ʼE Liliu Te Kau Ako Faiva Ko He Kau Misionea Faiva
“ ʼE KEI ʼau punamaʼuli ʼaupito ʼi tamā maʼu te pilivilesio ʼaenī!” Ko te ʼui ʼaia ʼa Will ʼo ʼuhiga mo te ako ʼaē neʼe kau kiai ia ia pea mo tona ʼohoana ko Patsy, neʼe nā kau ki te 103 kalasi ʼo te Faleako Faka Tohi-Tapu ʼo Kalaate ʼo te Sosiete Watchtower. Neʼe manatu tahi mo nāua ia Zahid pea mo Jeni. Neʼe nā ʼui fēnei: “ ʼE ko he pilivilesio tamā ʼi henī.” Neʼe gāue lelei te kau ako fuli ʼi te faleako ʼaia. Pea kua nātou loto la ke kamata tanatou gāue faka misionea. Kae, ʼuluaki, ʼi te polokalama ʼo tanatou maʼu pepa ʼaē neʼe fai ʼi te ʼaho 6 ʼo Sepetepeli 1997, neʼe nātou maʼu ai te ʼu tokoni ʼofa ʼe ʼaoga anai kia nātou ke nātou maʼu he ʼu fua lelei ʼi tanatou ʼu telituale faka misionea.
Ko Theodore Jaracz, ʼaē ʼe kau ki te Kolesi Pule, neʼe pelesita ʼi te polokalama ʼaia. Neʼe ina fakatokagaʼi te kau ai ʼo te ʼu kaumeʼa pea mo te ʼu kāiga mai Kanata, mo Eulopa, mo Porto Rico pea mo Amelika, ʼo feiā pe mo te Famili ʼo te Petele pea mo te kau fakafofoga e 48 ʼo te ʼu filiale ʼo te Sosiete Watch Tower, neʼe nātou ʼōmai fuli moʼo fakahā ʼo tanatou ʼofa pea mo tanatou lagolago ki te kau ako. Neʼe fakatokagaʼi e te Tēhina ko Jaracz ʼe lahi te ʼu misionea ʼaē neʼe fekauʼi e te Keletiate, neʼe mole kei nātou tokakaga ki tanatou gāue misionea kae neʼe nātou fai he ʼu kumi peʼe nātou kau ki te politike. ʼE kehekehe ia mo te kau maʼu pepa ʼo Kalaate, ʼaē ʼe nātou fakahoko te gāue ʼaē neʼe akoʼi age ke nātou fai. ʼE nātou akoʼi te Tohi-Tapu ki te hahaʼi.
Ki muli mai, ko Robert Butler, ʼe kau ki te pilō ʼo te Sosiete ʼi Brooklyn, neʼe palalau ki te kupu tāfito ʼaenī “Fai Ke Fua Lelei Tou Ala.” Neʼe ina fakamahino ʼe fakafuafua e te hahaʼi he tahi ʼe maʼuhiga mo kapau ʼe maʼu paʼaga peʼe ʼi ai hona faʼahiga koloā, kae ko te meʼa ʼaē ʼe maʼuhiga peʼe feafeaʼi te fakafuafua ʼa te ʼAtua. Neʼe fua lelei te minisitelio ʼa Sesu he neʼe agatonu ʼi te gāue ʼaē neʼe tuku age ke ina fai, kae mole ʼuhi ko te tokolahi ʼaē neʼe tafoki mai. Neʼe faka kolōliaʼi e Sesu ia Sehova, pea neʼe mole ina tuku ke ʼulihi ia ia e te mālama. (Soane 16:33; 17:4) Ko te ʼu meʼa ʼaia ʼe feala ke fai e te kau Kilisitiano takitokotahi.
“Ke Koutou Kaugana Ki Te Hahaʼi Fuli,” neʼe ko te tokoni ʼa Robert Pevy, ʼaē neʼe misionea ʼi te Potu Hahake ki muʼa atu. Neʼe fua lelei te gāue misionea ʼa te ʼapositolo ko Paulo. Koteā tona tupuʼaga? Neʼe liliu ko te kaugana maʼa te hahaʼi fuli. (1 Kolonito 9:19-23) Neʼe fakamahino fēnei e te tēhina: “Ko he maʼu pepa ʼo Kalaate ʼe aga feiā, ʼe mole sio anai ki te gāue misionea ohage ko he maʼu tuʼulaga, ʼo feala ai ke faka maʼuhigaʼi ia ia ʼi te kautahi. Ko he misionea ʼe ʼalu ki tona telituale ʼaki pe te manatu e tahi: ke tauhi, he ko te gāue ʼaia ʼa te kaugana.”
Ko Gerrit Lösch ʼo te Kolesi Pule, neʼe ina fakatafito tana ʼu tokoni kia 2 Kolonito kapite 3 mo te 4, ʼo fakaloto mālohiʼi te kau ako ke nātou “Fakaʼata Ohage Ko He ʼu Sioʼata Te Kolōlia ʼo Sehova.” Neʼe ina fakamanatuʼi age kia nātou ko te ʼatamai mālama ʼo ʼuhiga mo te ʼAtua ʼe hage ko he mālama ʼe ina fakagigila he Kilisitiano, mokā ina avahi tona loto moʼo tali kiai. ʼE tou fakaʼata te mālama ʼaia ʼi tatatou faka mafola te logo lelei pea mo tatatou taupau he aga ʼe lelei. Neʼe ina toe ʼui fēnei: “Lagi ʼi ʼihi temi, ʼe koutou logoʼi ʼe mole feala ke koutou fakahoko te faʼahi ʼaia. Ka hake te ʼu manatu ʼaia ia koutou, koutou falala kia Sehova, ‘koteʼuhi ko te mālohi ʼaē ʼe laka age ʼi te mālohi māhani ʼe ko te mālohi ia ʼo te ʼAtua.’ ” (2 Kolonito 4:7) ʼI tana toe fakaʼaogaʼi te ʼu palalau ʼaē ʼa Paulo ia 2 Kolonito 4:1, neʼe uga fēnei e te Tēhina ko Lösch te kau ako: “ ʼAua naʼa koutou līaki takotou gāue faka misionea. Ke gigila takotou sioʼata!”
Ko Karl Adams, ʼe kau ki te kau faiako ʼo Kalaate, neʼe palalau ki te kupu tāfito fakapunamaʼuli ʼaenī “ ʼE ʼifea ia Sehova?” Neʼe mole faka ʼuhiga te fehuʼi ʼaia ki te potu ʼaē ʼe nofo ai te ʼAtua ʼi te ʼatulaulau, kae ki te ʼaoga ʼaē ke tou vakaʼi te manatu ʼa Sehova pea mo te ʼu meʼa ʼaē ʼe hā ai tana takitaki. Neʼe ina ʼui fēnei: “Kapau ʼe lotohoha he tahi, tatau aipe pe kua fualoa tana kau ki te selevisi ʼa Sehova, ʼe feala ke puli ia ia te manatu ʼa Sehova.” (Sopo 35:10) ʼO feafeaʼi mo totatou temi? ʼI te taʼu 1942, neʼe ʼaoga ke takitaki te hahaʼi ʼa te ʼAtua. Neʼe kua ʼosi koa te gāue fai faka mafola, peʼe kei lahi koa te gāue ʼaē neʼe tonu ke fai? Neʼe koteā te finegalo ʼo te ʼAtua ki tana hahaʼi? ʼI tanatou ako te Folafola ʼa te ʼAtua, neʼe hā lelei ai te tali ki te ʼu fehuʼi ʼaia. Neʼe fakamatala e te Tēhina ko Adams: “ ʼI muʼa ʼo te fakaʼosi ʼo te taʼu 1942, neʼe fai te ʼu fakatuʼutuʼu ʼo ʼuhiga mo te Faleako Faka Tohi-Tapu ʼo Kalaate ʼo te Sosiete Watchtower.” ʼE mahino papau ia, neʼe tapuakina e Sehova te gāue ʼa te kau misionea ʼaē neʼe fekauʼi e te faleako ʼaia.
Ko Mark Noumair neʼe ko te lua faiako ʼaē neʼe faiakonaki. ʼI tana akonaki, ʼaē ko tona kupu tāfito “ ʼE Koutou Fakaʼaogaʼi Feafeaʼi Anai Tokotou Taleta?,” neʼe ina fakaloto mālohiʼi te kau ako ke nātou fakaʼaogaʼi te ʼu meʼa ʼaē neʼe akoʼi age kia nātou ʼi Kalaate, ʼi tanatou tau atu pe ki tonatou telituale foʼou. Neʼe ina toe ʼui fēnei: “Koutou tokakaga ki te hahaʼi. Koutou fakaōvi kia nātou. Koutou kumi ke koutou ʼiloʼi tanatou ʼu agaʼi fenua, mo tanatou hisitolia pea mo tanatou ʼu fakahuahua. Kapau ʼe koutou ako fakavilivili tanatou lea, pea ʼe faigafua age leva takotou felogoi mo te hahaʼi.”
Ko He Kau Ako Fakamalotoloto ʼe Nātou Fiafia ʼi Tanatou Minisitelio
ʼO hilifaki ki tanatou ako fakamalotoloto ʼi Kalaate, neʼe fakatuʼutuʼu ke fono te kau ako mo te ʼu kokelekasio e 11. ʼI te ʼu fakaʼosi vāhaʼa neʼe nātou kau mālohi ki te gāue fai faka mafola. Ko Wallace Liverance ko te tahi faiako ʼo Kalaate, neʼe ina fakaafe ʼihi ke nātou fakamatala te ʼu meʼa ʼaē neʼe hoko kia nātou. Neʼe hā lelei tanatou fiafia ʼi tanatou fakamatala tanatou fagonogono ʼi te ʼu fale koloā lalahi, ʼi te ʼu taulaga motokā, ʼi te telituale ʼo te ʼu matani gāue, ʼi te ala pea mo te ʼu ʼapi. Ko ʼihi ia nātou neʼe nātou faigaʼi ke nātou felāveʼi mo te hahaʼi matāpule ʼaē neʼe nonofo peʼe gāue ʼi te telituale ʼo tonatou kokelekasio. Ko te ʼu ako Tohi-Tapu e 10 neʼe kamata e ʼihi ʼo te 103 kalasi lolotoga te ʼu māhina e nima ʼaē neʼe nātou ako ai.
Ko Te Kau Misionea ʼĀfea ʼe Nātou Fakahā Te ʼu Fua Lelei ʼo Tanatou Gāue
ʼI te hili ʼo te koga fakafiafia ʼaia ʼo te polokalama, neʼe fakaafe e Patrick Lafranca pea mo William Van de Wall, te ʼu tēhina e toko fitu ʼe kau ki te ʼu Komite ʼo te Filiale, ke nātou fakahā mai te ʼu meʼa ʼaē neʼe nātou ako ʼi tanatou gāue misionea, ke fua lelei ki te kau ako. Neʼe nātou tokoniʼi te kau maʼu pepa ke nātou faka ʼuhiga tanatou gāue misionea ohage ko he meʼa ʼe haʼu mai ia Sehova pea ke nātou fakatotonu ke nātou pipiki maʼu ki tanatou gāue. Tahi ʼaē meʼa, neʼe nātou palalau ki te ʼu fua lelei ʼi ʼihi ʼu fenua, ʼuhi ko te gāue ʼa te kau misionea ʼaē neʼe akoʼi ʼi Kalaate.
Koteā ʼaē neʼe tokoni ki te ʼu tēhina ʼaia ʼo te ʼu Komite ʼo te Filiale ke nātou fai fakalelei pea mo nātou fiafia ʼi tanatou gāue misionea lolotoga te ʼu taʼu ʼe lauʼi hogofulu? Neʼe nātou gāue fakatahi mo te ʼu tēhina ʼo tonatou telituale pea neʼe nātou ako mai ia nātou. Neʼe nātou ako te lea ʼo te fenua ʼi tanatou tau atu pe kiai. Neʼe nātou faka ʼalutahi tanatou aga mo te ʼu agaʼi fenua ʼo te telituale. Neʼe fakahā e Charles Eisenhower, neʼe kau ʼi te ʼuluaki kalasi ʼo Kalaate pea kua taʼu 54 tana misionea, te ʼu “kalavi” e nima neʼe ako e te kau misionea ke fua lelei ai tanatou gāue: (1) Ke ako tuʼumaʼu te Tohi-Tapu, (2) ke ako te lea ʼo te fenua, (3) ke gāue fakamalotoloto ʼi te minisitelio, (4) ke kumi te tokalelei ʼi te ʼapi faka misionea pea mo (5) ke faikole tuʼumaʼu kia Sehova. Neʼe ōfo te kau ako, ʼo mole gata pe ʼi te ʼu tokoni lelei ʼaē neʼe foaki age kia nātou, kae ʼo toe feiā pe mo te fiafia ʼaē neʼe hā lelei ʼi te kau misionea fakamalotoloto ʼaia ʼi tanatou kau ki te selevisi ʼo Sehova. Ohage ko te ʼui ʼaenī ʼa Armando pea mo Lupe, “ ʼe nātou fiafia ʼi tanatou palalau ki tonatou maʼuli.”
ʼI te ʼosi ʼo te ʼu fai fehuʼi ʼaia, neʼe kei toe te akonaki e tahi. Ko Albert Schroeder, ʼe kau ki te Kolesi Pule, neʼe ina fili te kupu tāfito ʼaenī “ ʼI Tatatou Taupau Lelei Te Folafola ʼa Te ʼAtua, ʼe Hā Ai Te ʼu Koloā Maʼuhiga ʼo Te Moʼoni.” Mai tona ʼaluʼaga ʼaē ko te Tohi-Tapu ʼe ko te tohi ʼaē ʼe fakaʼaogaʼi tāfito ʼi te Faleako ʼo Kalaate, neʼe fia logo te kau ako ki te meʼa ʼaē ka tala mai. Neʼe fakahā e te Tēhina ko Schroeder, ʼi te temi ʼaē neʼe kamata ai te gāue moʼo fakaliliu ʼo te Tohi-Tapu Les Saintes Écritures — Traduction du monde nouveau ia taʼu e 50 ki muʼa atu, ko te ʼu tēhina fakanofo ʼaē neʼe kau ki te Komite ʼo te Traduction du monde nouveau, neʼe mole nātou kumi ke leleiʼia nātou e te hahaʼi, kae neʼe nātou falala ki te takitaki ʼo te laumālie maʼoniʼoni. (Selemia 17:5-8) Pea neʼe mole heʼeki fualoa, neʼe fakahā e ʼihi hahaʼi popoto te maʼuhiga ʼo te Traduction du monde nouveau. Neʼe faitohi fēnei ki te Sosiete te tagata fai kumi: “ ʼE ʼau ʼiloʼi te maʼuhiga ʼo he tohi ʼi taku sio kiai, pea neʼe gāue lelei tokotou ‘Komite ʼo te Traduction du monde nouveau.’ ”
ʼI te ʼosi ʼo te akonaki ʼaia, neʼe maʼu leva e te kau ako tanatou ʼu pepa, pea neʼe fakahā ki te hahaʼi te ʼu telituale ʼaē neʼe hinoʼi nātou kiai. Neʼe ko he lakaga maʼuhiga ʼaia ki te kau ako. Ko he tahi ʼi te kau ako, neʼe ina fakafofoga nātou, neʼe ina lau te tohi fakamālo, pea ko te tokolahi neʼe nātou fia tagi. Ko ʼihi ʼi te kau ako neʼe kua fualoa tanatou nofo teuteu ʼo ʼuhiga mo te gāue misionea. ʼI tanatou mahino ʼaē ʼe fai ʼi te lea Fakapilitānia te ako ʼo Kalaate, ko ʼihi neʼe nātou kau ki te ʼu kokelekasio ʼi te lea Fakapilitānia, ke nātou mahino lelei ki te lea ʼaia. Ko ʼihi age neʼe nātou ʼolo ʼo gāue ʼi te ʼu potu ʼaē neʼe ʼaoga lahi kiai he ʼu pionie, ʼi tonatou fenua peʼe ʼi he tahi fenua. Pea ko ʼihi neʼe nātou teuteu ki te faʼahi ʼaia ʼi tanatou lau te ʼu hisitolia ʼo ʼuhiga mo te fai faka mafola, mo nātou fai te ʼu kumi pea mo nātou sioʼi liuliuga te foʼi fime viteo ʼo te Sosiete Jusquʼaux extrémités de la terre.
Ko Will pea mo Patsy, ʼaē neʼe tou talanoa ki ai ʼi te kamataʼaga ʼo te alatike ʼaenī, neʼe lave ʼaupito kia nāua te ʼu tokaga takitokotahi ʼaē neʼe fai ki te kau ako. “Māʼiape la mo te hahaʼi ʼaē neʼe mole nātou ʼiloʼi mātou, neʼe fāʼufua mai kia mātou pea mo fai tonatou ʼu paki. Ko he tēhina ʼo te Kolesi Pule neʼe ʼalofa mai pea mo ina ʼui mai, ‘ ʼE mātou fiafia ʼaupito ia koutou!’ ” ʼE mahino papau ia, ko te kau ako ʼo te 103 kalasi neʼe ʼofainaʼi ʼaupito nātou. Neʼe akoʼi lelei nātou. Pea ko te ako ʼaē neʼe nātou maʼu mai Kalaate, ʼe feala ai anai ke nātou liliu ko he ʼu misionea faiva.
[Talanoa ʼo te pasina 22]
Ko Te ʼu Agaaga ʼo Te Kalasi
Ko te lahi ʼo te ʼu fenua ʼaē neʼe fakafofoga: 9
Ko te lahi ʼo te ʼu fenua ʼaē neʼe hinoʼi nātou kiai: 18
Ko te hahaʼi ʼo te kau ako: 48
Ko te hahaʼi ʼo te ʼu taumatuʼa: 24
Ko te fakafuafua ʼo te ʼu taʼu ʼo te kau ako: 33
Ko te fakafuafua ʼo te ʼu taʼu ʼi te moʼoni: 16
Ko te fakafuafua ʼo te ʼu taʼu ʼi te gāue temi katoa: 12
[Paki ʼo te pasina 23]
Ko Te 103 Kalasi ʼo Te Kau Misionea ʼo Te Faleako Faka Tohi-Tapu ʼo Kalaate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ʼe lau te ʼu higoa ʼo te lisi mai te faʼahi hema ki te faʼahi mataʼu.
(1) Bunn, A.; Dahlstedt, M.; Campaña; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.
[Paki ʼo te pasina 24]
ʼE mātou ʼolo anai kifea?