Koutou “Gāue Katoa” ʼi Takotou Minisitelio
1 ʼE tou lau ʼi te Tohi-Tapu, neʼe tui falelā te ʼapositolo ko Paulo ʼi tana nofo ʼi Kolonito, pea ʼe lagi feala ke tou manatu ai neʼe tuʼakoi tana fai faka mafola. Kae ʼe ʼui fēnei ia Gaue 18:5, MN: “Pea neʼe kamata gāue katoa ia Paulo ʼaki te folafola, ʼo fagonogono ki te kau Sutea moʼo fakamoʼoni ko Sesu ia Kilisito.” He koʼe neʼe gāue katoa ia Paulo ʼi te fai faka mafola? Logola ʼi Kolonito neʼe kua kaugamālie te hahaʼi ʼaē neʼe liliu ko te kau Kilisitiano, kae neʼe fakahā age e te ʼAliki neʼe kei toe te tokolahi ʼi te kolo ʼaia neʼe feala ke nātou liliu ko he kau tisipulo. (Gaue 18:8-11) ʼE tou maʼu koa he tupuʼaga feiā ke tou gāue katoa ai ʼi tatatou minisitelio? Ei, heʼe kei lahi ʼaupito te hahaʼi ʼe feala ke tou maʼu pea mo akoʼi age kia nātou te moʼoni.
2 Koutou Fakaʼaogaʼi He Temi Lahi ʼi Te Gāue ʼo ʼApelili: ʼO toe feiā pe, ʼe koutou fakatuʼutuʼu ʼi te māhina fuli ke koutou gāue mālohi ʼi te faka mafola ʼo te logo lelei. Kae ʼi ʼihi māhina, ʼe lahi ai tatatou ʼu faigamālie ke tou “gāue katoa” ai. Ohage ko te māhina ʼo ʼApelili, ʼaē ka fai ai te Fakamanatu. ʼE feala koa hakotou pionie vaeluaʼi temi peʼe koutou faiga mālohi ʼi te minisitelio ʼo te māhina ʼo Malesio pea mo ʼApelili? ʼE lahi te ʼu tapuakina ʼaē ʼe maʼu e te tokolahi ʼo te kau fai faka mafola ʼaē ʼe nātou fai te faʼahi ʼaia. (2 Ko. 9:6) Kapau ʼe koutou fai ia meʼa fuli ʼaē ʼe koutou lavaʼi, pea koutou manatuʼi ʼe fiafia ia Sehova ki te gāue ʼaē ʼe koutou fai ʼaki tokotou nefesi katoa. (Lu. 21:2-4) Tatau aipe pe koteā te ʼu ʼaluʼaga ʼaē ʼe tau mo koutou, kae koutou fakatuʼutuʼu ke koutou “gāue katoa” ʼi te minisitelio ʼo ʼApelili. Pea ʼaua naʼa galo takotou kiʼi pepa tānaki gāue ʼi te fakaʼosi māhina, ke feala hona tānaki fakatahi mo te ʼu hola gāue ʼo te hahaʼi ʼa Sehova.
3 Koutou ʼAʼahi Te Hahaʼi Foʼou ʼAē Neʼe ’Ōmai Ki Te Fakamanatu: ʼI Niu Kaletonia, ʼi te taʼu ʼaenī kua ʼosi, neʼe ko te toko 4 952 ʼaē neʼe ʼōmai ki te Fakamanatu, pea neʼe toko 259 ʼi Uvea mo Futuna. ʼE mole heʼeki tou ʼiloʼi peʼe tou tokofia anai ʼi te taʼu ʼaenī. Kae ʼe ʼasi ʼi te ʼu tānaki ʼe feala ke lahi ʼaupito te “taʼukai.” (Mat. 9:37, 38, MN ) Koia koutou foimo fai he ʼu fakatuʼutuʼu moʼo ʼaʼahi te hahaʼi ʼaē neʼe ʼōmai ki te Fakamanatu, moʼo tokoni kia nātou ʼi te faʼahi fakalaumālie. Kapau ʼe tuku fualoa te ʼu ʼaʼahi ʼaia, pea ʼe feala anai ki ‘te agakovi ke ina taʼaki te folafola ʼo te puleʼaga ʼaē neʼe kua tō ʼi tonatou loto.’ (Mat. 13:19) Kae kapau ʼe koutou foimo ʼaʼahi, pea ʼe koutou fakahā ai anai ʼe koutou “gāue katoa” ʼi takotou minisitelio.
4 Koutou Haga Tokoni Kia Nātou ʼAē ʼe Mole Kei Fai Faka Mafola: ʼI Fepualio neʼe tou faiga tāfito ke tou tokoni kia nātou ʼaē ʼe mole kei nātou fai faka mafola. Kapau ʼe ʼi ai ʼihi ʼe mole heʼeki fai kia nātou he ʼaʼahi faka tauhi ōvi, pea ʼe tonu ki te kau tagata ʼāfea ke nātou foimo ʼaʼahi nātou ʼi muʼa ʼo te fakaʼosi ʼo ʼApelili. ʼE faiga anai te kau tagata ʼāfea ke nātou ʼiloʼi te tupuʼaga ʼo tonatou ʼu fihifihia, pea mo tokoni lelei ke nātou toe kau ki te gāue moʼo tauhi kia Sehova. Ko te tokoni ʼofa ʼaia ʼe ina fakahā mai ko te kau tagata ʼāfea, ʼe nātou fai fakalelei tonatou maʼua ʼaē ko te tauhi ki “te fagaʼovi a te Atua.” (1 Pet. 5:2; Gaue 20:28) Ko Te Tule Leʼo Fakafalani ʼo te ʼaho 15 ʼo Sepetepeli 1993, pasina 22-23, ʼe tou maʼu ai te ʼu tokoni lelei ʼe feala hona fakaʼaogaʼi fakalelei e te kau tagata ʼāfea mokā nātou fai tokoni ʼo ʼuhiga mo te ʼu fihifihia tāfito e nima ʼaē ʼe feala ke tau mo nātou ʼaē ʼe mole kei nātou fai faka mafola. ʼE mahino ia, ʼe kei feala ke toe kau ʼihi ki te minisitelio ʼo ʼApelili.
5 Tou Tokoni Ki ʼIhi Ke Nātou Liliu Ko He ʼu Kaugā Fagona: Kua feala koa ki takotou fānau ke nātou liliu ko he ʼu kaugā fagona foʼou ʼo te logo lelei? ʼE feafeaʼi kia nātou ʼaē ʼe koutou fai tanatou ako Tohi-Tapu? Kapau ʼe tali e te kau tagata ʼāfea ke nātou kau ki te gāue, pea ʼe mole koa la ko te māhina lelei ʼo ʼApelili ke nātou kamata ai tanatou fai faka mafola? Kapau ʼe ʼi ai he tahi ʼe tuputupu, pea kua ina ako te kaupepa lahi Fakamaʼua pea mo te tohi Te ʼAtamai Mālama, pea ʼe lagi feala ke hoko atu tana ako ʼaki he tahi tohi—Parole de Dieu, peʼe ko te tohi Paix véritable, peʼe ko te tohi Unis dans le culte. ʼE tonu ke koutou fakatuʼutuʼu ke koutou tokoni kia ia ʼaē ʼe ako ke ina maʼu he fakasiosio loloto ʼi te moʼoni, ke liliu ko he kaugā fagona, pea ke ina momoli tona maʼuli kia Sehova pea mo papitema.—Ef. 3:17-19; 1 Tim. 1:12; 1 Pet. 3:21.
6 Ko takotou fai tuʼumaʼu ia te ako pea mo takotou ʼofa moʼoni ki takotou kau ako Tohi-Tapu, ʼe lava tokoni anai ke nātou maʼuliʼi totonu ia te moʼoni. Ko te tēhina neʼe felāveʼi mo te taumatuʼa kua matutuʼa, pea neʼe nā tali lelei ke fai hanā ako Tohi-Tapu. Kae neʼe fakaholomuli e te taumatuʼa te ako ʼaia kia vāhaʼa e tolu. Pea neʼe kamata ai leva te ako ʼaia. Kae ʼi te vāhaʼa fuli neʼe teitei ke mole fai e te taumatuʼa tanā ako. Kae ʼaki te temi, neʼe tuputupu te ako ʼa te fafine ʼo aʼu ki tana papitema. ʼE manatuʼi fēnei e te tēhina: “ ʼI tana ʼosi papitema, neʼe tagi fiafia te fafine, pea neʼe ma tagi fiafia ai mo toku ʼohoana.” Ei, ʼe tou maʼu he fiafia lahi mokā tou “gāue katoa” ʼi te tala ʼo te logo lelei!
7 Ko te ʼu lea faka polofeta ʼo te Tohi-Tapu pea mo te ʼu meʼa ʼaē ʼe hoko ʼi te malamanei, ʼe nātou fakahā mai ʼe tou maʼuʼuli ʼi te temi ʼaē kua tou vave aʼu ai ki te fakaʼosi. ʼI te temi nei, ʼe tonu ai ki te hahaʼi fuli ʼa te ʼAtua ke nātou “gāue katoa” moʼo tala te logo lelei ki te hahaʼi. ʼE fakahā lelei mai e te ʼapositolo ko Paulo ko te gāue kinakina ʼaia “ ʼe mole vaʼiganoa ʼo ʼuhiga mo te ʼAliki.”—1 Ko. 15:58, MN.