STÙDIO 43
Come che Geovà el ne fà forti?
‘Geovà el ve farà forti, el ndarà giutarve a mantegnerve fedeli e el ve meterà nte un posto firme.’ — 1 PIE. 5:10.
CÀNTICO 38 Geovà el te farà forte
COSSA CHE NDAREMO IMPARAR?a
1. Parché che arquanti servi de Geovà nel passà i ga bio forsa?
LA BÌBLIA la parla de arquanti servi fedeli del passà che i ga bio tanta forsa. Magari, anca lori i se sentia strachi. Par esémpio, el rè Davi el ga dito che, dele volte, el se sentia ‘forte compagno un monte’. Ancora cossita, ghen’era volte che ‘l’era spaurà’. (Sal. 30:7) Sanson el gavea tanta forsa par causa del spìrito de Geovà. Ma lu el savea che el ‘saria fiaco compagno ai altri òmini’ se no’l gavesse el aiuto de Dio. (Giui. 14:5, 6; 16:17) Savemo che questi òmini fedeli i gavea tanto poder sol parché l’è stà Geovà che ghe ga dato forsa.
2. Parché che Paolo l’era poderoso anca quando l’era fiaco? (2 Corinti 12:9, 10)
2 El apòstolo Paolo el savea che el gavea bisogno del aiuto de Geovà. (Ledi 2 Corinti 12:9, 10.b) Compagno a tanti de noantri, Paolo el gavea problemi de salute e anca el tribolea par far quel che l’era giusto. (Rom. 7:18, 19; Gàl. 4:13, 14) Dele volte, Paolo el gavea paura de quel che podaria suceder. (2 Cor. 1:8, 9) Magari, lu l’era poderoso anca quando el se sentia fiaco. Parché? Parché Geovà el ghe dea la forsa che Paolo ghe ocorea.
3. Cossa che ndaremo imparar in questo stùdio?
3 Anca noantri gavaremo el aiuto che ne ocore par seitar fedeli. (1 Pie. 5:10) Ma cossa che ne ocore far par ricever el aiuto de Geovà? Pensa nte un auto. L’è el motor che fà el auto moverse, ma se no te pesti mia nel asselerador, el auto no’l va avanti. Dela stessa maniera, Geovà el ne dà la forsa che ne ocore par ndar avanti. Ma, ghemo de sforsarse anca noantri. Alora, in questo stùdio, ndaremo veder come che Geovà el ne giuta ancoi e cossa ghemo de far par ricever so aiuto. Anca ndaremo veder come che Geovà el ga giutà Giona, Maria, so mare de Gesù, e el apòstolo Paolo. Dopo ndaremo imparar come che Geovà l’è drio giutar arquanti dei so servi ancoi.
PREGA A GEOVÀ E STÙDIA LA BÌBLIA PAR GAVER FORSA
4. Cossa che ghemo de far par ricever el aiuto de Geovà?
4 Una roba che podemo far par ricever el aiuto de Geovà la ze pregar. Lu el ndarà risponderne e el ne darà “el poder che l’è pi grando del normal”. (2 Cor. 4:7) Nantra roba che podemo far la ze leder la Bìblia e pensarghe sora quel che ghemo ledesto. (Sal. 86:11) Geovà el ga scrito la Bìblia par giutarne, e la so Parola “la ga poder”. (Ebr. 4:12) Alora, se ti te preghi a Geovà e te ledi la Bìblia, te riceverè la forsa che te ocore. Cossita, te sarè bon de seitar a laorar fedele e contento anca se te ghè qualche dificoltà. Vedemo adesso come che Geovà el ga giutà el profeta Giona.
5. Parché che Giona el ga bio bisogno de aiuto?
5 El profeta Giona el ga bio bisogno de aiuto. Parché? Parché quando Geovà el ghe ga domandà de far un laoro che no l’era mia fàcile, Giona el ga scampà via. Par quela, lu e altre persone i ze quasi morti par via de una granda tempesta. Dopo, quando i marineri i lo ga butà fora del barco, Giona l’è ndato rento la pansa de un grando pesse. Come che lu el se ga sentio? Sarà che el ga pensà che Geovà lo gavea abandonà e che el ndaria morir? Sicuro che Giona l’è restà pròpio spaurà.
Quando te sì drio infrontar una dificoltà, cossa che te pol far par gaver forsa compagno a Giona? (Varda i paràgrafi 6 a 9.)
6. De acordo con Giona 2:1, 2, 7, cossa che ga dato forsa a Giona intanto che lu l’era rento la pansa de un grando pesse?
6 Giona l’era lu lu sol, rento la pansa de un pesse. Alora, cossa galo fato par ricever forsa? Prima, lu el ga pregà a Geovà. (Ledi Giona 2:1, 2,c 7.d) Ancora che el gavesse desobedio e el fusse scampà via, Giona el savea che Geovà el ndaria scoltarlo se el fusse ùmile e el se ciamesse gramo. Giona anca el ga pensà sora quel che el savea dela Parola de Dio. Par esémpio, la so orassion, che la ze stata scrita in Giona 2, la ga parole compagne a tanti Salmi. (Varda quel che l’è scrito in Giona 2:2, 5 e nel Salmo 69:1; 86:7.) Cossita, vedemo che Giona el cognossea ben la Parola de Dio. E quando el ga bio dificoltà, lu l’era sicuro che Geovà el ndaria giutarlo. Par quela, dopo ricever el aiuto de Geovà, Giona l’era pronto par far quel che Dio el volea. — Giona 2:10–3:4.
7-8. Cossa che ga dato forsa a un fradel de Taiwan?
7 Quel che ga sucedesto con Giona pol giutarne quando semo drio infrontar qualche dificoltà. Par esémpio, un fradel de Taiwan de nome Zhiming e el ga tante brute malatie e la so fameia la ghe vien contra parché lu l’è una Testimònia de Geovà. Come che lu el riceve el aiuto de Geovà? Par meso dela orassion e del stùdio dela Bìblia. Lu el ga dito: “Dele volte, mi resto tanto ansioso par causa dei me problemi che no son mia bon studiar. Alora prima, mi prego a Geovà. Dopo, scolto arquanti càntichi e, dele volte, canto insieme in voce bassa. Cossita, son bon de scominsiar a studiar.”
8 Studiar la Bìblia e le publicassion ga giutà tanto a Zhiming. Par esémpio, vanti de far una operassion, lu el gavea ledesto la stòria de una sorela che la gavea bio el medèsimo problema e anca la gavea fato una operassion. I dotori i gavea dito a ela che la gavaria bisogno de sangue. Ma ela no la ga acetà e dopo, la ze restada meio. La situassion de quela sorela la era ancora pedo de quela de Zhiming. Alora, quando i ghe ga dito che lu el gavaria de ciapar sangue, anca Zhiming el ga dito che no’l ndaria mia acetar. La speriensa de quela sorela lo ga giutà a seitar fedele.
9. Cossa che te pol far se te sì desanimà? (Varda anca la ilustrassion.)
9 Fursi te sì drio infrontar una bruta situassion e no te sì mia bon de dir a Geovà come te te senti. O pol esser che te sì massa straco e no te ghè gnanca forsa par studiar. Alora, cossa che te pol far? Ricòrdate che Geovà el sa quel che te sì drio infrontar. Anca se te fè una orassion con poche parole, te pol esser sicuro che lu el te darà pròpio quel che te ocore. (Efe. 3:20) Se te ghè mal o te sì massa desanimà par studiar, proa scoltar la letura dela Bìblia o de altre publicassion. Te pol anca meter sonar un càntico o vardar un vìdeo nel jw.org. Geovà el vol giutarte e el te darà la forsa che te ocore se te preghi e te vè in serca dela so orientassion par meso dela Bìblia e dele publicassion.
I FRADEI I POL DARTE FORSA
10. Come che i nostri fradei e sorele i pol giutarne?
10 Geovà anca el pol doperar i nostri fradei e sorele par giutarne. Quando semo drio infrontar una dificoltà, ghemo bisogno de ancora de pi aiuto. Alora, i nostri fradei e sorele i pol esser “una fonte de grando consolo” quando semo drio infrontar una dificoltà o se l’è massa fadiga far el nostro laoro par Geovà. (Pro. 17:17; Col. 4:10, 11) Par quela, i nostri fradei e sorele i ndarà darne quel che ne ocore, consolarne quando semo desanimadi e incoraiarne par seitar a servir a Geovà. Vedemo adesso come che Maria, so mare de Gesù, la ga bio aiuto dei altri.
11. Parché che Maria la gavea bisogno de aiuto?
11 Maria la gavea bisogno de aiuto par far quel che Geovà el volea. Sicuro che ela la ze restada preocupada quando el àngelo Gabriel el ga dito che la gavaria un fiol, parché no la era gnancora maridada. El so fiol el deventaria el Messia, ma ela no la savea mia come slevar su un toseto. Anca saria pròpio fadiga spiegar a Giusepe cossa che l’era drio suceder parché ela ancora la era vèrgine. — Luc. 1:26-33.
12. De acordo con Luca 1:39-45, cossa che Maria la ga fato par gaver forsa?
12 Cossa che Maria la ga fato par gaver la forsa che ghe ocorea? Ela la ze ndata in serca del aiuto dei altri. Par esémpio, Maria la ga domandà che el àngelo Gabriel ghe contesse de pi sora cossa che ndaria suceder e cossa che la gavea de far. (Luc. 1:34) Dopo, “la ze ndata svelta fin una cità nei monti de Giudà” par catarse con Elizabete, che la era dela so fameia. Questa vìsita la ze stata pròpio bela, parché Elizabete la ga lodada e la ga fato una professia sora el fiol de Maria. (Ledi Luca 1:39-45.f) Alora, Maria la ga dito che Geovà el gavea mostrà el so grando poder. (Luc. 1:46-51) Sicuro che Geovà el ga incoraià Maria par meso del àngelo Gabriel e de Elizabete.
13. Cossa che ga sucedesto con Dasuri dopo che la ga domandà aiuto ai fradei?
13 Compagno a Maria, anca ti te pol ricever aiuto de Geovà par meso dei fradei. Varda el esémpio de Dasuri, una sorela dela Bolìvia. Quando ela la ga savesto che so pare el gavea una bruta malatia che no la gavea cura, Dasuri la ga dito che la ndaria tenderlo. (1 Tim. 5:4) Ma, dele volte, no l’era mia fàcile tender de so pare e ela no la volea intrigar i fradei. Dasuri la ga dito: “Dele volte, me parea che no saria mia bona ndar avanti. Ma come tuti i gavea so robe de far, mi no volea che ghe tochesse vegner drio de mi. Mi pensea che Geovà ndaria darme la forsa che me ocorea. Magari, go visto che ero drio tirarme distante dei fradei parché ero drio far le robe mi mi sola.” (Pro. 18:1) Alora, cossa che Dasuri la ga fato? Ela la ga spiegà ai so amighi cossa che era drio suceder. Ela la ga dito: “No son mia bona spiegar el tanto che lori i me ga giutà. I me amighi i me ga portà de magnar nel ospedal e i ga ledesto arquanti testi dela Bìblia insieme a mi. L’è stà tanto bel veder che no ero mia mi mi sola. Semo tuti dela fameia de Geovà, e in questa fameia, tuti i ze pronti par giutarte quando te ocore, piander insieme o incoraiarte par seitar a servir a Geovà.”
14. Parché che ghemo de acetar el aiuto dei ansiani?
14 Geovà el pol darne forsa anca par meso dei ansiani. Lori i ze un presente che Geovà el ne ga dato par giutarne quando ghemo dificoltà. (Isa. 32:1, 2) Alora, se te ghè massa pensieri, conteghe quel che te sì drio infrontar e aceta suito quando lori i proa giutarte. Par meso dei ansiani, Geovà el ndarà incoraiarte.
LA NOSTRA SPERANSA LA NE DÀ FORSA
15. Che speransa noantri ghemo?
15 La nostra speransa la vien dela Bìblia e la ne dà tanta forsa. (Rom. 4:3, 18-20) Tuti i servi de Geovà i ga una bela speransa de viver par sempre, sia nel cielo o nela Tera. Questa speransa la ne giuta a seitar fedeli quando vien fora una dificoltà, quando ghemo de parlar ai altri sora la Bìblia e quando ghemo de giutar i nostri fradei e sorele dela congregassion. (1 Tes. 1:3) L’è stà questa speransa che ga giutà el apòstolo Paolo.
16. Parché che Paolo el gavea bisogno de aiuto?
16 Paolo el ga bio bisogno de aiuto. Quando el ga scrito ai Corinti, lu l’era nel so terso viaio par predicar le bone notìssie. In questa carta, Paolo el ga dito che l’era fiaco compagno un vaso de baro. Lu el gavea infrontà diverse dificoltà, perseghission e quasi l’è morto. (2 Cor. 4:8-10) Magari, lu el ndaria sofrir ancora de pi parché tante persone le ghe vegnaria contra, el barco ndove lu l’era el ndaria sfondarse e lu el seitaria tanto tempo in preson.
17. De acordo con 2 Corinti 4:16-18, cossa ga giutà Paolo a gaver forsa?
17 Paolo sempre el pensea nela so speransa par gaver la forsa che ghe ocorea. (Ledi 2 Corinti 4:16-18.g) Lu el ga dito ai corinti che, anca se el so corpo fusse drio finirse fora, lu no’l restaria desanimà. Paolo el seitea a pensar in quel che ndaria suceder parché el savea che la so speransa de viver par sempre nel cielo la era ‘una glòria granda e eterna’. Cossita, lu l’era bon de gaver la forsa che ghe ocorea a cada giorno par via dela so speransa.
18. Come che la speransa la ga dato forsa a Tihomir e so fameia?
18 La speransa anca la ga dato forsa a Tihomir, un fradel dela Bulgària. Arquanti ani indrio, so fradel pi gióveno, Zdravko, l’è morto nte un assidente de auto. Par quela, Tihomir el se ga sentio tanto desanimà par un tempo. Alora, lu e so fameia i ga scominsià a pensarghe sora come che sarà la ressuression. Lu el ga dito: “Noantri sempre pensemo ndove ndaremo catarse con lu, cossa ndaremo far de magnar, cossa ndaremo contarghe sora i ùltimi giorni e chi che sarà insieme a noantri nela prima festa che ndaremo far.” Sicuro che lori i ze premosi de catarse con Zdravko nela ressuression. Pensarghe sora questa bela speransa ga dato forsa a Tihomir e so fameia par seitar fedeli a Geovà.
Come che te pensi che sarà la to vita in Paradiso? (Varda el paràgrafo 19.)h
19. Cossa che te pol far par gaver una speransa pi forte? (Varda anca la ilustrassion.)
19 Cossa che te pol far par gaver una speransa pi forte? Se la to speransa la ze viver par sempre qua nela Tera, ledi e stùdia i testi che i parla sora el Paradiso e pensaghe sora come sarà la to vita. (Isa. 25:8; 32:16-18) Par esémpio, te pol pensar: Chi che l’è insieme a ti? Cossa che te sì bon de scoltar? Come che te sì drio sentirte? Nantra roba che pol giutarte la ze doperar le bele ilustrassion che ghen’è nele nostre publicassion. Te pol anca assister i vìdei musicai come, Presto el vegnarà, Romai l’è ben darente e Pensemo nel di. Se se tolemo el tempo par pensarghe sora come sarà la nostra vita in Paradiso, sarà pi fàcile dàrghene fora coi problemi che ghemo ancoi. (2 Cor. 4:17) Sicuro che la speransa che Geovà el ne ga dato pol giutarne a gaver forsa.
20. Come che podemo gaver forsa quando semo fiachi?
20 Anca quando semo fiachi, podemo gaver la forsa che ghemo de bisogno. (Sal. 108:13) Geovà sempre el ne darà forsa par meso dei fradei, dela Bìblia e dela nostra speransa. Alora, se l’è fadiga far el to laoro par Geovà, se te toca dàrghene fora con una dificoltà o se te sì desanimà, prega a lu e stùdia la Bìblia. Anca aceta el aiuto dei fradei e seita a pensarghe sora la bela speransa che te ghè. Cossita, ‘par meso del glorioso poder de Dio, te restarè cada volta pi forte par perseverar in tuto con passiensa e alegria’. — Col. 1:11.
CÀNTICO 33 Buta la to carga sora Geovà
a Tanti fradei i ze drio infrontar brute situassion e altri i pensa che no i ze mia boni de far so laoro par Geovà. Questo stùdio el ndarà giutarne a veder come che Geovà el ne dà forsa e cossa ghemo de far par ricever el so aiuto.
b (2 Corinti 12:9, 10) Ma Lu el me ga rispondesto: “Te basta la maraveiosa bontà che te go mostrà, parché el me poder l’è fato pi forte nela fiachessa.” Alora, mi sarò contento de esser orgolioso dele me fiachesse, cossita el poder de Cristo el resta sora de mi come una protession. 10 Par quela mi son contento dele fiachesse, dele parole che i me dise su, dei momenti de nessessità, dele perseghission e dele dificoltà par amor de Cristo. Parché quando che mi son fiaco, alora mi son poderoso.
c (Giona 2:1, 2) Alora, quando l’era rento la pansa del pesse, Giona el ga pregà a Geovà, el so Dio. 2 Lu el ga dito: “Quando son restà angustià mi go domandà aiuto de Geovà e lu el me ga rispondesto. Dela parte pi profonda del Sepolcro mi go suplicà par aiuto e ti te ghè scoltà la me voce.
d (Giona 2:7) Intanto che la me vita la era drio finirse, mi me go ricordà de Geovà. Alora, la me orassion la ze rivada fin ti, rento el to santo témpio.
e Arquanti nomi i ze stati cambiadi.
f (Luca 1:39-45) Poco tempo dopo, Maria la ze ndata svelta fin una cità nel monti de Giudà. 40 Ela la ze ndata rento la casa de Zacaria e la ga saludà Elisabete. 41 Alora, quando Elisabete la ga sentio la voce de Maria, el bambin che l’era nela so pansa el ga saltà, e Elisabete la ga ricevesto tanto spìrito santo. 42 Ela la ga dito con voce ben alta: “Te sì benedida intrà le done, e el bambin che l’è rento de ti l’è benedio. 43 Alora, varda el onor che mi go de ricever la mare del me Signor! 44 Parché no go fato gnanca ora scoltarte che el bambin rento de mi el ga saltà de contento. 45 Te ghè credesto e te pol restar contenta, parché quel che Geovà el te ga dito el ndarà suceder del tuto.”
g (2 Corinti 4:16-18) Par quela, noantri no desistemo mia, parché anca se el omo che semo par fora el se finisse, el omo che semo par rento l’è fato novo un giorno dopo l’altro. 17 Anca se la tribolassion la dura par poco tempo e la ze pìcola, la ne dà una glòria che la deventa cada volta pi granda e che la ze eterna. 18 E seitemo vardar le robe che no se pol mia vederle, e nò le robe che se pol vederle. Parché le robe che se pol vederle le dura par poco tempo, ma le robe che no se pol mia vederle le dura par sempre.
h ILUSTRASSION: Una sorela che la ze sorda la ghe pensa sora le promesse dela Bìblia. Ela la ze drio vardar un vìdeo musical che la giuta a pensar come sarà la so vita in Paradiso.