Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
4-10 NOVEPELI
KOLOA ʼO TE TOHI-TAPU PESALEMO 105
“ ʼE Ina Manatuʼi Tana Fuakava Ki Te Heʼe Gata”
ʼE Fakamalohi Feafeaʼi Tatatou Tui Ki Te Fakapapau Mai ʼa Sehova ʼo ʼUhiga Mo He Malama Foʼou?
11 Tokagaʼi ni fakapapau neʼe fai e Sehova ʼi te temi muʼa ki ʼana kaugana, pea ʼi te sio fakatagata ʼe mole feala ia ke hoko. Neʼe ina ui age kia Apalahamo mo Sala ʼe nā maʼu anai hanā tamasiʼi tagata ʼi tanā kua matuʼa. (Sen. 17:15-17) Neʼe ina toe fakapapauʼi age kia Apalahamo ʼe ina foaki anai te fenua ʼo Kanaane ki tona hologa. Lolotoga te ʼu taʼu ʼae neʼe maʼuli popula ai te kau Iselaele, te hologa ʼo Apalahamo ʼi Esipito, neʼe hage ʼe mole hoko anai te fakapapau ʼaia. Kae neʼe hoko moʼoni ia. Ki muli age, neʼe fakaha e Sehova ʼe maʼu anai e Elisapeta hana tamasiʼi kae neʼe kua finematuʼa. Neʼe ina toe fakaha age kia Malia, ʼae neʼe kei taupoʼou ʼe ina fanauʼi anai tona ʼAlo. ʼE fakahoko ai te tahi fakapapau neʼe fai e Sehova ʼi ni taʼu ʼe lauʼi afe ki muʼa atu, ʼi te ʼoloto ʼo Eteni!—Sen. 3:15.
12 Ka tou fakakaukauʼi te ʼu fakapapau ʼae neʼe fai e Sehova pea mo tana fakahoko, ʼe tou mahino ai ki te lahi ʼo tona malohi pea ʼe toe malohi ai tatatou tui ki tana fakapapauʼi mai he malama foʼou. (Lau ia Sosue 23:14; Esaia 55:10, 11.) ʼE feala ai ke tou tokoni ki te hahaʼi ke natou mahino ko te tui ʼae ki he malama foʼou ʼe mole ko he moemisi. Neʼe ui e Sehova totonu ʼo ʼuhiga mo tana fakapapau mai he lagi foʼou mo he kele foʼou: “Ko te ʼu folafola ʼaia ʼe agatonu pea mo moʼoni.”—Apk. 21:1, 5.
it-2 493 ¶3
(Te) Folafola
ʼE fakalogo te fakatupu katoa ki te folafola ʼa te ʼAtua pea ʼe feala ke ina fakaʼaogaʼi moʼo fakahoko ʼana fakatuʼutuʼu. (Ps 103:20; 148:8) Ko tana folafola ʼe tuha mo te falala. Ka fai e te ʼAtua hana fakapapau ʼe ina manatuʼi pea ʼe ina fakahoko. (Tet 9:5; Ps 105:42-45) Ohage pe ko tana ui “ ʼe heʼe gata” tana folafola, pea ʼe mole toe liliu anai kia te ia kae heʼeki ina fakahoko tana fakatuʼutuʼu.—Esa 40:8; 55:10, 11; 1Pe 1:25.
Koloa Fakalaumalie
w86 1/11 19 ¶15
ʼU Tupulaga, ʼe Kotou Kau Ki He Famili ʼe Fiafia Mo Logo Tahi
15 “Neʼe seiniʼi [te ʼu vaʼe ʼo Sosefo], pea neʼe toe seiniʼi mo tona kia. Neʼe fakamaʼa tona loto e te folafola ʼa Sehova, ʼo kaku ki te temi ʼae neʼe hoko ai te folafola ʼa te ʼAtua.” (Pesalemo 105:17-19) Ia taʼu ʼe 13, neʼe lotomamahi ia Sosefo ʼi tona uhiga kaugana mo tagata pilisoni ʼo kaku ki te fakahoko e Sehova ia tana fakapapau. Neʼe toe malohi age ai tana tui ʼaki te ʼu ʼahiʼahi ʼaia. Logo la neʼe mole fakatupu e Sehova te ʼu faigataʼaʼia ʼaia, kae neʼe ina fakagafua. ʼE taupau anai koa e Sosefo tana ʼamanaki ki “te folafola ʼa te ʼAtua” logo la te ʼu ʼahiʼahi? ʼE ina gaueʼi anai koa ke lelei age ona kalitate ohage la ko te kataki fualoa, te agavaivai, te malohi fakalaumalie mo te lototoʼa ʼae ka tokoni ki ai ke ina fakahoko he gaue faigataʼa? Koia ʼe feala ke tou ui ai neʼe malo ia Sosefo ʼi te ʼahiʼahi ʼaia, ohage ko te fakamaʼa ʼo te ʼaulo e te afi. Neʼe liliu ai ia Sosefo ʼo maʼa age pea mo maʼuhiga kia mata ʼo te ʼAtua ʼae neʼe ina fakaʼogaʼi ʼi hona aluʼaga fakaofoofo ki muli age.—Senesi 41:14, 38-41, 46; 42:6,9.
11-17 NOVEPELI
KOLOA ʼO TE TOHI-TAPU PSALM 106
“Neʼe Natou Galoʼi Te ʼAtua, ʼAe Neʼe Ina Haofaki Natou”
“Ko Ai ʼAe ʼe Kau Mo Sehova?”
13 Neʼe matataku te kau Iselaele ʼi te fakaha age e te ʼAtua ia tona malohi, koia neʼe hake ai Moisese ki te Moʼuga ʼo Sinai ʼo palalau kia Sehova ʼo ʼuhiga mo natou. (Eke. 20:18-21) Kae neʼe fualoa te nofo ʼa Moisese ʼi te moʼuga. ʼE mahino mai neʼe hage kua natou māʼua nonofo ʼi te toafa he ʼe kua puli tonatou takitaki. Kotea ʼae neʼe natou fai? ʼE iloga mai neʼe kua tuku katoa tanatou falala ki te takitaki fakatagata, ia Moisese. Neʼe natou kamata hoha ai, ʼo natou ui fenei kia Alone: “Fai he atua ke haele i omatou mua, koteuhi ko Moisese, te tagata ae nee ina fakamavae matou mai te fenua o Esipito, e mole matou iloi tona aluaga.”—Eke. 32:1, 2.
Koloa Fakalaumalie
Ko He ʼu Puani ʼAoga ʼo Te Tolu Koga Pea Mo Te Fa Koga ʼo Te ʼu Pesalemo
106:36, 37. ʼI te ʼu vaega ʼaeni, ʼe fakapipiki tahi ia te tauhi tamapua pea mo te ʼu fai sakilifisio ki te kau temonio. ʼE ha ʼaki mai, ko he tahi ʼe ina fakaʼaogaʼi he ʼu tamapua ʼe lava fakahalaʼi anai e te kau temonio. ʼE tokoni fenei mai ia te Tohi-Tapu: “Kotou fakamamaʼo mai te ʼu tamapua.”—1 Soane 5:21.
18-24 NOVEPELI
KOLOA ʼO TE TOHI-TAPU PESALEMO 107-108
“Kotou Fakafetaʼi Kia Sehova He ʼe Agalelei”
Ke Fakavikiviki Te Kokelekasio Kia Sehova
2 Ko te kokelekasio ʼe mole fakaʼuhiga pe ki he fakatahi ʼa he kutuga. ʼE mole ko ni hahaʼi peʼe ko he fale ʼe fakatahi ki ai niʼihi he ʼe natou felogoi tahi pe ʼe tatau te ʼu faigaoʼi ʼae ʼe natou manako ki ai. Kae ko te fakatuʼutuʼu ʼuluaki ʼo te kokelekasio moʼo fakavikiviki kia Sehova ʼAtua. Kua fualoa ia te fakatuʼutuʼu ʼaia, ohage ko tona fakaha ʼi te tohi ʼo Pesalemo. Ia Pesalemo 35:18, ʼe tou lau fenei: “E au fakakololia anai koe ʼi te kokelekasio lahi; ʼi te hahaʼi tokolahi ʼe au fakavikiviki anai kia te koe.” ʼO toe feia ia Pesalemo 107:31, 32, ʼe fakalotomalohiʼi fenei tatou: “E! Ke tou fakafetaʼi kia Sehova ʼuhi ko tona lotomanavaʼofa pea mo tana ʼu gaue fakaofoofo ki te ʼu foha ʼo te tagata. Ke natou vikiʼi ia ia ʼi te kokelekasio ʼa te hahaʼi.”
Tou Fakafetaʼi Kia Sehova Pea Mo Maʼu Tapuakina
4 Ke tou taupau tatatou lotofakafetaʼi kia Sehova, ʼe ʼaoga ki ai he ʼu faiga. ʼUluaki, ʼe tonu ke tou manatuʼi ia te ʼu tapuakina ʼae neʼe foaki mai e Sehova kia tatou takitokotahi. ʼOsi ʼaia, ʼe tonu ke tou metitasio ki te ʼu tapuakina ʼaia, ʼae ʼe ha ai ia te ʼofa ʼo te ʼAtua kia tatou. Neʼe toe fai e te tagata faipesalemo ia te faʼahi ʼaia, pea neʼe ʼofolele ki te ʼu meʼa taulekaleka ʼae neʼe fai e Sehova maʼa ia.—Lau ia Pesalemo 40:5; 107:43.
Koloa Fakalaumalie
it-2 303 ¶5
Moape
Ki muli age, ʼi te temi ʼae neʼe hau ai ia Tavite, neʼe toe fetauʼaki ia Iselaele mo Moape. Neʼe liliu ai te kau Moape ko he hahaʼi faifekau ʼa Tavite pea neʼe natou totogi ki ai te tukuhau. ʼE ha mai neʼe matehi te vahe lua ki te tolu ʼo te kau Moape ʼi te ʼosi ʼo te tau. ʼE mahino ia, neʼe fakatakoto e Tavite te kau Moape ki te kele. Pea neʼe ina fuafua natou ke ina iloʼi te ʼu kutuga ʼe lua ʼae ʼe tonu ke matehi pea mo te tahi kutuga ʼae ʼe tonu ke maʼuli. (2Sa 8:2, 11, 12;1Kk 18:2, 11) Neʼe lagi ko te tau ʼaia ʼae neʼe matehi ai “te ʼu foha ʼe lua ʼo Aliele, te tagata Moape,” e Penaia te foha ʼo Seosata. (2Sa 23:20; 1Kk 11:22) ʼI te malo ʼa Tavite ʼi te kau Moape, neʼe hoko ai te lea fakapolofeta ʼae neʼe fakakikite e Palaame kua hili ki ai taʼu ʼe 400 tupu. Neʼe ina ui fenei: “ ʼE haʼu anai he fetuʼu mai ia Sakopo, ʼe malaga anai he tokotoko fakahau mai Iselaele. ʼE ina foaʼi moʼoni anai te laʼe ʼo Moape pea mo te ʼu foʼi ʼulu ʼo te ʼu tagata tau agamalohi fuli.” (Num 24:17) Neʼe toe talanoa pe foki te tagata faipesalemo ki te malo ʼaia ʼi tana ui ʼae neʼe hage ia Moape ki te ʼAtua ko ‘te topu ʼae ʼe maʼanu ai.’—Ps 60:8; 108:9.
25 NOVEPELI–1 TESEPELI
KOLOA ʼO TE TOHI-TAPU PESALEMO 109-112
Kotou Lagolago Kia Sesu Te Hau!
Ko He ʼu Puani ʼAoga ʼo Te Nima Koga ʼo Te ʼu Pesalemo
110:1, 2—Kotea ʼae neʼe fai e te “ ʼAliki [ʼo Tavite],” ko Sesu Kilisito, ʼi te temi ʼae neʼe heka ai ʼi te toʼomataʼu ʼo te ʼAtua? ʼI tona ʼosi fakatuʼuake, neʼe hake ia Sesu ki selo pea neʼe fakatalitali ʼi te toʼomataʼu ʼo te ʼAtua ʼo aʼu ki te 1914 ʼae neʼe kamata ai tana ʼafio Hau. ʼI te temi ʼaia, neʼe pule ia Sesu ki tana kau tisipulo fakanofo, ʼo ina takitaki tanatou faifakamafola pea mo tanatou fai ʼo ni ʼu tisipulo, pea mo teuteuʼi natou ki tanatou gaue ʼae ko te kauga hau mo ia ʼi tona Puleʼaga.—Mateo 24:14; 28:18-20; Luka 22:28-30.
ʼE Mole Malo Anai Te Hahaʼi ʼAe ʼe Natou Tauʼi Te ʼAtua
3 Talu mai te kamata ʼo te 20 sekulo, neʼe tauʼi te hahaʼi ʼa Sehova. ʼE lahi te ʼu fenua, neʼe faigaʼi ai e te hahaʼi agakovi ke natou taʼofi ʼei, ke natou fakalologo te kalagaʼi ʼo te logo lelei ʼo ʼuhiga mo te Puleʼaga ʼo te ʼAtua. ʼE ʼeke natou e totatou Fili tafito, te Tevolo, ʼae ʼe “hage ko he laione ʼe gugulu, ʼe fealuʼaki ʼo kumi he tahi ke ina kai.” (1 Petelo 5:8) ʼI te fakaʼosi ʼo “te temi ʼo te ʼu puleaga” ʼi te taʼu 1914, neʼe fakanofo e te ʼAtua tona ʼAlo ko te Hau foʼou ʼo te kele, ʼo ina fakatotonu fenei age: “Alu ʼo pule ʼi te lotolotoiga ʼo tou ʼu fili.” (Luka 21:24; Pesalemo 110:2) Neʼe fakaʼaogaʼi e Kilisito tona malohi moʼo kapu ia Satana mai te lagi, pea neʼe ina taʼofi ia ia ke nofo maʼu ʼi te ʼu tafaʼaki ʼo te kele. ʼI tana ʼiloʼi ʼae kua nounou tona temi, ʼe ita kovi te Tevolo ki te kau Kilisitiano fakanofo pea mo tonatou ʼu kauga gaue. (Fakaha 12:9, 17) Neʼe kotea te ʼu fua ʼo te ʼu fakafeagai ʼa natou ʼaia neʼe natou tauʼi te ʼAtua?
be 76 ¶2
Ke Kotou Tuputupu
Ka uga tatou ke tou fakaʼaogaʼi ʼotatou fealagia, ʼe toe uga ai tatou ke tou fai ni fakatuʼutuʼu. ʼE kotou fakatuʼutuʼu koa ke kotou faifakamafola mo ʼihi? ʼE kotou kumi koa ni faigamalie ke kotou tokoni ki ʼihi ʼo te kokelekasio ʼae ʼe kei foʼofoʼou, tupulaga peʼe maʼimoa? ʼE kotou lotolelei koa ke kotou fakamaʼa te Fale Fono peʼe ke kotou fai he gaue pe ʼi te ʼu fakatahi lalahi? ʼE feala koa ke kotou pionie vaeluaʼi temi? ʼE feala koa ke kotou pionie katoa peʼe ke kotou kau ki he kokelekasio ʼe ʼaoga ki ai he tokoni? Kapau ko koe ko he tehina, ʼe ke faigaʼi koa ke ke mulimuli ki te ʼu fakamaʼua Fakatohi–tapu ʼae ʼe ʼaoga ke ke liliu ai ko he faifekau fakaminisitelio peʼe tagata ʼafeā? Kapau ʼe kotou lotolelei ʼo tokoni pea mo fakahoko he ʼu maʼua ʼe kotou fakaha ai kua kotou tuputupu.—Pes. 110:3.
Koloa Fakalaumalie
it-1 80 ¶4
Fuakava
Ko He Fuakava Ke Ke Liliu Ko He Pelepitelo Ohage Ko Melekiseteke. ʼE talanoa ia Pesalemo 110:4 ki te fuakava ʼaia, pea ʼe fakaʼuhiga kia Kilisito e ia ʼae neʼe ina tohi te tohi ʼo Hepeleo. (7:1-3, 15-17) Neʼe fai pe e Sehova ia te fuakava ʼaia mo Sesu Kilisito. ʼE mahino ia, neʼe talanoa ki ai ia Sesu ʼi tana fai he fuakava ki he puleʼaga mo ʼana tisipulo. (Luk 22:29) Neʼe fakapapau e Sehova ʼe liliu anai ia Sesu Kilisito te ʼAlo ʼo te ʼAtua, ko he pelepitelo ohage ko Melekiseteke. Ko Melekiseteke neʼe ko te hau pea mo pelepitelo ʼa te ʼAtua ʼi te kele. ʼE liliu anai ia Sesu ko he Hau pea mo Pelepitelo Lahi ʼi te lagi kae mole ʼi te kele. Neʼe fakanofo ia ia ki te tuʼulaga ʼaia ʼo talu ai hili tana hake ki selo. (Hep 6:20; 7:26, 28; 8:1) ʼE tuʼu anai te fuakava ʼaia ʼo talu ai, koteʼuhi ʼi te takitaki ʼa Sehova, ʼe Hau anai ia Sesu pea mo Pelepitelo Lahi ki te heʼe gata.—Hep 7:3.
2-8 TESEPELI
KOLOA ʼO TE TOHI-TAPU PESALEMO 113-118
Kotea ʼAe ʼe Feala Ke Tou Liufaki Kia Sehova?
Ke Lagalagaʼi Tatou e Te ʼOfa
13 ʼI te ʼu palalau ʼa Sesu, ʼe mahino lelei mai, ko te potu tafito ʼe tonu ke tou ʼofa kia Sehova. Kae neʼe mole tou tutupu ake ʼaki he ʼofa katoa kia Sehova. ʼE ko he meʼa ʼe tonu ke tou fakatuputupu. ʼI tatatou ʼuluaki logo ʼo ʼuhiga mo ia, neʼe tou ʼofa ki ai ʼuhi ko te ʼu meʼa ʼae neʼe tou logo ki ai. ʼAki te temi, neʼe tou ako tana faʼahiga teuteuʼi ʼo te kele maʼa te hahaʼi. (Senesi 2:5-23) Neʼe tou ako ai pe neʼe feafeaʼi tana ʼu faʼahiga felogoi mo te hahaʼi, ʼo mole lituʼa kia tatou ʼi te ʼuluaki hu ʼo te agahala ki te maʼuli ʼa te tagata, kae neʼe ina fai te ʼu fakatuʼutuʼu moʼo totogi ʼo tatou. (Senesi 3:1-5, 15) Neʼe felogoi lelei mo natou ʼae neʼe agatonu, pea hoko ai mo tana momoli ifo tona ʼAlo ʼulu tokotahi moʼo fakamolemole ʼo totatou ʼu agahala. (Soane 3:16, 36) Ko tatatou mahino lahi ki te ʼu meʼa ʼaia neʼe ina fakatuputupu ai totatou ʼofa kia Sehova. (Esaia 25:1) Neʼe ui e te Hau ko Tavite neʼe ʼofa kia Sehova ʼuhi ko Tana agaʼofa kia ia. (Pesalemo 116:1-9) ʼI te temi nei, ʼe taupau tatou e Sehova, mo takitaki tatou, mo fakamaohiʼi tatou, pea mo fakalotomalohiʼi tatou. Ka lahi te ʼu meʼa ʼae ʼe tou ako ʼo ʼuhiga mo ia, pea ʼe lesili ai totatou ʼofa mamahi kia te ia.—Pesalemo 31:23; Sofoni 3:17; Loma 8:28.
w09 15/7 29 ¶4-5
Kotou Tali ʼAki He Lotolelei, Kotou Foaki ʼAki Tokotou Loto Katoa
Neʼe feuiʼaki fenei te tagata faipesalemo: “Kotea ʼae ʼe feala ke au liufaki kia Sehova kia meʼa lelei fuli ʼae neʼe ina fai maʼaku?” (Pes. 116:12) Kotea te ʼu “meʼa lelei” ʼae neʼe ina maʼu? Neʼe lagolago ki ai te ʼAtua ʼi te ʼu temi ʼae neʼe “lotohoha mo lotomamahi” ai. Pea neʼe “haofaki [ia ia] mai te mate” e Sehova. Koia neʼe fia foaki ai e te tagata faipesalemo ia he meʼa kia Sehova. Kotea koa ʼae neʼe feala ke ina faoki? Neʼe ina ui: “ ʼE au fakahoko anai te ʼu fakapapau ʼae neʼe au fai kia Sehova.” (Pes. 116:3, 4, 8, 10-14) Neʼe fakatotonu ai e te tagata faipesalemo ke ina fakahoko ʼana fakapapau fuli ʼae neʼe ina fai kia Sehova. Neʼe ina toe fai feia ki ʼona maʼua fuli ʼae kia te ia.
Kae ʼe feafeaʼi kia koutou? ʼE feafeaʼi hakotou liufaki ia meʼa lelei fuli neʼe fai e Sehova maʼa koutou? ʼAki takotou mulimuli ki te ʼu lao mo te ʼu pelesepeto ʼa te ʼAtua ia aluʼaga fuli ʼo tokotou maʼuli. Kotou vakaʼi foki pe takimuʼa te tauhi ʼae kia Sehova ʼi tokotou maʼuli. Pea kotou tuku ke takitaki koutou e te laumalie ʼa te ʼAtua ia meʼa fuli ʼae ʼe kotou fai. (Ekl. 12:13; Kal. 5:16-18) ʼE moʼoni, ʼe mole feala anai ke kotou liufaki ia meʼa fuli ʼae neʼe fai e Sehova maʼa koutou. Kae ʼe feala ke kotou fakafiafiaʼi ia Sehova ʼo kotou tauhi kia te ia ʼaki tokotou loto katoa. (Taag. 27:11) ʼE mahino ia, ko he toe pilivilesio tatatou fakafiafiaʼi ia te ʼAtua.
Te ʼu Ako Mai Te Tohi ʼo Levitiko
9 Ako lua: ʼE tou tauhi kia Sehova koteʼuhi ʼe tou lotofakafetaʼi kia te ia. ʼE tou ako anai te manatu ʼaia ʼaki tatatou vakaʼi te ʼu sakilifisio fakafetaʼi peʼe ʼo te tokalelei ʼae neʼe fai e te kau Iselaele. ʼI te tohi ʼo Levitiko, ʼe tou mahino ai neʼe feala ke momoli e he tagata Iselaele he sakilifisio ʼo te tokalelei moʼo fakaha tana lotofakafetaʼi. (Lev. 7:11-13, 16-18) Neʼe mole ina fai te molaga ʼaia ʼuhi pe he neʼe ko tona maʼua, kae neʼe lotolelei ki ai. Neʼe ko he molaga neʼe ina momoli ʼi tona lotolelei, koteʼuhi neʼe ʼofa ʼi tona ʼAtua ʼae ko Sehova. Pea ko te kanoʼi manu ʼo te manu ʼae neʼe sakilifisioʼi, neʼe kai e te kau pelepitelo, mo ia ʼae neʼe ina fai te sakilifisio pea mo tona famili. Kae ko ʼihi koga ʼo te manu ʼae neʼe sakilifisioʼi, neʼe momoli ʼateaina pe kia Sehova. Kotea te ʼu koga ʼaia?
10 Ako tolu: ʼE tou foaki te ʼu meʼa ʼae ʼe lelei tukupau kia Sehova, koteʼuhi ʼe tou ʼoʼofa kia te ia. Ko te gako ʼo he manu, neʼe ko he koga lelei tukupau ʼaia kia Sehova. Neʼe ui e Sehova, ʼe toe maʼuhiga kia ia ʼihi atu koga ʼo te manu, ʼo kau ai te ʼu ifiifi. (Lau ia Levitiko 3:6, 12, 14-16.) Koia ʼae neʼe leleiʼia tafito e Sehova moka foaki e he tagata Iselaele ʼi tona lotolelei te ʼu koga ʼaia pea mo te gako kia te ia. Ka momoli e he tagata Iselaele he molaga feia, ʼe ina fakaha tana fia foaki te meʼa ʼae ʼe lelei tukupau ki te ʼAtua. ʼO toe feia pe mo Sesu, neʼe ina foaki kia Sehova te ʼu meʼa ʼae ʼe lelei tukupau. Neʼe ina fai te faʼahi ʼaia ʼaki tana tauhi kia Sehova ʼi tona loto katoa, koteʼuhi neʼe ʼofa ia te ia. (Soa. 14:31) Neʼe fiafia ia Sesu ʼi te fai ʼo te finegalo ʼo te ʼAtua, pea neʼe ʼofa mamahi ki tana lao. (Pes. 40:8) ʼE mahino papau ia, neʼe fiafia lahi ia Sehova ʼi tana sio ʼae ʼe tauhi age ia Sesu kia te ia ʼaki he lotolelei.
11 Ko tatatou tauhi ʼae kia Sehova ʼe hage pe ko te ʼu sakilifisio fakafetaʼi ʼaia, he ʼe tou fakaha ai te ʼu meʼa ʼae ʼe tou logoʼi ʼi totatou loto ʼo ʼuhiga mo ia. ʼE tou foaki te ʼu meʼa ʼae ʼe lelei tukupau kia Sehova, koteʼuhi ʼe tou ʼoʼofa kia te ia ʼi totatou loto katoa. ʼE mahino ia, ʼe fiafia lahi ia Sehova ʼi tana sio ʼae ʼe lotolelei te toko lauʼi miliona hahaʼi ke natou tauhi kia te ia. Pea ʼe natou fai te faʼahi ʼaia, koteʼuhi ʼe natou ʼoʼofa kia te ia pea mo ʼana lao. ʼE sio ia Sehova pea mo ina leleiʼia te ʼu meʼa ʼae ʼe tou fai, kae ʼe mole gata ai. ʼE toe mahino foki pe kotea ʼae ʼe ina uga tatou ke tou fai te ʼu meʼa ʼaia. Pea ʼe ko he faʼahi ʼe fakalotofimalie kia tatou. Ohage la, ʼe lagi kua kotou vaivai matuʼa, ʼo mole kei feala hakotou fai te ʼu meʼa ʼae ʼe kotou loto ki ai. Kae ʼe tonu ke kotou tui papau, ʼe mahino Sehova ki ʼokotou tuʼakoi. ʼE lagi kotou manatu ʼe mole kei feala hakotou gaue lahi maʼa Sehova. Kae ʼe sio Sehova ki tokotou loto, ki tokotou ʼofa ʼae ʼe ina uga ke kotou fai te ʼu meʼa ʼae ʼe kotou lavaʼi. ʼE fiafia ia Sehova pea ʼe ina tali te ʼu meʼa lelei tukupau ʼae ʼe feala ke kotou foaki age kia te ia.
Koloa Fakalaumalie
Te ʼu Fehuʼi ʼa Te Kau Lautohi
Neʼe hiva fenei ia te tagata faipesalemo: “E maʼuhiga ʼosi kia mata ʼo te Eteleno, te mate ʼo natou ʼae ʼe ʼoʼofa kia ia.” (Pes. 116:15) ʼE maʼuhiga kia Sehova ia te maʼuli ʼo te hahaʼi ʼae ʼe tauhi kia te ia. Koia ia Pesalemo 116 ʼe mole fakaʼuhiga pe ia ki te mate ʼo he foʼi tokotahi.
Ka fai he akonaki ʼi he ʼavaifo ʼo he tehina peʼe ko he tuagaʼane, ʼe mole ʼaoga anai ke tou fakaʼaogaʼi ia te vaega ʼo Pesalemo 116:15 logo la neʼe mate agatonu. Kotea tona tupuʼaga? Koteʼuhi ko te faʼahi ʼa neʼe talanoa ki ai ia te tagata faipesalemo, ʼe lahi ʼona fakaʼuhiga. ʼE feala ke fakaʼuhiga ʼe mole fakafealagia anai e te ʼAtua ke mate ia tana kau agatonu fuli ʼae ʼe maʼuhiga kia te ia.—Vakaʼi ia Pesalemo 72:14; 116:8.
9-15 TESEPELI
KOLOA ʼO TE TOHI-TAPU PESALEMO 119:1-56
“ ʼE Taupau Feafeaʼi Anai e He Tupulaga Ke Maʼa Tona Ala?”
w87 1/11 18 ¶10
ʼE Kotou Nofo Maʼa Koa ʼi Te ʼu Faʼahi Fuli?
10 Ia Efeso 5:5, neʼe fakatokaga fenei mai ia Paulo: “Koteʼuhi ʼe kotou iloʼi pea mo mahino ki te faʼahi ʼaeni: Ko he tahi ʼe ina fai he ʼu felaveʼi fakasino heʼe ʼaoga, peʼe aga heʼe maʼa peʼe ina maʼu he ʼu holi fakavale, ʼae ko he tahi ʼe tauhi taula ʼatua, ʼe mole ina maʼu anai te Puleʼaga ʼo Kilisito pea mo te ʼAtua.” Kae ʼi te taʼu fuli, ko te toko lauʼi afe tehina mo tuagaʼane neʼe fakatonutonuʼi peʼe fakamavae koteʼuhi neʼe natou fai he ʼu aga heʼe ʼaoga, ko tona fakaʼuhiga neʼe natou ‘agahala ki tonatou sino totonu.’ (1 Kolonito 6:18) Ko te tokolahi neʼe agahala he neʼe mole natou ‘nofo tokaga ʼo mulimuli ki te folafola ʼa te ʼAtua.’ (Pesalemo 119:9) Ohage la, ʼe kaugamalie ia natou ʼae neʼe mole kei natou tokagaʼi te ʼu pelesepeto ʼa te ʼAtua moka ʼe natou olo ʼo malolo. ʼE natou to fono pea ʼe natou fakakaumeʼa mo ʼihi neʼe toe olo ʼo malolo kae ʼe mole tauhi kia Sehova. Ki ʼihi tehina mo tuagaʼane, ko te hahaʼi ʼaia neʼe agalelei, koia ʼae neʼe natou fai ai mo natou he ʼu gaue ʼe lagi mole lelei. ʼE toe feia pe, neʼe kua faʼifaʼitaliha ʼosi ʼihi mo ʼonatou kauga gaue. Ohage la, neʼe fakakaumeʼa te tagata ʼafeā mo tona kauga gaue pea ki muli age, neʼe ina liʼaki tona kiʼi famili kae alu ʼo maʼuli mo te fafine ʼaia. Neʼe fakamavae leva te tagata ʼafeā ʼaia. Koia ʼe tou fakamoʼoni ai ki te ʼu folafola ʼaeni ʼi te Tohi-Tapu: “Ko te ʼu fakakaugā kovi ʼe ina maumauʼi te ʼu agamahani ʼae ʼe lelei”!—1 Kolonito 15:33.
“ ʼE Au Pipiki Ki Tau ʼu Fakamanatu”
ʼE FOAKI e Sehova te ʼu fakamanatu ki tana hahaʼi moʼo tokoni kia natou ke natou tauʼi te ʼu fihifihia ʼo te ʼu temi faigataʼa ʼaeni. ʼE tou maʼu te ʼu fakamanatu ʼaia moka tou lau takitokotahi ia te Tohi-Tapu, pea ʼe tou logo ki te tahi ʼu fakamanatu ʼi te ʼu akonaki peʼe ʼi te ʼu tali ʼae ʼe fai ʼi te ʼu fono. Ko te ʼu manatu ʼae ʼe tou lau peʼe tou logo ki ai ʼi te ʼu lakaga ʼaia, ʼe mole ko he ʼu manatu foʼou kia tatou. Neʼe lagi kua tou talanoa ki te ʼu fakamanatu ʼaia ʼi muʼa atu. Kae mai tona aluʼaga ʼae ʼe tou loto galogalo, koia ʼae ʼe ʼaoga ke fakamanatuʼi tuʼumaʼu mai kia tatou te ʼu fakatuʼutuʼu ʼa Sehova, tana ʼu lao, pea mo tana ʼu fakatotonu. ʼE tonu ke tou lotofakafetaʼi ʼo ʼuhiga mo te ʼu fakamanatu ʼa te ʼAtua. ʼE natou fakalotomalohiʼi tatou ʼo tokoni mai ke tou manatuʼi tafito te ʼu tupuʼaga ʼae ʼe natou uga ai tatou ke tou mulimuli ki te finegalo ʼo te ʼAtua ʼi totatou maʼuli. Koia neʼe hiva fenei te tagata faipesalemo kia Sehova: “ ʼE au pipiki ki tau ʼu fakamanatu.”—Pesalemo 119:24.
Leʼei Kehe ʼOkotou Mata Mai Te ʼu Meʼa ʼAe ʼe Vaʼiganoa!
2 Kae ko te ʼu meʼa ʼae ʼe tou sio ki ai, ʼe feala pe ke toe fua kovi kia tatou. ʼI te malohi ʼae ʼo te felogoi ʼo totatou ʼu mata pea mo totatou ʼatamai, koia ko te ʼu meʼa ʼae ʼe tou sio ki ai ʼe feala ke natou uga peʼe ke natou fakaʼasili he ʼu holi ʼi totatou loto. Pea mai tona aluʼaga ʼae ʼe tou maʼuʼuli ʼi te malama ʼe tahi manatu pe te hahaʼi kia natou totonu pea ʼe puleʼi e Satana te Tevolo, ʼi te temi fuli pe ʼe tou sisio ai ki te ʼu pāki pea mo logo ki te ʼu logo, ʼe feala aipe ke tou higa, tatau aipe pe ʼe tou sio fakavilivili ki te ʼu meʼa ʼaia. (1 Soa. 5:19) Koia ʼe mole tou punamaʼuli ai, ki te kole ʼaeni neʼe fai e te tagata faipesalemo ki te ʼAtua: “Leʼei kehe ʼoku mata ke ʼaua naʼa sio ki te meʼa ʼae ʼe vaʼiganoa; puipui ia au ʼi tou ala.”—Pes. 119:37.
Koloa Fakalaumalie
Tou Falala Ki Te Folafola ʼa Sehova
2 ʼE talanoa tafito ʼi te Pesalemo 119 ki te maʼuhiga ʼo te folafola peʼe ko te logo ʼa te ʼAtua. Ke feala hana manatuʼi te ʼu folafola ʼaia, neʼe tohi e te tagata faipesalemo he hiva ʼaki te ʼu mataʼi tohi ʼo te matuʼa lea. Ko te ʼu vaega ʼe 176 ʼe mulimuli ki te ʼu mataʼi tohi ʼo te matuʼa lea Fakahepeleo. ʼI te Fakahepeleo ʼafea, ʼe maʼu ʼi te ʼu taʼaga hiva takitahi ʼe 22 ʼo te pesalemo, te ʼu vaega ʼe 8 ʼe kamata ʼaki te mataʼi tohi ʼe tatau. ʼE talanoa te pesalemo ʼaia ki te folafola ʼa te ʼAtua, tana ʼu lao, tana ʼu fakamanatu, tona ʼu kalitate, tana ʼu fakatotonu, tana ʼu lekula, pea mo tana ʼu tonu faifakamau. ʼI te alatike ʼaeni pea mo ʼae ka hoko mai, ʼe tou palalau anai ʼo ʼuhiga mo te Pesalemo 119 ʼo mulimuli ki te fakaliliu totonu ʼo te Tohi-Tapu Fakahepeleo. Ko tatatou metitasio ki te ʼu meʼa ʼae neʼe hoko ki te ʼu kaugana ʼa Sehova ʼo te temi muʼa pea mo totatou temi, ʼe ina fakatuputupu anai tatatou mahino ki te hiva ʼaia pea mo tatatou lotofakafetaʼi ki te Folafola ʼa te ʼAtua, ia te Tohi-Tapu.
16-22 TESEPELI
KOLOA ʼO TE TOHI-TAPU PESALEMO 119:57-120
ʼE Feafeaʼi Hatatou ʼUtakiʼi Te ʼu ʼAhiʼahi?
“ ʼE Au ʼOfa ʼAupito Ki Tau Lao!”
2 ʼE tonu ke kotou fai te fehuʼi ʼaeni: “Neʼe lava maʼu feafeaʼi e te tagata faipesalemo he lotofimalie ʼi te lao ʼa te ʼAtua?” Neʼe lotomalohi he neʼe falala ʼe tokaga ia Sehova kia ia. Neʼe fiafia te tagata faipesalemo ʼi tana iloʼi ia te ʼu fakatuʼutuʼu fonu ʼi te ʼofa ʼa te lao ʼaia, logo la te ʼu fihifihia ʼae neʼe tau mo ia ʼuhi ko tona ʼu fili. Neʼe ina iloʼi neʼe agalelei ia Sehova kia ia. Tahi ʼae meʼa, ʼi tana mulimuli ki te takitaki ʼa te lao ʼa te ʼAtua, neʼe liliu ai te tagata faipesalemo ʼo poto age ʼi tona ʼu fili pea mo haofaki ai ia ia. ʼI tana fakalogo ki te lao, neʼe ina maʼu ai te tokalelei pea mo he leʼo ʼo loto ʼe lelei.—Pesalemo 119:1, 9, 65, 93, 98, 165.
ʼE Kotou Manako Lahi Koa Ki Te ʼu Fakamanatu ʼa Sehova?
3 Ko te ʼu fakamanatu ʼa te ʼAtua neʼe maʼuhiga ʼaupito ki te tagata faipesalemo, ʼae neʼe hiva fenei: “Neʼe ʼau fakavilivili, pea neʼe mole au tuai moʼo taupau tau ʼu fakatotonu. Ko te ʼu maea ʼo te kau agakovi neʼe natou haʼihaʼi ʼau. Neʼe mole ʼau galoʼi tau lao.” (Pesalemo 119:60, 61) Ko te ʼu fakamanatu ʼa Sehova ʼe tokoni mai kia tatou ke tou katakiʼi te ʼu fakataga, he ʼe tou falala ʼe feala ki tatatou Tamai ʼae ʼi selo ke ina tuʼusi te ʼu maea ʼae ʼe haʼi ʼaki tatou e totatou ʼu fili. ʼI tona temi tonu, ʼe ina fakaʼateainaʼi tatou mai te ʼu fakafeagai ʼaia, ke feala ai hatatou fakahoko te gaue ʼae ko te fakamafola te Puleʼaga.—Maleko 13:10.
Ko He ʼu Puani ʼAoga ʼo Te Nima Koga ʼo Te ʼu Pesalemo
119:71—Kotea ʼae ʼe feala ke fua lelei ʼuhi ko te mamahi? Ka hoko ni ʼu fakataga kia tatou, pea ʼe feala ke lahi age tatatou falala ʼae kia Sehova, pea mo fakamalotoloto age tatatou ʼu faikole ʼae kia te ia, pea mo lahi age tatatou ako ia te Tohi-Tapu pea mo maʼuliʼi te ʼu meʼa ʼae ʼe tou ako. Tahi ʼae, ʼe tou fakaha ʼi tatatou ʼutakiʼi ʼae ʼo totatou ʼu mamahi, ʼe feala ke tou lolomi totatou ʼuhiga agahala. Kapau ʼe tou maʼu he ako mai te ʼu mamahi ʼae ʼe tau mo tatou, pea ʼe mole liliu anai ko he faʼahi ʼe fakatupu mafasia kia tatou.
“Kotou Fetagihi Mo Natou ʼAe ʼe Fetagihi”
3 Ko tatatou Tamai manavaʼofa ko Sehova, ʼe ina foaki mai te fakalotofimalie ʼae ʼe ʼaoga kia tatou. (Lau ia 2 Kolonito 1:3, 4.) Ko te faʼifaʼitaki lelei tukupau ia ʼo te lotomahino, pea ʼe ina fakapapau fenei ki tana hahaʼi: “Ko au totonu ʼae ʼe au fakalotofimalieʼi ia koutou.”—Esa. 51:12; Pes. 119:50, 52, 76.
5 ʼE tou iloʼi papau ʼe tokoni mai anai ia Sehova kia tatou. Koia ʼae ʼe tonu ai ke tou faikole tuʼumaʼu mo faʼifaʼitaliha kia te ia. Tou fakaha kia te ia te lotomamahi ʼaupito ʼae ʼe tou logoʼi. Ko tatatou iloʼi ʼae ʼe mahino ia Sehova ki te ʼu meʼa ʼe tou logoʼi, ʼe ko he meʼa fakalotofimalie ia. Pea ʼe ina foaki mai te fakalotofimalie ʼae ʼe ʼaoga kia tatou. Kae ʼe ina fakahoko feafeaʼi te faʼahi ʼaia?
Koloa Fakalaumalie
Ko He ʼu Puani ʼAoga ʼo Te Nima Koga ʼo Te ʼu Pesalemo
119:96—Kotea te fakaʼuhiga ʼo te ui ʼae ‘ ʼe ʼi ai te gataʼaga ʼo te ʼu meʼa fuli ʼae ʼe katoa’? ʼE palalau te tagata fai pesalemo ʼo ʼuhiga mo te manatu ʼaē ʼe maʼu e he tagata ki he meʼa ʼe kātoa. Lagi neʼe ina ʼiloʼi ko te meʼa ʼaē ʼe kātoa ki te tagata ʼe faka tuʼakoi. Kae ko te fakatotonu ʼa te ʼAtua ʼe mole feiā ia. Ko tana takitaki ʼe ʼaoga kiā tatou ʼi te ʼu faʼahi fuli ʼo totatou maʼuli. ʼE ʼui fēnei ʼi te New International Version: “ ʼE au sio ʼe tuʼakoi te ʼu gāue fuli ʼaē ʼe ʼui ʼe kātoa, kae ko tau ʼu folafola ʼe mole hona gataʼaga.”
23-29 TESEPELI
KOLOA ʼO TE TOHI-TAPU PESALEMO 119:121-176
Kotea ʼAe ʼe Tonu Ke Tou Fai Ke Mole Tou Lotomamahi Ai?
Ke Akoʼi ʼOkotou Leʼo ʼo Loto ʼAki Te ʼu Lao Pea Mo Te ʼu Pelesepeto ʼa Te ʼAtua
5 Kapau ʼe tou loto ke ʼaoga mai te ʼu lao ʼa ʼAtua, ʼe mole gata ʼaki pe tatatou lau peʼe ko tatatou iloʼi te ʼu lao ʼaia. ʼE tonu ke tou leleiʼia pea mo fakaʼapaʼapa ki ai. ʼE ui fenei ʼi te Tohi-Tapu: “Koutou fehia ki te kovi pea koutou oofa ki te lelei.” (Amos 5:15) ʼE tou fai feafeaʼi te faʼahi ʼaia? ʼE tonu ke tou maʼu te faʼahiga sio mo te faʼahiga manatu ʼa Sehova. Tou fakakaukauʼi te aluʼaga ʼaeni. Ohage la ʼe mole kotou moe lelei, pea ʼe ui atu e te toketa ke kotou tokaga ki takotou faʼahiga kai, ke kotou fai gaoʼi, pea mo fetogi tokotou faʼahiga maʼuli. ʼE kotou muliʼi lelei ʼana tokoni pea ʼe fua lelei kia koutou. Kotea takotou manatu ʼo ʼuhiga mo te ʼu tokoni ʼa te toketa ʼaia.
6 ʼE toe feia pe, neʼe tuku mai e totatou Tupuʼaga te ʼu lao moʼo puipui ʼaki ʼo tatou mai te ʼu nunuʼa ʼo te agahala pea ke hikihiki ai totatou faʼahiga maʼuli. Ohage la, ʼe akoʼi mai ʼi te Tohi-Tapu ʼe mole tonu ke tou loi, ke tou faikaka, ke tou kaihaʼa, ke tou fai he ʼu aga heʼe ʼaoga, ke tou aga malohi, peʼe ke tou fai he ʼu meʼa fakamanamana. (Lau ia Taʼaga Lea 6:16-19; Fkha. 21:8) Ka tou fakalogo kia Sehova pea tou sio ki ʼona fua lelei, ʼe hikihiki anai totatou ʼofa ʼae kia te ia pea mo ʼana lao.
ʼU Tupulaga: Kotea Koa ʼAe ʼe Kotou Kumi?
12 Ko te meʼa ʼae ʼe maʼuhiga tafito, ʼe tonu ke kotou ako te fehiʼa, pea mo fakalialia ki te meʼa ʼae ʼe kovi. (Pesalemo 97:10) ʼE feafeaʼi hakotou fehiʼa ki he meʼa ʼe hage ʼi tona kamata ʼe ko he meʼa fakagaoʼi peʼe matalelei? ʼI hakotou manatuʼi tona ʼu ikuʼaga! “ ʼAua naʼa kotou faihala: ʼE mole feala ke kakaʼi te ʼAtua. ʼIo, ko te meʼa ʼae ʼe to e te tagata, koia pe anai ka ina utu ake. Koteʼuhi ko te meʼa ʼae ʼe to e te tagata ʼi te aluʼaga ʼo te kakano ʼe ina utu anai ʼi te kakano te malaʼia.” (Kalate 6:7, 8) ʼI te temi ʼae ʼe kotou holi ai ki te fakahala, kotou fakakaukauʼi te kavega mamafa ʼae: Ko he tahi ʼe higa ki te felaveʼi fakasino ʼe ina fakaloto mamahi anai ia Sehova ʼAtua. (Vakaʼi ia Pesalemo 78:41.) Kotou toe manatuʼi ia hakotou maʼu he tamasiʼi neʼe mole kotou loto ki ai peʼe ko he mahaki, ohage la ko te SITA. Kotou fakatokagaʼi te lotomamahi ʼae ka kotou maʼu pea mo te matagafua ʼae ʼe tau anai mo koutou. ʼE feala pe ke hoko mo he ʼu ikuʼaga fualoa. Neʼe fakaha e te fafine Klisitiano, ʼo fenei: “Ko toku ʼohoana pea mo au neʼe kua ma iloʼi te felaveʼi fakasino ʼi muʼa ʼo tamā ʼohoana. Logo pe la ko maua ko te ʼu Kilisitiano ʼi te temi nei, ko toma maʼuli ʼafea takitokotahi ʼe ko he matapuna fakafihi feia aipe mo te fuaʼa ʼi tamā nofo ʼohoana.” ʼI tona ʼu aluʼaga fuli ko te mole tokagaʼi te ʼu tokoni ʼa te ʼAtua, ʼe toʼo tokotou ʼu pilivilesio fakateokalatike peʼe feala pe ke fakamavae koutou ʼi te kokelekasi! (1 Kolonito 5:9-13) ʼE ko te fakafimalie fakatemi ʼaia ʼe tau koa mo te totogi mamafa ʼaia?
Koloa Fakalaumalie
Ke Ke Tui Papau Ko Te Folafola ʼa Te ʼAtua “ ʼe Moʼoni”
2Ko tatou ʼae ʼe tauhi kia Sehova ʼe tou tui papau ko ia “te ʼAtua ʼo te moʼoni” pea ʼe ina loto tuʼumaʼu pe ke fua lelei ia meʼa fuli kia tatou. (Pes. 31:5; Esa. 48:17) ʼE tou iloʼi ʼe feala ke tou falala ki te ʼu meʼa ʼae ʼe tou lau ʼi te Tohi-Tapu. ʼE tou tui “ ʼe moʼoni [te] folafola katoa” ʼa te ʼAtua.” (Lau ia Pesalemo 119:160.) ʼE tou manatu tahi mo te ui ʼa te tagata sivi Tohi-Tapu: “ ʼE mole he meʼa ʼe ui e te ʼAtua ʼe loi peʼe mole hala anai mo fakahoko. ʼE feala ki ʼana kaugana ke natou falala ki te ʼu faʼahi ʼae ʼe ina ui, he ʼe natou falala ki te ʼAtua ʼae neʼe ina ui.
30 TESEPELI–5 SANUALIO
KOLOA ʼO TE TOHI-TAPU PESALEMO 120-126
Neʼe Natou Nunusi ʼAki Ni Loʼimata, Kae Neʼe Natou Utu ʼAki Ni Kalaga Fakafiafia
Ke Tapuakina Ia Natou ʼAe ʼe Natou Fakakololiaʼi Te ʼAtua
10 ʼE tou tauʼi ia Satana, mo kapau ʼe tou tali te ʼakau ʼamo, ʼae ko te ʼuhiga tisipulo ʼa Sesu. ʼE fakapapau fenei ia Sakopo 4:7: “Kotou fakafehagai ki te temonio pea ʼe hola mamaʼo anai maia koutou.” ʼE mole ui ai leva ʼe faigafua te faʼahi ʼaia. Ko te tauhi ki te ʼAtua ʼe fakamaʼua ki ai he ʼu faiga lahi. (Luka 13:24) Kae ʼe fai e te Tohi-Tapu te fakapapau ʼaeni ia Pesalemo 126:5: “Ko natou ʼae ʼe natou to ʼaki te ʼu loʼimata ʼe natou utu anai ʼaki he kalaga fakafiafia.” ʼE tou tauhi ki he ʼAtua ʼe lotofakafetaʼi. “E ina fakapale natou ʼe natou kumi ia ia,” pea ʼe ina tapuakina ia natou ʼae ʼe natou fakakoloa kia te ia.—Hepeleo 11:6.
ʼE Malohi Anai Koa Tau Tui?
17 Neʼe kua mate koa he tahi ʼe ke ʼofa ai? Kapau koia, ke ke lau te ʼu fakamatala ʼi te Tohi-Tapu ke fakamalohiʼi ai tau tui ki te ʼamanaki ʼo te fakatuʼuake. ʼE ke lotomamahi koa moka fakamavae he tahi ʼo tou famili? ʼE mahino ia, koia ke ke ako te Folafola ke ke mahino ai ʼe lelei tuʼumaʼu te fakatonutonu ʼa te ʼAtua. Kotea pe he aluʼaga ʼe ke tau mo ia, kae ʼe ko he faigamalie ʼaia ke fakamalohiʼi tau tui. Fakaha kia Sehova te meʼa ʼae ʼi tou loto. ʼAua tau nofo tokotahi, kae ke ke fakatahi tuʼumaʼu mo ʼou tehina mo tuagaʼane. (Taag. 18:1) Ke ke fai he ʼu gaue ʼe tokoni atu ke ke faʼa kataki, tatau aipe pe ʼe ke tagi he ʼe ke manatuʼi te aluʼaga ʼae neʼe hoko kia koe. (Pes. 126:5, 6) Ke ke kau tuʼumaʼu ki te ʼu fono, mo te faifakamafola pea mo lau te Tohi Tapu. Pea ke ke fakakaukauʼi te ʼu tapuakina ʼe fakapapauʼi atu e Sehova. Ka ke tokagaʼi tana faʼahiga tokoni atu, pea ʼe toe malohi age anai tau tui kia te ia.
Tou Faʼa Kataki ʼi Te Gaue ʼo Te Taʼukai!
13 ʼE fakalotomalohi ʼaupito ki te kau gaue ʼo te taʼukai ʼa te ʼAtua, kae tafito ia natou ʼae ʼe mamahi ʼi te fakataga, ia te ʼu palalau ʼae ia Pesalemo 126:5, 6: “Ko natou ʼae ʼe natou to ʼaki te ʼu loʼimata ʼe natou utu anai ʼaki he kalaga fakafiafia. Ko ia ʼae ʼe alu ki tuʼa, maʼia pe ʼe tagi, ʼo ina ʼamo te taga ʼe fonu ko te pulapula, ʼe liliu moʼoni mai anai ʼaki he kalaga fakafiafia, ʼo ina ʼamo tana taga fulumeto.” Ko te ʼu palalau ʼa te tagata faipesalemo ʼo ʼuhiga mo te to pea mo te utu, ʼe fakata ki te tokaga pea mo te tapuakina ʼa Sehova ki te toe ʼo te kau Iselaele ʼae neʼe natou toe liliu mai tanatou ʼaunofo ʼi te Papiloni ʼafea. Neʼe natou fiafia lahi ʼi tonatou fakaʼateaina ʼaia, kae lagi neʼe natou fetagihi ʼi tanatou tutu te ʼu pulapula ki te kele neʼe tuku magemage ia taʼu ʼe 70 ʼo tanatou ʼaunofo. Kae ko natou ʼae neʼe nātou haga tutu tanatou ʼu pulapula pea mo fai tanatou ʼu gaue laga fale, neʼe natou maʼu te ʼu fua pea mo te fiafia ʼi tanatou gaue.
14 ʼE lagi ʼe tou tagi moka tou tau mo he ʼu fihifihia peʼe ka fakamamahiʼi tatou peʼe ko totatou ʼu kauga fagona ʼuhi ko te faitotonu. (1 Petelo 3:14) ʼI tatatou taʼukai, ʼe lagi feala ke tou tau mo he temi faigataʼa koteʼuhi ʼe tou sio ʼe hage ʼe mole he fua ʼo tatatou ʼu faiga ʼi te minisitelio. Kae kapau ʼe tou haga to pea mo fakapala, ʼe fakatuputupu anai e te ʼAtua te ʼu pulapula ʼaia, ʼo lagi laka age ʼi te ʼu meʼa ʼae neʼe tou fakaʼamu ki ai. (1 Kolonito 3:6) ʼE fakata lelei te faʼahi ʼaia ʼi te ʼu fua ʼo tatatou tufa te ʼu Tohi-Tapu pea mo te ʼu tohi Fakatohi-tapu.
Koloa Fakalaumalie
cl 86 ¶15
Tona Mafimafi ʼe Ina Puipau Tatou: “Ko Te ʼAtua Ko Totatou Nonoʼaga”
15 Tou talanoa muʼa ki totatou puipui ʼi te faʼahi fakasino. ʼI te faʼahi ʼaia, ʼe puipui fakatahi ai te kau atolasio ʼa Sehova. Kapau ʼe mole ʼi ai hotatou puipuiʼaga, pea ʼe mole tou hao anai mai ia Satana. ʼE mole koa la ko te loto ʼaia ʼo “te pule ʼo te malama ʼaeni” ke ina pulihi te tauhi moʼoni? (Soane 12:31; Fakaha 12:17) Neʼe tapuʼi tatatou faifakamafola e ʼihi puleʼaga malohi pea mo faigaʼi ke natou pulihi tatou. Kae neʼe tou tutuʼu malohi mo hoko atu te faifakamafola ʼaki he lototoʼa. He koʼe neʼe mole feala ki he ʼu puleʼaga malohi ke natou fakagata te ʼu gaue ʼa he kiʼi kutuga Fakakilisitiano ʼe hage mai neʼe mole honatou puipuiʼaga? Koteʼuhi neʼe puipui tatou e Sehova ʼi ʼona lalo pakakau.—Pesalemo 17:7, 8.