa xtometuk muyel xchʼailal* yuʼun. 14 Jech xtok, la sapbe li sbikiltak xchiʼuk yoʼtake, laje la xchikʼ ta sba skajleb matanal sventa xtometuk muyel xchʼailal* yuʼun ta sba li chikʼbil matanale.

15 Ta tsʼakale, laj yakʼ li matanal ti yichʼoj tal li jteklume, la stsak li tot tentsun ti chtun ta matanal sventa smul jteklume, laje la smil, jech laj yakʼ ta matanal sventa mulil jech kʼuchaʼal laj yakʼ li baʼyele. 16 Laj yakʼ li chikʼbil matanale, jech la spasbe ti kʼu onoʼox yelan chichʼ pasele.+

17 Laje, laj yakʼ li matanal sat tsʼunobiletike,+ la stsak jop xchiʼuk la xchikʼ ta sba skajleb matanal sventa xtometuk muyel xchʼailal* yuʼun, pe parte li chikʼbil matanal laj yichʼ akʼel ta sobe.+

18 Ta tsʼakale, la smil li tot vakax xchiʼuk li tot chij ti chtun ta matanal sventa jun oʼontonal ti jaʼ sventa li jteklume. Li xnichʼnabtak Aaron une laj yichʼbeik batel li xchʼichʼele, jech la svij ta xokontak li skajleb matanale.+ 19 Yan li jujutuchʼ xepuʼal tot vakaxe,+ li sjupʼemal sne tot chije, li xepuʼal sbikilike, li srinyonike, li xepuʼal sekubike,+ 20 skotol li jujutuchʼ xepuʼaltak taje, te laj yakʼik ta sba stiʼ yoʼonton li chonbolometike. Laje, la xchikʼ ta sba skajleb matanal sventa xtometuk muyel xchʼailal* yuʼun+ li jujutuchʼ xepuʼaltake. 21 Yan li stiʼ yoʼonton xchiʼuk sbatsʼi-oʼ ti kʼot ta yebil matanal ta stojolal Jeovae la syeʼilan ta jujujot li Aaron jech kʼuchaʼal yaloj mantal li Moisese.+

22 Vaʼun, li Aarone la stoy xchibal skʼob ta stojolal li jteklume xchiʼuk laj yakʼbe bendision.+ Kʼalal laj yoʼonton Aaron ta yakʼel li matanal sventa mulile, li chikʼbil matanale xchiʼuk li matanaletik sventa jun oʼontonale, yal li ta skajleb matanale. 23 Ta tsʼakal li Moises xchiʼuk Aarone ochik talel li ta karpana sventa tsobobbaile, laje lokʼik batel sventa xakʼbeik bendision li jteklume.+

Te laj yakʼ ta ilel ta stojolal jteklum smukʼulal li Jeovae,+ 24 lokʼ talel kʼokʼ ta stojolal Jeova,+ vaʼun li kʼokʼe lik slajes li chikʼbil matanale xchiʼuk li jujutuchʼ xepuʼaltak ta sba li skajleb matanale. Li jteklume lik avanikuk kʼalal jech laj yilik taje xchiʼuk la snijan yalel satik ta lumtik.+

10 Ta tsʼakal li xnichʼnab Aaron ti jaʼik li Nadab xchiʼuk Abiue+ la stsak yav yakʼalik, laj yakʼbeik skʼakʼal xchiʼuk laj yakʼik pom+ ta sba. La spas sbaik ta mantal stukik, yuʼun te lik xchikʼik pom ta yeloval Jeova ti muʼyuk akʼbilik permiso+ spasel jeche. 2 Lik talel kʼokʼ ta stojolal Jeova kʼalal jech la spasike, jech te kʼakʼik+ xchiʼuk chamik ta yeloval Jeova.+ 3 Li Moisese xi laj yalbe li Aarone: «Xi chal li Jeovae: ‹Li buchʼutik nopol oy ta jtojolale+ skʼan teuk ta sjolik ti chʼulune, jech xtok, chkichʼ mukʼibtasbel jkʼoplal ta yeloval sjunul li jteklume›». Muʼyuk xa kʼusi laj yal li Aarone.

4 Li Misael xchiʼuk Elsafan ti jaʼ xnichʼnab li sjuntot Aaron ti Usiel+ sbie takatik ta ikʼel yuʼun li Moisese, xi albatike: «Laʼik liʼe, lokʼesik batel li avutsʼ avalalik ti chamik ta yeloval ti bu chʼule, te to xbat avakʼik ta spat ti bu oy li karpanaetike». 5 Nopajik talel, vaʼun la slokʼesik batel li viniketik ti slapojik li skʼuʼ spokʼik sventa paleale, te to laj yikʼik batel ta spat li karpanaetik jech kʼuchaʼal laj yal li Moisese.

6 Li Moisese xi laj yalbe li Aaron xchiʼuk li Eleasar xchiʼuk Itamar, li yan xnichʼnab Aarone: «Mu me xavakʼ xchʼi xchiʼuk xchʼetpʼuj ajolik mi jaʼuk xaliʼ ta jatel akʼuʼ apokʼik+ sventa mu xachamik xchiʼuk sventa mu x-ilin Dios ta stojolal sjunul li tsobobbaile. Li yantik achiʼilik ta Israele jaʼ ta xokʼitaik li buchʼutik milatik yuʼun Jeova ta kʼokʼe. 7 Ta skoj ti avichʼojik+ xa li aseite ti jaʼ yuʼun Jeova ti chtun kʼalal oy buchʼu chichʼ tʼujele, skʼan me mu xalokʼik batel li ta yochebal karpana sventa tsobobbaile, yuʼun mi moʼoje chachamik». Jaʼ yuʼun, jech la spasik kʼuchaʼal laj yal li Moisese.

8 Xi albat yuʼun Jeova li Aarone: 9 «Sventa mu xachamike, mu me xavuchʼik vino o yan jtosukal pox kʼalal cha-ochik ta karpana sventa tsobobbaile+ mi jaʼuk xuʼ xuchʼik li anichʼnab te achiʼuke. Jaʼ jun mantal sbatel osil avuʼunik xchiʼuk li jaykʼol kuxlejal chtal avuʼunik ta tsʼakale. 10 Taje jaʼ sventa xichʼ naʼel li kʼusi akʼbil ta stojolal Diose xchiʼuk li kʼusi maʼuke xchiʼuk jaʼ sventa xichʼ naʼel li kʼusi ibal sbae* xchiʼuk li kʼusi sake.+ 11 Jech xtok, jaʼ sventa xichʼik chanubtasel ta smantaltak Jeova li j-israeletik ti laj yal ta stojolal li Moisese».+

12 Li Moisese la skʼopon li Aaron xchiʼuk li Eleasar xchiʼuk Itamar, li yan xnichʼnab Aarone, xi laj yalanbee: «Tsakik li skomenal* matanal sat tsʼunobiletik ti muʼyuk la achikʼbeik ta smoton li Jeovae, pasik ta pan ti muʼyuk yichʼoj slevaduraile* xchiʼuk lajesik ta stsʼel skajleb matanal,+ yuʼun toj echʼ xa noʼox chʼul.+ 13 Persa te xalajesik ti bu chʼule,+ yuʼun jaʼ aparte kʼotem li ta matanaletik chikʼbil ta kʼokʼ sventa Jeovae xchiʼuk jaʼ sparteik kʼotem ek li anichʼnabtake, jech laj kichʼ albel mantal. 14 Li stiʼ yoʼonton yebil matanale xchiʼuk li yoʼ ti laj yichʼ akʼel ta yebil matanal ti kʼot ta chʼul matanale,+ te xatiʼik ti bu sake, te chatiʼ xchiʼuk li anichʼnabtake xchiʼuk li atsebetake.+ Yuʼun li kʼusitik taje jaʼ aparte kʼotem li ta matanaletik sventa jun oʼontonal chakʼ li j-israeletike xchiʼuk jaʼ sparteik kʼotem ek li anichʼnabtake. 15 Ichʼbeik tal li yoʼ ti kʼot ta chʼul matanale xchiʼuk li stiʼ yoʼonton yebil matanale, jmoj xavichʼik tal xchiʼuk li xepuʼaltak ti laj yichʼ chikʼel ta kʼokʼ sventa matanale yoʼ xichʼ yeʼilanel ta jujujot ta yeloval Jeova sventa xkʼot ta yebil matanal; jaʼ aparte chkʼot xchiʼuk anichʼnabtak+ sbatel osil jech kʼuchaʼal yaloj mantal li Jeovae».

16 Li Moisese la saʼ tajek li tot tentsun ti laj yichʼ akʼel ta matanal sventa mulile,+ laj yakʼ venta ti laj yichʼ chikʼel ta kʼokʼe. Ta skoj taje ilin ta stojolal li Eleasar xchiʼuk Itamar, li yan xnichʼnab Aarone, xi laj yale: 17 «¿Kʼu yuʼun muʼyuk la atiʼik ti bu chʼul+ li matanal sventa mulile, ti toj echʼ xa noʼox chʼul xchiʼuk ti voʼoxuk laj yakʼboxuk sventa xchʼaybat smulik yuʼun Jeova li jteklume? 18 Pe muʼyuk laj yichʼ ichʼbel ochel xchʼichʼel chkil ti bu chʼul+ une. Te la atiʼik jechuk ti bu chʼule, yuʼun jech laj kichʼ albel mantal». 19 Li Aarone xi la stakʼbe li Moisese: «Li naxe laj yichʼik tal li matanal sventa smulike xchiʼuk laj yakʼik ta yeloval Jeova+ li chikʼbil matanale, pe jech kʼot ta jtojolal li avie. Ti lajuk jtiʼ li matanal sventa mulile, ¿mi lek van laj yil Jeova ti jechuke?». 20 Jun xa yoʼonton kom Moises kʼalal jech albate.

11 Li Jeova une xi laj yalbe li Moises xchiʼuk Aarone: 2 «Xi xavalbeik li j-israeletike: ‹Liʼe jaʼ li kʼusitik kuxajtik ta balumil* ti xuʼ xatiʼike:+ 3 xuʼ xatiʼik skotol li chonbolometik ti lek chaʼxol* svoyike xchiʼuk ti chchaʼxax sveʼelike.

4 »›Li chonbolometik ti mu stakʼ xatiʼik ti chchaʼxax sveʼelik o ti chaʼxol* svoyike jaʼ li kameyoe, chchaʼxax sveʼel, pe muʼyuk chaʼxol svoy. Ibaluk sba* xavilik.+ 5 Te xtok li damane,*+ chchaʼxax sveʼel, pe muʼyuk chaʼxol* svoy. Ibaluk sba xavilik. 6 Jech xtok, te oy li tʼule, chchaʼxax sveʼel, pe muʼyuk chaʼxol* svoy. Ibaluk sba xavilik. 7 Jech li chitom eke,+ lek chaʼxol* li svoye, pe muʼyuk chchaʼxax sveʼel. Ibaluk sba xavilik. 8 Mu xatibeik jutebuk sbekʼtal li chonbolometik taje xchiʼuk mu xapikik li sbekʼtal ti chamem xae. Ibaluk sba xavilik.+

9 »›Liʼe jaʼ li kʼusitik xuʼ xatiʼik ti kuxajtik ta voʼe: kʼusiuk noʼox ti oy xikʼ xchiʼuk ti oy smikʼale,* mi te kuxul ta nab o ta ukʼum. Taje jaʼ noʼox xuʼ xatiʼik.+ 10 Pe kʼusiuk noʼox ti muʼyuk xikʼ o muʼyuk smikʼal* ti kuxajtik ta nab o ta ukʼume, mi jaʼ li bikʼtal chanul voʼe o kʼusiuk noʼox ti kuxajtik ta voʼe, skʼan ibal sba xavilik. 11 Ta melel, skʼan ibal sba xavilik. Mu xatibeik jutebuk li sbekʼtale+ xchiʼuk ibaluk me sba xavilik li sbekʼtal ti chamem xae. 12 Skʼan ibal sba xavilik skotol li kʼusi kuxajtik ta voʼ ti muʼyuk xikʼ xchiʼuk ti muʼyuk smikʼale.*

13 »›Liʼe jaʼ li kʼusitik kuxajtik ti chvilik ta vinajel ti skʼan ibaluk sba xavilike; mu stakʼ xatiʼik, yuʼun ibalik sba: jaʼ li aguilae,+ li jtsakchoy aguilae, li ikʼal xuleme,+ 14 li tsajal milano mute xchiʼuk skotol li jeltos ikʼal milano mute, 15 skotol li jeltos joj mute, 16 li avestruse, li kuxkuxe,* li gaviota mute, skotol li jeltos xike, 17 li chʼin kuxkuxe,* li xpechʼal nabe, li kuxkux ti natik xchikine, 18 li sisne mute, li pelikano mute, li xuleme, 19 li sigüenya mute, skotol li jeltos garsae, li abubiya mute xchiʼuk li sotsʼe. 20 Skotol li bikʼtal chonetik ti oy xikʼik, pe ti chanavike skʼan ibal sba xavilik.

21 »›Li ta bikʼtal chonetik ti oy xikʼik, pe ti chanavike jaʼ noʼox xuʼ xatiʼik li bu natik yakan ti xpʼitlajet chanavik ta balumile. 22 Li kʼusitik xuʼ xatiʼike jaʼ liʼe: li jeltos kʼulubetik ti buyuk xbatike, li yan kʼulubetik ti stakʼ onoʼox tiʼele,+ li chiletike xchiʼuk li pʼilixetike.* 23 Skotol li yan bikʼtal chonetik ti oy xikʼik, pe ti chanavike skʼan ibaluk sba xavilik. 24 Ibal sba chakomik yuʼun li kʼusitik taje. Buchʼuuk noʼox ti tsta ta tijbel li sbekʼtal ti chamem xae ibal sba chkom, jech-o chkom jaʼ to mi chʼayem xa ox batel kʼakʼale.+ 25 Li buchʼu chichʼbe batel sbekʼtal ti chamem xae skʼan xchukʼ li skʼuʼ spokʼe;+ ibal sba chkom, jech-o chkom jaʼ to mi chʼayem xa ox batel kʼakʼale.

26 »›Kʼusiuk noʼox chonbolomal ti chaʼxol* svoye, pe ti muʼyuk chʼakal lek li svoye xchiʼuk ti mu snaʼ xchaʼxax sveʼele skʼan ibaluk sba xavilik. Buchʼuuk noʼox ti tsta ta tijbel li sbekʼtale ibal sba chkom.+ 27 Ta skotol li kʼusitik kuxajtik ti oy chanib yakane, jaʼ ibaluk sba xavilik li kʼusitik kuxajtik ti chʼabal svoyike. Buchʼuuk noʼox ti tsta ta tijbel li sbekʼtal ti chamem xae ibal sba chkom, jech-o chkom jaʼ to mi chʼayem xa ox batel kʼakʼale. 28 Li buchʼu chichʼbe batel sbekʼtal ti chamem xae skʼan xchukʼ li skʼuʼ spokʼe;+ ibal sba chkom, jech-o chkom jaʼ to mi chʼayem xa ox batel kʼakʼale.+ Ibaluk sba xavilik.

29 »›Liʼe jaʼ li bikʼtal chonetik ti kuxajtik ta balumil ti ibaluk sba xavilike: li jeltos chʼoetike,*+ skotol li jeltos okotse, 30 li jekoe,* li mukʼta okotse, li salamandra chon ti chchʼi ta voʼe, li okots ti chchʼi ta jiʼtike* xchiʼuk li kamaleone. 31 Ibaluk me sba xavilik+ li bikʼtal chonetik taje. Buchʼuuk noʼox ti tsta ta tijbel li sbekʼtal ti chamem xae ibal sba chkom, jech-o chkom jaʼ to mi chʼayem xa ox batel kʼakʼale.+

32 »›Mi oy cham jkotuk li chonetik taje xchiʼuk mi te kajal kʼot ta sba kʼusiuk noʼox ti pasbil ta teʼe, ta jlikuk kʼuʼil pokʼil, ta jlikuk nukul o ta jtuchʼuk chʼixal kʼuʼile,* ibal me sba chkom. Skotol ti kʼusi chichʼ tunesele skʼan xichʼ tsʼajel ta voʼ xchiʼuk ibal sba chkom, jech-o chkom jaʼ to mi chʼayem xa ox batel kʼakʼale, jaʼ to jech xuʼ sak ta xkom. 33 Yan mi te pʼaj* ta yut lumal pʼine, akʼo yichʼ vokʼel xchiʼuk ibal sba chkom+ li kʼusitik te tikʼil ta yute. 34 Skotol li kʼusitik stakʼ lajesel ti tskap sba xchiʼuk li yaʼlel lumal pʼin taje ibal me sba chkom ek. Jech xtok, kʼusiuk noʼox ti stakʼ uchʼel ti te tsʼanal ta pʼine ibal sba chkom. 35 Ibal me sba chkom ti bu kajal chkʼot li sbekʼtal ti chamem xae akʼo mi orno o mi yav kʼokʼ ti bikʼit noʼoxe, skʼan me xichʼ lilinel. Ibalik sba xchiʼuk jech-o ibal sba skʼan xavilik. 36 Jaʼ noʼox muʼyuk ibal sba chkom li sat voʼe* xchiʼuk li poso ti bu tstsʼan sba voʼe, pe buchʼuuk noʼox ti tsta ta tijbel li sbekʼtal ti chamem xae ibal sba chkom. 37 Mi te kajal chkʼot li sbekʼtalik ta sbekʼ sat tsʼunobil ti chichʼ xa tsʼunele, muʼyuk me tsok. 38 Pe mi laj xa ox yichʼ akʼbel yaʼlel li sbekʼ tsʼunobile xchiʼuk mi te kʼot jtuchʼuk li sbekʼtal ta sbae, ibal me sba chkom ta atojolalik li sbekʼ tsʼunobile.

39 »›Mi cham jkotuk chonbolom ti nopem xavaʼiik stiʼele, ibal sba chkom li buchʼu tspike, jech-o chkom jaʼ to mi chʼayem xa ox batel kʼakʼale.+ 40 Buchʼuuk noʼox ti tstibe li sbekʼtale skʼan xchukʼ li skʼuʼ spokʼe, ibal sba chkom, jech-o chkom jaʼ to mi chʼayem xa ox batel kʼakʼale.+ Jech xtok, mi oy buchʼu laj yichʼbe batel li sbekʼtale, skʼan xchukʼ li skʼuʼ spokʼe, ibal sba chkom, jech-o chkom jaʼ to mi chʼayem xa ox batel kʼakʼale. 41 Ibal sba+ skotol li bikʼtal chonetik ta balumile, mu stakʼ tiʼel. 42 Mu me xatiʼik jkotuk chon ti xkilet chanav ta lumtike, mi jkotuk kʼusi kuxul ti chanib yakane mi jaʼuk bikʼtal chonetik ta balumil ti ep yokike, yuʼun ibalik sba.+ 43 Mu me xasokes abaik ta skoj jkotuk bikʼtal chon, jech xtok, mu me xavikʼubtas abaik ti jech ibal xa aba chakomik yuʼune.+ 44 Ta skoj ti voʼon Jeova Diosun avuʼunike,+ skʼan xachʼultajes abaik sventa chʼul xakʼotik,+ yuʼun chʼulun li voʼon+ eke. Jech oxal, skʼan xakʼel abaik sventa mu ibaluk sba xakʼotik ta skoj jkotuk bikʼtal chon ti kuxajtik ta balumile. 45 Voʼon Jeovaun, voʼon la jlokʼesoxuk talel ta yosilal Ejipto sventa xikʼot ta Adiosik,+ skʼan me chʼulukoxuk,+ yuʼun chʼulun li voʼone.+

46 »›Taje jaʼ smantalil li chonbolometike, li kʼusitik kuxajtik ti chvilik ta vinajele, skotol li kʼusitik kuxajtik ta voʼe xchiʼuk skotol li bikʼtal chonetik ti tsnojesik li balumile. 47 Jaʼ sventa xichʼ naʼel ti butik ibal sbae xchiʼuk ti butik muʼyuk ibal sbae, ti butik stakʼ tiʼel li kʼusitik kuxajtike xchiʼuk ti butik mu stakʼ tiʼele›».+

12 Xi to albat yuʼun Jeova li Moisese: 2 «Xi xavalbe li j-israeletike: ‹Mi la xchiʼin yol junuk antse xchiʼuk mi kerem vokʼ li yole, vukub kʼakʼal ibal sba* chkom, jaʼ jech chopol chkom jech kʼuchaʼal kʼalal chil xchamele.+ 3 Mi lokʼ xa ox vaxakib kʼakʼale, ta xichʼ sirkunsision*+ li sjol skʼunil yole. 4 Li antse jech to chchabi sba 33 kʼakʼal sventa sakubtas sba ta skoj ti mal xchʼichʼele. Jech xtok, mu me stakʼ spik li kʼusitik chʼule mi jaʼuk xuʼ x-och li bu chʼule, jaʼ to mi tsʼaki yuʼun ti jayib kʼakʼal tslekubtas sbae.

5 »›Mi tseb vokʼ li yole, 14 kʼakʼal ibal sba chkom, jaʼ jech chkom jech kʼuchaʼal kʼalal chil xchamele. Li antse jech to chchabi sba 66 kʼakʼal sventa sakubtas sba ta skoj ti mal xchʼichʼele. 6 Mi tsʼaki yuʼun ti jayib kʼakʼal tslekubtas sba ta skoj ti vokʼ skerem o stsebe, akʼo yikʼ talel jkotuk chʼiom tot chij ti jun to jabil yichʼoje sventa xkʼot ta chikʼbil matanal+ xchiʼuk akʼo yikʼ talel jkotuk chʼiom paloma o jkotuk tortola* sventa xichʼ akʼel ta matanal sventa mulil. Akʼo yikʼbe talel pale ta yochebal karpana sventa tsobobbail. 7 Li palee akʼo yakʼ ta yeloval Jeova sventa sta perton li antse, vaʼun lek xa chkom akʼo mi mal xchʼichʼel li antse. Taje jaʼ smantalil ti kʼalal chvokʼ skerem o stseb jun antse. 8 Yan mi mu xlokʼ-o stojol yuʼun sventa jkotuk chije, akʼo yikʼ talel chaʼkotuk tortola* o chaʼkotuk chʼiom paloma.+ Li jkote jaʼ chkʼot ta chikʼbil matanal, li jkote jaʼ chkʼot ta matanal sventa mulil. Li palee chakʼ ta matanal sventa sta perton li antse, vaʼun lek xa chkom›».

13 Li Jeovae xi to laj yalbe li Moises xchiʼuk Aarone: 2 «Mi oy junuk krixchano ti tsitub snukulil sbekʼtal, takijem syayijemal o ti oy xchinal ti xuʼ van jaʼ lepra*+ ta snukulile, akʼo yichʼ ikʼel batel ta stojolal pale Aaron o ta stojolal junuk xnichʼon ti jaʼ pale eke.+ 3 Vaʼun, li palee tskʼelbe lek li syayijemal snukulile. Mi sakubem xa stsotsil ti bu yayijeme xchiʼuk mi xvinaj ti chʼenpʼujem xa ochel li ta snukulile, jaʼ xa lepra. Tskʼel lek li palee, vaʼun chakʼ ta naʼel ti ibal sbae.* 4 Pe mi sak li xchinal snukulile xchiʼuk mi xvinaj ti muʼyuk chʼenpʼujem ochel li ta snukulile xchiʼuk mi muʼyuk to sak li stsotsile, li palee chchʼak lokʼel vukub kʼakʼal+ ta stojolal li yantike. 5 Li palee tskʼel lek ta svukubal kʼakʼal, mi laj yakʼ venta ti staoj-o yav yileluk li syayijemale xchiʼuk ti muʼyuk to epajem batel ta snukulile, li palee chchʼak lokʼel yan vukub kʼakʼal ta stojolal li yantike.

6 »Li palee tskʼel lek yan velta li ta svukubal kʼakʼale. Mi laj yakʼ venta ti chchʼay xa batele xchiʼuk ti muʼyuk bu epajem batel ta snukulile, chakʼ ta naʼel ti muʼyuk ibal sbae;+ jaʼ noʼox takijem yayijemal. Vaʼun, skʼan xchukʼ skʼuʼ spokʼ li vinike xchiʼuk muʼyuk ibal sba chkom. 7 Pe mi epaj to batel ta snukulil li takijem yayijemal* kʼalal kʼelat xa ox yuʼun pale xchiʼuk ti albat xa ox ti lek kome, skʼan xbat yakʼ sba ta ilel yan velta* ta stojolal li palee. 8 Tskʼel lek li palee, mi laj yakʼ venta ti epaj xa batel ta snukulil li takijem yayijemale, chakʼ ta naʼel ti ibal sbae, jaʼ xa lepra.+

9 »Mi tsakat ta lepra li jun krixchanoe, skʼan ikʼel batel ta stojolal pale, 10 vaʼun tskʼel lek li palee.+ Mi sak li sitemal snukulile, mi sak li stsotsile xchiʼuk mi lek kuxul xvinaj li syayijemal+ sitemale, 11 jaʼ xa tsatsal lepra ta snukulil. Li palee chakʼ ta naʼel ti ibal sbae. Mu xa persauk xichʼ chʼakel lokʼel ta stojolal yantik,+ yuʼun ibal xa sba. 12 Pe mi lokʼ ta sjunul sbekʼtal krixchano li leprae, mi pixil kom ta lepra yakan kʼalal to ta sjole, jaʼ ti bu to kʼalal sta ta kʼelel li palee, 13 mi laj xa ox skʼel lek li palee xchiʼuk mi laj yil ti noj xa ta sjunul sbekʼtal li leprae, chakʼ ta naʼel ti muʼyuk xa ibal sbae,* yuʼun sak takijem xa kom li leprae, vaʼun muʼyuk ibal sba chkom. 14 Pe mi lek kuxul xvinaj syayijemal li ta sbekʼtale, ibal sba chkom. 15 Mi laj yil pale ti lek kuxul xvinaj li syayijemale, chakʼ ta naʼel ti ibal sbae.+ Ibal sba li syayijemale. Jaʼ lepra.+ 16 Pe mi chaʼsakub li bu lek kuxul syayijemal xvinaje, chbat skʼel li palee. 17 Tskʼel lek li palee,+ mi chaʼsakubem li syayijemale, chakʼ ta naʼel ti muʼyuk xa ibal sba li krixchano ti oy xchamele. Muʼyuk ibal sba chkom.

18 »Mi oy buchʼu chʼi kʼaʼemal chin ta snukulile xchiʼuk mi kole, 19 pe mi kʼun to situb ti bu toʼox lokʼ li kʼaʼemal chine xchiʼuk mi sak ta kʼelele o mi pas ta chin ti saklepʼanik xchiʼuk mi tsojtsojtik sbae, skʼan xbat yakʼ sba ta ilel ta stojolal li palee. 20 Tskʼel lek li palee.+ Mi laj yakʼ venta ti chʼenpʼujem xa ochel li ta snukulile xchiʼuk ti sak xa li stsotsile, li palee skʼan xakʼ ta naʼel ti ibal sbae. Jaʼ lepra ti kʼusi lokʼ li ta skʼaʼemal chine. 21 Pe mi la skʼel lek li palee, mi laj yakʼ venta ti muʼyuk sakubem li stsotsile, ti muʼyuk chʼenpʼujem ochel li ta snukulile xchiʼuk ti yantik xa xchʼay batel yilele, li palee chchʼak lokʼel vukub kʼakʼal+ ta stojolal li yantike. 22 Mi lek xvinaj ti yantik xa x-epaj batel ta snukulile, li palee chakʼ ta naʼel ti ibal sbae. Jaʼ xa lepra. 23 Pe mi muʼyuk x-epaj batel li xchinale, jaʼ noʼox sitemal li skʼaʼemal chine, li palee chakʼ ta naʼel ti muʼyuk xa ibal sbae.+

24 »Mi oy buchʼu la xchikʼ sba, pe ti chinajtik xvinaj li yav skʼakʼemale xchiʼuk ti saklepʼanik xchiʼuk ti tsojtsojtik sbae o mi sakloʼan xvinaje, 25 tskʼel lek li palee. Mi sakubem xa stsotsil li xchinal ti bu kʼakʼeme xchiʼuk mi xvinaj ti chʼenpʼujem xa ochel li ta snukulile, jaʼ xa lepra ti te lokʼ ta skʼakʼemale, vaʼun li palee chakʼ ta naʼel ti ibal sbae. Jaʼ xa lepra. 26 Pe mi la skʼel lek li palee, mi laj yakʼ venta ti muʼyuk sakubem li stsotsil ta xchinale, mi muʼyuk chʼenpʼujem ochel li ta snukulile xchiʼuk mi chchʼay xa batele, li palee chchʼak lokʼel vukub kʼakʼal+ ta stojolal li yantike. 27 Li palee tskʼel lek li ta svukubal kʼakʼale, mi laj yil ti yantik xa x-epaj batel ta snukulile, chakʼ ta naʼel ti ibal sbae. Jaʼ xa lepra. 28 Pe mi muʼyuk x-epaj batel ta snukulil li xchinale xchiʼuk ti chchʼay xa batele, jaʼ noʼox sitemal li skʼakʼemale, li palee chakʼ ta naʼel ti muʼyuk xa ibal sbae, yuʼun jaʼ noʼox sitemal skʼakʼemal.

29 »Kʼalal jun vinik o jun ants chlik jtosuk xchamel ta sjol o ta skolome, 30 li palee tskʼel lek li chamele.+ Mi xvinaj ti chʼenpʼujem xa ochel li ta snukulile, mi kʼanubem xchiʼuk jichʼilik xa li stsotsile, li palee chakʼ ta naʼel ti ibal sbae, jaʼ xchamel snukulil sjol o xchamel skolom. Jaʼ lepra ta sjol o ta skolom. 31 Mi laj yakʼ venta pale ti muʼyuk chʼenpʼujem ochel ta snukulile xchiʼuk mi muʼyuk ikʼ li stsotsile, li palee chchʼak lokʼel vukub kʼakʼal+ ta stojolal yantik li buchʼu ipe. 32 Li palee tskʼel lek ta svukubal kʼakʼal li chamele, mi muʼyuk to epajem batele, mi muʼyuk to kʼanubem jpʼejuk li stsotsile xchiʼuk xvinaj ti muʼyuk to chʼenpʼujem ochel ta snukulil li xchamele, 33 skʼan slokʼ stsotsil sjol o stsotsil skolom li buchʼu ipe, pe jaʼ muʼyuk tslokʼbe stsotsil ti bu ipe. Li pale une chchʼak lokʼel vukub kʼakʼal ta stojolal yantik li buchʼu ipe.

34 »Li palee tskʼel lek yan velta ta svukubal kʼakʼal li bu ipe, mi muʼyuk to pukem batel ta sbekʼtal li xchamel snukulil sjol o li xchamel skolome xchiʼuk mi xvinaj ti muʼyuk to chʼenpʼujem ochel ta snukulil li xchamele, li palee chakʼ ta naʼel ti muʼyuk xa ibal sbae. Li buchʼu ipe skʼan xchukʼ li skʼuʼ spokʼe, vaʼun muʼyuk xa ibal sba chkom. 35 Yan mi lek xvinaj ti pukem xa batel ta sbekʼtal akʼo mi albat xa ox yuʼun pale ti muʼyuk xa ox ibal sbae, 36 chkʼelat lek yuʼun li pale xtoke, mi laj yil ti pukem xa batel li xchamele, mu xa persauk tskʼelbe mi kʼon li stsotsile; ibal xa sba li krixchano taje. 37 Pe mi laj yichʼ ilel ti muʼyuk pukem batel li xchamel kʼalal laj yichʼ kʼelel leke xchiʼuk ti ikʼ xa chʼi talel li stsotsile, kol xa li jchamele. Muʼyuk xa ibal sba, li palee chakʼ ta naʼel ti muʼyuk xa ibal sbae.+

38 »Mi oy jun vinik o jun ants ti chchʼi chin ta snukulile* xchiʼuk mi sakik li xchinale, 39 tskʼel lek li palee.+ Mi sakvayanik li chin ta snukulile, jaʼ jtos chin ti muʼyuk kʼusi chopol tspas ti te chʼi ta snukulile. Muʼyuk ibal sba li krixchano taje.

40 »Mi oy jun vinik ti chtul stsotsil sjol xchiʼuk mi tʼaxjol chkome, muʼyuk ibal sba. 41 Mi jaʼ noʼox chtul stsotsil li stibae xchiʼuk mi tʼaxal kom li stibae, muʼyuk ibal sba. 42 Pe mi chlik yayijuk li snukulil sjol o li snukulil stiba ti bu tʼaxal kome ti saklepʼanik xchiʼuk ti tsojtsojtik sbae, jaʼ lepra yakal chchʼi ta snukulil sjol o ta snukulil stiba ti bu tʼaxal kome. 43 Tskʼel lek li palee. Mi laj yakʼ venta ti saklepʼanik xchiʼuk ti tsojtsojtik sba li sitemal snukulil sjol o li snukulil stibae xchiʼuk mi lepra xa yilel li ta snukulile, 44 tsakbil ta lepra un bi. Ibal me sba, li palee chakʼ ta naʼel ti ibal sba chkom ta skoj li chamel ta sjole. 45 Li buchʼu tsakbil ta leprae skʼan sliʼ ta jatel li skʼuʼ spokʼe, skʼan xakʼ chʼiuk xchiʼuk xchʼetpʼuj li sjole xchiʼuk skʼan xpix li yisime. Vaʼun, xi skʼan x-avane: ‹¡Ibal jba, ibal jba!›. 46 Jech-o ibal sba chkom ti kʼu sjalil ip ta leprae. Ta skoj ti ibal sbae, skʼan stuk akʼo bat nakiuk ta spat ti bu oy li karpanaetike.+

47 »Mi chʼamaj ta jlikuk kʼuʼil pokʼil li leprae; mi chʼamaj ta jlikuk kʼuʼil pokʼil pasbil ta tsots* o ta linoe, 48 mi jaʼ te kʼot ta snaul li kʼuʼil pokʼil pasbil ta lino o ta tsots* o mi te kʼot ta jlikuk nukul o ta kʼusiuk noʼox pasbil ta nukule 49 xchiʼuk mi kʼonkʼontik sba xyaxal o tsojtsojtik sba xvinaj li chamel kʼot ta kʼuʼil pokʼil, ta jlikuk nukul, ta snaul jolobil* o ta kʼusiuk noʼox ti pasbil ta nukule, jaʼ xa lepra xchiʼuk skʼan xichʼ akʼbel yil li palee. 50 Li palee tskʼel lek li chamele, vaʼun chchʼak lokʼel vukub kʼakʼal+ li kʼusi xkuchoj chamele. 51 Mi la skʼel lek ta svukubal kʼakʼal li chamele xchiʼuk mi laj yil ti pukem xa batel ta kʼuʼil pokʼile, ta snaul jolobil* o ta jlikuk nukule (mu ventauk kʼusi chichʼ-o tunesel li nukule), jaʼ chopol lepra xchiʼuk ibal sba.+ 52 Ta skoj ti jaʼ chopol leprae, skʼan xchikʼ ta kʼokʼ li kʼuʼil pokʼile, li snaul jolobil* ti pasbil ta tsots* o ta lino o kʼusiuk noʼox pasbil ta nukul ti xkuchoj leprae. Skʼan chikʼel ta kʼokʼ.

53 »Mi la skʼel lek li palee xchiʼuk mi laj yakʼ venta ti muʼyuk pukem batel li chamel ta kʼuʼil pokʼile o ta kʼusiuk noʼox ti pasbil ta nukule, 54 li palee chal mantal ti akʼo yichʼ chukʼel li kʼuʼil pokʼil ti xkuchoj chamele, vaʼun chchʼak to lokʼel yan vukub kʼakʼal. 55 Mi laj xa ox yichʼ chukʼel lek li kʼuʼil pokʼil ti xkuchoj chamele, skʼan skʼel lek li palee. Mi te-o xvinaj li chamele akʼo mi muʼyuk to pukem batel, ibal sba. Skʼan xachikʼ ta kʼokʼ, yuʼun sok xa ta skoj li chamele akʼo mi jaʼ noʼox ta spat o ta yut.

56 »Mi la skʼel lek li palee xchiʼuk mi laj yakʼ venta ti chchʼay xa batel ti kʼalal laj xa ox yichʼ chukʼel leke, chtuchʼ lokʼel ti bu oy xchamel li pokʼe, li nukule o li snaul jolobile.* 57 Yan mi oy to bu jotukal vinaj li chamel ta pokʼe o ta kʼusiuk noʼox ti pasbil ta nukule, yakal to ta pʼolel un bi. Mi jeche, skʼan xachikʼ ta kʼokʼ+ kʼusiuk noʼox ti xkuchoj li chamele. 58 Pe mi chʼay xa batel li chamel ta kʼuʼil pokʼil, ta snaul jolobil* o ta kʼusiuk noʼox ti pasbil ta nukul kʼalal la achukʼe, skʼan xichʼ chukʼel yan velta sventa mu xa ibaluk sba xkom.

59 »Taje jaʼ smantalil li lepra chamel ta jlik kʼuʼil pokʼil ti pasbil ta tsots* o ta linoe o mi te lokʼ ta snaul jolobil* o ta kʼusiuk noʼox ti pasbil ta nukul sventa xichʼ naʼel mi ibal sba o mi muʼyuk ibal sba».

14 Xi to albat yuʼun Jeova li Moisese: 2 «Liʼe jaʼ li mantal kʼalal chichʼ kʼelel yuʼun pale+ mi sak xa li buchʼu tsakbil ta leprae:* 3 li palee chlokʼ batel ti bu spasoj skarpanaike sventa chbat skʼel lek. Mi kolem xa li buchʼu tsakbil ta leprae, 4 li palee chalbe mantal ti akʼo yikʼ talel chaʼkotuk mut ti muʼyuk ibal sbae,* akʼo yichʼ talel sedro teʼ, kuxul tsajal pokʼ xchiʼuk isopo,* taje jaʼ sventa sakubtas sba.+ 5 Li palee chal mantal ti akʼo yichʼ milel li baʼyel mute, te akʼo smilik ta jun lumal pʼin ti oy yaʼlel ti lupbil tal ta sat voʼe.* 6 Akʼo stsak li yan kuxul mute, akʼo yichʼ talel xchiʼuk li sedro teʼe, li kuxul tsajal pokʼe xchiʼuk li isopoe. Akʼo stsʼaj skotol ta xchʼichʼel li mut ti laj yichʼ milel ta lumal pʼin ti oy yaʼlel ti lupbil tal ta sat voʼe.* 7 Vukub velta tsvijbe ta sba li buchʼu tslekubtas sba ta skoj leprae, vaʼun chakʼ ta naʼel ti muʼyuk xa ibal sbae, mi laje, tskolta batel ta osiltik+ li kuxul mute.

8 »Li buchʼu tslekubtas sbae skʼan xchukʼ li skʼuʼ spokʼe, skʼan slokʼ skotol li stsotsil sbekʼtale xchiʼuk li stsotsil sjole xchiʼuk skʼan spok sba ta voʼ, vaʼun jech muʼyuk xa ibal sba chkom. Ta tsʼakale, xuʼ xa x-och batel ti bu spasoj skarpanaike, jaʼ noʼoxe mu to xuʼ x-och vukub kʼakʼal li ta skarpanae. 9 Li ta svukubal kʼakʼale, skʼan slokʼ li stsotsil sjole, li yisim ta skolome xchiʼuk li smotsobe. Mi laj xa ox slokʼ skotol li stsotsile, akʼo xchukʼ li skʼuʼ spokʼe xchiʼuk akʼo spok sba ta voʼ, vaʼun jech muʼyuk xa ibal sba chkom.

10 »Li ta xvaxakibal kʼakʼale, akʼo stsak talel chaʼkotuk chʼiom tot chij ti muʼyuk ipe* xchiʼuk jkot meʼ chij+ ti jun to jabil yichʼoj xchiʼuk ti muʼyuk ipe, jech xtok, akʼo yichʼ talel oxvokʼ ta lajunvokʼ jun efa* arina ti lek nin ti kapbil ta aseite ti chkʼot ta matanal sat tsʼunobiletike+ xchiʼuk akʼo yichʼ talel jun log* aseite.+ 11 Li pale ti chakʼ ta naʼel ti muʼyuk xa ibal sba li buchʼu yakal tslekubtas sbae akʼo yikʼ talel ta yeloval Jeova xchiʼuk li matanaletike. Te akʼo yakʼ ta yochebal karpana sventa tsobobbail. 12 Li palee tstsak li baʼyel chʼiom tot chije yoʼ xakʼ ta matanal sventa skʼanel perton,+ te jmoj chakʼ xchiʼuk li jun log aseitee. Tsyeʼilan ta jujujot sventa xkʼot ta yebil matanal ta stojolal Jeova.+ 13 Li chʼiom tot chije te tsmil ti bu onoʼox chichʼ milel+ li matanal sventa mulile xchiʼuk li chikʼbil matanale, jaʼ xkaltik, li bu chʼule. Jech ta spas, yuʼun li matanal sventa skʼanel pertone jaʼ yuʼun li pale+ jech kʼuchaʼal jaʼ yuʼun li matanal sventa mulile. Toj echʼ xa noʼox chʼul.+

14 »Li palee tstsakbe jutebuk xchʼichʼel li matanal sventa skʼanel pertone, tsbonbe ta svelvelul sbatsʼichikin li buchʼu yakal tslekubtas sbae, tsbonbe ta smeʼ sbatsʼikʼob xchiʼuk ta smeʼ sbatsʼi-ok. 15 Jech xtok, li palee tstsak jutuk li jun log aseitee+ xchiʼuk tsmal ta yut stsʼetkʼob.* 16 Li pale une tstsʼaj sniʼ sbatsʼikʼob li ta aseite ti xchʼamoj ta stsʼetkʼobe,* vaʼun vukub velta tsvij batel ta sniʼ skʼob jutebuk ta yeloval Jeova. 17 Li skomenal* aseite ta yut skʼob li palee akʼo sbonbe ta svelvelul sbatsʼichikin li buchʼu yakal tslekubtas sbae, ta smeʼ sbatsʼikʼob xchiʼuk ta smeʼ sbatsʼi-ok. Jaʼ te akʼo sbonbe ti bu xa onoʼox bonbil ta xchʼichʼel matanal sventa skʼanel pertone. 18 Li aseite ti kom to ta yut skʼob li palee ta sbonbe ta sjol li buchʼu yakal tslekubtas sbae. Jaʼ jech skʼan spas li palee sventa x-akʼbat perton yuʼun Jeova+ li buchʼu yakal tslekubtas sbae.

19 »Li palee tsmil li matanal sventa mulile+ yoʼ sta perton li buchʼu yakal tslekubtas sbae, mi laje, tsmil li chikʼbil matanale. 20 Li palee te chakʼ ta skajleb matanal li chikʼbil matanale xchiʼuk li matanal sat tsʼunobiletike,+ vaʼun tsta perton+ li buchʼu yakal tslekubtas sbae xchiʼuk muʼyuk xa ibal sba chkom.+

21 »Pe mi povree xchiʼuk mi mu xlokʼ-o stojol yuʼune, skʼan xikʼ talel jkotuk chʼiom tot chij ti chkʼot ta matanal sventa skʼanel pertone. Chkʼot ta yebil matanal sventa sta perton li buchʼu yakal tslekubtas sbae. Jech xtok, akʼo yichʼ talel jvokʼ ta lajunvokʼ li jun efa* arina ti lek nin ti kapbil ta aseite sventa xkʼot ta matanal sat tsʼunobil, akʼo yichʼ talel xtok jun log aseite 22 xchiʼuk chaʼkot tortola* o chaʼkot chʼiom paloma, jaʼ ti kʼu yepal xlokʼ-o yuʼune. Li jkote jaʼ chkʼot ta matanal sventa mulil, li jkote jaʼ chkʼot ta chikʼbil matanal.+ 23 Li ta xvaxakibal kʼakʼale,+ chichʼbe talel pale sventa xichʼ kʼelel mi sak xa chkom. Te akʼo yichʼbe talel ta yochebal karpana sventa tsobobbail ta yeloval Jeova.+

24 »Li palee tstsak li chʼiom tot chij ti chichʼ akʼel ta matanal sventa skʼanel pertone+ xchiʼuk li jun log aseitee. Tsyeʼilan ta jujujot sventa xkʼot ta yebil matanal ta stojolal Jeova.+ 25 Li palee tsmil li chʼiom tot chij ti chichʼ akʼel ta matanal sventa skʼanel pertone, vaʼun tstsakbe jutebuk xchʼichʼel li matanal sventa skʼanel pertone, tsbonbe ta svelvelul sbatsʼichikin li buchʼu yakal tslekubtas sbae, tsbonbe ta smeʼ sbatsʼikʼob xchiʼuk ta smeʼ sbatsʼi-ok.+ 26 Li palee tsmal ta yut stsʼetkʼob*+ jutebuk li aseitee, 27 vaʼun li aseite ti xchʼamoj ta stsʼetkʼobe* vukub velta tsvij batel jutebuk ta sniʼ sbatsʼikʼob ta yeloval Jeova. 28 Li aseite ta yut skʼob li palee akʼo sbonbe jutebuk ta svelvelul sbatsʼichikin li buchʼu yakal tslekubtas sbae, akʼo sbonbe ta smeʼ sbatsʼikʼob xchiʼuk ta smeʼ sbatsʼi-ok. Jaʼ te akʼo sbonbe ti bu xa onoʼox la sbonbe ta xchʼichʼel matanal sventa skʼanel pertone. 29 Li aseite ti kom to ta yut skʼob li palee ta sbonbe ta sjol li buchʼu yakal tslekubtas sbae sventa x-akʼat ta perton yuʼun Jeova li buchʼu yakal tslekubtas sbae.

30 »Akʼo yakʼ jkotuk li tortolae* o jkotuk li chʼiom palomae, jaʼ ti kʼu yepal xlokʼ-o yuʼune,+ 31 jaʼ ti bu jtosukal oy yuʼune, li jkote jaʼ chkʼot ta matanal sventa mulil, li jkote jaʼ sventa chikʼbil matanal+ ti jmoj chichʼ akʼel xchiʼuk li matanal sat tsʼunobiletike; li palee chakʼ ta matanal sventa sta perton li buchʼu yakal tslekubtas sba ta yeloval Jeovae.+

32 »Taje jaʼ li mantal sventa li buchʼu tsakbil ta lepra ti mu xlokʼ-o yuʼun ti kʼu yepal chkʼanbat kʼalal chakʼ sba ta lekubtasele».

33 Vaʼun, li Jeovae xi laj yalbe li Moises xchiʼuk Aarone: 34 «Mi la-ochik li ta yosilal Kanaan+ ti jaʼ chkakʼ avuʼuninike+ xchiʼuk mi laj kakʼ permiso ti te chkʼot lepra+ ta jpʼejuk nae, 35 li yajval nae xi akʼo bat yalbe li palee: ‹Oy kʼusi xvinaj li ta spakʼbal jnae,* xkoʼolaj lepra yilel›. 36 Kʼalal mu to ch-och batel li pale yoʼ tskʼel lek li chamele, akʼo yal mantal ti akʼo xokobtasik li nae sventa mu xal ti ibal sba skotol li kʼusitik te oy ta nae; mi laj xa ox xokobtasik li nae, ch-och batel sventa chbat skʼel li nae. 37 Tskʼel lek ti bu kʼot li chamele, mi laj yil ti kʼonkʼontik xyaxal o tsojtsojtik sba li ta pakʼbal nae* xchiʼuk mi chʼenpʼujem xa ochele, 38 li palee chlokʼ li ta yochebal nae xchiʼuk tsbaj vukub kʼakʼal+ li nae.

39 »Li palee tsut ta svukubal kʼakʼal yoʼ skʼel lek li nae. Mi laj yil ti pukem xa ta spakʼbal na* li chamele, 40 li palee chal mantal ti akʼo yichʼ pitsel lokʼel li tonetik ti xkuchoj li chamele xchiʼuk akʼo bat yichʼ jipel ta spat li lume, jaʼ ti bu ibal sbae. 41 Mi laje, akʼo yal mantal ti akʼo xjuxik lek li spakʼbal yut nae.* Li spakʼ yut xchiʼuk li smesklail ti laj yichʼ lokʼesele akʼo yichʼ jipel ta spat li lume, jaʼ ti bu ibal sbae. 42 Vaʼun, akʼo stikʼbeik xkʼexol li tonetik la slokʼesike xchiʼuk yan xa-o akʼo yakʼbeik li smesklaile, mi laje, akʼo yal mantal ti akʼo spasik ta parejo li spakʼbal nae.*

43 »Pe mi sut to tal li chamel ta na ti kʼalal laj xa ox yichʼ pitsel lokʼel li tonetike, ti kʼalal laj xa ox xjuxik lek li spakʼbale* xchiʼuk ti laj xa ox yichʼ pasel ta parejoe, 44 ch-och skʼel lek li palee. Mi laj yil ti pukem xa li ta nae, jaʼ chopol lepra.+ Vaʼun, ibal xa sba li nae. 45 Chal mantal ti akʼo yichʼ jinesel li nae —li stanaltake, li steʼeltake, li spakʼbale* xchiʼuk li smesklaile—, akʼo yichʼ ichʼel batel ta spat li lume, jaʼ ti bu ibal sbae.+ 46 Mi oy buchʼu ch-och li ta na kʼalal jaʼo bajbile,+ ibal sba chkom jaʼ to mi chʼayem xa ox batel kʼakʼale.+ 47 Jech xtok, mi oy buchʼu te chvay li ta nae skʼan me xchukʼ li skʼuʼ spokʼe xchiʼuk skʼan xchukʼ skʼuʼ spokʼ li buchʼu te chveʼe.

48 »Pe mi tal skʼel li palee xchiʼuk mi laj yil ti muʼyuk pukem batel ta na li chamel kʼalal pasbil xa ox ta parejo li spakʼbale,* li palee chakʼ ta naʼel ti muʼyuk xa ibal sba li nae, yuʼun chʼay xa batel li chamele. 49 Sventa xichʼ lekubtasel ta skoj ti ibal toʼox sba* li nae, li yajval nae akʼo yikʼ talel chaʼkot mut, sedro teʼ, kuxul tsajal pokʼ xchiʼuk isopo.+ 50 Li baʼyel mute akʼo te smil ta jun lumal pʼin ti oy yaʼlel ti lupbil tal ta sat voʼe.* 51 Akʼo stsak li sedro teʼe, li isopoe, li kuxul tsajal pokʼe xchiʼuk li kuxul mute. Akʼo stsʼaj skotol ta xchʼichʼel li mut ti laj yichʼ milel ta lumal pʼin ti oy yaʼlel ti lupbil tal ta sat voʼe* xchiʼuk vukub velta+ tsvijbe batel li nae. 52 Sventa xichʼ lekubtasel ta skoj ti ibal toʼox sba* li nae, jaʼ tstunes li xchʼichʼel mute, li voʼ lupbil tal ta sat voʼe,* li kuxul mute, li sedro teʼe, li isopoe xchiʼuk li kuxul tsajal pokʼe. 53 Mi laje, tskolta batel ta spat lum ta osiltik li kuxul mute sventa sta perton li nae, vaʼun muʼyuk xa ibal sba chkom.

54 »Taje jaʼ li mantal kʼalal oy buchʼu tstsakat ta jtosuk leprae, chamel ta snukulil sjol o chamel ta skolom,+ 55 lepra ta jlik kʼuʼil pokʼil+ o ta jpʼejuk na,+ 56 kʼalal oy buchʼu tsitub snukulil sbekʼtale, takijem syayijemal o ti oy xchinale,+ 57 sventa xichʼ naʼel mi oy kʼusi ibal sba o mi muʼyuk.+ Taje jaʼ li mantal sventa leprae».+

15 Xi to albatik yuʼun Jeova li Moises xchiʼuk Aarone: 2 «Xi xavalbeik li j-israeletike: ‹Mi oy junuk vinik ti oy kʼusi chlokʼ ta skʼunile,* ibal sba* chkom+ ta skoj li kʼusi chlokʼ yuʼune. 3 Ibal sba chkom akʼo mi chlokʼ li ta skʼunile o mi te makal chkom.

4 »›Ibal me sba chkom li tem* ti jaʼ te chvay li buchʼu oy kʼusi chlokʼ yuʼune xchiʼuk ibal sba chkom xtok kʼusiuk noʼox ti chchotlebine. 5 Mi oy buchʼu tspikbe li steme,* skʼan me xchukʼ li skʼuʼ spokʼe, skʼan spok sba ta voʼ xchiʼuk ibal sba chkom jaʼ to mi chʼayem xa ox batel kʼakʼale.+ 6 Buchʼuuk noʼox ti te chchoti ti te xa echʼ chotluk li buchʼu oy kʼusi chlokʼ yuʼune skʼan me xchukʼ li skʼuʼ spokʼe, skʼan spok sba ta voʼ xchiʼuk ibal sba chkom jaʼ to mi chʼayem xa ox batel kʼakʼale. 7 Mi oy buchʼu la stabe ta pikbel sbekʼtal li buchʼu oy kʼusi chlokʼ yuʼune, skʼan me xchukʼ li skʼuʼ spokʼe, skʼan spok sba ta voʼ xchiʼuk ibal sba chkom jaʼ to mi chʼayem xa ox batel kʼakʼale. 8 Li buchʼu oy kʼusi chlokʼ yuʼune, mi la sta ta tubtael li buchʼu leke, skʼan me xchukʼ skʼuʼ spokʼ li buchʼu laj yichʼ tubtaele, skʼan spok sba ta voʼ xchiʼuk ibal sba chkom jaʼ to mi chʼayem xa ox batel kʼakʼale. 9 Ibal me sba chkom yuʼun montura mi te choti li buchʼu oy kʼusi chlokʼ yuʼune. 10 Buchʼuuk noʼox ti la sta ta pikel ti bu choti li buchʼu oy kʼusi chlokʼ yuʼune ibal sba chkom jaʼ to mi chʼayem xa ox batel kʼakʼale. Jech xtok, buchʼuuk noʼox ti chichʼ batel li kʼusitik la xchotlebine skʼan me xchukʼ li skʼuʼ spokʼe, skʼan spok sba ta voʼ xchiʼuk ibal sba chkom jaʼ to mi chʼayem xa ox batel kʼakʼale. 11 Mi muʼyuk spokoj skʼob li buchʼu oy kʼusi chlokʼ yuʼune+ xchiʼuk mi oy buchʼu la sta ta pikele, skʼan me xchukʼ skʼuʼ spokʼ li buchʼu laj yichʼ pikele, skʼan spok sba ta voʼ xchiʼuk ibal sba chkom jaʼ to mi chʼayem xa ox batel kʼakʼale. 12 Mi la spik junuk lumal pʼin li buchʼu oy kʼusi chlokʼ yuʼune, akʼo yichʼ vokʼel; yan mi ta teʼ pasbil li pʼine, akʼo yichʼ pokel ta voʼ.+

13 »›Mi paj li kʼusi chlokʼ yuʼune xchiʼuk mi muʼyuk xa ibal sbae, akʼo echʼuk vukub kʼakʼal yoʼ slekubtas sbae. Mi laje, akʼo xchukʼ li skʼuʼ spokʼe xchiʼuk akʼo spok sba ta voʼ ti lupbil tal ta sat voʼe,* vaʼun lek xa chkom.+ 14 Li ta xvaxakibal kʼakʼale, akʼo stsak talel chaʼkotuk tortola* o chaʼkotuk chʼiom paloma,+ akʼo yichʼ talel ta yeloval Jeova li ta yochebal karpana sventa tsobobbaile, akʼo yakʼbe li palee. 15 Li palee chakʼ ta matanal, li jkote jaʼ chkʼot ta matanal sventa mulil, li jkote jaʼ chkʼot ta chikʼbil matanal. Jaʼ jech skʼan spas li palee sventa x-akʼat ta perton yuʼun Jeova li buchʼu oy kʼusi chlokʼ yuʼune.

16 »›Mi lokʼ yaʼlel skʼunil li jun vinike, skʼan spok ta voʼ sjunul li sbekʼtale xchiʼuk ibal sba chkom jaʼ to mi chʼayem xa ox batel kʼakʼale.+ 17 Skʼan xchukʼ ta voʼ kʼusiuk kʼuʼil pokʼil o jlikuk nukul ti yatinoj li yaʼlel skʼunil vinike xchiʼuk ibal sba chkom jaʼ to mi chʼayem xa ox batel kʼakʼale.

18 »›Mi lokʼ yaʼlel skʼunil jun vinik kʼalal jaʼo chchiʼin ta vayel junuk antse, skʼan spok sba ta voʼ xchaʼvoʼalik xchiʼuk ibal sba chkomik jaʼ to mi chʼayem xa ox batel kʼakʼale.+

19 »›Mi chil xchamel li jun antse, vukub kʼakʼal+ ibal sba chkom. Buchʼuuk noʼox ti tspik li antse ibal sba chkom jaʼ to mi chʼayem xa ox batel kʼakʼale.+ 20 Kʼusiuk noʼox ti tstasin li buchʼu chil xchamele ibal sba chkom. Jech xtok, ibal sba chkom+ skotol li kʼusi chchotlebine. 21 Buchʼuuk noʼox ti tspikbe stem* li buchʼu chil xchamele skʼan me xchukʼ li skʼuʼ spokʼe, skʼan spok sba ta voʼ xchiʼuk ibal sba chkom jaʼ to mi chʼayem xa ox batel kʼakʼale. 22 Buchʼuuk noʼox ti tsta ta pikel ti bu choti li antse skʼan me xchukʼ li skʼuʼ spokʼe, skʼan spok sba ta voʼ xchiʼuk ibal sba chkom jaʼ to mi chʼayem xa ox batel kʼakʼale. 23 Mi oy buchʼu la spik li tem* o kʼusiuk noʼox ti bu choti li antse, ibal sba chkom jaʼ to mi chʼayem xa ox batel kʼakʼale.+ 24 Mi oy jun vinik chchiʼin ta vayel li ants ti chil xchamele xchiʼuk mi laj yatinbe xchamel li ants kʼalal jaʼo chchiʼin ta vayele, vukub kʼakʼal ibal sba chkom li vinike.+ Vaʼun, ibal sba chkom ti buyuk noʼox chvay li vinike.

25 »›Mi ep xa ox kʼakʼal+ chlokʼ xchʼichʼel jun ants kʼalal maʼuk to yorail chil xchamele+ o mi jaʼ chjalij ep kʼakʼal li yorail chil xchamele, ibal sba chkom ti kʼu sjalil chlokʼ xchʼichʼele jech kʼuchaʼal ibal sba chkom kʼalal chil xchamele. 26 Li tem* ti bu chvay ti kʼu sjalil chlokʼ xchʼichʼele jech ibal sba chkom jech kʼuchaʼal kʼalal jaʼo chil xchamele,+ jech xtok, kʼusiuk noʼox ti chchotlebin li antse jech ibal sba chkom jech kʼuchaʼal kʼalal jaʼo chil xchamele. 27 Buchʼuuk noʼox ti tspik li kʼusitik la xchotlebin li antse ibal sba chkom, jaʼ yuʼun skʼan me xchukʼ li skʼuʼ spokʼe, skʼan spok sba ta voʼ xchiʼuk ibal sba chkom jaʼ to mi chʼayem xa ox batel kʼakʼale.+

28 »›Mi paj xa ox li xchʼichʼele, akʼo echʼuk vukub kʼakʼal, vaʼun lek xa chkom.+ 29 Li ta xvaxakibal kʼakʼale akʼo stsak talel chaʼkotuk tortola* o chaʼkotuk chʼiom paloma,+ akʼo yichʼbe talel pale ta yochebal karpana sventa tsobobbail.+ 30 Li palee chakʼ ta matanal sventa mulil li jkote, li yane chakʼ ta chikʼbil matanal. Jaʼ jech skʼan spas li palee sventa x-akʼat ta perton yuʼun Jeova li ants ti chlokʼ xchʼichʼel+ ti ibal sbae.

31 »›Ti jech taje jaʼ sventa chʼakal oyikuk li j-israeletik ta stojolal li kʼusitik ibal sbae sventa mu xchamik ta skoj ti tsokesik li axibalna kuʼun ti te oy ta stojolalik+ kʼalal jaʼo ibal sbaike.

32 »›Taje jaʼ li mantal kʼalal oy kʼusi chlokʼ ta skʼunil li vinike, kʼalal ibal sba chkom ta skoj ti chlokʼ yaʼlel skʼunile,+ 33 kʼalal chil xchamel li antse,+ kʼalal oy kʼusi chlokʼ ta sbekʼtal+ li jun vinik o jun antse xchiʼuk kʼalal oy jun vinik chchiʼin ta vayel jun ants ti ibal sbae›».

16 Li Jeovae la xchiʼin ta loʼil Moises kʼalal chamem xa ox li chaʼvoʼ xnichʼnab Aaron ta skoj ti nopajik batel ta stojolal Jeovae.+ 2 Li Jeovae xi laj yalbe li Moisese: «Sventa mu xcham+ li abankil Aarone, albo ti mu xuʼ x-och ta kʼusiuk noʼox ora li ta Batsʼi Lekil Chʼul Kuarto+ ta yutil kortinae,+ li ta yeloval smak Kaxae, yuʼun te chkakʼ jba ta ilel ta jvol tok*+ ta sba+ smak li Kaxae.

3 »Kʼalal ch-och ta Batsʼi Lekil Chʼul Kuarto li Aarone, skʼan xikʼ talel jkotuk chʼiom tot vakax yoʼ xkʼot ta matanal sventa mulil+ xchiʼuk jkotuk tot chij sventa chikʼbil matanal.+ 4 Skʼan slap li chʼul kʼuʼil+ ta lino ti oy skuadroaltake xchiʼuk li xkʼox vex+ ta lino sventa smak li sbekʼtale.* Jech xtok, akʼo skʼam ta xchʼut li chukil+ ta linoe xchiʼuk akʼo yakʼ ta sjol li stsʼot jolil+ ta linoe. Jaʼ chʼul kʼuʼil pokʼiletik.+ Pe baʼyuk akʼo spok sba ta voʼ,+ vaʼun akʼo slap.

5 »Akʼo stsak chaʼkotuk chʼiom tot tentsun ti jaʼ chakʼik li tsobobbail yuʼun j-israeletik+ yoʼ xkʼot ta matanal sventa mulile xchiʼuk akʼo stsak jkotuk tot chij sventa xkʼot ta chikʼbil matanal.

6 »Vaʼun, li Aarone chikʼ talel li tot vakax yoʼ xakʼ ta matanal sventa smule, sventa sta perton+ stuk xchiʼuk sventa sta perton li yutsʼ yalale.

7 »Akʼo yikʼ talel li chaʼkot tentsune, te akʼo yakʼ ta yeloval Jeova ta yochebal karpana sventa tsobobbail. 8 Li Aarone akʼo yakʼ suerte ta stojolal li chaʼkot tentsune yoʼ xichʼ naʼel bu jkotukal chichʼ li Jeovae xchiʼuk bu jkotukal chichʼ li Asasele.* 9 Li Aarone chakʼ ta matanal li tentsun ti jaʼ kʼot ta yuʼun+ li Jeovae, jaʼ chakʼ ta matanal sventa mulil. 10 Yan li tentsun ti jaʼ kʼot ta yuʼun li Asasele kuxul skʼan ikʼel talel ta yeloval Jeova sventa xichʼ tael perton, vaʼun chichʼ takbel batel Asasel ta takixokol balumil.+

11 »Li Aarone chikʼ talel ta skajleb matanal li tot vakax sventa smule, sventa sta perton stuk xchiʼuk sventa sta perton li yutsʼ yalale. Mi laje, tsmil li tot vakaxe yoʼ xkʼot ta matanal sventa li smul stuke.+

12 »Vaʼun, akʼo stsak li xchikʼobil pom+ ti oy yakʼalil ti te oy ta skajleb matanal+ ta yeloval Jeovae xchiʼuk akʼo stsak chaʼjopuk ninal pom+ ti oy sperfumeale, akʼo yichʼ talel li ta Batsʼi Lekil Chʼul Kuartoe.+ 13 Jech xtok, sventa mu xchame akʼo te xchikʼ li pom ta yeloval Jeovae,+ li xchʼailal* pome ta xpix sjunul li smak Kaxae.+

14 »Ta stsakbe jutebuk xchʼichʼel+ li tot vakaxe xchiʼuk ta svij batel ta sniʼ skʼob ta yeloval Kaxa li ta jot xokon ta stukʼil slokʼeb kʼakʼale xchiʼuk vukub velta ta svij ta sniʼ skʼob jutebuk chʼichʼ ta yeloval+ li Kaxae.

15 »Ta tsʼakale, ta smil li tentsun ti chtun ta matanal sventa mulile ti jaʼ sventa smul li jteklume.+ Vaʼun, chichʼbe ochel xchʼichʼel li ta Batsʼi Lekil Chʼul Kuartoe,+ jech tstunesbe kʼuchaʼal la stunesbe xchʼichʼel+ li tot vakaxe; akʼo svij batel li ta yeloval Kaxae.

16 »Akʼo sakubtas li Batsʼi Lekil Chʼul Kuarto ta skoj li kʼusitik ibalik sba* tspas li j-israeletike, ta skoj ti mu xchʼunik mantale xchiʼuk ta skoj li smulike,+ jech akʼo spas xtok ta stojolal li karpana sventa tsobobbail ti te oy ta stojolalik ti tsokesik ta skoj li kʼusitik ibal sba tspasike.

17 »Kʼalal jaʼo ch-och batel ta Batsʼi Lekil Chʼul Kuarto li pale sventa smal li chʼichʼ yoʼ sta pertone, muʼyukuk me buchʼu xbat li ta karpana sventa tsobobbaile, jaʼ to mi lokʼ talel li palee. Te tsmal li chʼichʼ sventa sta perton stuke, sventa sta perton li yutsʼ yalale+ xchiʼuk li tsobobbail yuʼun Israele.+

18 »Vaʼun, chbat li ta skajleb matanal+ ti te oy ta yeloval Jeova sventa xichʼ lekubtasel li skajleb matanale, mi laje, tstsakbe jutebuk xchʼichʼel li tot vakaxe xchiʼuk li xchʼichʼel tentsune sventa tsbonbe li xulubtak skajleb matanale. 19 Jech xtok, vukub velta tsvijbe ta sniʼ skʼob jutebuk chʼichʼ li skajleb matanale sventa slekubtas xchiʼuk xchʼultajes ta skoj li kʼusitik ibal sba tspas j-israeletike.

20 »Mi laj xa ox sakubtas+ li Batsʼi Lekil Chʼul Kuartoe, li karpana sventa tsobobbaile xchiʼuk li skajleb matanale,+ chikʼ talel xtok li kuxul tentsune.+ 21 Li Aarone chakʼ xchibal skʼob ta sjol li kuxul tentsune, vaʼun chal ta jamal skotol li kʼusi chopol tspas j-israeletike, ti mu xchʼunik mantale xchiʼuk skotol li smulike, te chakʼbe ta sjol li tentsune.+ Mi laje, tstak batel ta takixokol balumil ti jaʼ chikʼ batel jun vinik ti jaʼ onoʼox oy ta sbae.* 22 Li tentsune jaʼ chkuch batel ta takixokol balumil+ skotol li smul+ j-israeletike, li pale une tstak batel ta takixokol balumil+ li tentsune.

23 »Ta tsʼakal li Aarone ta xjelav li ta karpana sventa tsobobbaile xchiʼuk tslokʼ li skʼuʼ spokʼ ti pasbil ta lino ti jaʼ la slap kʼalal jaʼo och li ta Batsʼi Lekil Chʼul Kuartoe, vaʼun te chikta komel. 24 Akʼo spok sba* ta voʼ+ ti bu chʼule xchiʼuk akʼo slap li skʼuʼ spokʼtake;+ mi laje, chlokʼ batel sventa xakʼ li chikʼbil matanal+ yuʼune xchiʼuk li chikʼbil matanal+ yichʼojik tal jteklume, vaʼun tsta perton stuk xchiʼuk tsta perton li jteklume.+ 25 Li ta skajleb matanale te chchikʼbe xepuʼal li matanal sventa mulile yoʼ xtomet muyel xchʼailal* yuʼun.

26 »Li buchʼu oy ta sba ay skoltabe komel Asasel+ li tot tentsune skʼan xchukʼ li skʼuʼ spokʼtake, skʼan spok sba ta voʼ, mi laje, xuʼ x-och ti bu spasoj skarpanaike.

27 »Li tot vakax xchiʼuk li tentsun ti laj yichʼ akʼel ta matanal sventa mulile xchiʼuk ti laj yichʼ tikʼbel ochel xchʼichʼel li ta Batsʼi Lekil Chʼul Kuarto ti tun sventa xichʼ tael pertone ta xichʼik ikʼel batel ta spat li karpanaetike, vaʼun ta xichʼ chikʼel ta kʼokʼ+ li snukulile, li sbekʼtale xchiʼuk li yikʼobale.* 28 Li buchʼu ta xchikʼe skʼan xchukʼ li skʼuʼ spokʼtake, akʼo spok sba ta voʼ, mi laje, xuʼ x-och ti bu spasoj skarpanaike.

29 »Jaʼ jun mantal sbatel osil chkom ta atojolalik: li ta slajunebal kʼakʼal yochel li svukubal ue, skʼan xatsʼik avokolik,* mu me xapasik jtosuk abtelal+ manchuk mi te vokʼemoxuk ta Israel o jun jyanlum ti te xchiʼukoxuk ta nakleje. 30 Li kʼakʼal liʼe chataik perton+ sventa lekuk akʼoplal cha-albatik. Jech pokbil chakomik ta yeloval Jeova+ ta skoj li amulike. 31 Jaʼ jun savado sventa xakux lek avoʼontonik xchiʼuk skʼan xatsʼik avokolik.+ Jaʼ jun mantal sbatel osil.

32 »Li pale ti chichʼ tʼujel+ xchiʼuk ti chichʼ yabtel* ta paleal+ ti jaʼ chkom ta xkʼexol li stote+ jaʼ chakʼ matanal sventa xichʼ tael perton xchiʼuk jaʼ tslap li kʼuʼil pokʼiletik ti pasbil ta linoe,+ jaʼ li chʼul kʼuʼil pokʼiletike.+ 33 Jaʼ chakʼ matanal sventa li Batsʼi Lekil Chʼul Kuartoe,+ li karpana sventa tsobobbaile+ xchiʼuk li skajleb matanale;+ jech xtok, jaʼ chakʼ matanal sventa li paleetike xchiʼuk sventa sjunul li tsobobbail yuʼun jteklume.+ 34 Liʼe jaʼ jun mantal ti chtun avuʼunik+ sbatel osil sventa sta perton li j-israeletik ta skoj skotol li smulike, jun velta ta jabil+ jech chichʼ pasel».

Jaʼ jech la spas Aaron jech kʼuchaʼal albat mantal yuʼun Jeova li Moisese.

17 Xi albat yuʼun Jeova li Moisese: 2 «Chiʼino ta loʼil li Aaron xchiʼuk xnichʼnabtake xchiʼuk skotol li j-israeletike, xi xavalbe yaʼiike: ‹Xi chalboxuk mantal li Jeovae:

3 »›«Mi oy buchʼu junuk avuʼunik ta Israel ta smil jkotuk tot vakax o jkotuk chʼiom tot chij o jkotuk tentsun ti bu apasoj akarpanaike o mi te tsmil ta spat ti bu apasoj akarpanaike, 4 mi mu teuk laj yikʼ talel ta yochebal karpana sventa tsobobbail yoʼ xakʼbe ta smoton Jeova li ta yeloval axibalna yuʼun Jeovae, jaʼ chkom ta sba li chʼichʼe. Laj xa smal chʼichʼ, jaʼ yuʼun skʼan xichʼ milel li ta steklumale. 5 Taje jaʼ sventa mu xa teuk smil ta osiltik xchonbolomik li j-israeletike, jaʼ lek akʼo yikʼik talel ta stojolal Jeova ta yochebal karpana sventa tsobobbail, akʼo yikʼbeik tal li palee. Akʼo smilik sventa xkʼot ta milbil matanal sventa jun oʼontonal ta stojolal Jeova.+ 6 Li palee tsvijbe xchʼichʼel li ta skajleb smoton Jeova ti te oy ta yochebal karpana sventa tsobobbaile. Jech xtok, chchikʼbe li xepuʼal ta skajleb matanal yoʼ xtometuk muyel xchʼailal* yuʼun ti lek xmuet yikʼ* chaʼi Jeovae.+ 7 Mu xa me xakʼbeik milbil matanal li pukujetik+ ti xkoʼolajik ta tentsun ti yakal chmulivaj xchiʼukike.+ Taje jaʼ jun mantal chkom ta atojolalik sbatel osil sventa li jaykʼol kuxlejal chtal avuʼunike»›.

8 »Xi xavalbe yaʼiike: ‹Mi oy junuk j-israel o junuk jyanlum ti te xchiʼukoxuk ta naklej ti chakʼ chikʼbil matanal o milbil matanale, 9 pe mi muʼyuk chichʼ talel ta yochebal karpana sventa tsobobbail yoʼ xakʼbe li Jeovae, skʼan xichʼ milel li ta steklumale.+

10 »›Mi oy ta stiʼ chʼichʼ+ junuk j-israel o junuk jyanlum ti te xchiʼukoxuk ta nakleje, ta melel ta jkontrain ti buchʼu tstiʼ chʼichʼe xchiʼuk persa ta jmil li ta steklumale. 11 Yuʼun li xkuxlejal li kʼusi kuxajtike te oy ta xchʼichʼel+ xchiʼuk voʼon kakʼoj ta skajleb matanal+ sventa xataik perton, yuʼun li chʼichʼe jaʼ chataik-o perton+ ta skoj ti jaʼ te oy li kuxlejale. 12 Jaʼ yuʼun, xi kalojbe li j-israeletike: «Mu me buchʼu stiʼ chʼichʼ+ avuʼunik+ xchiʼuk mu me stiʼik ek li jyanlumetik ti te xchiʼukoxuk ta nakleje».

13 »›Mi oy junuk j-israel o junuk jyanlum ti te xchiʼukoxuk ta naklej ti la sta ta nutsel jkotuk teʼtikal chonbolom o jkotuk mut ti stakʼ tiʼele, skʼan me slokʼesbe li xchʼichʼele+ xchiʼuk skʼan smukbe ta lum. 14 Yuʼun li xkuxlejal li kʼusi kuxajtike jaʼ li xchʼichʼele, te oy ta chʼichʼ li kuxlejale. Jech oxal, xi onoʼox kalojbeik li j-israeletike: «Mu xatibeik xchʼichʼel jtosuk chonbolom, yuʼun li xkuxlejal kʼusiuk chonbolome jaʼ li xchʼichʼele. Persa skʼan xichʼ milel li buchʼu tstiʼe».+ 15 Mi oy buchʼu junukal avuʼunik ti te vokʼem ta Israel o junuk jyanlum ti la sta jkotuk chamem chonbolom xchiʼuk ti la stiʼe o mi la stiʼ jkotuk chonbolom ti yichʼoj lilinel ta tiʼel ta jkotuk jtiʼvanej chonbolome,+ skʼan me xchukʼ li skʼuʼ spokʼe, skʼan spok sba ta voʼ xchiʼuk ibal sba* chkom jaʼ to mi chʼayem xa ox batel kʼakʼale,+ vaʼun lek xa chkom. 16 Pe mi muʼyuk la xchukʼ li skʼuʼ spokʼe xchiʼuk mi muʼyuk la spok sba* ta voʼe, skʼan me stoj li smule›».+

18 Li Jeovae xi to laj yalbe li Moisese: 2 «Chiʼino ta loʼil li j-israeletike, xi xavalbee: ‹Voʼon li Jeova Dios avuʼunike.+ 3 Mu jechuk xapas atalelalik kʼuchaʼal tspasik li buchʼutik te nakalik ta yosilal Ejipto ti bu toʼox lanakiike. Jech xtok, mu me xapasik li kʼusitik tspasik li buchʼutik te nakalik ta yosilal Kanaane, ti bu chkikʼoxuk batele+ xchiʼuk mu me xlik apasik li kʼusitik nopem xaʼiik spasele. 4 Skʼan xachʼunik li kʼusitik chapanbil kuʼune xchiʼuk li mantaletik kuʼune, skʼan xavakʼ ta akuxlejalik.+ Voʼon li Jeova Dios avuʼunike. 5 Skʼan xachʼunik li mantaletik kuʼune xchiʼuk li kʼusitik chapanbil kuʼune; li buchʼu chchʼun li kʼusi chal mantale jaʼ chkuxi-o.+ Voʼon Jeovaun.

6 »›Mu me buchʼu xnopaj ta stojolal junuk yutsʼ yalal avuʼunik sventa xchiʼin ta vayel.+ Voʼon Jeovaun. 7 Mu xuʼ xachiʼin ta vayel atot xchiʼuk mu xuʼ xachiʼin ta vayel ameʼ. Ta skoj ti jaʼ ameʼe, mu xuʼ xachiʼin ta vayel.

8 »›Mu xuʼ xachiʼinbe ta vayel yajnil atot,+ yuʼun chavakʼ ta kʼexlal li atote.

9 »›Mu xuʼ xachiʼin ta vayel avix o avixlel, mi jaʼ stseb atot o mi jaʼ stseb ameʼ xchiʼuk akʼo mi jun anail lavokʼik o mi ta yan na vokʼ.+

10 »›Mu xuʼ xachiʼinbe ta vayel stseb akerem o stseb atseb, yuʼun chavakʼ aba ta kʼexlal.

11 »›Mu xuʼ xachiʼinbe ta vayel stseb yajnil atot, li stseb atote, yuʼun jaʼ achiʼil ta vokʼel.

12 »›Mu xuʼ xachiʼinbe ta vayel xvix o yixlel atot, yuʼun jaʼ to mero yutsʼ yalal atot.+

13 »›Mu xuʼ xachiʼinbe ta vayel xvix o smuk ameʼ, yuʼun jaʼ to mero yutsʼ yalal ameʼ.

14 »›Mu xuʼ xachiʼinbe ta vayel yajnil li xchiʼil ta vokʼel atote sventa mu xavakʼ ta kʼexlal li xchiʼil ta vokʼel atote, yuʼun jaʼ ajunmeʼ.+

15 »›Mu xuʼ xachiʼin ta vayel avalib.+ Ta skoj ti jaʼ yajnil akereme, mu xuʼ xachiʼin ta vayel.

16 »›Mu xuʼ xachiʼinbe ta vayel yajnil abankil o avitsʼin,+ yuʼun chavakʼ ta kʼexlal li abankil o avitsʼine.

17 »›Mu xuʼ xachiʼin ta vayel li jun ants xchiʼuk stsebe.+ Mu xuʼ xachiʼinbe ta vayel stseb li skerem ants taje mi jaʼuk xachiʼinbe ta vayel stseb li stsebe. Ta skoj ti jaʼ to mero yutsʼ yalale; toj chopol maʼ taje.*

18 »›Mu me xavikʼbe smuk o xvix li ants avikʼoje, yu’un tskontrain sbaik,+ mu xuʼ xachiʼin ta vayel ti kʼalal kuxul to li ants avikʼoje.

19 »›Mu me xanopaj ta stojolal junuk ants ti jaʼo chil xchamel ti chakʼan chachiʼin ta vayele.+

20 »›Mu xuʼ xachiʼinbe ta vayel yajnil junuk achiʼil ta krixchanoal* ti ibal xa sba*+ chakome.

21 »›Mu me xanop jutebuk ti xuʼ xichʼ akʼbel ta smoton Molek+ junuk anitilulale. Mu me xasokesbe skʼoplal sbi Adios ta skoj taje.+ Voʼon Jeovaun.

22 »›Mu xuʼ xachiʼin ta vayel achiʼil ta vinikal jech kʼuchaʼal chachiʼin ta vayel junuk antse.+ Toj ibal sba maʼ taje.

23 »›Mu xuʼ xchiʼin ta vayel jkotuk chonbolom li jun vinik ti jech ibal xa sba chkom ta skoje; mi jaʼuk jun ants xuʼ xakʼ sba ta chiʼinel ta vayel ta jkotuk chonbolom.+ Mu staleluk jech chichʼ pasel maʼ taje.

24 »›Mu me xapasik jtosuk li kʼusitik taje ti jech ibal xa aba chakomike, yuʼun jech spasojik li jyanlumetik ti ta jnutsik lokʼel ta atojolalik ta skoj ti ibal xa sbaike.+ 25 Jaʼ ta skoj ti ibal xa sba li balumile, jaʼ yuʼun chkakʼbe kastigo li balumil ta skoj li smulike, li balumile ta xeta lokʼel li jnaklejetike.+ 26 Pe li voʼoxuke skʼan xachʼunik li mantaletik xchiʼuk li kʼusitik chapanbil kuʼune,+ mu xapasik jtosuk li kʼusitik ibal sba taje akʼo mi te vokʼemoxuk ta Israel o mi jaʼ jun jyanlum ti te xchiʼukoxuk ta nakleje.+ 27 Yuʼun skotol li kʼusitik ibal sba taje jech la spas li krixchanoetik ti liʼ nakiik ta balumil kʼalal muʼyukoxuk toʼoxe,+ jech oxal ibal sba li balumil avie. 28 Ta skoj ti muʼyuk to asokesojik li balumile, muʼyuk chetaoxuk jech kʼuchaʼal la xeta lokʼel jyanlumetik kʼalal muʼyukoxuk toʼoxe. 29 Mi oy buchʼu tspas li kʼusitik ibal sba taje, skʼan xichʼ milel ta steklumalik li buchʼu jech tspase. 30 Voʼoxuke persa skʼan xachʼunik li mantal jech kʼuchaʼal kalojboxuke ti mu xapasik jtosuk li kʼusitik ibal sba ti nopem xaʼiik spasel krixchanoetik ti kʼalal muʼyukoxuk toʼoxe+ sventa mu jechuk ibaluk sba xakomik ta skoj. Voʼon li Jeova Dios avuʼunike›».

19 Li Jeovae xi to laj yalbe li Moisese: 2 «Chiʼino ta loʼil sjunul li tsobobbail yuʼun j-israeletike xchiʼuk xi xavalbee: ‹Skʼan me chʼulukoxuk, yuʼun chʼulun+ li Jeova Dios avuʼunike.

3 »›Ta jujunoxuk skʼan xatsakik ta mukʼ* atot ameʼik+ xchiʼuk skʼan xachabiik li savado+ kuʼune. Voʼon Jeova Dios avuʼunik. 4 Mu xabatik ta stojolal li jecheʼ diosetike+ mi jaʼuk xapas adiosik ta unijesbil takʼin.+ Voʼon Jeova Dios avuʼunik.

5 »›Ta yan xtoke, mi chavakʼbeik Jeova+ milbil matanal sventa jun oʼontonale, jaʼuk me jech xavakʼik sventa lek xiloxuke.+ 6 Jaʼo xatiʼik ti kʼusi kʼakʼalil chavakʼik li milbil matanale xchiʼuk xuʼ xatiʼik ta yokʼomal, pe skʼan me xachikʼik ta kʼokʼ+ mi komenaj* to ta yoxibal kʼakʼale. 7 Pe mi laj to yichʼ tiʼel li ta yoxibal kʼakʼale, ibal me sba* chkʼot xchiʼuk muʼyuk xa chichʼ chʼamel li matanale. 8 Li buchʼu tstiʼe skʼan me stoj li smule, yuʼun laj xa sokes li kʼusi chʼul ti jaʼ yuʼun Jeovae, li buchʼu jech tspase skʼan xichʼ milel li ta steklumale.

9 »›Kʼalal mi la sta yorail chatsobbe sat li kʼusitik chlokʼ ta avosilike, mu me xatsobik skotol li ta stiʼiltak avosilike xchiʼuk mu me xbat akʼuxkʼulta* li kʼusi kom kʼalal la atsobe.+ 10 Jech xtok, mu me xbat akʼuxkʼulta li a-uva mi laj xa ox atsobe xchiʼuk mi jaʼuk xatsob li butik chpʼaje.* Skʼan xaviktabe komel li povreetike*+ xchiʼuk li jyanlum ti te achiʼuk ta nakleje. Voʼon Jeova Dios avuʼunik.

11 »›Mu me xa-elkʼajik,+ mu me xaloʼlavanik+ xchiʼuk mu me kʼusi xavelkʼanbe abaik ta amanyailik. 12 Mu me xataik ta alel jbi+ kʼalal chajutik kʼope,* yuʼun chasokesbeik sbi li Adiosike. Voʼon Jeovaun. 13 Mu me ta amanyailuk kʼusi xavelkʼanbe li achiʼil ta krixchanoale+ xchiʼuk mu me xa-elkʼaj.+ Mu me teuk avichʼojbe sjunul akʼobal stojol li avaj-abtel ti ta yokʼomal+ to chavakʼbee.

14 »›Mu me xachopol kʼopta li pakʼchikine,* mu me xamakbe* yakan li maʼsate+ xchiʼuk xiʼtao* me li Adiose.+ Voʼon Jeovaun.

15 »›Tukʼ me xachapanvanik. Mu me xkʼuxubaj ta avoʼonton li povre ta skoj noʼox ti povree o ti jaʼ xa lek chavil ti buchʼu jkʼuleje.+ Tukʼuk me xachapan li achiʼil ta krixchanoale.

16 »›Mu me xapuk batel ta ateklumal+ li kʼusi mu meleluk ta stojolal li achiʼile. Mu me xavakʼbe ta vokol xkuxlejal* achiʼil+ ta skoj ti chapukbe skʼoplal li kʼusi mu meleluke.* Voʼon Jeovaun.

17 »›Mu me xapʼaj ta avoʼonton+ li avermanoe. Persa skʼan xapʼijubtas achiʼil+ sventa mu xakuchinbe li smule.

18 »›Mu me xapak akʼoplal+ ta stojolal li xnichʼnabtak ateklumale xchiʼuk mu me xanakʼ skʼakʼal avoʼonton ta stojolalik, skʼan me xakʼan achiʼil jech kʼuchaʼal akʼanoj aba atuke.+ Voʼon Jeovaun.

19 »›Chʼunik me li mantaletik kuʼune. Mu me xavakʼ xkuchomajik chaʼkot atsʼunbal chonbolom ti jelel stsʼunbalike. Jech xtok, mu me xakap ta tsʼunel ta avosil chaʼtos sbekʼ tsʼunobil+ xchiʼuk mu me xalap jlikuk kʼuʼil pokʼil ti kapbil ta jalel+ ta chaʼtos snaule.

20 »›Mi oy jun vinik ti chchiʼin ta vayel jun kiarail ti makbil xa sventa xnupun xchiʼuk jun vinike, mi muʼyuk to tojbil xchiʼuk mi muʼyuk to koltabil lokʼele, skʼan me xichʼik akʼbel kastigo. Pe mu me stakʼ xichʼik milel xchaʼvoʼalik, yuʼun muʼyuk to koltabil lokʼel li kiaraile. 21 Li vinike skʼan me xikʼ talel jkotuk tot chij yoʼ xakʼ ta matanal sventa skʼanel perton,+ akʼo yikʼbe talel Jeova ta yochebal karpana sventa tsobobbail. 22 Li palee jaʼ chakʼ ta matanal ta yeloval Jeova li tot chije sventa sta perton li vinike, jech chichʼ pasbel perton li smule.

23 »›Mi la-ochik li ta balumil ti chkakʼboxuke xchiʼuk mi la atsʼunik kʼusiuk teʼal ti chakʼ sate, skʼan me ibal sba xavilik xchiʼuk mu stakʼ xalobeik li sate. Oxib jabil mu stakʼ xapikik. Mu xuʼ xalobeik sat. 24 Li ta xchanibal jabile chʼul xa skotol li sate, vaʼun ta muyubajel chavakʼbeik li Jeovae.+ 25 Li ta svoʼobal jabile, xuʼ xa xalobeik li sate, vaʼun ta me x-epaj kʼalal chatsobbeik sate. Voʼon Jeova Dios avuʼunik.

26 »›Mu me kʼusi xatiʼik ti oy xchʼichʼele.+

»›Mu xachanbeik smelol li kʼusi chkʼot ta pasel ta jelavele mi jaʼuk xapasik li majiae.+

27 »›Mu me toj komkomuk xaset li ajolik ta xokontake mi jaʼuk xajux li avisimik ta xokon asatike.+

28 »›Mu me xaboj abekʼtalik ta skoj ti cham junuk krixchanoe,*+ jech xtok mu me kʼusi xatsʼiba ta anukulilik. Voʼon Jeovaun.

29 »›Mu me xapas ta jchonbail ants+ li atsebe, yuʼun chasokesbe skʼoplal sventa mu sok li balumil ta skoj li jchonbail antsetike xchiʼuk ti xnoj ta talelal ti kʼexlal sbae.+

30 »›Chabiik me li savado+ kuʼune xchiʼuk akʼik ta ilel ti chavichʼik ta mukʼ* li chʼulna kuʼune. Voʼon Jeovaun.

31 »›Mu me xbat asaʼik koltael ta stojolal jun j-espiritista+ xchiʼuk mi jaʼuk xbat ajakʼik ta stojolal li buchʼutik chalik li kʼusitik chkʼot ta pasel ta jelavele,+ yuʼun ibal sba chakʼotik yuʼun. Voʼon Jeova Dios avuʼunik.

32 »›Ichʼo me ta mukʼ li buchʼutik sak xa sjolike,+ tsako me ta mukʼ li buchʼutik oy xa sjabilalike+ xchiʼuk xiʼtao me li Adiose.+ Voʼon Jeovaun.

33 »›Mu me xavilbajinik+ li jyanlum mi te nakal ta avosilike. 34 Li jyanlum ti te xchiʼukoxuk+ ta nakleje skʼan me jaʼuk Israel xavilik ek; skʼan me xakʼan jech kʼuchaʼal akʼanoj aba atuke, yuʼun jyanlum la-echʼik ek li ta yosilal Ejiptoe.+ Voʼon Jeova Dios avuʼunik.

35 »›Mu me xaloʼlavanik kʼalal oy kʼusi chapʼisik ti kʼu smukʼul+ o ti kʼu yalale. 36 Tsʼakaluk me lek li akiloike, tsʼakaluk me li spʼisol avuʼunike, skʼan me tsʼakaluk avuʼunik li jun efae* xchiʼuk li jun ine.*+ Voʼon Jeova Dios avuʼunik ti la jlokʼesoxuk tal li ta yosilal Ejiptoe. 37 Skʼan me xachʼunik skotol li mantaletik kuʼune xchiʼuk skotol li kʼusitik chapanbil kuʼune, skʼan me xapasik.+ Voʼon Jeovaun›».

20 Li Jeovae xi to laj yalbe li Moisese: 2 «Xi xavalbe li j-israeletike: ‹Buchʼuuk noʼox ta Israel o jyanlum ti te nakal ta Israel ti chakʼbe Molek junuk snitilulale persa skʼan xichʼ milel.+ Li jnaklejetike akʼo yakʼbeik ton jaʼ to mi chame. 3 Voʼon jtuk ta jkontrain li buchʼu jech la spase xchiʼuk ta jmil li ta steklumale, yuʼun laj yakʼbe Molek li snitilulale xchiʼuk laj xa sokesbe skʼoplal ti bu chʼul+ kuʼune xchiʼuk laj xa sokesbe skʼoplal li jchʼul bie. 4 Mi te noʼox skʼelojik li jnaklejetik ta balumil ti laj yakʼbe Molek li snitilulale xchiʼuk mi muʼyuk la smilike,+ 5 voʼon jtuk ta jkontrain xchiʼuk yutsʼ yalal+ li buchʼu jech la spase. Ta jmil li ta steklumale xchiʼuk ta jmil skotol li buchʼu tskoʼoltas sjolik sventa chmulivajik xchiʼuk li Moleke.

6 »›Li buchʼu chbat saʼ j-espiritistaetik+ o chbat saʼ li buchʼutik chalik li kʼusitik chkʼot ta pasel ta jelavel+ ti jech muʼyuk xa tukʼ chakʼ sba ta jtojolale ta jkontrain ta melel li buchʼu jech tspase xchiʼuk ta jmil li ta steklumale.+

7 »›Skʼan xachʼultajes abaik sventa chʼul xakʼotik,+ yuʼun voʼon Jeova Diosun avuʼunik. 8 Jech xtok, skʼan xachʼunik li mantaletik kuʼune xchiʼuk xavakʼ ta akuxlejalik.+ Voʼon Jeovaun ti yakal ta jchʼultajesoxuke.+

9 »›Mi oy jun vinik chchopol kʼopta stot o smeʼe, persa akʼo yichʼ milel.+ Ta skoj ti la xchopol kʼopta stot o smeʼe, jaʼ chkom ta sba stuk li xchʼichʼele.

10 »›Mi oy jun vinik la sloʼlabe snup xchiʼil yan vinike, persa skʼan xichʼ milel xchaʼvoʼalik.*+ 11 Li vinik ti chchiʼinbe ta vayel yajnil stote chakʼ ta kʼexlal+ li stote. Persa skʼan xichʼ milel xchaʼvoʼalik. Jaʼ chkom ta sba stukik li xchʼichʼelike. 12 Mi oy jun vinik chchiʼin ta vayel yalibe, persa skʼan xichʼ milel xchaʼvoʼalik. Mu staleluk li kʼusi la spasike. Jaʼ chkom ta sba stukik li xchʼichʼelike.+

13 »›Mi oy jun vinik chchiʼin ta vayel xchiʼil ta vinikal jech kʼuchaʼal chchiʼin ta vayel junuk antse, toj ibal sba* li kʼusi tspasike.+ Persa skʼan xichʼ milel xchaʼvoʼalik. Jaʼ chkom ta sba stukik li xchʼichʼelike.

14 »›Mi oy jun vinik chikʼ jun ants xchiʼuk ti chikʼbe li smeʼ xtoke, toj chopol maʼ taje.*+ Skʼan me xachikʼik+ li vinik xchiʼuk li antsetike sventa mu xchan yantik li kʼusi toj chopol taje.

15 »›Mi oy jun vinik chchiʼin ta vayel jkotuk chonbolome, persa skʼan xichʼ milel li vinike xchiʼuk skʼan xamilik li chonbolome.+ 16 Mi oy jun ants ti chakʼ sba ta chiʼinel ta vayel ta jkotuk chonbolome,+ skʼan me xamil li antse xchiʼuk li chonbolome. Persa skʼan xchamik. Jaʼ chkom ta sba stukik li xchʼichʼelike.

17 »›Mi oy jun vinik chchiʼin ta vayel xvix o yixlel, mi jaʼ stseb stot o stseb smeʼ ti laj yil sbaik ti tʼanalike, toj kʼexlal sba maʼ taje.+ Skʼan xichʼik milel ta yeloval sat li jteklume. Laj xa yakʼ ta kʼexlal xvix o yixlel li vinike. Skʼan me stoj li smule.

18 »›Mi oy jun vinik chchiʼin ta vayel jun ants kʼalal jaʼo chil xchamele, xchaʼvoʼalik chakʼik ta ilel ti muʼyuk stsakojik ta venta li xchʼichʼele.+ Skʼan xichʼ milel xchaʼvoʼalik li ta steklumalike.

19 »›Mu me xachiʼinbe ta vayel xvix o smuk ameʼ o xvix o yixlel atot, yuʼun jaʼ to mero yutsʼ yalal atot o ameʼ ti chavakʼ ta kʼexlale.+ Skʼan me stoj li smulike. 20 Mi oy jun vinik chchiʼinbe ta vayel yajnil sjuntote, chakʼ ta kʼexlal+ li sjuntote. Skʼan me stoj li smulike. Muʼyuk yalab xnichʼnab xcham xlajik. 21 Mi oy jun vinik chikʼbe yajnil yitsʼin o sbankile, toj echʼ noʼox chopol maʼ taje.+ Chakʼ ta kʼexlal li yitsʼin o sbankile. Muʼyuk yalab xnichʼnab chkomik.

22 »›Skʼan me xachʼunik skotol li mantaletik xchiʼuk skotol li kʼusitik chapanbil kuʼune+ xchiʼuk akʼo ta akuxlejalik+ sventa mu xetaoxuk lokʼel+ li balumil ti bu chkikʼoxuk batel ta nakleje. 23 Mu me xapasik li kʼusi nopem xaʼiik spasel li jyanlumetik ti ta jnuts lokʼel ta atojolalike;+ ta skoj ti jaʼ la spasik skotol li kʼusitik taje, toj echʼ noʼox chopol chkil.+ 24 Jaʼ yuʼun, xi laj kalboxuke: «Jaʼ chavuʼuninbeik li yosilike, voʼon chkakʼboxuk sventa xavuʼuninik li balumil ti bu oy lek leche xchiʼuk pome.+ Voʼon Jeova Diosun avuʼunik ti la jchʼakoxuk lokʼel ta stojolal li jteklumetike».+ 25 Skʼan xatojobik stʼujel li chonbolometik ti muʼyuk ibalik sbae xchiʼuk ti bu ibalik sbae, li mutetik ti muʼyuk ibalik sbae+ xchiʼuk ti bu ibalik sbae; mu me ibal aba xakomik ta skoj jkotuk chonbolom o jkotuk mut o kʼusiuk noʼox ti xkilet ta lumtik chanav ti la jchʼak lokʼel ta atojolalik sventa ibaluk sba xavilike.+ 26 Skʼan me chʼulukoxuk ta jtojolal, yuʼun chʼul Jeovaun+ xchiʼuk voʼon yakal ta jchʼakoxuk lokʼel ta stojolal jteklumetik sventa xakʼotik ta kuʼun.+

27 »›Mi oy jun vinik o ants ti tspas espiritismoe o ti chalbe skʼoplal li kʼusi chkʼot ta pasel ta jelavele, persa akʼo yichʼik milel.+ Li jteklume akʼo yakʼbeik ton jaʼ to mi chamike. Jaʼ chkom ta sba stukik li xchʼichʼelike›».

21 Li Jeovae xi laj yalbe li Moisese: «Chiʼino ta loʼil li paleetik ti jaʼ xnichʼnabtak Aarone, xi xavalbee: ‹Mu me buchʼu sokes sba ta stojolal junuk anima* li ta steklumale.+ 2 Pe mi jaʼ to mero yutsʼ yalale, xuʼ sokes sba, mi smeʼ, mi stot, mi skerem, mi stseb, mi sbankil o yitsʼin. 3 Jech xtok, xuʼ sokes sba ta skoj xvix o yixlel ti tojol tseb toe ti jaʼ to mero yutsʼ yalal ti muʼyuk to nupuneme. 4 Pe mi nupunem xa xchiʼuk jun vinik ta jteklum li jun antse, mu xuʼ spikbe li sbekʼtal ti chamem xae sventa mu sokes sba. 5 Mu me xjux li sjolike+ mi jaʼuk slokʼ li stiʼil yisimik ta xokon satike xchiʼuk mu stakʼ sboj sbekʼtalik.+ 6 Skʼan chʼulikuk ta stojolal li Sdiosike+ xchiʼuk skʼan mu sokesbeik skʼoplal li sbi Sdiosike,+ yuʼun jaʼ chakʼbeik matanal Jeova ti chikʼbil ta kʼokʼe, li span* Sdiosike. Skʼan chʼulikuk.+ 7 Mu stakʼ xikʼik junuk jchonbail ants,+ mi jaʼuk junuk ants ti maʼuk xa tojol tsebe, mi junuk sutemal ants,+ yuʼun li palee chʼul ta stojolal li Sdiose. 8 Skʼan xachʼultajes,+ yuʼun jaʼ chakʼ pan ta stojolal li Adiose. Skʼan chʼuluk ta atojolal, yuʼun li voʼone chʼulun,+ voʼon Jeova ti yakal ta jchʼultajesike.

9 »›Mi oy stseb junuk pale ti tsokes skʼoplal ta skoj ti chchon sbae, yakal me tsokesbe skʼoplal li stote. Persa skʼan xichʼ chikʼel ta kʼokʼ.+

10 »›Li buchʼu chtun ta mero bankilal pale yuʼunik ti jaʼ laj yichʼ malbel+ li aseite kʼalal laj yichʼ tʼujel ta paleale xchiʼuk ti jaʼ la slap li kʼuʼil pokʼil sventa paleal+ kʼalal laj yichʼ vaʼanele* mu me stakʼ ti akʼo svotsib li sjole mi jaʼuk stakʼ sliʼ ta jatel li skʼuʼ spokʼe.+ 11 Mu me stakʼ xnopaj ta stojolal junuk krixchano* ti chamem+ xae; mu me stakʼ sokes sba mi jaʼuk ta stojolal stot o smeʼ. 12 Mu me stakʼ xlokʼ li ta chʼulnae mi jaʼuk stakʼ sokesbe skʼoplal li xchʼulna Sdiose,+ yuʼun yichʼoj senyail ti yakʼoj xa sba ta stojolal Diose, jaʼ li aseite ti chtun kʼalal oy buchʼu chichʼ tʼujel ti jaʼ yuʼun li Sdiose.+ Voʼon Jeovaun.

13 »›Skʼan me tojol tsebuk+ saʼ li yajnile. 14 Mu stakʼ xikʼ junuk ants ti chamem smalale, mi junuk sutemal ants, mi jaʼuk junuk ants ti maʼuk xa tojol tsebe xchiʼuk mi jaʼuk junuk jchonbail ants, jaʼ skʼan xikʼ junuk tojol tseb ta steklumal. 15 Mu me sokesbe skʼoplal snitilulal li ta steklumale,+ yuʼun voʼon Jeovaun ti yakal ta jchʼultajese›».

16 Li Jeovae xi to laj yalbe li Moisese: 17 «Xi xavalbe li Aarone: ‹Mi oy jun vinik ta anitilulal ti oy xchopolil ta sbekʼtale, mu stakʼ xnopaj batel sventa chbat yakʼbe pan li Sdiose. 18 Mu xuʼ xnopaj batel li vinik ti oy xchopolil ta sbekʼtale: jun vinik ti maʼsate, ti koxoe, ti chʼabal lek sniʼe, ti nat junuk skʼob o junuk yakane, 19 ti kʼasem junuk yakan o junuk skʼobe, 20 ti vujvuj spate o ti pekʼex vinik noʼoxe,* ti oy xchamel sate o ti oy xchinale o ti oy kʼusi chʼiem ta snukulile o ti chʼabal lek ston skʼunile.+ 21 Mi oy jun vinik ta snitilulal li pale Aaron ti oy xchopolile, mu me xuʼ xnopaj batel sventa xakʼbe Jeova li matanal chikʼbil ta kʼokʼe. Ta skoj ti oy xchopolile, mu xuʼ xnopaj batel sventa chakʼbe pan li Sdiose. 22 Xuʼ svebe li span Sdiose, jaʼ xkaltik, li kʼusitik toj echʼ xa noʼox chʼule+ xchiʼuk li kʼusitik chʼule.+ 23 Pe mu xuʼ xnopaj batel li ta kortinae+ xchiʼuk mu xuʼ xnopaj batel li ta skajleb matanale,+ yuʼun oy xchopolil; jech xtok mu xuʼ sokesbe skʼoplal li jchʼulnae,+ yuʼun voʼon Jeovaun ti yakal ta jchʼultajesike›».+

24 Jech oxal, li Moisese la xchiʼin ta loʼil li Aaron xchiʼuk xnichʼnabtake xchiʼuk skotol li j-israeletike.

22 Xi to albat yuʼun Jeova li Moisese: 2 «Albo Aaron xchiʼuk xnichʼnabtak ti skʼan skʼelik lek kʼu yelan tstunesik* li chʼul matanaletik ti chakʼ j-israeletike. Jech xtok, mu me sokesik-o jchʼul bi+ ta skoj li kʼusitik yakal chakʼbeikune.+ Voʼon Jeovaun. 3 Xi xavalbe yaʼiike: ‹Buchʼuuk noʼox ta anitilulalik ti chtal avuʼunik ta tsʼakale, mi jaʼo ibal sba* ti kʼalal chnopaj talel ta stojolal li chʼul matanaletik ti jaʼ sventa chakʼbeik Jeova li j-israeletike, ta xichʼ milel.+ Voʼon Jeovaun. 4 Mi oy junuk snitilulal Aaron ti ip ta lepra*+ o ti oy kʼusi chlokʼ ta skʼunile,+ mu xuʼ slajes li chʼul matanaletike jaʼ to mi lek xa kome.+ Jech xtok, mu me stakʼ slajes li buchʼu la spik jun krixchano ti ibal sba ta skoj junuk animae*+ xchiʼuk mu stakʼ slajes ek li buchʼu chlokʼ yaʼlel skʼunile+ 5 mi jaʼuk li buchʼu tspik jkotuk bikʼit chon+ ti ibal sbae o mi tspik junuk vinik ti ibal sbae.+ 6 Li buchʼu tspik li kʼusitik taje ibal sba chkom jaʼ to mi chʼayem xa ox batel kʼakʼale xchiʼuk mu xuʼ slajes jutebuk li kʼusitik chʼule jaʼ to mi la spok sba ta voʼe.+ 7 Sak xa chkom mi chʼayem xa ox batel kʼakʼale, vaʼun xuʼ xa slajes li chʼul matanaletike, yuʼun jaʼ onoʼox sveʼel.+ 8 Mu me xuʼ stiʼ mi la sta jkotuk chamem chonbolom xchiʼuk mi la sta jkotuk chonbolom ti yichʼoj lilinel ta tiʼel ta jkotuk jtiʼvanej chonbolome, yuʼun ibal sba chkom mi la stiʼe.+ Voʼon Jeovaun.

9 »›Skʼan spasik li kʼusi kakʼojbe sbainike sventa mu sta smulik ta skoj ti muʼyuk tspasik li kʼusi kakʼojbe sbainike. Ta skoj ti xuʼ sokesbeik skʼoplal li chʼul matanaletike, xuʼ xchamik ta skoj ti muʼyuk tspasik li kʼusi kakʼojbe sbainike. Voʼon Jeovaun ti yakal ta jchʼultajesike.

10 »›Mu me xuʼ slajes chʼul matanaletik+ li buchʼu muʼyuk akʼbil permisoe.* Jech xtok, mi oy junuk jyanlum ti te xchʼamunojbe sna junuk palee o mi oy junuk yaj-abtel palee, mu xuʼ slajes li chʼul matanaletike. 11 Pe mi oy smanoj junuk smoso ta stakʼin stuk li palee, xuʼ slajes. Li mosoiletik ti te xa vokʼem ta snae xuʼ slajesik ek li sveʼel+ palee. 12 Mi maʼuk jun pale nupun xchiʼuk li stseb palee, li tsebe mu me stakʼ slajes li chʼul matanaletike. 13 Yan mi cham smalal li stseb palee o mi sutesat yuʼun smalale xchiʼuk mi chʼabal yalab kom xchiʼuk mi sut nakluk ta sna stot kʼuchaʼal ta stsebal toʼoxe, xuʼ slajes li kʼusi tslajes stote,+ pe mu xuʼ slajes li buchʼu muʼyuk akʼbil permisoe.*

14 »›Mi oy jun vinik ti mu yaleluk la slajes li chʼul matanaletik ti mu stakʼ slajese, akʼo yakʼbe xkʼexol xchiʼuk akʼo to yakʼ jun ta voʼob ti kʼu yepal stojole xchiʼuk akʼo yakʼbe pale+ li chʼul matanale. 15 Jaʼ yuʼun, skʼan mu sokesbeik skʼoplal li chʼul matanaletik ti chakʼbeik Jeova+ li j-israeletike, 16 taje jaʼ sventa mu xichʼik kastigo li j-israeletik ta skoj ti la slajesik li kʼusitik chʼule; yuʼun voʼon Jeovaun ti yakal ta jchʼultajesike›».

17 Xi to albat yuʼun Jeova li Moisese: 18 «Chiʼino ta loʼil li Aaron xchiʼuk xnichʼnabtake xchiʼuk skotol li j-israeletike, xi xavalbe yaʼiike: ‹Mi oy junuk j-israel o junuk jyanlum ti te nakal ta Israel ti chakʼbe chikʼbil matanal+ Jeova sventa tspas li kʼusi yaloje o ti chlokʼ ta yoʼonton chakʼbe matanale,+ 19 skʼan jaʼ xakʼ jkotuk tot vakax+ ti muʼyuk ipe,* jkotuk chʼiom tot chij o jkotuk tentsun sventa lek x-ilate. 20 Mu me xavakʼik ta matanal mi oy xchopolile,+ yuʼun muʼyuk lek chiloxuk mi jech chavakʼike.

21 »›Mi chakʼbe matanal Jeova sventa jun oʼontonal+ ti jaʼ sventa tspas li kʼusi yaloj li jun vinike o chakʼbe matanal ti chlokʼ ta yoʼonton stuke, skʼan me xakʼ jkotuk vakax ti muʼyuk ipe* o jkotuk chij sventa lek x-ilate. Skʼan me chʼabaluk jutebuk xchopolil li matanal chakʼe. 22 Mu me xavakʼik ta matanal mi maʼsate, mi kʼaseme, mi yayijeme, mi oy xchʼokale, mi oy takijem syayijemale o mi oy kʼusi chʼiem ta snukulile; mu me xavakʼbeik Jeova mi oy xchopolile mi jaʼuk xavakʼbeik Jeova li ta skajleb matanale. 23 Mi chlokʼ ta avoʼonton yakʼele, xuʼ xavakʼ jkotuk tot vakax o jkotuk chij manchuk mi nat o mi komkom junuk skʼob o junuk yakan; pe muʼyuk me chichʼ chʼamel mi jaʼ chavakʼ ta matanal sventa chapas li kʼusi avaloje. 24 Mu me xavakʼbeik Jeova jkotuk chonbolom ti chʼabal lek ston skʼunile o ti tʼuseme o ti lokʼbile, mu me xavakʼbeik jech ta matanal li ta alumalike. 25 Jech xtok, li jyanlumetike mi jaʼuk xuʼ xakʼik ta matanal ti chkʼot ta span Adiosike, yuʼun sokem xchiʼuk oy xchopolil. Muʼyuk chichʼ chʼamel sventa lekuk xa-ilatik›».

26 Li Jeovae xi to laj yalbe li Moisese: 27 «Mi vokʼ jkotuk neneʼ tot vakax o jkotuk neneʼ tot chij o jkotuk neneʼ tentsune, skʼan te xchiʼin vukub kʼakʼal+ li smeʼe, pe li ta xvaxakibal kʼakʼale xuʼ xa me xichʼ chʼamel mi chichʼ akʼel ta matanale. Jaʼ jun matanal ti chichʼ chikʼel ta kʼokʼ sventa Jeovae. 28 Mi la amilik jkotuk vakax o jkotuk chije, mu me junuk skʼakʼalil+ xamilik xchiʼuk li yole.

29 »Mi laj avakʼbeik Jeova milbil matanal+ sventa stojel ta vokole, skʼan me jaʼuk sventa lek xa-ilatik. 30 Skʼan xalajesik ti kʼusi kʼakʼalil chavakʼike. Mu me xakʼejik* jutebuk kʼalal to ta yokʼomal.+ Voʼon Jeovaun.

31 »Skʼan me xachʼunik li jmantaltake xchiʼuk skʼan xavakʼ ta akuxlejalik.+ Voʼon Jeovaun. 32 Mu me xasokesik li jchʼul bie,+ skʼan me xvinaj ti chʼulun ta stojolal li j-israeletike.+ Voʼon Jeovaun ti yakal ta jchʼultajesoxuke,+ 33 ti la jlokʼesoxuk tal ta yosilal Ejipto sventa xkakʼ avilik ti voʼon Adiosikune.+ Voʼon Jeovaun».

23 Li Jeovae xi to laj yalbe li Moisese: 2 «Chiʼino ta loʼil li j-israeletike, xi xavalbee: ‹Li kʼinetik+ chapasilanik sventa Jeovae jaʼ+ chʼul tsobajeletik. Liʼe jaʼ li kʼinetik kuʼun ti chapasilanike:

3 »›Vakib kʼakʼal xuʼ cha-abtejik, pe li ta svukubal kʼakʼale jaʼ jun savado sventa xakux lek avoʼontonik,+ jaʼ jun chʼul tsobajel. Mu me stakʼ xapasik mi jtosuk abtelal. Jaʼ jun savado sventa Jeova ti buyuk noʼox chanakiike.+

4 »›Liʼe jaʼ li kʼinetik chichʼ pasilanel sventa Jeovae, jaʼ li chʼul tsobajeletik ti skʼan xapasik jech kʼuchaʼal akʼbil yoraile: 5 li ta 14 yuʼun li sba ue,+ chichʼ pasel li Kʼin Koltael+ sventa Jeova kʼalal jaʼo chʼayem xa ox batel kʼakʼale.*

6 »›Li ta 15 yuʼun li u liʼe, jaʼ Skʼinal Pan ti Muʼyuk Slevaduraile* ti chichʼ pasel sventa Jeovae.+ Vukub kʼakʼal skʼan xaveʼik pan ti muʼyuk slevaduraile.+ 7 Li ta sba kʼakʼale chapasik jun chʼul tsobajel.+ Mu me xapasik jtosuk tsatsal abtelal. 8 Pe baʼyel skʼan xavakʼbeik Jeova jun matanal ti chikʼbil ta kʼokʼe, vukub kʼakʼal jech skʼan xapasik. Li ta svukubal kʼakʼale oy chʼul tsobajel. Mu me xapasik jtosuk tsatsal abtelal›».

9 Xi to albat yuʼun Jeova li Moisese: 10 «Chiʼino ta loʼil li j-israeletike, xi xavalbe yaʼiike: ‹Mi la-ochik li ta balumil ti voʼon chkakʼboxuke xchiʼuk mi laj xa ox atsobik li kʼusi atsʼunojike, skʼan xavichʼik talel jyomuk li sba sat asevadaike,+ jaʼ xavichʼbeik talel li palee.+ 11 Li palee tsyeʼilan ta jujujot ta yeloval Jeova li jyom sevadae sventa lek xiloxuk. Li palee jaʼo tsyeʼilan li ta yokʼomal savadoe. 12 Ti kʼusi kʼakʼalil chavichʼik talel li jyom sevada sventa chichʼ yeʼilanele skʼan xavakʼik jkotuk chʼiom tot chij ti muʼyuk ipe* xchiʼuk ti jun to jabil yichʼoje, skʼan xavakʼbeik Jeova ta chikʼbil matanal. 13 Li matanal sat tsʼunobil chavakʼike jaʼ chaʼvokʼ ta lajunvokʼ jun efa* arina ti lek nin ti kapbil ta aseitee, jaʼ smoton Jeova ti chikʼbil ta kʼokʼ ti lek xmuet yikʼe.* Jaʼ jutuk mu jun litro* skʼan xavichʼik talel li matanal vinoe. 14 Mu to xuʼ xaveʼik jtosuk pan, bakubtasbil sat tsʼunobil xchiʼuk achʼ sat tsʼunobiletik, jaʼ to xuʼ xaveʼik mi laj xa ox avakʼbeik li smoton Adiosik li vaʼ kʼakʼale. Jaʼ jun mantal sbatel osil avuʼunik xchiʼuk li jaykʼol kuxlejal chtal avuʼunik ta tsʼakal ti buyuk noʼox chanakiike.

15 »›Li ta yokʼomal savado kʼalal chavichʼik talel li jyom sevada sventa yebil matanale,+ te chlik achapik batel vukub savado. Lek tsʼakal vukub xemana xachapik. 16 Skʼan xachapik batel 50 kʼakʼal+ ti te chkʼot tsʼakiuk ta yokʼomal li svukubal savadoe, vaʼun jaʼo te chavakʼbeik ta smoton Jeova+ li achʼ sat tsʼunobiletike. 17 Skʼan xavichʼik talel chib pan ti te chapas ta anaik ti chkʼot ta yebil matanale. Pasbiluk ta chaʼvokʼ ta lajunvokʼ jun efa* arina ti lek nine. Skʼan xichʼ taʼajesel xchiʼuk levadura+ yoʼ xkʼot ta sba sat tsʼunobiletik sventa Jeova.+ 18 Li panetik taje skʼan jmojuk xavakʼik xchiʼuk vukot chʼiom tot chij ti muʼyuk ipe* xchiʼuk ti jun to jabil yichʼojike. Skʼan xavakʼ jkot chʼiom tot vakax xtok xchiʼuk chaʼkot tot chij.+ Chtun sventa xichʼ chikʼbel ta smoton Jeova ti jmoj onoʼox chichʼ akʼel xchiʼuk li matanal sat tsʼunobiletik xchiʼuk li matanal vinoe. Chkʼot ta matanal ti chikʼbil ta kʼokʼ ti lek xmuet yikʼ* chaʼi Jeovae. 19 Skʼan xavakʼik jkot chʼiom tentsun yoʼ xkʼot ta matanal sventa mulil+ xchiʼuk chaʼkot chʼiom tot chij ti jun to jabil yichʼojik yoʼ xkʼot ta matanal sventa jun oʼontonale.+ 20 Li palee tsyeʼilan ta jujujot ta stojolal li Jeovae, jmoj tsyeʼilan xchiʼuk li panetik ti jaʼ pasbil-o ta sba sat tsʼunobiletike xchiʼuk tsyeʼilan xtok li chaʼkot chʼiom tot chije. Chʼul chkʼot ta stojolal Jeova li kʼusi chkʼot ta sparte palee.+ 21 Li jun kʼakʼal taje skʼan xavalik+ ti chapasik jun chʼul tsobajele. Mu me xapasik jtosuk tsatsal abtelal. Jaʼ jun mantal sbatel osil avuʼunik xchiʼuk li jaykʼol kuxlejal chtal avuʼunik ta tsʼakal ti buyuk noʼox chanakiike.

22 »›Kʼalal mi la sta yorail chatsobbe sat+ li kʼusitik chlokʼ ta avosile, mu me xatsob skotol li ta stiʼiltak avosile xchiʼuk mi jaʼuk xatsob li butik chpʼaj* komele. Skʼan xaviktabe komel li povreetike*+ xchiʼuk li jyanlum+ ti te achiʼuk ta nakleje. Voʼon Jeova Diosun avuʼunik›».

23 Li Jeovae xi to laj yalbe li Moisese: 24 «Xi xavalbe li j-israeletike: ‹Li ta sba kʼakʼal yuʼun li svukubal ue, skʼan me xakux lek avoʼontonik, li vaʼ kʼakʼale jaʼo chlik kʼalal chichʼ jupanel jmojuk li okʼese,+ jaʼ sventa xanaʼik ti jaʼ jun chʼul tsobajele. 25 Mu me xapasik jtosuk tsatsal abtelal. Skʼan xavakʼbeik Jeova li matanal chikʼbil ta kʼokʼe›».

26 Xi to albat yuʼun Jeova yan velta li Moisese: 27 «Pe li ta slajunebal kʼakʼal yochel li svukubal u taje, jaʼ Skʼakʼalil Stael Perton.+ Skʼan xapasik jun chʼul tsobajel xchiʼuk skʼan xatsʼik avokolik.*+ Jech xtok, skʼan xavakʼbeik smoton Jeova ti chikʼbil ta kʼokʼe. 28 Li vaʼ kʼakʼal taje mu me xapasik jtosuk abtelal, yuʼun jaʼ skʼakʼalil chataik perton+ ta yeloval li Jeova Dios avuʼunike. 29 Buchʼuuk noʼox ti mu stsʼik svokol* li vaʼ kʼakʼale skʼan xichʼ milel li ta steklumale.+ 30 Buchʼuuk noʼox ti tspas jtosuk abtelal li vaʼ kʼakʼale ta jlajesbe skʼoplal li ta steklumale. 31 Mu me xapasik jtosuk abtelal. Jaʼ jun mantal sbatel osil avuʼunik xchiʼuk li jaykʼol kuxlejal chtal avuʼunik ta tsʼakal ti buyuk noʼox chanakiike. 32 Jaʼ jun savado sventa xakux lek avoʼontonik xchiʼuk skʼan xatsʼik avokolik+ kʼalal chʼayem xa ox batel kʼakʼal li ta sbalunebal kʼakʼal yochel li ue. Skʼan xachabiik li savado avuʼunike ti chlik kʼalal chʼayem xa ox batel kʼakʼal jaʼ to mi chʼay batel kʼakʼal ta yokʼomale».

33 Li Jeovae xi to laj yalbe li Moisese: 34 «Xi xavalbe li j-israeletike: ‹Li ta 15 yuʼun li svukubal u taje, chlik apasik li Skʼinal Axibalnaetike,* vukub kʼakʼal jech skʼan xapasik ta sventa Jeova.+ 35 Chapasik jun chʼul tsobajel li ta sba kʼakʼale xchiʼuk mu me xapasik jtosuk tsatsal abtelal. 36 Vukub kʼakʼal skʼan xavakʼbeik smoton Jeova ti chikʼbil ta kʼokʼe. Li ta xvaxakibal kʼakʼale, skʼan xapasik jun chʼul tsobajel+ xchiʼuk skʼan xavakʼbeik smoton Jeova ti chikʼbil ta kʼokʼe. Tsots skʼoplal li tsobajel taje. Mu me xapasik jtosuk tsatsal abtelal.

37 »›Liʼe jaʼ li kʼinetik+ chichʼ pasilanel sventa Jeova ti jaʼ chʼul tsobajel+ chkʼot avuʼunik sventa xavakʼbeik smoton Jeova ti chikʼbil ta kʼokʼe: li chikʼbil matanale,+ li matanal sat tsʼunobiletike+ xchiʼuk li matanal vinoe+ jech xavakʼik kʼuchaʼal chichʼ kʼanel jujun kʼakʼale. 38 Parte me li kʼusi chavakʼbeik onoʼox Jeova li ta jujun savado yuʼune+ xchiʼuk parte me li matanaletik chavakʼike,+ li matanal kʼalal chavakʼ aveike+ xchiʼuk li matanal chlokʼ ta avoʼontonik+ ti skʼan xavakʼbeik li Jeovae. 39 Pe li ta 15 yuʼun li svukubal ue, kʼalal atsobojik xa ox li kʼusitik chlokʼ ta avosilike, skʼan xapasik li kʼin sventa Jeovae, vukub kʼakʼal+ chjalij. Li ta sba kʼakʼale skʼan xakux lek avoʼontonik, jech xtok, skʼan xakux lek avoʼontonik li ta xvaxakibal kʼakʼale.+ 40 Li ta sba kʼakʼale, skʼan xavichʼik talel sat lekil teʼetik, skʼobtak xan+ ti jun yutsilike, skʼob teʼetik ti pimik yanale xchiʼuk alamo teʼ ti te chchʼi ta stenlejaltike,* vaʼun vukub kʼakʼal+ xkuxet avoʼontonik+ ta stojolal Jeova Dios avuʼunik. 41 Vukub kʼakʼal ta jabil+ skʼan xapasik kʼin ta sventa Jeova. Jaʼ jun mantal sbatel osil avuʼunik xchiʼuk li jaykʼol kuxlejal chtal avuʼunik ta tsʼakale, ta svukubal u jech skʼan xapasik. 42 Vukub kʼakʼal+ skʼan xanakiik ta axibalnaetik. Ta axibalnaetik skʼan xnakiik skotol li mero j-israeletike. 43 Taje jaʼ sventa snaʼik+ li jaykʼol kuxlejal chtal avuʼunik ta tsʼakal ti laj kakʼ nakiikuk ta axibalnaetik li j-israeletik kʼalal la jlokʼesik ta yosilal Ejiptoe.+ Voʼon Jeova Diosun avuʼunik›».

44 Jaʼ yuʼun, li Moisese laj yalbe j-israeletik li kʼinetik chichʼ pasilanel sventa Jeovae.

24 Li Jeovae xi to laj yalbe li Moisese: 2 «Albo mantal j-israeletik ti akʼo yichʼboxuk tal sbatsʼi aseiteal oliva sventa li kantiletike yoʼ jech tsanaluk-o li kantiletike.+ 3 Li Aarone skʼan tsanaluk-o yuʼun li kantiletik ti te oy ta spat kortina ti bu nopol xil li xkaxail Mantal ti te oy li ta karpana sventa tsobobbaile. Skʼan tsanaluk-o yuʼun ta yeloval Jeova kʼalal chʼayem xa ox batel kʼakʼal kʼalal to ta sob yokʼomal. Jaʼ jun mantal sbatel osil avuʼunik xchiʼuk skotol li jaykʼol kuxlejal chtal avuʼunik ta tsʼakale. 4 Skʼan jechuk-o xchol ta yeloval Jeova li skantilaltak kandelero+ ti pasbil ta batsʼi oroe.

5 »Tsako arina ti lek nin sventa xapas ta 12 set-set panetike. Li jujun pane skʼan yichʼojuk chaʼvokʼ ta lajunvokʼ jun efa* arina. 6 Ta chaʼchol skʼan xalats muyel li pane, vakib ta jujuchol xavakʼ+ ta yeloval Jeova+ li ta sba mexa pasbil ta batsʼi oroe. 7 Akʼbo batsʼi sakil pom* ta sba li jujuchol pane, vaʼun jaʼ chkʼot ta smoton Jeova ti chikʼbil ta kʼokʼ sventa xichʼ vulesel ta jolile.*+ 8 Jujun savado skʼan xchol ta yeloval Jeova.+ Jaʼ jun trato sventa sbatel osil xchiʼuk li j-israeletike. 9 Jaʼ chichʼik li Aaron xchiʼuk xnichʼnabtake+ xchiʼuk skʼan te sveʼik ti bu chʼule,+ yuʼun li matanal chikʼbil ta kʼokʼ sventa Jeovae toj echʼ xa noʼox chʼul kʼotem ta stojolal li palee. Jaʼ jun mantal sbatel osil».

10 Li ta Israele oy jun j-israelal ants ti oy yol ti jaʼ j-ejiptoal vinik+ li stot yole, vaʼun li nichʼonile lik stsak sbaik ta kʼop xchiʼuk jun j-israelal vinik ti bu spasoj skarpanaike. 11 Li yol j-israelal antse lik slaban li Biile,* vaʼun lik xchopol kʼopta,+ jaʼ yuʼun laj yikʼik batel ta stojolal Moises.+ Selomit sbi li meʼile, jaʼ stseb Dibri ti likem talel ta snitilulal Dane. 12 La xchukik jaʼ to ti kʼuxi kʼot ta nopel yuʼun Jeova ti kʼusi chichʼ pasbele.+

13 Vaʼun, xi albat yuʼun Jeova li Moisese: 14 «Jocho lokʼel ti bu apasoj akarpanaik li buchʼu chopol kʼoptavane. Skotol li buchʼutik laj yaʼiike akʼo yakʼ skʼobik ta sjol, mi laje, sjunul li tsobobbail yuʼun j-israeletike akʼo smilik+ ta ton. 15 Xi skʼan xavalbe li j-israeletike: ‹Skʼan me stoj smul li buchʼu chchopol kʼopta Sdiose. 16 Li buchʼu chchopol kʼoptabe sbi Jeovae persa skʼan xichʼ milel.+ Li tsobobbail yuʼun j-israeletike persa skʼan smilik ta ton. Mu ventauk mi jyanlum ti te xchiʼukoxuk ta nakleje o mi jaʼ mero j-israel, persa skʼan xichʼ milel mi la xchopol kʼopta li Biile.

17 »›Mi oy junuk krixchano la syayijes junuk xchiʼil ta krixchanoal* ti cham-o yuʼune, persa skʼan xichʼ milel ek.+ 18 Pe mi oy buchʼu la syayijes jkotuk tsʼunbal chonbolom ti cham-o yuʼune, skʼan xakʼbe xkʼexol. Ti kʼusi chonbolomal la smile skʼan xakʼbe xkʼexol. 19 Mi oy junuk vinik la syayijes junuk xchiʼil ta krixchanoale, skʼan me jech xichʼ pasbel ek.+ 20 Mi oy buchʼu la skʼasbe sbakil junuk xchiʼile, skʼan xichʼ kʼasbel sbakil ek. Mi la stʼus bekʼ satile, chichʼ tʼusbel sbekʼ sat ek, mi la skʼas tanal eile, chichʼ kʼasbel stanal ye ek. Ti kʼu yelan yayijesvane jech skʼan xichʼ yayijesel ek.+ 21 Li buchʼu tsyayijes jkotuk tsʼunbal chonbolom ti chcham-o yuʼune skʼan xakʼbe xkʼexol.+ Pe mi jaʼ tsyayijes junuk xchiʼil ta krixchanoal ti chcham-o yuʼune, skʼan xichʼ milel.+

22 »›Jun noʼox kʼusi chapanbil kuʼun ta sventa li buchʼu te vokʼemoxuk ta Israele xchiʼuk li jyanlum+ ti te xchiʼukoxuk ta nakleje, yuʼun voʼon Jeova Diosun avuʼunik›».

23 Li Moisese la xchiʼin ta loʼil li j-israeletike, vaʼun li j-israeletike la xjochik lokʼel ti bu spasoj skarpanaik li buchʼu chopol kʼoptavane xchiʼuk la smilik+ ta ton. Li j-israeletike la spasik jech kʼuchaʼal albat mantal yuʼun Jeova li Moisese.

25 Li Jeovae xi to laj yalbe Moises li ta vits Sinaie: 2 «Chiʼino ta loʼil li j-israeletike, xi xavalbe yaʼiike: ‹Kʼalal mi la-ochik xa ox li ta balumil ti voʼon chkakʼboxuke,+ li balumile skʼan xkux jun savado sventa Jeova.+ 3 Vakib jabil skʼan xatsʼunolaj li ta avosile xchiʼuk vakib jabil skʼan xasetbe stakinal skʼobtak li a-uvae xchiʼuk xuʼ xatsob li kʼusitik chlokʼ ta avosile.+ 4 Pe li ta svukubal jabile jaʼ jun savado ti skʼan xkux lek li avosile, jaʼ jun savado sventa Jeova. Mu xuʼ xatsʼunolaj li ta avosile xchiʼuk mu xuʼ xasetbe stakinal skʼobtak li a-uvae. 5 Kʼalal mi atsoboj xa ox li kʼusitik chlokʼ ta avosile, mu me xatsobbe sat li kʼusi chchʼi tal stuke xchiʼuk mu me xatsobbe sat li a-uva ti muʼyuk la asetbe stakinal skʼobtake. Jaʼ jun jabil ti skʼan xkux lek li avosile. 6 Pe xuʼ xalajesik li kʼusi chchʼi tal stuk li ta balumil ti kʼu sjalil chjalij li savadoe; xuʼ xalajes li voʼote, li amosotake xchiʼuk li akiaratake, jech xtok, xuʼ slajes li jsaʼabteletik xchiʼuk li jchʼom-osiletik ti jaʼ jyanlumetik ti te achiʼuk ta nakleje, 7 xuʼ slajesik ek li tsʼunbal chonbolometike xchiʼuk li teʼtikal chonbolometik ta avosile. Xuʼ xichʼ lajesel skotol li kʼusitik chchʼi ta osile.

8 »›Chachap batel vukub velta li vukub jabile, jaʼ savado ta jabiletik, ta skotol li vukub savado ta jabiletik taje jaʼ 49 jabil. 9 Li ta slajunebal kʼakʼal yochel li svukubal ue, li ta Skʼakʼalil Stael Pertone,+ skʼan tsots xajupanik li kachue, skʼan me xichʼ aʼiel ta sjunul avosilalik kʼalal chajupanike. 10 Skʼan xachʼultajesik li jabil 50 xchiʼuk skʼan xavalik ti oy kolebal ta sjunul balumile.+ Jaʼ Sjabilal Kolebal avuʼunik, jaʼ yorail chasut ta avosilik xchiʼuk skʼan xasut ta stojolal avutsʼ avalalik.+ 11 Li ta sjabilal 50 jaʼ Sjabilal Kolebal chkʼot avuʼunik. Mu xuʼ xatsʼunolajik xchiʼuk mu xuʼ xatsobbeik sat li kʼusi chchʼi tal stuke xchiʼuk mu xuʼ xatsobbeik sat li a-uvaik ti muʼyuk la asetbeik stakinal skʼobtake.+ 12 Yuʼun jaʼ Sjabilal Kolebal. Skʼan chʼuluk xavilik. Jaʼ noʼox xuʼ xalajesik li kʼusitik chchʼi stuk+ ta osile.

13 »›Li ta Sjabilal Kolebale ta jujuntal skʼan xasut akʼelik li kʼusitik jaʼ avuʼunike.+ 14 Mi oy kʼusi chachonbeik junuk achiʼilik ta krixchanoale o mi oy kʼusi chamanbeike, mu me xaloʼla abaik.+ 15 Kʼalal oy kʼusi chamanbe li achiʼil ta krixchanoale, jaʼ xatsak ta venta ti jayib xa jabil echʼem talel li ta Sjabilal Kolebale, jech xtok, kʼalal chchonbote jaʼ akʼo stsak ta venta ti jayib to jabil xuʼ chichʼ tsobbel sat li kʼusitik chichʼ tsʼunele.+ 16 Mi ep to jabil skʼane, xuʼ smuyesbe stojol li kʼusi chchone, pe mi junchib xa noʼox jabil skʼane, skʼan syalesbe stojol li kʼusi chchone, yuʼun jaʼ ta xchonbot ti jayib to velta chakʼ sat li kʼusitik chichʼ tsʼunele. 17 Mu me buchʼu sloʼla xchiʼil ta krixchanoal+ avuʼunik. Jaʼ lek xiʼtao* li Adiose,+ yuʼun voʼon Jeova Diosun avuʼunik.+ 18 Mi chavakʼ ta akuxlejalik li mantaletik kuʼune xchiʼuk mi chachʼunik li kʼusitik chapanbil kuʼune, jun noʼox avoʼonton chanakiik li ta balumile.+ 19 Chakʼ sat+ li kʼusi chatsʼunik ta balumile xchiʼuk xuʼ xaloʼik ti kʼu yepal skʼan avoʼontonike. Jech xtok, jun noʼox avoʼonton te chanakiik.+

20 »›Pe mi xi chlik avalike: «¿Kʼusi xa noʼox ta jlajestik li ta svukubal jabil mi mu xuʼ xijtsʼunolaj xchiʼuk mi mu xuʼ jtsobbetik sat+ li kʼusitik une?». 21 Li ta svakibal jabile ta xkakʼboxuk tal bendision, vaʼun li balumile lek ta xakʼ li kʼusi chatsʼunik ti xalokʼik-o sventa oxib jabile.+ 22 Jaʼ to ta xvaxakibal jabil chatsʼunolajik, jech oxal jaʼ chalajesik-o kʼalal to ta sbalunebal jabil li voʼne sat tsʼunobil avuʼunike. Jech-o chalajesik li voʼne sat tsʼunobile, jaʼ to mi la atsobbeik sat li kʼusitik la atsʼunike.

23 »›Mu stakʼ chonel sbatel osil li balumile,+ yuʼun jaʼ kuʼun+ li balumile. Yuʼun li voʼoxuke jyanlumoxuk noʼox chkiloxuk ti te nakaloxuke xchiʼuk jchʼom-osiloxuk noʼox chkiloxuk.+ 24 Ta skotol li osil chavuʼuninike oyuk me sderecho avuʼunik yantik sventa xchaʼmanik li osile.

25 »›Mi pas ta povre li achiʼilik ta krixchanoal xchiʼuk mi chchon jlomuk yosile, li buchʼu jaʼ to mero yutsʼ yalale jaʼ akʼo taluk sventa sman sutel li osil la xchone.+ 26 Mi muʼyuk buchʼu xchaʼmanbat sutele, pe mi pas xa ox ta jkʼulej xchiʼuk ti xchaʼman xa yuʼun sutel stuke, 27 skʼan xchapbe stojol ti jayib xa jabil echʼem talel ti kʼuxi la xchone, vaʼun jaʼ xa noʼox akʼo sutesbe ti kʼu yepal skʼan li buchʼu la sman osile. Ta tsʼakale xuʼ sut batel li ta yosile.+

28 »›Pe mi mu xlokʼ-o stojol yuʼun sventa xchaʼmanbe sutele, li kʼusi la xchone te chichʼ-o komel li buchʼu la smane jaʼ to mi kʼot li Sjabilal Kolebale;+ jaʼ to chichʼ sutesbel mi kʼot li Sjabilal Kolebale, vaʼun xuʼ xa xichʼ sutel li yosile.+

29 »›Mi oy buchʼu la xchon sna ta junuk lum ti joybil ta muroe, jun jabil oy sderecho sventa xchaʼman sutel, te chlik xchap ti kʼusi ora la xchone. Lek tsʼakal jun jabil oy sderecho sventa xchaʼman sutel.+ 30 Pe mi muʼyuk la xchaʼman sutel mi lokʼ xa ox lek jun jabile, jaʼ xa me chichʼ-o komel li buchʼu la sman li na ta jun lum ti joybil ta muroe, te chkom-o ti jaykʼol kuxlejal chtal yuʼun ta tsʼakale. Muʼyuk me chichʼ sutesel li ta Sjabilal Kolebale. 31 Pe li naetik ta jun lum ti muʼyuk joybil ta muroe koʼol sba xchiʼuk li osil ta junuk lume. Oy-o sderecho sventa xuʼ xichʼ chaʼmanel sutel xchiʼuk skʼan sutesel li ta Sjabilal Kolebale.

32 »›Pe li sna jlevietik ta yut steklumalike+ oy-o sderechoik sbatel osil sventa xchaʼmanik sutel snaik li jlevietike. 33 Mi muʼyuk laj yichʼ chaʼmanel li sna jlevietike, chichʼ sutesel ta Sjabilal Kolebal+ li snaik ti laj yichʼ chonel ti te oy ta yutil jteklume. Yuʼun li sna jlevietik te oy ta yut steklumalike jaʼ yuʼunik kʼotem ti bu nakalik li j-israeletike.+ 34 Jech xtok, li yosilik+ te oy ta sjoylejal jteklume mu stakʼ chonel, yuʼun jaʼ yuʼunik-o sbatel osil li jlevietike.

35 »›Mi pas ta povre li avermano ti te noʼox nopol oy ta atojolale xchiʼuk ti mu xa xmakʼlij sba yuʼun stuke, skʼan xavakʼbe sveʼel+ jech kʼuchaʼal junuk jyanlum ti te xchiʼukot ta nakleje+ o junuk jchʼom-osil yoʼ jech kuxuluk-o avuʼun. 36 Mi oy la xchʼamunbot atakʼine, mu me xakʼanbe sjol mi jaʼuk sventa xapas-o kanal.+ Skʼan xaxiʼta li Dios avuʼune,+ vaʼun mi jech la apase, kuxul-o avuʼun li avermanoe. 37 Mi chavakʼbe xchʼamun atakʼine, mu me xakʼanbe sjol,+ jech xtok, kʼalal chavakʼbe sveʼele, maʼuk me sventa chapas-o kanal. 38 Voʼon Jeova Diosun avuʼunik ti la jlokʼesoxuk ta yosilal Ejipto+ sventa xkakʼboxuk li yosilal Kanaane yoʼ xkakʼ avilik ti voʼon Adiosikune.+

39 »›Mi pas ta povre li avermano ti te noʼox nopol oy ta atojolale xchiʼuk ti persa chchon sba ta atojolale,+ mu me xasuj ta abtel jech kʼuchaʼal jun mosoil.+ 40 Kʼotuk jech kʼuchaʼal junuk jsaʼabtel+ avuʼun o junuk jchʼom-osil. Te abtejuk-o avuʼun jaʼ to mi kʼot li Sjabilal Kolebale. 41 Vaʼun, chiktaot komel xchiʼuk li xnichʼnabtake,* tsut batel ta stojolal li jchop nitilulal bu likem tale. Skʼan sut batel ta yosil li smoltotake.+ 42 Yuʼun jaʼ jmosotak ti la jlokʼesik ta yosilal Ejiptoe,+ jaʼ yuʼun mu stakʼ xchon sbaik jech kʼuchaʼal chchon sba junuk mosoile. 43 Mu me toj tsotsuk xapas aba+ ta stojolal, skʼan xaxiʼta li Dios avuʼune.+ 44 Skʼan jaʼ xasaʼ ta amoso xchiʼuk ta akiara li krixchanoetik ta yan lumetik ta sjoylejal ti bu nakalote, jaʼ xuʼ xaman ta amosoik xchiʼuk ta akiaraik. 45 Jech xtok, xuʼ jaʼ xaman ta amosoik li xnichʼnabtak jchʼom-osiletik ti te nakal ta atojolalike,+ xuʼ jaʼ xamanbeik li yutsʼ yalalik ti te chvokʼ ta alumalike, vaʼun jaʼ xa chkʼot ta avuʼunik. 46 Xuʼ xaviktabeik komel ta xrexto* li avalab anichʼnabik xtoke, jaʼ xrexto chkom avuʼunik sbatel osil. Xuʼ x-abtej ta atojolalik li achiʼilik ta Israele, jaʼ noʼox mu me toj tsotsuk xapas aba+ ta stojolik.

47 »›Mi pas ta jkʼulej junuk jyanlum ti te achiʼukik ta nakleje o junuk jchʼom-osile, pe mi jaʼ pas ta povre li avermano ti te nopol nakale xchiʼuk mi chbat xchon sba ta stojolal li jyanlum ti te achiʼukik ta nakleje o ta stojolal li jchʼom-osil ti te nakal ta atojolalike o ti jaʼ chbat xchon sba ta stojolal junuk yutsʼ yalal li jyanlum ti te achiʼukik ta nakleje, 48 oy-o me sderecho sventa xichʼ chaʼmanel kʼalal xchonoj xa ox sbae. Xuʼ xchaʼmanat+ yuʼun junuk xchiʼil ta vokʼel. 49 O xuʼ jaʼ xchaʼmanat yuʼun sjuntot o xnichʼon sjuntot o buchʼuuk noʼox ti jaʼ to mero yutsʼ yalale, xuʼ xchaʼmanat.

»›Pe mi pas xa ox ta jkʼuleje, xuʼ xchaʼman sba stuk.+ 50 Skʼan koʼol xchap xchiʼuk li buchʼu manat ti kʼu xa sjalil echʼem talel ti kʼuxi la xchon sba ta stojolale jaʼ to mi la sta skʼakʼalil li Sjabilal Kolebale.+ Ti kʼu yepal stojol la xchon sbae jaʼ chichʼ tsakel ta venta ti jayib xa jabil echʼem tale.+ Vaʼun, li stojol ti kʼu xa sjalil echʼem tale jaʼ chichʼ tsakel ta venta ti kʼu yepal stojol li jun jsaʼabtele.+ 51 Mi ep to jabil skʼan li Sjabilal Kolebale, jaʼ jech yepal akʼo stoj sventa xchaʼman sba ti jayib to jabil skʼan li Sjabilal Kolebale. 52 Pe mi junchib xa noʼox jabil skʼan xkʼot li Sjabilal Kolebale, akʼo xchap ti kʼu yepal skʼan xakʼe, jaʼ xa noʼox akʼo stoj sventa xchaʼman sba ti jayib jabil skʼan li Sjabilal Kolebale. 53 Akʼo abtejuk jech kʼuchaʼal junuk jsaʼabtel ti jayib jabil te chtune; skʼan me xakʼel lek ti mu tsotsuk spas sba+ ta stojolal li jsaʼabtel yuʼune. 54 Pe mi mu xuʼ yuʼun xchaʼman sba stuk jech kʼuchaʼal chichʼ alel liʼe, jaʼ to kolem chkom li ta Sjabilal Kolebale,+ kolem chkom xchiʼuk li xnichʼnabtake.*

55 »›Yuʼun jaʼ jmosotak li j-israeletike. Jaʼ jmosotak ti la jlokʼesik ta yosilal Ejiptoe.+ Voʼon Jeova Diosun avuʼunik.

26 »›Mu me xapas yan adiosik+ ti mu kʼusi xtun-oe, mu me kʼusi xapasbeik slokʼol+ mi jaʼuk xapasik junuk chʼul vaʼanbil ton xchiʼuk mu me kʼusi xapasbeik slokʼol ta ton+ te ta alumalik ti jaʼ chlik anijan abaik ta stojolale,+ yuʼun voʼon Jeova Diosun avuʼunik. 2 Skʼan xachabiik li savado kuʼune xchiʼuk akʼik ta ilel ti chavichʼik ta mukʼ* ti bu chʼul kuʼune. Voʼon Jeovaun.

3 »›Mi jech-o chavakʼ ta avoʼontonik li kʼusi kaloje, mi chachʼunik li mantaletik kuʼune xchiʼuk mi chavakʼ ta akuxlejalike,+ 4 chkakʼ taluk lek voʼ kʼalal jaʼo yoraile,+ li balumile lek chakʼ li kʼusitik te chichʼ tsʼunele+ xchiʼuk chakʼ sat li teʼetik ta osiltike. 5 Li yorail chamaj atrigoike tsta sba xchiʼuk kʼalal chatsobbeik sat a-uvaike; jech xtok kʼalal chatsobbeik sat a-uvaike, tsta sba xchiʼuk ti kʼusi ora chatsʼunolajike. Chalajes apanik jaʼ ti kʼu yepal skʼan avoʼontonike xchiʼuk jun noʼox avoʼonton chanakiik li ta avosilike.+ 6 Jun noʼox avoʼontonik kuʼun li ta lume,+ jun avoʼonton chavayik, yuʼun muʼyuk buchʼu tsibtasoxuk.+ Ta jtupʼbe skʼoplal ta alumalik li simaron jtiʼvanej chonbolometike xchiʼuk muʼyuk chtal avichʼik milel ta espada li ta alumalike. 7 Voʼoxuk chanutsik batel li avajkontraike xchiʼuk chamilik komel ta espada. 8 Li voʼoboxuk noʼoxe chanutsik batel sien ta voʼ, mi sienoxuk noʼox ta voʼe chanutsik batel lajunmil ta voʼ, chamilik komel ta espada+ li avajkontraike.

9 »›Lek chkiloxuk,* ch-epaj kuʼun li avalab anichʼnabike xchiʼuk cha-epajik kuʼun,+ jech xtok, staoj-o yav li trato jpasoj xchiʼuk voʼoxuke.+ 10 Li kʼusitik yakal to chalajesik ti lokʼ echʼ jabile persa chalokʼesik sventa xatikʼik ochel li kʼusitik jaʼ to achʼ chlokʼ avuʼunike. 11 Jech xtok, te chkakʼ ta atojolalik+ li axibalna kuʼune xchiʼuk muʼyuk chkiktaoxuk. 12 Te ta jchiʼinoxuk ta xanbal xchiʼuk voʼon chikʼot ta Adiosik,+ yan li voʼoxuke chakʼotik ta jteklumal.+ 13 Voʼon Jeova Diosun avuʼunik ti la jlokʼesoxuk tal ta yosilal Ejipto sventa xakolik ta mosoil yuʼunike. Jech xtok, voʼon la jkʼas li kʼatlom teʼ akuchojike sventa lek tukʼ xateltun chaxanavik.

14 »›Pe mi mu xakʼan xachikintabeikune, mi mu xakʼan xachʼunik skotol li mantaletik+ taje, 15 mi chapʼajik li kʼusitik kaloje,+ mi solel chopol chavilik li kʼusitik chapanbil kuʼune, mi muʼyuk xa chavakʼ ta akuxlejalik skotol li jmantaltake xchiʼuk mi muʼyuk xa chatsakik ta venta li jtratoe,+ 16 li voʼone xi chkakʼboxuk kastigoe: chavul tajek avoʼontonik, chkakʼ ipajanik ta tuberkulosis,* chkakʼ stsakoxuk tsatsal kʼokʼ, vaʼun mu xa lekuk chavilik osil xchiʼuk chakʼunibik batel. Jecheʼ xa noʼox chavakʼ avokolik kʼalal oy kʼusi chatsʼunike, yuʼun jaʼ tslajesik+ li avajkontraike. 17 Ta jkontrainoxuk xchiʼuk chkakʼ stsaloxuk li avajkontraike;+ li buchʼutik tspʼajoxuke chpechʼilanoxuk ta tekʼel,+ ta jech noʼox chajatavik batel akʼo mi muʼyuk buchʼu tsnutsoxuk.+

18 »›Pe mi muʼyuk tstij avoʼontonik sventa xachikintabeikun li kʼusitik chanuptanik taje, vukub to velta mas chkakʼboxuk kastigo ta skoj li amulike. 19 Ta jlilin li abol toyobbailike, jech xtok, ta xkʼot kuʼun kʼuchaʼal tsatsal takʼin li vinajel+ avuʼunike xchiʼuk ta xkʼot kuʼun kʼuchaʼal kovre li avosilike. 20 Ta jech noʼox chalajes avipik ta abtel, yuʼun muʼyuk chakʼ li kʼusi chatsʼun ta avosilike,+ jech xtok, muʼyuk chakʼ sat li teʼetik ta osiltike.

21 »›Pe mi jaʼ noʼox jech-o chakontrainikune xchiʼuk mi jech-o mu xakʼan xachikintabeikune, vukub to velta mas chkakʼ avokolik jaʼ ti kʼu yelan amulike. 22 Ta jtak tal ta atojolalik+ li jtiʼvanej chonbolometik ta osiltike, vaʼun tsmilik li avalab anichʼnabike+ xchiʼuk tsmilik li atsʼunbal chonbolomike, jech chajutukajik xchiʼuk iktabil chkom li abeike.+

23 »›Pe mi jech-o mu xachʼamik li tukʼibtasel+ chkakʼboxuke xchiʼuk mi jech-o jpʼel avoʼonton chakontrainikune, 24 ta me jkontrainoxuk ek xchiʼuk voʼon jtuk ta jyayijesoxuk vukub to velta ta skoj li amulike. 25 Chkakʼ xtal stsakoxuk ta espada avajkontraik ta skoj ti muʼyuk chatsakik ta venta li jtratoe.+ Kʼalal chatsob abaik ta yutil ateklumalike, ta jtak tal chamel ta atojolalik+ xchiʼuk chavichʼik akʼel ta yok skʼob jun avajkontraik.+ 26 Kʼalal mi la jlilin li yavil* apanike,*+ lajunvoʼ antsetik jmoj tspasik li apanik ta jun noʼox ornoe, mi laje, pʼisbil+ noʼox chachʼakbe abaik li apanike, muʼyuk chnoj-o achʼutik+ kʼalal chalajesike.

27 »›Pe mi jech-o mu xachikintabeikune xchiʼuk mi jech-o jpʼel avoʼonton chakontrainikune, 28 mas to tsots ta jkontrainoxuk+ xchiʼuk voʼon jtuk chkakʼboxuk kastigo vukub velta ta skoj li amulike. 29 Jaʼ yuʼun, jaʼ chlik atibeik sbekʼtal li akeremike xchiʼuk chlik atibeik sbekʼtal li atsebike.+ 30 Ta jlilin li chʼul tayal kʼopojebaletik*+ avuʼunike xchiʼuk ta jlilin li skajleb pom avuʼunike, jech xtok, kʼalal animaoxuk xa oxe, te ta jbusan abekʼtalik ta sba asantoik+ ti muʼyuk kuxulik xchiʼuk ti ibalik sbae,* vaʼun x-ibet koʼonton+ ta jchʼak jba lokʼel ta atojolalik. 31 Ta jlilin+ li ateklumalike xchiʼuk ti butik chʼul avuʼunike xchiʼuk muʼyuk xa chkutsʼi ti lek xmuet yikʼ* li milbil matanal avuʼunike. 32 Ta jlilin+ li alumalike, jech xtok, li avajkontraik ti te noʼox nakalike labal chaʼiik kʼalal chilik ti jech chkʼot ta pasele.+ 33 Ta jpukoxuk batel ta yan lumetik+ xchiʼuk chkakʼ snutsoxuk xchiʼuk s-espadaik li avajkontraike;+ xokol chkom+ li avosilike xchiʼuk jinesbil chkom li alumalike.

34 »›Li vaʼ kʼakʼale, chkux* li osil ti kʼu sjalil xokol chkome, jaʼo chkux kʼalal te oyoxuk ta yosil li avajkontraike. Li vaʼ kʼakʼale, chkux+ li osile, yuʼun muʼyuk xkux avuʼunik. 35 Chkux ti kʼu sjalil xokol chkome, yuʼun muʼyuk xavakʼbeik xkux li jujun savado avuʼunik kʼalal te toʼox nakaloxuke.

36 »›Li buchʼutik kuxul to chkom+ te ta yosil yajkontraike ta jtikʼbeik ep xiʼel ta yoʼontonik. Jech xtok, ta xjatavik batel ta skoj noʼox ti kʼu yelan chbakʼ jlik yanal teʼ ti kuchbil tal ta ikʼe, chjatavik batel jech kʼuchaʼal kʼalal oy buchʼu nutsbil ta espadae xchiʼuk chyalik ta lum akʼo mi muʼyuk nutsbilik.+ 37 Akʼo mi muʼyuk nutsbilik, te xa noʼox tsmakbe sba* yakanik ta jujuntal jech kʼuchaʼal li buchʼutik chjatavik ta skoj espadae. Mu stsal avuʼunik li avajkontraike.+ 38 Te chachamik ti butik lumal+ oyoxuke xchiʼuk te cha-ulik li ta yosil avajkontraike. 39 Li buchʼutik te to chakomike jaʼ sventa te chakʼaʼik ta yosil li avajkontraik+ ta skoj li amulike. Ta melel, te chkʼaʼik ta skoj smulik li stotike.+ 40 Jaʼ to te chal ta jamal li smulike.+ Jech xtok, jamal chalik li smul stotike xchiʼuk ti muʼyuk tukʼ laj yakʼ sbaik li stotike, jaʼ to te chalik ta jamal ti muʼyuk tukʼ laj yakʼ sbaik kʼalal la skontrainikune.+ 41 Jaʼ yuʼun, persa la jkontrainik+ kʼalal la jtakik batel ta yosilal yajkontraike.+

»›Xuʼ van jaʼ to te kʼexlal chaʼi sba li yoʼontonik+ ti muʼyuk yichʼoj sirkunsisione* xchiʼuk jaʼ to te lek tsʼakal tstoj li smulike. 42 Vaʼun, te chvul ta jol li trato la jpas xchiʼuk Jakobe,+ li trato la jpas xchiʼuk Isaake+ xchiʼuk chvul ta jol li trato la jpas xchiʼuk Abraane,+ vaʼun chvul ta jol li osil ti kaloj chkakʼboxuke. 43 Ti kʼu sjalil la stenik komel li osile, la xkux+ li osile xchiʼuk muʼyuk xa yajval kom. Li stukike yakal xa ox tstoj smulik ta skoj ti la spʼajik li kʼusitik chapanbil kuʼune xchiʼuk ta skoj ti toj echʼ noʼox chopol laj yilik li mantaletik kuʼune.+ 44 Akʼo mi jech, muʼyuk chkiktaik ta j-echʼel ti kʼalal te oyik ta slumal li yajkontraike mi jaʼuk ta jkomtsanik-o+ ta j-echʼel ti te xa ta jlajesike, yuʼun mi jech ta jpase, muʼyuk chkʼot ta pasel kuʼun li trato+ la jpas xchiʼukike, yuʼun voʼon Jeova Diosun yuʼunik. 45 Sventa slekilalike, chvul ta jol li trato la jpas xchiʼuk li smoltotik+ kʼalal te skʼeloj jyanlumetik+ ti la jlokʼesik ta yosilal Ejipto sventa xkakʼ ta ilel ti voʼon Sdiosikune. Voʼon Jeovaun›».

46 Taje jaʼ li kʼusitik chapanbile xchiʼuk li smantaltak Jeova laj yakʼbe j-israeletik ta vits Sinai ta stojolal li Moisese.+

27 Li Jeovae xi to laj yalbe li Moisese: 2 «Chiʼino ta loʼil li j-israeletike, xi xavalbe yaʼiike: ‹Mi oy junuk vinik laj to yakʼ ye+ xtok ti chakʼbe Jeova ti kʼu yepal stojol chichʼ alel li jun krixchanoe, 3 xi me yepal stojol li jun vinik ti 20 kʼalal ta 60 sjabilale: 50 siklo* plata jaʼ ti kʼu yepal yalal jujun siklo ti bu chʼule. 4 Pe mi jaʼ jun antse, jaʼ 30 siklo li stojole. 5 Yan mi yichʼoj voʼob jabil kʼalal to ta 20 jabile, 20 siklo stojol li kereme, jaʼ lajuneb siklo stojol li tsebe. 6 Mi yichʼoj jun u kʼalal to ta voʼob sjabilale, voʼob siklo plata stojol li kereme, jaʼ oxib siklo plata stojol li tsebe.

7 »›Mi yichʼoj 60 jabil o mi mase, 15 siklo stojol li vinike, jaʼ lajuneb siklo stojol li antse. 8 Pe mi toj echʼ noʼox povre ti mu xtoj yuʼun ti kʼu yepal albil stojol+ li jun krixchanoe, li krixchano ti laj yichʼ alel ti chichʼ akʼele te tsvaʼan sba ta yeloval pale, vaʼun li palee chal kʼu yepal stojol. Li palee jaʼ tstsak ta venta ti kʼu yepal xtoj yuʼun li buchʼu chakʼ yee.+

9 »›Pe mi chakʼ ye ti chakʼbe Jeova jkotuk chonbolom ti muʼyuk ibal sbae,* chʼul xa me chkom-o ti kʼusi chichʼ akʼel ta stojolal Jeovae. 10 Mu me stakʼ xkʼexta mi jaʼuk sjel ta jkotuk chopol chonbolom li bu leke xchiʼuk mu stakʼ sjel ta jkotuk lekil chonbolom li bu chopole. Pe mi la sjel ta yan chonbolome, chʼul chkʼot xchaʼkotal, chʼul chkʼot li baʼyel chonbolome xchiʼuk li xkʼexole. 11 Mi jaʼ jkotuk ibal sba chonbolom+ ti mu stakʼ akʼbel ta smoton Jeovae, akʼo bat skotan ta yeloval pale li chonbolome. 12 Li palee chal kʼu yepal stojol akʼo mi lek o mi chopol li chonbolome. Ti kʼu yepal chalbe stojol li palee jaʼ jech akʼo komuk-o. 13 Pe mi oy jun kʼakʼal chchaʼman yaʼi sutele, skʼan xakʼ ti kʼu yepal stojol+ albile xchiʼuk akʼo to yakʼ jun ta voʼob ti kʼu yepal stojole.

14 »›Mi oy jun vinik chakʼ sna sventa chʼul xkʼot ta stojolal Jeovae, li palee jaʼ chal ti kʼu yepal stojole akʼo mi lek o mi chopol li nae. Jaʼ jech yepal stojol+ chkom ti kʼu yepal chal li palee. 15 Pe mi tskʼan chchaʼman yaʼi sutel li sna laj yakʼe, skʼan xakʼ ti kʼu yepal stojol albile xchiʼuk akʼo to yakʼ jun ta voʼob ti kʼu yepal stojole, vaʼun jaʼ yuʼun chkʼot yan velta.

16 »›Mi oy jun vinik chakʼbe Jeova jtuchʼuk yosile, li stojol chichʼ alele jaʼ chichʼ tsakel ta venta ti kʼu yepal sat tsʼunobil x-och-o ta tsʼunele: li jpʼis jomer* sevadae jaʼ 50 siklo plata stojol. 17 Mi jaʼo chakʼ yosil li ta Sjabilal Kolebale,+ jaʼ jech akʼo komuk-o ti kʼu yepal stojol laj yichʼ alele. 18 Pe mi jaʼo laj yakʼ yosil kʼalal echʼem xa ox li Sjabilal Kolebale, li palee jaʼ akʼo stsak ta venta ti jayib to jabil skʼan li yan Sjabilal Kolebal kʼalal chchapbe stojole, vaʼun akʼo syalesbe ti kʼu yepal stojol albile.+ 19 Pe mi tskʼan chchaʼman yaʼi sutel yosil li buchʼu laj yakʼe, skʼan xakʼ ti kʼu yepal stojol albile xchiʼuk akʼo to yakʼ jun ta voʼob ti kʼu yepal stojole, vaʼun jaʼ yuʼun chkʼot yan velta. 20 Pe mi muʼyuk la xchaʼman sutel li yosile, mi laj yichʼ chonel batel ta yan vinike, mu xa me xuʼ xichʼ chaʼmanel sutel li osile. 21 Mi kolem kom ta Sjabilal Kolebal li osile, chʼul xa me chkom ta stojolal Jeova, laj xa yichʼ-o akʼel ta stojolal li osile. Jaʼ xa yuʼun-o chkom li paleetike.+

22 »›Mi oy jun vinik chakʼbe Jeova jsepuk smanbil osil ti maʼuk xrexto* akʼbil komele,+ 23 li palee chchapbe kʼu yepal stojol, jaʼ tstsak ta venta ti jayib to jabil skʼan li Sjabilal Kolebale, ti kʼusi kʼakʼalil taje jaʼo chichʼ albel ti kʼu yepal stojole.+ Chʼul ta stojolal Jeova li osile. 24 Mi kʼot li Sjabilal Kolebale, li osile jaʼ chichʼ sutel li buchʼu la smanbee, li yajval onoʼox osile.+

25 »›Kʼalal oy kʼusi chichʼ chapbel stojole, jaʼ chichʼ tsakel ta venta ti kʼu yepal yalal jujun siklo ti bu chʼule. Li yalal jun sikloe skʼan me jaʼuk 20 guera.*

26 »›Pe mu xa me stakʼ xavakʼik li sba yol achonbolomike, yuʼun li sba yol chonbolometike jaʼ xa onoʼox yuʼun Jeova+ kʼalal chvokʼike. Jaʼ xa yuʼun Jeova+ akʼo mi jaʼ jkotuk tot vakax o jkotuk chij. 27 Mi jaʼ jkotuk ibal sba chonbolome xchiʼuk mi chchaʼman sutele, akʼo stoj ti kʼu yepal laj yichʼ alele xchiʼuk akʼo to yakʼ jun ta voʼob ti kʼu yepal stojole.+ Pe mi muʼyuk la xchaʼman sutel li yajval ibal sba chonbolome, li palee akʼo xchon batel, jech yepal stojol chchon batel ti kʼu yepal laj yichʼ alele.

28 »›Pe li kʼusi laj xa yichʼ-o akʼel ta stojolal Jeova ti mu xa stakʼ skʼan sutel* li buchʼu laj yakʼe mu stakʼ chonel mi jaʼuk stakʼ chaʼmanel sutel. Akʼo mi jaʼ junuk krixchano, mi jaʼ jkotuk chonbolom o mi osil, yuʼun toj chʼul xa kʼotem ta stojolal Jeova+ li kʼusi laj yichʼ-o akʼele. 29 Jech xtok, mu me stakʼ chaʼmanel+ sutel li jun krixchano ti laj xa yichʼ-o akʼel ti chʼakbil sventa chichʼ lajesele. Persa skʼan xichʼ milel.+

30 »›Li jvokʼ ta lajunvokʼ*+ li kʼusitik chchʼi ta osiltik o li sat teʼetike jaʼ yuʼun li Jeovae. Chʼul ta stojolal Jeova. 31 Mi oy buchʼu tskʼan chchaʼman sutel jutebuk li jvokʼ ta lajunvokʼ chakʼe, akʼo stoj ti kʼu yepal laj yichʼ alele xchiʼuk akʼo to yakʼ jun ta voʼob ti kʼu yepal stojole. 32 Li jkot ta lajunkot ta skotol li vakaxetik xchiʼuk li chijetike, skotol li kʼusi ch-echʼ ta yolon xvachʼ li jchabichije, jaʼ chʼul chkʼot ta stojolal Jeova li ta slajunkotale. 33 Mu persauk skʼel mi lek o mi chopol mi jaʼuk stakʼ xkʼexta ta yan. Pe mi oy junuk velta tskʼan chkʼexta ta yane, chʼul chkʼot xchaʼkotal, chʼul chkʼot+ li baʼyel chonbolome xchiʼuk li xkʼexole. Mu xa stakʼ chaʼmanel›».

34 Taje jaʼ li mantaletik akʼbat yuʼun Jeova li Moises ta vits Sinai+ sventa li j-israeletike.