ʼE Mātou Tauhi Kia Sehova Ohage Ko He Famili Logo Tahi

NEʼE FAKAMATALA E ANTONIO SANTOLERI

Neʼe mavae taku tāmai mai Italia ʼi tona taʼu 17, ʼi te taʼu 1919. Neʼe ʼalu ki Pelesile moʼo kumi he maʼuli ʼe lelei age. ʼAki te temi, neʼe ina toʼo te fale kosi ʼulu ʼi te kiʼi kolo ʼi te loto fenua ʼo São Paulo.

ʼI TE tahi ʼaho, ʼi te taʼu 1938, ʼi toku taʼu fitu, neʼe maʼu e taku tāmai te Tohi-Tapu faka Brasileira mai te tagata neʼe ʼalu age ki tona fale. Hili kiai taʼu e lua, neʼe mahaki kovi taku faʼe pea neʼe nofo mahaki ʼo aʼu ki tona mate. Neʼe toe mahaki foki mo taku tāmai, koia ko mātou fuli, ko ʼau, mo taku faʼe, taku tāmai, pea mo toku tokolua ko Ana, neʼe mātou ʼolo ʼo nonofo mo tomatou ʼu kāiga ʼi te kolo ʼo São Paulo.

Lolotoga taku ako ʼi São Paulo, neʼe ʼau lau te ʼu tohi fuli, tāfito te ʼu tohi faka hisitolia. Neʼe ʼau ōfo ʼi taku sio ʼaē, ʼi ʼihi temi, ʼe talanoa te ʼu tohi ʼaia ki te Tohi-Tapu. ʼI te tohi ʼe fakamatala ai te ʼu meʼa ʼe mole ko he ʼu meʼa moʼoni, ʼaē neʼe ʼau toʼo ʼi te tānakiʼaga tohi ʼi São Paulo, neʼe tuʼa lahi tana talanoa ki te Akonaki ʼi te Moʼuga. Neʼe ko te temi ʼaia ʼaē neʼe ʼau fakatotonu ai ke ʼau maʼu haku Tohi-Tapu ke ʼau lau ia te akonaki ʼaia. Neʼe ʼau kumi te Tohi-Tapu ʼaē neʼe toʼo e taku tāmai ʼi muʼa atu, pea neʼe ʼau maʼu ʼi te fuga puha, neʼe tuku ai lolotoga taʼu e fitu.

Neʼe mātou Katolika, kae neʼe mole fakaloto mālohiʼi ʼau ʼi he temi ke ʼau lau te Tohi-Tapu. ʼI te temi ʼaia, neʼe ʼau ako tokotahi te kumi ʼo te ʼu kapite pea mo te ʼu vaega. Neʼe ʼau lau ʼaki he loto fiafia te Akonaki ʼi te Moʼuga, pea neʼe ʼau toe lau mo te tohi katoa ʼo Mateo pea mo te tahi ʼu tohi ʼo te Tohi-Tapu. Ko te meʼa ʼaē neʼe ʼau leleiʼia tāfito neʼe ko te moʼoni ʼaē neʼe fakamatala ʼaki ai te ʼu milakulo pea mo te ʼu akonaki ʼa Sesu.

ʼI taku mahino ʼaē ki te kehekehe ʼo te lotu Katolika mo te ʼu meʼa ʼaē neʼe ʼau lau ʼi te Tohi-Tapu, neʼe ʼau kamata kau ai ki te ’Ēkelesia Presbytérienne, pea neʼe kau kiai mo Ana. Kae, neʼe mole heʼeki fiafia toku loto. Lolotoga te ʼu taʼu neʼe ʼau kumi fakamalotoloto te ʼAtua. (Gāue 17:27) ʼI te tahi po fetuʼuʼia, neʼe ʼau fakakaukau, pea neʼe ʼau ʼui pe maʼaku: ‘Koteā te tupuʼaga ʼo taku ʼi henī? Koteā te ikuʼaga ʼo te maʼuli?’ Neʼe ʼau ʼalu tokotahi ki te tuʼa fale, pea neʼe ʼau tuʼutuli, ʼo faikole fēnei: ‘ ʼAliki ʼAtua! Ko ai koa ia koe? ʼE lava feafeaʼi haku ʼiloʼi ia koe?’ Mole fualoa, pea neʼe ʼau maʼu te tali kiai.

ʼE ʼAu Ako Te Moʼoni ʼo Te Tohi-Tapu

ʼI te tahi ʼaho ʼo te taʼu 1949, neʼe fakaōvi age te fafine ki taku tāmai ʼi tana hifo ʼi te saliote hila. Neʼe ina foaki kia ia te ʼu nusipepa ʼaē ko Te Tule Leʼo pea mo te Réveillez-vous! Neʼe apone ki Te Tule Leʼo pea neʼe ina kole age kia ia ke ʼalu age ʼo ʼaʼahi mātou, ʼo ina fakamahino age ʼe ʼi ai tana ʼu toe e lua ʼe nā kau ki te ’Ēkelesia Presbytérienne. Lolotoga te ʼaʼahi ʼa te fafine, neʼe ina tuku age te tohi Enfants kia Ana, pea neʼe nā kamata te ako Tohi-Tapu. Ki muli age, neʼe ʼau kau mo ʼau ki te ako ʼaia.

ʼI Novepeli 1950, neʼe ko tamā ʼuluaki kau ʼaia ki te fakatahi ʼa te kau Fakamoʼoni ʼa Sehova. ʼI te fakatahi ʼaia, neʼe fakahā ai te tohi “Que Dieu soit reconnu pour vrai!” pea neʼe hoko atu tamā ako Tohi-Tapu ʼo fakaʼaogaʼi te tohi ʼaia moʼo takitaki ʼo tomā maʼuli. Mole tuai pea neʼe mahino kia māua kua ma maʼu te moʼoni, pea ʼi ʼApelili 1951, neʼe ma papitema moʼo fakahā kua ma foaki tomā maʼuli kia Sehova. Neʼe papitema taku tāmai ʼi te ʼu taʼu ki muli age, pea neʼe nofo agatonu ki te ʼAtua ʼo aʼu ki tana mate ʼi te taʼu 1982.

ʼE ʼAu Fiafia ʼi Te Selevisi Katoa

ʼI Sanualio 1954, ʼi taku kei taʼu 22, neʼe tali ke ʼau gāue ʼi te filiale ʼo te kau Fakamoʼoni ʼa Sehova, ʼaē ʼe higoaʼi ko te Petele. ʼI taku tau atu kiai, neʼe ʼau punamaʼuli ʼi taku ʼiloʼi ʼaē ko te tagata taupau ʼo te filiale, ia Richard Mucha, neʼe lahi age ia ʼau ia taʼu pe e lua. ʼI te taʼu 1955, ʼi te temi ʼaē neʼe ʼaoga ai he kau tagata taupau faka silikosikilipisio, ko te higoa ʼaē neʼe foaki ki te kau taupau feʼaluʼaki, neʼe ʼau kau ki te toko nima tagata ʼaē neʼe fakaafe ke nātou kau ki te selevisi ʼaia.

Neʼe hinoʼi ʼau ki te kolo ʼo Rio Grande do Sul. Neʼe ko kokelekasio pe e 8 ʼa te kau Fakamoʼoni ʼa Sehova ʼi taku kamata taku gāue faka silikosikilipisio, kae hili kiai māhina e 18, neʼe fakatuʼu te ʼu kokelekasio foʼou e lua pea mo te ʼu kūtuga e 20. Ia ʼaho nei, ʼi te koga meʼa ʼaia, ko silikosikilipisio e 15 ʼa te kau Fakamoʼoni ʼa Sehova, ʼaki te ʼu kokelekasio e 20 takitahi! ʼI te fakaʼosi ʼo te taʼu 1956, neʼe fakatokagaʼi mai ʼe vaheʼi anai taku silikosikilipisio ia koga veliveli e 4, ke gāue ai te ʼu tagata taupau faka silikosikilipisio e fā. ʼI te temi ʼaia, neʼe fakatotonu mai ke ʼau toe liliu ki te Petele, ki te gāue foʼou.

Neʼe ʼau ōfo pea mo fiafia ʼi toku hinoʼi ʼaē ki te Potu Tokelau ʼo Pelesile, ke ʼau gāue ai ko he tagata taupau faka tisitilike, ko he minisi feʼaluʼaki ʼe gāue ʼi te ʼatu ʼu silikosikilipisio. ʼI te temi ʼaia, ʼi Pelesile, neʼe ko minisi e 12 000 ʼo te kau Fakamoʼoni ʼa Sehova, pea neʼe ko tisitilike e 2 ʼi te fenua. Neʼe gāue ia Richard Wuttke ʼi te potu toga ʼo Pelesile, pea neʼe ʼau maʼu ʼau te tisitilike ʼo te potu tokelau. ʼI te Petele, neʼe akoʼi mai kia mātou te fakaʼaogaʼi ʼo te sinema moʼo fakahā ʼo te ʼu ʼata neʼe fai e te kau Fakamoʼoni ʼa Sehova, ʼaē ko te La Société du Monde Nouveau en action pea mo te Le bonheur de la Société du Monde Nouveau.

ʼI te temi ʼaia, neʼe mole tatau tamatou ʼu feʼoloʼaki mo te temi ʼaenī. Neʼe mole ʼi ai he motokā ʼa te kau Fakamoʼoni, koia neʼe ʼau folau ai ʼi te paopao, ʼi te kiʼi vaka, ʼi te saliote neʼe toho e te ʼu pipi, neʼe ʼau heka hōsi, neʼe ʼau ʼalu ʼi te saliote afi, ʼi te kamioneti, pea ʼi te tahi temi neʼe ʼau folau ʼi te vakalele. Neʼe fakaofoofo tamatou folau ʼi te vakalele, ʼo sio mai te lagi ki te vao matuʼa ʼo te Amazonie ʼo aʼu ki te fenua ʼi Santarém, te kolo ʼaē ʼe tuʼu ʼi te lotomalie ʼo Belém ʼi te kamataʼaga ʼo te Amazonie pea mo Manaus, te kolo tāfito ʼo te fenua ʼo Amazonie. Neʼe mole lahi te fai ʼo te ʼu fakatahi faka silikosikilipisio e te kau tagata taupau faka tisitilike, koia neʼe lahi te temi ʼaē neʼe ʼau fakaʼaogaʼi ai moʼo fakahā te ʼu ʼata ʼo te Sosiete. ʼI te ʼu kolo lalahi, neʼe kau te toko teau hahaʼi kiai.

Ko te meʼa ʼaē neʼe ʼau ōfo lahi ai ʼi te potu tokelau ʼo Pelesile, neʼe ko te potu fenua ʼo te Amazonie. Lolotoga taku gāue ʼi ai ʼi ʼApelili 1957, neʼe hake te Vaitafe ʼo Amazonie pea mo te tahi ʼu vaitafe. Neʼe ʼau maʼu te pilivilesio ʼaē ko te fakahā te ʼata e tahi ki te hahaʼi ʼaē neʼe nonofo ʼi te ʼu vao matuʼa, ʼo ʼau folahi te puipui ʼo te sinema ʼi te ʼu fuʼu ʼakau e lua. Neʼe fakahaʼele te sinema ʼaki te hila ʼo te masini ʼo te vaka neʼe tau ʼi te vaitafe. Neʼe ko te hoki sio ʼaia ʼa te hahaʼi ki he ʼata.

Hili pe te temi ʼaia, pea neʼe ʼau toe liliu ʼo gāue ʼi te Petele, pea ʼi te taʼu ʼaē neʼe hoa mai kiai, ʼi te taʼu 1958, neʼe ʼau maʼu te pilivilesio ʼaē ko te kau ki te Fakatahi Faka Malamanei ʼaē neʼe maʼuhiga ʼi te hisitolia ʼo te kau Fakamoʼoni ʼa Sehova, ʼaē ko te “Finegalo ʼo te ʼAtua,” neʼe fai ʼi te kolo ʼo New York. Ko te ʼu hahaʼi mai te ʼu fenua e 123, neʼe nātou kau ki te toko 253 922 hahaʼi ʼaē neʼe nātou fakafonu te Malaʼe faigaoʼi ʼo te Yankee Stadium pea mo te Polo Grounds ʼaē neʼe ōvi age, ʼi te ʼaho fakaʼosi ʼo te fakatahi ʼaia ʼaē neʼe fai ia ʼaho e valu.

ʼE Hoko Te ʼu Fetogi ʼi Toku Maʼuli

ʼO mole fualoa ʼi taku toe liliu ki te Petele, neʼe ʼau fakatahi mo Clara Berndt, pea ʼi Malesio 1959, neʼe ma ʼohoana ai. Neʼe hinoʼi māua ki te gāue faka silikosikilipisio ʼi te potu fenua ʼo Bahia, ʼo ma gāue ai lolotoga te taʼu katoa. ʼE ma kei manatuʼi, ʼaki he loto fiafia, te agavaivai, mo te tali kāiga, mo te faiva, pea mo te ʼofa ʼa te ʼu tēhina ʼo te potu fenua ʼaia; neʼe nātou māsisiva ʼi te faʼahi fakakoloa kae neʼe nātou koloaʼia ʼi te ʼu fua ʼo te Puleʼaga. Pea neʼe hinoʼi māua ki te potu fenua ʼo São Paulo. ʼI te taʼu 1960, neʼe faitama toku ʼohoana, pea neʼe ma tuku te minisitelio katoa.

Neʼe ma fakatotonu ke ma ʼolo ki te koga meʼa ʼo te potu fenua ʼo Santa Catarina, ʼaē neʼe tupu ai toku ʼohoana. Ko tamā tama, ia Gerson, neʼe ko te ʼuluaki ʼaia ʼo tama fānau e toko 5. Neʼe hoa ki ai ia Gilson ʼi te taʼu 1962, mo Talita ʼi te taʼu 1965, mo Tárcio ʼi te taʼu 1969, pea mo Janice ʼi te taʼu 1974. ʼE ʼau fakamālo kia Sehova, pea mo te ʼu tokoni lelei ʼaē neʼe ina foaki mai, he neʼe feala ai ke ma tauʼi te faigataʼa ʼo te akoʼi ʼo nātou ʼi “te akonaki pea mo te manatu ʼa Sehova.”​—Efesi 6:4.

ʼE maʼuhiga kia māua tama ʼu fānau fuli. Neʼe fakahā lelei e te tagata fai pesalemo te ʼu meʼa ʼaē ʼe ma logoʼi ʼi tomā loto, ʼi tana ʼui ʼaē: “Koʼeni, ko te ʼu foha ʼe ko he tofiʼa mai ia Sehova.” (Pesalemo 127:3) Logope la te ʼu fihifihia, neʼe ma gaohi lelei tamā fānau, ohage pe ko hamā fai ki te ʼu “tofiʼa [fuli] mai ia Sehova,” ʼo ma manatuʼi tuʼumaʼu te ʼu fakatotonu ʼaē ʼe tou maʼu ʼi tana Folafola. Neʼe lahi ai tona ʼu fua lelei. Neʼe lahi ʼaupito tomā fiafia, ʼi te temi ʼaē neʼe nātou fakahā ai, ia nātou toko nima, ʼi te ʼu lakaga kehekehe, pea ʼaki tonatou loto faʼitaliha, tanatou fia papitema moʼo fakahā kua nātou foaki tonatou maʼuli kia Sehova.​—Tagata Tānaki 12:1.

Te Meʼa ʼAē Neʼe Filifili e Tamā Fānau

ʼI tana ʼosi ako olotinatea, neʼe ma fiafia ʼi te temi ʼaē neʼe ʼui mai e Gerson, ʼe fia gāue ʼi te Petele, ʼo mole ina filifili he gāue ʼi te mālama kae ina fili ia te minisitelio katoa. Kae, ʼi te kamata, ko te maʼuli ʼi te Petele neʼe mole ko he meʼa faigafua kia Gerson. ʼI te hili ʼaē ʼo tamatou ʼaʼahi ia ia ʼi tona māhina 4 ʼi te Petele, neʼe malave ʼaupito kia ʼau te mamahi ʼaē neʼe hā ʼi tona fofoga ʼi te temi ʼaē neʼe mātou mavae ai. ʼI te sioʼata ʼo tamatou motokā, neʼe ʼau sio ki tana sioʼi mātou ʼo aʼu ki tamatou fakalaka ʼi te ʼuluaki pikoga. Neʼe mole kei feala haku tāʼofi taku tagi, koia neʼe ʼau fakatuʼu ai te motokā ʼi te vaʼe ala, ʼi muʼa ʼo tamatou hoko atu te ʼu kilometa e 700 ki tomatou ʼapi.

Ki muli age, neʼe leleiʼia e Gerson te maʼuli ʼo te Petele. Hili kiai teitei taʼu e 6 ʼi tana nofo ai, pea ʼohoana mo Heidi Besser, pea neʼe nā gāue toko lua ʼi te Petele ia taʼu e 2. Neʼe faitama leva ia Heidi, pea neʼe tonu ke nā mavae mai te Petele. Ko tanā kiʼi taʼahine, ia Cintia, ʼaē kua taʼu 6 ʼi te temi nei, ʼe kaugā ʼalu mo nāua ʼi tana ʼu gāue ʼo te Puleʼaga.

ʼO mole fualoa ʼi te hili ʼo tamatou ʼaʼahi ia Gerson ʼi te Petele, ko Gilson, ʼaē neʼe hoki ʼosi pe tona ʼuluaki taʼu ʼi te univelesitē, neʼe ina ʼui mai ʼe fia gāue mo ia ʼi te Petele. Neʼe ina fakatuʼutuʼu ʼe ina hoko atu anai tana ako ʼi te ʼosi ʼo hana gāue taʼu katoa ʼi te Petele. Kae neʼe fetogi tana ʼu fakatuʼutuʼu, pea neʼe nofo ʼo gāue ʼi te Petele. ʼI te taʼu 1988, neʼe ʼohoana mo Vivian Gonçalves, neʼe ko te pionie, ko te higoa ʼaia ʼo te kau minisi katoa. Talu mai ai, ʼe nā gāue fakatahi ʼi te Petele.

Neʼe hoko atu tomā fiafia, ʼi te temi ʼaē neʼe fili ai e tama toe tolu, ko Talita, ke kau ki te selevisi pionie ʼi te taʼu 1986, ʼi tana ʼosi fai te ako ʼaē ko te fai ʼo te ʼu plans. Hili kiai taʼu e tolu, neʼe toe fakaafe mo ia ki te Petele. ʼI te taʼu 1991, neʼe ʼohoana mo José Cozzi, ʼaē neʼe gāue ʼi te Petele lolotoga taʼu e 10, pea neʼe hoko atu tanā gāue ʼi ai.

Neʼe ma toe fiafia mo toku ʼohoana ʼi te temi ʼaē neʼe toe ʼui mai e Tárcio, tamā tahi toe, te palalau neʼe ma logo tuʼa tolu kiai, “Papa, ʼe ʼau fia ʼalu ki te Petele.” Neʼe tali tana kole, pea ʼi te taʼu 1991, neʼe toe kamata mo ia tana gāue ʼi te Petele, ʼo nofo ai ʼo aʼu ki te taʼu 1995. ʼE ma fiafia ʼi tana fakaʼaogaʼi feiā tona temi tūpulaga ki te fakahaʼele ki muʼa ʼo te ʼu meʼa ʼo te Puleʼaga, ʼi tana fai te faʼahi ʼaia ʼo laka age ia taʼu e tolu.

Ko tamā taʼahine muli, ia Janice, neʼe ina fili ke tauhi kia Sehova pea neʼe papitema ʼi tona taʼu 13. Lolotoga tana ako, neʼe ina toʼo te selevisi pionie vaeluaʼi temi lolotoga te taʼu katoa. Pea ʼi te ʼaho 1 ʼo Sepetepeli 1993, neʼe kamata tana pionie katoa ʼi tomatou kokelekasio ʼi te kolo ʼo Gaspar.

Te Faʼahiga Fai Ke Iku Lelei

Koteā te kalavi ʼo te taupau ʼo he famili ke logo tahi ʼi te tauhi kia Sehova? ʼI taku manatu ʼe mole ʼi ai he ʼu lekula ʼe tonu ke mulimuli kiai. Neʼe foaki mai e Sehova te ʼu tokoni ʼi tana Folafola ke muliʼi e te ʼu mātuʼa Kilisitiano, koia ko te ʼu fakamālo fuli ʼe tonu ke fai ki te ʼAtua ʼo ʼuhiga mo te ʼu fua lelei ʼaē neʼe mātou maʼu. Ko te meʼa pe ʼaē neʼe mātou fai neʼe ko te faiga ʼaē ke mātou muliʼi tana takitaki. (Tāʼaga Lea 22:6) Neʼe maʼu e tamā ʼu fānau fuli te lotoʼofa faka Latina ʼaē neʼe ʼau maʼu, pea mo te lotomālohi Siamani ʼo tanatou faʼe. Kae, ko te meʼa ʼaē ʼe maʼuhiga age, he neʼe ma foaki age kia nātou te tofiʼa fakalaumālie.

Neʼe mātou fakamuʼamuʼa tuʼumaʼu ʼi tomatou maʼuli faka famili, te ʼu meʼa ʼaē ʼo ʼuhiga mo te Puleʼaga. Neʼe mole faigafua te taupau ʼo te ʼu meʼa maʼuhiga ʼaia. Ohage la, neʼe faigataʼa tamā fai tuʼumaʼu te ako Tohi-Tapu faka famili, kae neʼe mole he temi neʼe ma tuku ai. Talu tanatou tutupu, neʼe ma ʼave tamā ʼu tamaliki fuli ki te ʼu fono faka Kilisitiano pea mo te ʼu fakatahi lalahi. Neʼe gata pe ki te ʼu temi ʼaē neʼe mahahaki ai, pe ko he ʼu meʼa fakafokifā neʼe hoko, neʼe mole mātou kau ai ki te ʼu fono. Tahi ʼaē meʼa, ʼi tanatou kei veliveli, neʼe ma ʼave tamā fānau mo māua ʼi te minisitelio faka Kilisitiano.

ʼI tonatou lagi taʼu 10, neʼe kamata fai akonaki tama ʼu tamaliki ʼi te Ako ʼo Te Minisitelio Faka Teokalatike. Neʼe ma tokoni kia nātou ʼi tanatou teuteuʼi ʼo tanatou ʼu ʼuluaki akonaki, ʼo fakaloto mālohiʼi nātou ke nātou fakaʼaogaʼi he ʼu nota kae mole ko he pepa ʼe tohi katoa ai tanatou akonaki. Ki muli age, neʼe nātou tahi teuteuʼi tana akonaki. Tahi ʼaē meʼa, ʼi tanatou tau 10 pea mo 12, neʼe nātou kamata kau tuʼumaʼu ki te minisitelio. Neʼe ko te faʼahiga maʼuli pe ʼaia ʼaē neʼe ma akoʼi age kia nātou.

Neʼe maʼuhiga te gāue ʼo toku ʼohoana, ia Clara, ʼi te akoʼi ʼo tamā fānau. ʼI te ʼu po fuli, ʼi tanatou kei veliveli, te temi ʼaē ʼe fakamaʼumaʼu vave ai e te fānau te ʼu meʼa ʼaē ʼe nātou ako, neʼe lau e Clara te ʼu hisitolia ʼo te Tohi-Tapu kia nātou pea mo faikole mo nātou takitokotahi. Neʼe ina fakaʼaogaʼi lelei te ʼu tohi Du paradis perdu au paradis reconquis, mo te tohi Écoutez le grand Enseignant, pea mo te Recueil d’histoires bibliques.a ʼI te temi ʼaē neʼe kua feala ai kia nātou, neʼe ma fakaʼaogaʼi te ʼu kaseti pea mo te ʼu ʼata ʼaē neʼe fai e te kau Fakamoʼoni ʼa Sehova.

Ko te ʼu meʼa ʼaē neʼe hoko kia māua, ʼi tomā ʼuhiga mātuʼa Kilisitiano, ʼe ina fakahā mai te ʼaoga ʼaē ke tou tokakaga ʼi te ʼaho fuli pe ki te ʼu tamaliki. Ko he ʼofa lahi, mo he tokaga kia nātou takitokotahi, pea mo te fakaʼaogaʼi lahi ʼo totatou temi kia nātou, ʼe kau ki te ʼu meʼa ʼaē ʼe ʼaoga tāfito ki te kau tūpulaga. ʼE mole tonu ke tou faka ʼuhiga te faʼahi ʼaia ohage pe ko he maʼua ʼo tatou ʼu mātuʼa, ʼo tou fai ʼaki totatou loto katoa te ʼu meʼa ʼaē ʼe ʼaoga kia nātou, kae ke tou maʼu mo he fiafia lahi ʼi te fakahoko ʼo te maʼua ʼaia.

ʼE moʼoni, ʼe ko he meʼa fakafimālie ki te ʼu mātuʼa te fakahoko ʼo te ʼu palalau ʼaē ʼe tuʼu ia Pesalemo 127:​3-5: “Koʼeni, ko te ʼu foha ʼe ko he tofiʼa mai ia Sehova; ko te fua ʼo te ʼalo ʼe ko he fakapale. Ohage ko he ʼu kauʼi nahau ʼi te nima ʼo he tagata mālohi, ʼe toe feiā mo te ʼu foha ʼo te temi tūpulaga. Manuʼia te tagata mālohi ʼaē neʼe ina fakafonu ʼaki tana ʼaiʼaga nahau.” Ko te tauhi kia Sehova mo he famili ʼe logo tahi, ʼe ko te tupuʼaga lahi ʼaia ʼo tomatou fiafia!

[Nota ʼi te lalo pasina]

[Paki ʼo te pasina 26]

Ko Antonio Santoleri mo tana famili ʼi te temi nei