ʼE Lava Feafeaʼi Hatatou Uga He Tahi Ke Fia Fakalogo?
1 ʼI te kolo ʼo Filipe, “ko he fafine neʼe higoa ko Litia, neʼe faifakatau mutuʼi meʼa kula . . . neʼe fakalogo, pea ko Sehova neʼe ina avahi lahi tona loto ke ina tokagaʼi te ʼu meʼa ʼaē ʼe palalau kiai ia Paulo.” (Gāue 16:14) Koteā ʼaē ʼe tou ako mai te talanoa ʼaia? Ko te fakalogo ʼe ko te meʼa ʼaia ʼaē ʼe ina faka fealagia ki he tahi ke ina ako te moʼoni. Ke fua lelei tatatou vaevae te logo ʼo te Puleʼaga, ʼe fakatafito ʼuluaki ki te lotolelei ʼo ia ʼaē ʼe palalau mo tatou ke fakalogo mai. Ka tou maʼu he tahi ʼe fia fakalogo mai, ʼe faigafua age leva te fakahā ʼo tatatou logo. Kae ko he maʼu ʼo he tahi ʼe fia fakalogo mai ʼe mole ko he meʼa faigafua. Koteā ʼaē ʼe feala ke tou fai?
2 Ia muʼa ʼo tatatou ʼolo ʼo fai faka mafola, ʼe tonu anai ke tou tokakaga ki tatatou faʼahiga teu pea mo te ʼu tohi ʼaē ka tou fakaʼaogaʼi. Koteā tona tupuʼaga? He ko te hahaʼi ʼe nātou fia fakalogo lelei ki he tahi ʼe teu maʼa. ʼE lelei koa pea mo fakaʼapaʼapa tatatou teuteu? Tatau aipe peʼe ʼi te mālama ʼe ko he meʼa māhani te mole teuteu lelei, ʼe mole tonu ke tou feiā heʼe ko tatou ko te ʼu minisi ʼe tou fakafofoga te Puleʼaga ʼo te ʼAtua. Ko tatatou teu maʼa ʼe toe kau foki ki te fakamoʼoni ʼo te logo ʼo te Puleʼaga ʼaē ʼe tou faka mafola.
3 Ke Koutou Aga Fakakaumeʼa Pea Mo Aga Fakaʼapaʼapa: Logope la te kua fetogi ʼo te ʼu aga ʼi te temi nei, tokolahi te hahaʼi ʼe kei nātou leleiʼia te Tohi-Tapu pea mo nātou tali anai ke palalau ʼaki he aga fakaʼapaʼapa pea mo fakakaumeʼa ki te ʼu meʼa ʼaē ʼe maʼu ʼi te Tohi-Tapu. ʼAki he agalelei, mo he malimali fakafiafia ʼe feala ke ina fakafimālieʼi ia ia ʼaē ʼe tou palalau mo ia, pea mo feala ai leva ke hoko he fai palalau mālie. Ko tatatou loto fakamalotoloto pea mo tatatou ʼu aga ʼaē ʼe lelei, ʼe feala foki ke toe hā ʼi tatatou ʼu palalau pea mo tatatou ʼu aga, ʼaē ʼe kau ki ai mo tatatou fakalogo fakalelei ki te ʼu manatu ʼa ia ʼaē ʼe palalau mo tatou.
4 Ko tatatou fakatuʼutuʼu ʼe ko te vaevae ʼo tatatou ʼamanaki ʼo te Tohi-Tapu mo ʼihi. ʼAki te manatu ʼaia ʼi totatou ʼatamai, ʼe tonu ke tou ʼiloʼi papau ʼe lelei ʼatatou ʼu palalau, ka mole fakatupu fihi. ʼE mole he ʼuhiga ʼo hakita fakafifihi mo he tahi ʼe hā lelei ʼe mole fia fakalogo. (2 Tim. 2:23-25) ʼE feala ke tou filifili lahi he ʼu faʼifaʼitaki kehekehe ʼe fakaloto mālohi pea mo ʼaoga ki totatou temi, ʼaē ʼe foaki mai kia tatou ʼi Te Minisitelio ʼo Te Puleʼaga pea mo te tohi Raisonner. ʼE moʼoni foki, ʼe tonu ke tou teuteuʼi lelei te ʼu faʼahi ʼaia ke feala hatatou palalau ʼaki he loto māfana pea mo tui moʼoni ki te ʼu meʼa ʼaē ʼe tou palalau kiai.—1 Pe. 3:15.
5 ʼI te ʼosi ʼo tatatou ʼaʼahi, ʼe mole lahi he hahaʼi ʼe kei nātou manatuʼi lelei te meʼa ʼaē neʼe tou palalau kiai. Kae, ko nātou fuli ʼe feala ke nātou manatuʼi te faʼahiga fai ʼo tatatou ʼu palalau. ʼE mole tonu ke tou meʼa noaʼi te mālohi ʼo te agalelei pea mo te lotoʼofa. Lagi e tokolahi te hahaʼi ʼe hage ko he ʼu ōvi ʼi totatou telituale, ʼe fia fakalogo anai ki te moʼoni ohage ko Litia ʼi te ʼuluaki sēkulō. Kapau ʼe tou tokakaga lelei ki totatou faʼahiga teu pea mo tatatou faʼahiga palalau, ʼe feala anai ke fakaloto mālohiʼi ai te hahaʼi fakamalotoloto ke nātou fakalogo ki te Folafola ʼa te ʼAtua pea mo tali leleiʼi.—Maleko 4:20.