Neʼe Fua Lelei Te Tufa ʼo Te ʼu Logo ʼo Te Puleʼaga
“HE KOʼE Koa ʼe Lahi Te ʼu Fihifihia ʼi te maʼuli?—ʼE Feala Koa Ke Maʼu He Palatiso ʼe ʼĀteaina Mai Te Maveuveu?” Ko te kupu ʼaenī ʼo Te ʼu Logo ʼo Te Puleʼaga N° 34, ko te pepa lotu ʼe pasina fā ʼaē neʼe tufa ʼi te malamanei katoa ʼi te ʼu lea e 139 lolotoga te ʼu māhina ʼo ʼApelili pea mo Maio ʼo te taʼu ʼaenī kua hili. “Ko he faʼahi maʼuhiga ʼo te taʼu” ko te ʼui ʼaia ʼa te kau Fakamoʼoni ʼi Samaika ʼo ʼuhiga mo te tufa ʼaia. “Ko he matapuna tāfito ʼo te fiafia ki te ʼu tēhina,” ko te ʼui ʼaia ʼa te kau Fakamoʼoni ʼi Pelesike. ʼI te Lepupilika Tchèque, neʼe ko te ʼuluaki faigamālie ʼaia ki te kau Fakamoʼoni ʼa Sehova ke nātou kau ki te tufa ʼo Te ʼu Logo ʼo Te Puleʼaga. ʼE fakamatala fēnei e te filiale: “Ko te tufa ʼaia neʼe ina fakatupu ai he faiva pea mo he fiafia.” Ko te ʼu meʼa pe ʼaia ʼe tou logo kiai mai te tahi ʼu fenua.
Ko Te ʼu Logo ʼo Te Puleʼaga N° 34 neʼe ko he logo makehe kia nātou ʼaē ʼe toʼetoʼe pea mo lotomamahi ʼuhi ko te ʼu meʼa fakalialia ʼaē ʼe fai ʼaki te higoa ʼo te lotu. (Esekiele 9:4) Neʼe ko he meʼa fakafimālie kia nātou ʼaē ʼe maʼuʼuli ʼi te maveuveu ʼuhi ko te “ ʼu temi maʼuhiga ʼaupito mo faigataʼa,” ʼaē ʼe mole feala ke nātou fetogi. (2 Timoteo 3:1) Moʼo faka maʼuhigaʼi ʼo te Tohi-Tapu, ʼe fakahā e te pepa lotu ko te ʼu fihifihia ʼo te maʼuli kua vave pe tona fakatokatoka. Ko te palatiso ʼe ʼāteaina mai te maveuveu ʼe hoko moʼoni ia. (Luka 23:43) Tokolahi ia nātou ʼaē ʼe nātou lau Te ʼu Logo ʼo Te Puleʼaga ʼe nātou tui papau ki tana logo. Neʼe ʼui fēnei e te tagata ʼi Toko ki te Fakamoʼoni: “Ko te meʼa ʼaē neʼe koutou ʼui ʼe moʼoni.”
ʼE mahino ia, ko te tufa ʼaenī ʼo Te ʼu Logo ʼo Te Puleʼaga neʼe fakatokagaʼi ʼaupito. ʼI Tanemaka neʼe ʼui age e te tagata ki te Fakamoʼoni ʼi tana lolotoga tufa te pepa lotu: “Ko taku hoki haʼu pe ʼaenī mai Amelika. ʼI muʼa ʼo taku mavae mai, neʼe foaki mai e he tahi takotou pepa lotu. ʼI te temi nei ko taku hoki tau mai pe ʼaenī, pea neʼe foaki mai aipe te pepa lotu ʼaia ʼi te lea faka Tanemaka!”
Ko Te Lagolago Fakafiafia Ki Te Tufa
Ko te kau Fakamoʼoni ʼa Sehova ʼi te malamanei katoa ʼe nātou fiafia ʼi tanatou kau ki te tufa ʼo te pepa lotu. ʼI Otilisia, ʼi El Salvador, ʼi Haiti, ʼi Hukalia, ʼi Italia, ʼi Niu-Kaletonia, ko he ʼu fenua ʼi te ʼu fenua lahi ʼaupito neʼe nātou fakahā te tupu foʼou ʼo te ʼu kaugā fai faka mafola, lolotoga te ʼu māhina ʼaē neʼe tufa ai Te ʼu Logo ʼo Te Puleʼaga.
ʼI Zambie neʼe ako e te taupau faka silikosikilipisio ki tona ʼofafine ʼe taʼu tolu, ko Tepola, te fakahā ʼo te ʼu tohi ʼi te ʼu ʼapi. Lolotoga te tufa ʼo Te ʼu Logo ʼo Te Puleʼaga N° 34, neʼe tuku e Tepola te ʼu pepa lotu ʼe fakalaka ʼi te 45. Neʼe kamata ai e tana faʼe te ʼu ako Tohi-Tapu mo nātou ʼaē neʼe nātou tali Te ʼu Logo ʼo Te Puleʼaga ʼaē neʼe tufa e Tepola.
ʼI te Potu Toga ʼo Afelika neʼe foaki e he kiʼi taʼahine te pepa lotu ki tona kaugā ako ʼe higoa ko Cashia. Neʼe lau e Cashia te pepa lotu pea ina ʼui age: “Ko te meʼa ʼaenī ʼe taulekaleka ʼaupito—te maʼuli heʼegata ʼi te palatiso ʼi te kele! He koʼe koa neʼe mole fakahā mai kia ʼau te faʼahi ʼaia ʼi muʼa atu?” Neʼe kamata ai te ako Tohi-Tapu. Neʼe mole hili kiai he vāhaʼa pea toe maʼu e Cashia te tahi pepa lotu. Ko te lua pepa lotu ʼaia ʼe haʼu mai tona kaumeʼa Katolika Loma ʼe nā fefaitohiʼaki ʼe nofo ʼi Sīpele. Neʼe fakamatala ʼe tona kaumeʼa kia Cashia pe koʼe ʼe hala te ʼu akonaki ʼo te ’Ēkelesia Katolika Loma, pea neʼe ina ʼui age neʼe ina fakatuʼutuʼu ke ina ako te Tohi-Tapu mo te kau Fakamoʼoni ʼa Sehova. ʼE mahino ia, ko te faʼahi ʼaia neʼe ina fakaloto mālohiʼi ai te faiga ʼaē ʼa Cashia ke hoko atu tana ako.
Ko he kiʼi tama ʼe taʼu hogofulu ʼi Suisi neʼe kau ki te tufa ʼo te pepa lotu mo tana faʼe. Neʼe ina foaki age te pepa lotu ki he fafine kei finemui pea neʼe ina fakaloto mālohiʼi ia ia ke ina lau fakalelei. Neʼe fehuʼi age e te fafine ʼaia ki te kiʼi tama peʼe tui moʼoni ia ki te paki ʼaē ʼe tuʼu ʼi te takafi ʼo te pepa lotu—ki te maʼuli heʼegata ʼi te kele. Koteā ʼaē neʼe tali age e te kiʼi tama? “Ei, ʼe ʼau tui moʼoni kiai.” Neʼe fakahā age e te fafine ʼe ina lolotoga kumi te tui moʼoni, koteʼuhi ʼe lahi ʼaupito te ʼu manatu ʼe fefakafeagaiʼaki ʼi tana lotu. ʼI tana toe ʼaʼahi atu, neʼe kamata ai te ako Tohi-Tapu.
Te ʼu Fua Fakavilivili
ʼI ʼihi temi ʼi te lau e ʼihi Te ʼu Logo ʼo Te Puleʼaga neʼe fakatupu atu aipe te ʼu fua fakavilivili. ʼI te hili ʼo tana lau te pepa lotu, ko he kiʼi taʼahine ʼe taʼu 11 ʼi Pelesike neʼe ina fakahā age ki te Fakamoʼoni ʼa Sehova neʼe kaihaʼa ia ʼi te fale koloā. Neʼe mole loto e te faʼe ʼa te kiʼi taʼahine ke ina fakahā te faʼahi ʼaia, kae neʼe hoha te leʼo ʼo loto ʼo te kiʼi taʼahine ʼi te meʼa ʼaē neʼe ina lau, pea neʼe lotomālohi ia ke ʼalu ki te pule ʼo te fale koloā. Moʼo fakaʼosi neʼe lotolelei te faʼe ʼa te kiʼi taʼahine ʼo ina tuku ke ʼalu mo te Fakamoʼoni ki te fale koloā. Neʼe punamaʼuli te tagata pule ʼo te koloā ʼi tana fakahā fakahagatonu age te faʼahi ʼaia. ʼI tana ʼiloʼi ʼaē neʼe ko Te ʼu Logo ʼo Te Puleʼaga ʼaē neʼe ina uga ia ia ke ina fai te faʼahi ʼaia, neʼe ina toʼo ai he pepa lotu ke ina vakaʼi te mālohi ʼo te logo ʼaē ʼe tuʼu ʼi loto. ʼI te temi nei kua tuputupu te ako Tohi-Tapu ʼa te kiʼi taʼahine.
Neʼe tuku e te fafine Fakamoʼoni ʼi Kameluna te pepa lotu ʼo Te ʼu Logo ʼo Te Puleʼaga ki he tagata pea mo fakamatala age ki ai: “ ʼI tamā toe liliu ki ai, neʼe ma maʼu atu kua ʼosi ina fakaʼiloga te pepa lotu pea neʼe lahi tana ʼu fehuʼi. ʼI tana fiafia ʼi tana maʼu tona ʼu tali, neʼe ina ʼui fēnei: ‘ ʼE moʼoni ʼosi ko te lotu neʼe kau ki te malaʼia ʼo te malamanei. Neʼe tokoni takotou pepa lotu kia ʼau ke lahi te ʼu meʼa ʼaē ʼe ʼau mahino kiai, kae ʼe ʼau loto ke lahi age te meʼa ʼaē ʼe ʼau ʼiloʼi.’ ” Kua fai tuʼumaʼu tana ako Tohi-Tapu ʼi te temi nei.
Neʼe ʼaʼahi e te Fakamoʼoni te ʼu ʼapi ʼi Ulukuai ʼo ina tuku te pepa lotu ki te tagata. Neʼe hoko atu te gāue ʼa te Fakamoʼoni ʼi te fai faka mafola ʼi te ʼu ʼapi pea neʼe ina takafoli te telituale ʼo aʼu ki te matapā ʼaē ʼi muli ʼo te ʼapi ʼo te tagata. Neʼe punamaʼuli ia ʼi tana maʼu atu te tagata ʼe talitali mai mo toʼo te pepa lotu. Neʼe kua ina lau te pepa lotu pea ʼe loto ke toe lahi age te ʼu meʼa ʼe ina ʼiloʼi. Neʼe kamata aipe te ako Tohi-Tapu.
Ko Te Hahaʼi ʼe Tokoni Ki Te Tufa
ʼI Saponia neʼe fakaōvi te Fakamoʼoni tūpulaga ki he tagata ʼe taʼu 50 tupu pea ina foaki age ki ai te pepa lotu. Neʼe fehuʼi age e te tagata: “Koteā te meʼa ʼe ke fai ʼaki te pepa lotu ʼaia mokā ʼe ke felāveʼi mo ni hahaʼi kivi?” Neʼe ʼui age e te Fakamoʼoni ʼe mole ina ʼiloʼi te meʼa ka ina fai anai. Neʼe ʼui age e te tagata ke talitali muʼa pea neʼe ʼulu ia ki tona ʼapi. Neʼe liliu mai ia mo Te ʼu Logo ʼo Te Puleʼaga pea ina ʼui age: “Neʼe kua ʼau maʼu te pepa lotu ʼaia. ʼI taku manatu ʼe tuʼu ʼi ai te talanoa ʼe lelei pea mo maʼuhiga, koia neʼe ʼau hiki ai ni ʼu mataʼi tohi maʼa te kau kivi. Fakalelei kae ke ke fakaʼaogaʼi te meʼa ʼaenī ki te hahaʼi ʼaē ʼe kivi.” Neʼe fakaʼaogaʼi e te tagata te ʼu hola loaloaga moʼo hiki ʼo Te ʼu Logo ʼo Te Puleʼaga ki te ʼu mataʼi tohi maʼa te kau kivi, koia ko te kau kivi ʼe mole galoʼi nātou ʼo ʼuhiga mo te logo ʼaē ʼe tuʼu ʼi ai.
ʼI Slovaquie neʼe lahi te leleiʼia e te tagata te pepa lotu koia neʼe ina toe tā ai te ʼu pepa lotu e 20, pea neʼe ina tufa totonu. Ko he kaugā fai faka mafola ʼi Suisi neʼe ina tuku Te ʼu Logo ʼo Te Puleʼaga ki he famili pea neʼe hoko atu tana gāue ʼi te ʼu fata ʼi ʼoluga ʼo te fale ʼaē ʼe nofo ai te famili. ʼI tana hifo ifo, neʼe fetaulaki ia mo te kiʼi tama ʼo te famili, ʼo ina kole age he tahi ʼu pepa lotu e 19. ʼI te faleako ʼo te tama ʼaia, neʼe fakatotonu ki te kau ako ke nātou fai hanatou talanoa ʼo ʼuhiga mo te ʼu fihifihia pea mo kumi he ʼu puleʼaki. Koia neʼe ina fia foaki age Te ʼu Logo ʼo Te Puleʼaga ki tana kalasi.
Neʼe Mole Galo He Tahi
Ko nātou ʼaē neʼe kau ki te tufa ʼo te pepa lotu neʼe nātou tokakaga fakalelei ke ʼaua naʼa galo he tahi. ʼI Niu-Kaletonia ko te ʼu tagata Fakamoʼoni ʼe toko lua neʼe nā ʼolo ki te telituale ʼo fai te telepi ʼe tuʼu mamaʼo moʼo tufa Te ʼu Logo ʼo Te Puleʼaga. ʼI te faʼahi ʼaia, neʼe nā fakatokagaʼi te ala ʼe hage ʼe mole fakaʼaogaʼi tuʼumaʼu, pea nā fakatuʼutuʼu ke nā ʼolo ʼo vakaʼi peʼe ʼi ai he tahi ʼe nofo ʼi ai. ʼI tana tuku te motokā, neʼe nā haʼele ʼi te ala, ʼo nā ʼolo ʼi te ʼu vaitafe ʼo aʼu ki tanā maʼu te ʼapi. Ko te taumatuʼa neʼe mole heʼeki nā logo ki te kau Fakamoʼoni ʼa Sehova, pea neʼe nā tali Te ʼu Logo ʼo Te Puleʼaga. Ki muli age neʼe toe liliu mai te ʼu kaugā fai faka mafola ʼo ʼaʼahi te taumatuʼa, pea neʼe nā punamaʼuli ʼi te kua gaohi e te taumatuʼa ʼaia te ala pea neʼe nā fakatuʼu mo te ʼu ʼalesō liliki, ke feala ai he ʼalu age ʼa te kau Fakamoʼoni mo tanā motokā ki tonā ʼapi. Neʼe kamata ai mo te ako Tohi-Tapu.
ʼI Polonia neʼe afe te Fakamoʼoni ʼi muʼa ʼo te laga fale ʼo tufa Te ʼu Logo ʼo Te Puleʼaga ki te tagata. Neʼe sioʼi e te kau gāue tana toe afe age ʼi te tafatafa ʼo te laga fale. Pea, neʼe pāui e te tahi ʼi te kau gāue ki ai, ʼo ina ʼui age ke ʼaua naʼa galo ia nātou. ʼI tana fakaōvi age kia nātou, neʼe nātou mānava pea neʼe nātou fakalogo fakalelei ki te fakahā ʼo te pepa lotu. Neʼe nātou tali Te ʼu Logo ʼo Te Puleʼaga ʼo feiā aipe mo te ʼu nusipepa pea ki muli age, neʼe fai te ʼaʼahi, ʼo tali ai te ʼu tohi.
Ko te ʼu lauʼi teau miliona ʼo Te ʼu Logo ʼo Te Puleʼaga N° 34 neʼe tufa ʼi te ʼu lea ʼe lahi ʼaupito. Ko tana logo kua lahi ʼaupito tona fua lelei. Neʼe ʼiloʼi ai e te tokolahi ʼe feala ke fakatuʼu he palatiso ʼe ʼāteaina mai te maveuveu. ʼE mātou faikole ke hoholo atu te tali e te hahaʼi loto faitotonu, pea mo nātou kau ʼi “te kau agavaivai” ʼaē ʼe nātou “maʼu anai te kele, pea ʼe nātou fiafia anai ʼi te mahu ʼo te tokalelei.”—Pesalemo 37:11.
[Talanoa ʼo te pasina 31]
Ke Hoholo Atu Tatatou Tufa Te ʼu Nusipepa!
Ko ʼApelili pea mo Maio 1995 neʼe lahi ʼaupito ai te fua lelei ʼo te tufa ʼo Te ʼu Logo ʼo Te Puleʼaga N° 34. ʼI te lolotoga ʼo te ʼu māhina ʼaia, neʼe makehe ai foki te tufa ʼo te ʼu nusipepa ʼo Te Tule Leʼo pea mo te Réveillez-vous! Ohage la ko he tēhina ʼi te Lepupilika Tchèque, neʼe ina fakahā ʼi te māhina ʼo ʼApelili neʼe ina tufa te ʼu pepa lotu e 250 ʼo Te ʼu Logo ʼo Te Puleʼaga pea mo te ʼu nusipepa e 750. ʼI Kuatelupe, neʼe fakatuʼutuʼu te Moeaki, ʼaho 15 ʼo ʼApelili, ko he ʼaho makehe moʼo tufa ʼo te ʼu nusipepa. Neʼe teitei pe ke katoa fuli te ʼu kaugā fai faka mafola ʼo te fenua ʼo kau ki te minisitelio ʼi te ʼaho ʼaia! Neʼe maʼu te tupu foʼou ʼi Slovaquie ʼo ʼuhiga mo te tufa ʼo te ʼu nusipepa ʼi ʼApelili. Neʼe toe tatau pe mo te ʼu tānaki neʼe maʼu mai te tahi ʼu fenua.
Koia he koʼe koa la ʼe mole tou fakatuʼutuʼu ia ʼApelili pea mo Maio 1996 ko he ʼu māhina makehe moʼo tufa ʼo te ʼu nusipepa? ʼE feala ke fakatuʼutuʼu e te ʼu kokelekasio he ʼu ʼaho makehe moʼo tufa ʼo te ʼu nusipepa. ʼE feala ke tou pionie vaeluaʼi temi. ʼI te ʼu faʼahi ʼaia pea mo te tahi age ʼu faʼahi, ko te tufa ʼo te ʼu nusipepa ʼe feala ke ina fakaloto mālohiʼi tatou, pea ko te logo maʼuhiga ʼaē neʼe kalagaʼi ʼi Te ʼu Logo ʼo Te Puleʼaga N° 34 ʼe hoholo atu tona mafola. Koia, ohage ko te taʼu ʼaenī kua ʼosi, ʼe tapuakina moʼoni anai e Sehova te faiva ʼaē ʼe tou fakahā.—2 Timoteo 4:22.