“ ʼE Mole Maʼu Hoku Temi!”
1 Ko te tokolahi ia tatou ʼe tou fai te ʼu palalau ʼaia, heʼe lahi tatatou ʼu gāue. Neʼe ʼui ko te temi ʼe kau ʼi te ʼu meʼa lelei ʼaē ʼe maʼuhiga ʼaupito pea mo faka temi ʼaē ʼe tou maʼu. Kofea ʼaē ʼe tou lava maʼu ai he temi ki te ʼu meʼa ʼaē ʼe maʼuhiga ʼaupito, ohage ko te lau pea mo te ako ʼo te Folafola ʼa te ʼAtua?—Filp. 1:10.
2 Ko te meʼa ʼaē ʼe maʼuhiga, ʼe mole ko he faiga ki he temi lahi, kae ko te vakaʼi peʼe koteā ʼaē ʼe kita fia fai ʼi te temi ʼaē ʼe kita maʼu. ʼE tou maʼu fuli te ʼu hola e 168 ʼi te vāhaʼa, ko lagi hola e 100 ʼe tou fakaʼaogaʼi ki te moe pea mo te gāue. Koia e feafeaʼi hatatou fakaʼaogaʼi lelei te ʼu hola ʼaē kei toe? ʼE foaki mai te tokoni ia Efeso 5:15-17 (MN ), ke ʼaua naʼa tou haʼele “[ohage] ko he kau vavale, kae ke hage ko ni kau popoto, ʼo [tou] totogi te temi faigamālie . . . [pea mo tou] mahino pe koteā te finegalo ʼa Sehova.” ʼE hā ʼaki mai, ʼe tonu ke tou fakaʼaogaʼi katoa te ʼu temi faigamālie fuli moʼo fai te ʼu meʼa ʼaē ʼe maʼuhiga kia Sehova.
3 Neʼe fakatatau e Sesu totatou temi ki te temi ʼo Noe. (Lu. 17:26, 27) ʼI te temi ʼaia, ko te hahaʼi neʼe nātou maʼumaʼua ʼi te ʼu gāue ʼo te ʼaho fuli. Kae ko Noe neʼe ina fakaʼaogaʼi tona temi moʼo faʼu te aleka lahi pea mo faka mafola. (Hep. 11:7; 2 Pet. 2:5) ʼO feafeaʼi? ʼI tana fakamuʼamuʼa te finegalo ʼo te ʼAtua, pea mo tana fakalogo ʼo “mulimuli” katoa ki te ʼu meʼa ʼaē neʼe ina fakatotonu age.—Sen. 6:22.
4 Koteā ʼAē ʼe Tonu Ke Fakamuʼamuʼa? Neʼe ʼui fēnei e Sesu: “Ko te tagata ʼe mole tonu ke maʼuli ʼaki pe te pane, kae ʼaki te folafola fuli pe ʼe haʼu mai te gutu ʼo Sehova.” (Mat. 4:4, MN ) ʼI te vāhaʼa fuli, ʼe ʼaumai tatatou “ ʼinasi meʼa kai [fakalaumālie] ʼi tona temi totonu.” (Lu. 12:42, MN ) Ko tona faka ʼuhiga, ke tou fai hatatou polokalama lautohi pea mo ako takitokotahi pea mo mulimuli tuʼumaʼu kiai, mo kapau ʼe kita loto moʼoni ke fua lelei kia kita. Kapau ʼe tou fakafetaʼi ki te meʼa kai fakalaumālie, pea ʼe mole tou lau vave anai te ʼu tohi ka mole tou fakakaukauʼi, ohage pe ko he tahi ʼe kai fakavilivili. Kae ko te loto fakafetaʼi, ʼe ina uga tatou ke tou fakaʼaogaʼi he temi moʼo ako pea mo leleiʼia te ʼu meʼa fakalaumālie.
5 Ko te kai ʼo te meʼa kai fakalaumālie ʼe ina lava taki tatou ki te maʼuli heʼegata. (Soa. 17:3) ʼE maʼua ke tou fakamuʼamuʼa te faʼahi ʼaia ʼi tatatou polokalama ʼi te ʼaho fuli. ʼE tou lava tāʼofi koa he temi moʼo lau te Tohi-Tapu ʼi te ʼaho fuli, pea mo teuteuʼi te ʼu fono faka Kilisitiano? Ei. Kapau ʼe tou fai feiā, pea ʼe tou maʼu anai te “fakapale lahi” ʼaē ʼe haʼu mai tatatou ʼiloʼi pea mo tatatou fai ia te finegalo ʼo te ʼAtua.—Pes. 19:7-11.