Te ʼu Tapuakina ʼo Te Faʼa Kātaki

NEʼE ko te fafine Keleka neʼe maʼuli ʼi Fenisia ʼi te taʼu 32 ʼo totatou temi. Neʼe mahaki kovi tana taʼahine, pea neʼe kua lotovaivai te fafine ʼi te kumi hona faitoʼo. ʼI tana logo ʼaē ki te ʼaʼahi ʼa te matāpule tonatou kolo—ko he matāpule neʼe ʼiloa ʼi te mālohi ʼaē neʼe ina maʼu moʼo fakamālōlō te mahaki—neʼe ina fakapapau mālohi ke sio ki ai pea mo kole age ke tokoni kia ia.

ʼI tana fetaulaki mo ia, neʼe tō ʼo tuʼutuli, ʼo ina kole mamahi age ʼo fēnei: “ ʼOfa, mai kia te ʼau, ʼAliki, Foha ʼo Tavite. Ko taku taʼahine kua kovi ʼaupito tona gaohi e temonio.” ʼI tana faʼahiga aga, neʼe kole e te fafine Keleka kia Sesu ke ina fakamālōlō tana taʼahine.

ʼE feala koa hakotou fakakaukauʼi te lototoʼa pea mo te agavaivai ʼaē neʼe tonu ke maʼu e te fafine ʼaia moʼo fai te faʼahi ʼaia? Ko Sesu neʼe ko he tagata neʼe pule ʼaki he faʼahiga mālohi pea mo he faʼahiga matagafua, pea ʼi muʼa atu neʼe ina fakahā tana mole loto ʼaē ke ʼiloʼi te potu ʼaē ʼe nofo ai. Neʼe ina ʼave tana kau ʼapositolo ki Fenisia ke nātou ai hanatou kiʼi mālōlō, kae ke mole nātou gāue ki te kau Senitile ʼaē neʼe mole tui. Pea tahi foki, ko Sesu neʼe ko te Sutea pea ko te fafine neʼe ko te Senitile, pea neʼe ina ʼiloʼi lelei pe te fehiʼa ʼo te kau Sutea ʼi tanatou fakatahi ʼaē mo te ʼu hahaʼi ʼo te ʼu puleʼaga ʼaē neʼe fehiʼaʼinaʼi. Kae, neʼe lotomālohi ʼi tana tonu ʼaē ke ina maʼu he faitoʼo maʼa tana toe.

Neʼe faigaʼi e Sesu pea mo tana kau ʼapositolo ke nātou fakaloto vaivaiʼi te kumi tokoni ʼa te fafine ʼi te lakaga ʼaia. ʼUluaki, neʼe mole tali age e Sesu kia te ia he kupu e tahi. Pea ʼuhi ko tana kalaga tuʼumaʼu pea mo mālohi, neʼe ʼui age e te ʼu ʼapositolo ʼi tanatou ʼiʼita: “Fekau ke ʼalu, heʼe mole tuku tana kalaga ʼi ʼotatou tuʼa.”

Kae neʼe mole ina fia fakagata ia ʼo aʼu ki tana maʼu he tali ʼe lelei ki tana kole. Kae neʼe tulolo ia ia muʼa ʼo te ʼu vaʼe ʼo Sesu, ʼo ina ʼui fēnei: “ ʼAliki, tokoni mai kia te ʼau!”

ʼI tana fakatokagaʼi age tona ʼuluaki maʼua ki te ʼu foha ʼo Iselaele pea, ʼi te lakaga ʼaia, mo ina ʼahiʼahiʼi tana tui pea mo tana lotomālohi, neʼe fakamahino age e Sesu ʼaki he lotoʼofa kia te ia ʼo ina ʼui fēnei: “ ʼE mole lelei ke toʼo te pane ʼa te ʼu kiʼi tamaliki [ia Iselaele] ʼo laku ki te ʼu kiʼi kuli [te kau Senitile].”

Kae neʼe mole ʼita ia ʼi te talanoa kovi ʼaē ki tona lanu, kae neʼe toe faiga aipe ʼaki he agavaivai ʼi tana kole, ʼo ina tali age: “ ʼIo, ʼAliki, kaʼe ko te ʼu kiʼi kuli ʼe nātou kai foki te ʼu eveeveʼi pane ʼaē ʼe maluku ifo mai te laupapa ʼo tonatou ʼu pule.”

Neʼe fakapale e Sesu te faʼa kātaki ʼa te fafine Keleka ʼo ina vikiʼi tana tui pea mo ina tali lelei ki tana ʼu kole mamahi. Koutou fakakaukauʼi age muʼa tona fiafia ʼi tana toe liliu ʼaē ki tona ʼapi ʼo ina maʼu atu tana taʼahine kua mālōlō lelei ʼosi!—Mateo 15:21-28; Maleko 7:24-30.

Ohage ko te fafine ʼaia ʼo te ʼuluaki sēkulō, ʼe ʼaoga ke tou faʼa kātaki ʼi tatatou ʼu faiga ʼaē ke leleiʼia tatou e Sehova pea mo maʼu tona ʼofa. Ohage ko te meʼa ʼaē neʼe hoko ki te fafine Keleka, ʼe fakamoʼoni mai e te Tohi-Tapu ko tatatou faʼa kātaki ʼaē ʼo “fai ʼo te meʼa ʼaē ʼe lelei” ʼe fakapale leleiʼi anai.—Kalate 6:9.

Koteā koa te faʼa kātaki? He koe ʼe ʼaoga? Koteā te ʼu faʼahiga meʼa ʼe feala ai ke puli ia tatou te kalitate ʼaia, peʼe ke tou fakafisi kiai? Koteā te ʼu tapuakina ʼe tou ʼamanaki anai ke tou maʼu mo kapau ʼe tou faʼa kātaki ʼi te temi nei ʼo tauhi totatou Tupuʼaga pea mo Tāmai, ia Sehova?

ʼE fakamahino fēnei e te tikisionalio te kupu “faʼa kātaki”: “Ke puke maʼu pea mo tuʼumaʼu takita fakatuʼutuʼu ʼi te meʼa ʼaē ʼe tou loto kiai, tokita ʼaluʼaga, pea mo takita gāueʼi te meʼa ʼaē ʼe tou fai, logope te ʼu faigataʼa, te ʼu fakatokaga, peʼe ko te lotomamahi. . . . Ke toe hoko atu totatou maʼuli; ʼo faʼa kātaki.”

ʼE tuʼa lahi te fakaloto mālohi e te Tohi-Tapu te kau kaugana ʼa Sehova ke nātou faʼa kātaki ʼi te fai ʼo tona finegalo. Ohage la, ʼe ʼui mai fēnei ke “haga kumi muʼa te puleʼaga,” ke “haga puke maʼu te meʼa ʼaē ʼe lelei,” ke “kātaki tuʼumaʼu ʼi te faikole,” pea ke ʼaua naʼa “fiu” ʼi te fai ʼo te meʼa ʼaē ʼe lelei.—Mateo 6:33; 1 Tesalonika 5:21; Loma 12:12; Kalate 6:9.

ʼI te ʼaho fuli ʼo te maʼuli, ko te faʼa kātaki ʼe ko he kalitate ʼe tonu ke tou maʼu fuli pea mo fakatuputupu ke tou hāo. Kapau ʼe mole tou maʼu te kalitate ʼaia ʼe mole feala ke tou fakaiku he meʼa ke moʼoni, ke tologa. Tou vakaʼi te faʼifaʼitaki ʼo he kiʼi toe, tona faiga ʼaē ke tuʼu, pea mo kamata haʼele. ʼE mole ʼi te agamāhani te fealagia ʼaē ki he kiʼi toe ke ako te tuʼu pea mo te haʼele faʼitaliha ʼi te ʼaho pe e tahi. Ohage ko te ʼu kiʼi toe, ko tatou fuli lagi neʼe tou ʼahiʼahi mo fetōki ʼi ʼihi temi ʼi muʼa ʼo tatatou maʼu leva he faʼahiga haʼele ʼe lelei. Koteā te meʼa ʼaē neʼe feala ke hoko mo ka na pau la, ʼi totatou ʼuluaki tō, neʼe tou fakagata ai tatatou ʼu ʼahiʼahi? ʼE lagi kei tou totolo pe. Ko te faʼa kātaki ʼe maʼuhiga moʼo fakahoko ʼo tatatou ʼu fakatuʼutuʼu pea moʼo maʼu te faʼahi ʼaē ʼo te tuputupu ʼi te poto pea mo te fakaʼapaʼapa kia kita. Ohage ko tona ʼui e te tāʼaga lea, “ ʼE mole situʼa ʼi he temi ia nātou ʼaē ʼe mālo pea ko nātou ʼaē ʼe situʼa ʼe mole nātou mālo ʼi he temi.”

Talu mai fualoa neʼe mahino ki te kau pionie ʼe mole ʼaki pe tanatou poto pea mo tanatou ʼu faiva ʼaē ʼe fua lelei ai te gāue. ʼE toe ʼaoga foki mo he pipiki mālohi pea mo he fakatotonu ke tou fai katoa ia te finegalo ʼa Sehova, pea mo he lototoʼa moʼo tauʼi te ʼu hala faka temi, māʼia mo te lotomamahi. ʼE tonu ke tou taupau lelei tatatou fakatuʼutuʼu ʼaē ke tou maʼu te ʼu tapuakina heʼegata mai te ʼAtua.

Ei, ko tatou fuli ʼaē ʼe tou kumi ke tou maʼu te ʼofa ʼa Sehova pea mo tou kumi ke tou mālo ʼi te faʼahiga maʼuli, ʼe ʼaoga te tou haga fai tuʼumaʼu, ke tou faʼa kātaki pea mo lotoʼutaki. Kapau ʼe mole tou maʼu te ʼu kalitate ʼaia, ʼe feala ai ke puli ia tatou te ʼofa ʼa Sehova pea mo te tapuakina ʼo te maʼuli moʼoni.—Pesalemo 18:20; Mateo 24:13; 1 Timoteo 6:18, 19.

ʼE faigataʼa age ki he Kilisitiano ke ina haga fai tuʼumaʼu tana ʼu gāue fakalaumālie kapau ʼe ʼi ai hona tahi ʼu maʼua. ʼE feala ki he tagata ke gāue kinakina ki tana gāue fakamālama moʼo foaki te ʼu meʼa ʼaē ʼe ʼaoga ki tona famili ʼi te faʼahi fakasino, kae ʼe feala leva ia ke ‘gaʼegaʼe ʼaupito’ ʼi te takitaki tuʼumaʼu ʼo he ako faka Tohi-Tapu mo tona ʼohoana pea mo tana fānau. Koteā te ʼu faʼahi ʼe nātou fakaliliu te faʼa kātaki ʼi te ʼu gāue faka Kilisitiano ʼo faigataʼa maʼa te tokolahi?

Ko te faʼahi ʼaē ko te lotovaivai, ʼaē ʼe haʼu mai totatou ʼu mele pea mo totatou ʼu vaivaiʼaga. Kapau ʼe tou manatu tuʼumaʼu ki tatatou ʼu hala, ʼe feala pe ke tou lotomamahi pea mole tou toe hoko atu tatatou ʼu faiga, ʼo tou manatu ai ʼe mole feala ke galoʼi tuʼa tahi e Sehova tatatou ʼu agahala.

Ko te tahi faʼahi ko te ʼaele ʼo te mālama ʼaē ʼe heʼeʼaoga, ʼe aga fakahehema, pea mo loto fehiʼa. (1 Soane 2:15, 16) Ko te agamāhani ʼaē ʼe lelei ʼaē ʼe feala ke ʼulihi e te mālama, ko te faʼa kātaki faka Kilisitiano.—1 Kolonito 15:33.

ʼE feala ke fakaloto vaivai tatatou gāue fai faka mafola ʼi te fakafeagai ʼa te hahaʼi peʼe ko tanatou mole fia logo ʼaē ki tatatou gāue taputapu. ʼI tatatou lotomamahi, ʼe feala ke tou ʼui ai ʼe mole loto e te hahaʼi ki te moʼoni. ʼE feala ai ke tou fehuʼi: “Koteā koa tona fua?” pea mo tou tuku ai leva totatou pilivilesio makehe ʼaē ko te gāue faka minisitelio.

ʼE toe feala pe foki ke lave kia tatou te manatu ʼo te mālama ʼaē ʼe loto faʼitaliha. He koe koa ʼe tonu ke tou tauʼi mālohi pea mo sakilifisioʼi te ʼu meʼa ʼaē ʼe tou loto kiai kae tokolahi te hahaʼi ʼe nātou maʼuli faʼifaʼitaliha peʼe hage ia ʼe faigafua tonatou maʼuli?—Vakaʼi ia Mateo 16:23, 24.

Ke tou faʼa kātaki ʼo fai te finegalo ʼa Sehova, ʼe ʼaoga ke tou kofuʼi te ʼuhiga faka Kilisitiano foʼou pea mo tou maʼuʼuli ʼaki te laumālie, kae mole ʼaki te kakano. (Loma 8:4-8; Kolose 3:10, 12, 14) ʼI tatatou maʼu te manatu ʼa Sehova ʼi te faʼahi ʼaia, ʼe feala anai ke hoholo atu tatatou ʼu gāue fakalaumālie maʼuhiga.—1 Kolonito 16:13.

Ko Te ʼu Faʼifaʼitaki ʼo Te Faʼa Kātaki

ʼE lahi te ʼu faʼifaʼitaki neʼe tuku mai e Sehova ʼo ʼuhiga mo te kau kaugana ʼaē neʼe nonofo faitotonu pea mo agatonu kia te ia ʼi te ʼu ʼahiʼahiʼi faigataʼa. ʼI tatatou vakaʼi te ʼu faʼifaʼitaki ʼaia, ʼe tou sio peʼe feafeaʼi te fakatuputupu pea mo te maʼuliʼi ʼo te faʼa kātaki faka Kilisitiano pea he koʼe ʼe maʼuhiga.

Ko te faʼifaʼitaki lahi ko Sesu, ʼaē neʼe mamahi ʼaupito moʼo faka kolōliaʼi te huafa ʼa Sehova. ʼE fakaloto mālohiʼi tatou e te Tohi-Tapu ke tou ako lelei tana ʼu gāue faʼa kātaki ʼi te atolasio: “Koia, mo tatou foki, ʼe tou maʼu te toe ʼao ʼo te kau fakamoʼoni ʼi ʼotatou tafa, tou līaki te meʼa mamafa fuli pe pea mo te agahala ʼaē ʼe ina fakahēʼi gafua tatou, pea ke tou faʼa kātaki ʼo feleleʼi ʼi te lele ʼaē neʼe fekauʼi mai kia tatou, ʼo tou fakahagatonu tuʼumaʼu te sio kia Sesu, ko te Meʼa Gāue tāfito ʼaia ʼo tatatou tui, ko tona Tagata Faka Haohaoa. ʼUhi ko te fiafia ʼaē neʼe fakapapau age kia te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea neʼe heka ia ʼi te toʼomataʼu ʼo te hekaʼaga hau ʼo te ʼAtua. Ei, koutou tokagaʼi fakalelei, ia ia ʼaē neʼe ina kātakiʼi te taʼi ʼu palalau fakafeagai ʼaia mai te kau agahala, ʼaē neʼe ko he meʼa kovi ia kia nātou, koteʼuhi ke mole koutou fiu pea mo lotovaivai ʼi tokotou ʼu nefesi.”—Hepeleo 12:1-3.

Ko te lele ki te maʼuli ʼe loaloaga, mole ko he lele fai gaholo. Koia ʼaē ʼe ʼaoga ai ke tou faʼa kātaki ohage ko Kilisito. Ko tona ikuʼaga, ko te laini fakaʼosi, ʼe mole feala ia ke sio kiai ʼi te lolotoga ʼo te lele. ʼE tonu ke tāsilo ʼi totatou ʼatamai te ikuʼaga ke feala ai ke tou lele ki muʼa lolotoga te lele katoa. Neʼe maʼu e Sesu te taʼi ʼata ʼaia ʼi tona ʼatamai, ko tona faka ʼuhiga, ko “te fiafia ʼaē neʼe fakapapau age.”

Koteā ʼaē ʼe kau ki te fiafia faka Kilisitiano ia ʼaho nei? ʼUluaki, ko te fakapale ki te maʼuli tuputupua ʼi te lagi maʼa te tokosiʼi pea ki te maʼuli heʼegata ʼi te kele maʼa te tokolahi. ʼO toe kau foki kiai, te loto fiafia ʼaē ʼe haʼu mai te ʼiloʼi ʼaē neʼe tou fakafiafia te loto ʼo Sehova pea mo tou kau ki te tāpuhā ʼo te huafa ʼo te ʼAtua.—Tāʼaga Lea 27:11; Soane 17:4.

ʼE kau ki te fiafia ʼaia, te felogoi lelei ʼaupito mo Sehova. (Pesalemo 40:8; Soane 4:34) Ko te taʼi felogoi ʼaia ʼe ina fakaloto mālohiʼi pea mo lagolago ki totatou maʼuli, ʼo ina foaki ki he tahi te mālohi ke lele ʼi te lele ʼaki te faʼa kātaki pea ke ʼaua naʼa ina fakagata. Pea tahi foki, ʼe tapuakina e Sehova te felogoi ʼaia ʼaki tana tuku ifo tona laumālie maʼoniʼoni ki tana ʼu kaugana, ʼo fakatupu ai te fiafia pea mo te gāue fiafia.—Loma 12:11; Kalate 5:22.

ʼE fua lelei kia tatou tatatou vakaʼi ia te faʼifaʼitaki ʼo te faʼa kātaki ʼo te tui ʼa Sopo. Neʼe heʼe haohaoa ia pea, neʼe siʼisiʼi pe tona ʼatamai mālama ʼo ʼuhiga mo tona ʼaluʼaga. Kae, ʼi ʼihi lakaga, neʼe lotovaivai he neʼe agatonu fau pea mo heʼe ʼamanaki. Kae, neʼe ina fakahā tuʼumaʼu tana fakatotonu ʼaē ke ina taupau maʼu tana agatonu kia Sehova pea ke mole ina līaki ʼi he temi. (Sopo 1:20-22; 2:9, 10; 27:2-6) Neʼe fakapale e Sehova te faʼa kātaki ʼa Sopo ʼi tana aga faka lotu, ʼo ina foaki kia ia te ʼu tapuakina fakalaumālie pea mo fakasino pea mo te ʼamanaki ki te maʼuli heʼegata. (Sopo 42:10-17; Sake 5:10, 11) Ohage ko Sopo, ʼe feala ke tou tau mo ni ʼu mamahi lahi age pea mo puli totatou maʼuli ʼi te temi nei, kae ʼe toe feala pe ke tou ʼiloʼi papau ʼe tapuakina e Sehova tatatou faʼa kātaki agatonu.—Hepeleo 6:10-12.

ʼI totatou temi, neʼe fakahā fakatahi e te kau Fakamoʼoni ʼa Sehova te faʼa kātaki faka Kilisitiano ʼi te fai ʼo te finegalo ʼa Sehova. Ohage la ko tanatou faʼa kātaki ʼaē ʼi te gāue ʼi te ʼolo ʼi te ʼu ʼapi pea mo te fagonogono ki te hahaʼi neʼe fakatokagaʼi pea mo tanatou logo ʼaē ki te malamanei katoa. Ko te ʼu tala logo neʼe lahi tanatou talanoa ki tanatou faiva pea mo tanatou faʼa kātaki ʼo nātou faka mafola te logo lelei logope te fakafeagai mo te ʼu ʼahiʼahi. Māʼiape la mo te sulunale ʼi te ʼu sulunale ʼaia neʼe ko tona kupu tāfito: “ ʼE mole hāo he tahi mai te kau Fakamoʼoni ʼa Sehova!”—Mateo 5:16.

Neʼe tapuakina e Sehova te faʼa kātaki ʼo te ʼu faiga ʼa tana kau Fakamoʼoni ʼo fakatuputupu te fua ʼi te minisitelio. Koutou fakatokagaʼi te meʼa ʼaē neʼe hoko ki te ʼu ʼuluaki Fakamoʼoni faiva ʼaē neʼe fekauʼi ki Italia ʼi te ʼu taʼu 1960 ʼi te temi ʼaē neʼe teitei pe ko te toko 10 000 kau Fakamoʼoni ʼaē neʼe faka mafola ʼi te fenua ko tona hahaʼi ko te toko 53 000 000. ʼI te kolo ʼaē neʼe ko te toko 6 000, neʼe mole ʼi ai he Fakamoʼoni. Ko te ʼu tēhina ʼaē neʼe ʼolo ʼo ʼaʼahi neʼe nātou tau mo te ʼu agamālohi ʼi tanatou gāue faka minisitelio.

ʼI te temi pe ʼaē ʼe ʼōmai ai te ʼu tēhina ʼo faka mafola ʼi te kolo ʼaia, tokolahi ʼi te hahaʼi fafine, māʼia mo te hahaʼi tagata ʼo te kolo neʼe nātou fakatahiʼi te kau tūpulaga pea mo nātou fakaloto mālohiʼi nātou ke nātou muliʼi te kau Fakamoʼoni, ʼo vekaʼi nātou pea mo logoaʼa ʼaupito. Mole fualoa ki te aga ʼaia, neʼe tonu leva ki te ʼu tēhina ke nātou mavae mai ai pea mo ʼolo ki he tahi kolo. ʼI tanatou faiga ʼaē ke nātou foaki he fagonogono katoa ki te hahaʼi fuli ʼo te kolo ʼaē neʼe nātou mavae mai ai, neʼe fakatotonu e te ʼu tēhina ke nātou faka mafola pe ʼi te ʼu ʼaho ʼaē ʼe ʼua lahi ai, ʼaki tanatou fakaʼamu ʼaē ke mole fakakinakinaʼi nātou e te kau tūpulaga. Neʼe nātou fakatokagaʼi neʼe mole lotolelei te hahaʼi ʼo te kolo ke nātou palapala ʼuhi pe moʼo fakaleluʼi te kau fai faka mafola. ʼAki te faʼahiga fai ʼaia neʼe foaki te fagonogono lelei. Neʼe maʼu ai te hahaʼi neʼe fia logo ʼo kamata ai te ʼu ako faka Tohi-Tapu foʼou. Ko tona ikuʼaga, neʼe mole gata pe ki te fakatuʼu ʼaē ʼo te kokelekasio ʼaē neʼe tuputupu ʼi te kiʼi kolo veliveli ʼaia, kae neʼe kamata fai te gāue faka mafola ʼi te ʼu ʼaho ʼaē neʼe lāʼainaʼi ai. Neʼe haga pe Sehova ʼo tapuakina te faʼa kātaki ʼo tana kau Fakamoʼoni ʼi te koga meʼa ʼaia pea ʼi Italia katoa. ʼI te temi nei, ko te toko 200 000 kau Fakamoʼoni ʼa Sehova ʼi te fenua ʼaia.

ʼE lahi te fakapale ʼo te faʼa kātakiʼi ʼi te fai ʼo te meʼa ʼaē ʼe totonu. ʼAki te mālohi ʼo te laumālie ʼa te ʼAtua, neʼe feala ki te kau Fakamoʼoni ʼa Sehova ke nātou fakahoko he toe gāue lahi mole hona fakatatau ʼi te hisitolia ʼo te tagata, ʼaē ko te faka mafola ʼo te logo lelei ʼo te Puleʼaga, ʼi te ʼu muʼa matapā pea mo te tahi age pe ʼu faʼahiga fai ki te toko miliona hahaʼi. (Sakalia 4:6) Neʼe nātou sio fakafiafia ki te fakahoko ʼo te lea faka polofeta ʼo te Tohi-Tapu ʼo ʼuhiga mo te tuputupu fakaofoofo pea mo te mālohi ʼa te kautahi fakakelekele ʼa Sehova. (Isaia 54:2; 60:22) ʼE nātou maʼu he leʼo ʼo loto ʼe maʼa ia muʼa ʼo te ʼAtua, pea ʼe nātou fiafia ʼi te ʼamanaki ki te maʼuli heʼegata. Ia meʼa fuli, ʼe nātou fiafia ʼi tonatou ʼu felogoi lelei mo te Tupuʼaga, ia Sehova ʼAtua.—Pesalemo 11:7.

[Paki ʼo te pasina 25]

Neʼe fakapale e Sesu te faʼa kātaki agavaivai ʼo te fafine Keleka ʼaia

[Paki ʼo te pasina 26]

Ko te maʼuli ʼi te Palatiso ʼe kau ki te fiafia ʼaē ʼe tuku ia muʼa ʼo te kau Kilisitiano ia ʼaho nei