He Koʼē ʼe ʼAoga Ke Tou ʼIloʼi Ia Te ʼu Tali?

“E kotou iloi anai te mooni, pea e fakaateainai anai koutou e te mooni.”—SOANE 8:32.

KO TE moʼoni ʼaē ʼe tou maʼu ʼi te Tohi-Tapu ʼe ina fakaʼāteaina tātou mai te ʼu akonaki hala ʼo ʼuhiga mo Sesu. ʼE maʼuhiga koa ke tou tui kiā te ia? ʼEī, heʼe maʼuhiga ia te faʼahi ʼaia kiā Sehova mo Sesu pea mo tātou.

● He koʼē ʼe maʼuhiga kiā Sehova? Heʼe “ofa te Atua.” (1 Soane 4:8) ʼE loto e Sehova ke tou maʼuli fiafia ʼo talu ai. Neʼe ʼui fēnei e Sesu: “Nee ofa lahi osi te Atua ki te malamanei nee ina foaki ai tona Alo ulutokotahi, o tupu ko he tahi pe e tui kia ia . . . ke ina mau te mauli heegata.” (Soane 3:16) Neʼe fekauʼi ifo e te ʼAtua ia tona ʼAlo moʼo totogi ʼo ʼatatou agahala pea mo ina foaki mai kiā tātou ia te maʼuli heʼegata ʼi te Palatiso ʼi te kele, ʼo mulimuli pē ki Tana fakatuʼutuʼu ʼi te kamataʼaga. (Senesi 1:28) Kua fakatuʼutuʼu e te ʼAtua ke ina foaki ia te meʼa ʼofa ʼo te maʼuli heʼegata kiā nātou ʼaē ʼe natou akoʼi ia te moʼoni ʼo ʼuhiga mo tona ʼAlo pea mo natou mulimuli kiai.—Loma 6:23.

● He koʼē ʼe maʼuhiga kiā Sesu? Neʼe toe ʼofa ia Sesu ki te hahaʼi. Neʼe ina fakahā ia tona ʼofa makehe ʼaki tana foaki ʼaki he lotolelei ia tona maʼuli maʼa tātou. (Soane 15:13) Neʼe ina ʼiloʼi ʼe ko ia pē ia te ala ki te haofaki. (Soane 14:6) ʼE tou punamaʼuli koa ki te loto ʼaē e Sesu ke hahaʼi ia nātou ʼaē ʼe maʼu tapuakina mai tana sākilifisio faitotogi? Koia ʼaē neʼe ina fakatotonu ai ki ʼana tisipulo moʼoni ke natou akoʼi ki te hahaʼi ʼi te mālamanei kātoa ia te finegalo ʼo te ʼAtua pea mo tana fakatuʼutuʼu.—Mateo 24:14; 28:19, 20.

● He koʼē ʼe maʼuhiga kiā tātou? Kotou fakakaukauʼi age ia te ʼu faʼahi ʼaē ʼe maʼuhiga tāfito kiā koutou, ke kotou haohaoa mai te ʼu mahaki ʼo toe fēia aipē ki tokotou fāmili. ʼE kotou fakaʼamu koa ke kotou haohaoa mai te mahaki pea mo he maʼuli ʼe lelei age kiā koutou pea mo tokotou fāmili? Ko Sehova ʼaki ia Sesu ʼe ina foaki atu kiā koutou pea mo tokotou fāmili ia he maʼuli haohaoa pea mo te maʼuli heʼegata ʼi te mālama foʼou, ʼe mole maʼu ai ia te tuʼania pea mo te mamahi. (Pesalemo 37:11, 29; Apokalipisi 21:3, 4) ʼE kotou fia māʼuʼuli koa ʼi he mālama fēia? Kapau koia, ʼe ʼi ai te ʼaluʼaga ʼe tonu ke kotou fai.

Koia, ko te vaega Tohi-Tapu ʼaē ʼe tou maʼu ʼi te kupu tāfito ʼe ʼui fēnei: “E kotou iloi anai te mooni, pea e fakaateainai anai koutou e te mooni.” Ko te moʼoni ʼo ʼuhiga mo Sesu pea mo tana gāue ʼaē ko te fakahoko ʼo te ʼu fakapapau ʼa te ʼAtua ʼe feala ke ina fakaʼāteaina tātou mai he faʼahiga pōpula fakamataku, ʼaē ko te kaugana ki te agahala pea mo te mate. Ke feala hakotou maʼu ia te ʼāteaina, ʼe tonu ke kotou ‘ ʼiloʼi ia te moʼoni.’ He koʼē ʼe mole kotou ako ia te moʼoni ʼaia pea ʼe fua lelei feafeaʼi anai kiā koutou pea tokotou fāmili? ʼE fiafia anai ia te kau Fakamoʼoni ʼa Sehova ʼi tanatou tokoni atu kiā koutou.