Fol Bible ni Tabinaw Gur, Rayog ni Ngam Yarmiy Ya Nge Felfelan’ Chon e Tabinaw Rom Ngay?

I yog reb e matam nu Brazil ni gaar, “Gamad chon e tabinaw rog e boor ban’en ni gamad ma weliy u nap’an e Fol Bible ni Tabinaw, faanra dab gog ni nggu talgad, ma rayog ni nggu Fol Bible gad nge n’uw e nep’.” Reb e matam nu Sapan e yog ni bay ba pagel ni fak ni ragag e duw rok ni ba ga’ nder ma lemnag n’umngin nap’an ni yibe fol Bible, ya baadag ni nggu ululgad. Mang fan? Ki yog fare matam ni gaar, “Aram e n’en ni be pi’ e athamgil nga laniyan’, ma ke yag ni nge pirieg e felfelan’.”

Bin riyul’ riy e gathi gubin e bitir ni yad baadag e fol Bible ni tabinaw. Boch i yad e ma chalban ngay. Mang fan? Yog reb e matam ni ma par u Togo ni gaar, “Liyor ni yima tay ngak Jehovah e aram ban’en ni ngan felfelan’ ngay.” Faanra nge yan i aw ni aray rogon ma sana ngan thilyeg rogon ni yibe yarmiy e fol Bible ni tabinaw. Boor e tabinaw ni kar pirieged ni fol Bible ni yad ma tay e rayog ni ngar ‘felfelan’gad’ ngay ni bod rogon ni i felfelan’ piyu Israel ko fare rran ko Sabbath kakrom.​—Isa. 58:13, 14.

Pi matam ni Kristiano e yad manang ni faanra nge felfelan’ chon e tabinaw rorad ko fol Bible ni yad ma tay, ma susun e dariy ban’en ni nge magawonnagrad. Ralf e dalip e ppin ni fak ma taareb e pagel e yog ni fol Bible ni yad ma tay e yad gubin ni yad ma sabethin u taabang, ma ra bagayad ma be yog laniyan’. Riyul’ ni bay yu ngiyal’ nib mo’maw’ ni ngan ayuweg gubin e girdi’ u lan fare tabinaw ni ngar tiyan’rad ko n’en ni yibe fil. I yog reb e matin ni gaar: “Gathi gubin ngiyal’ nrayog ni nggu yarmiy e fol Bible ni tabinaw ya nge yag ni pirieg girdien e tabinaw rog e felfelan’ riy.” Gur, rayog ni ngam yarmiy e fol Bible ni tabinaw ya nge yag ni pirieg chon e tabinaw rom e felfelan’ riy?

NGAUN THILYEG E N’EN NI NGAN FIL, MIN RIN’ U BOOR E KANAWO’

“I yog reb e matam nu Chiyamen ni bay l’agruw e bitir ni fak ni gaar, “Ba t’uf ni ngaun thilthilyeg e pi n’en ni ngan fil.” Ma Natalia ni l’agruw e bitir ni fak e yog ni gaar, “N’en nth’abi ga’ fan ni nggu rin’ed u nap’an e fol Bible e nggu thilyeged kanawoen e pi n’en ni gamad ma fil.” Boor e tabinaw ni yad ma yarmiy e fol Bible ya nge gubin girdien fare tabinaw me yib angin ngak. Cleiton ni be’ nu Brazil ni bay l’agruw e fel’ yangaren ni fak e gaar, “Yira rin’ ni aray rogon ma ra pasig girdien fare tabinaw, ma yad urngin ni yad ra un ko fare fol Bible.” Yira yarmiy e fol Bible ni tabinaw nib fel’ rogon ma rayog ni nge tiyan’ e piin gallabthir ngar ayuweged gubin e bitir u lan fare tabinaw ni faanra ba thil yangarrad. Piin gallabthir e rayog ni ngar ayuweged gubin girdien fare tabinaw ko n’en nib t’uf rorad, ma rayog ni ngar mel’eged e pi n’en ni yira fil nge rogon ni ngan fil.

Mang boch ban’en ni be rin’ boch e tabinaw ya nge yag ngki thilthil rogon e fol Bible ni yad be tay? Boch e tabinaw e yad ma yon’ reb e tang ni fan ku Jehovah u m’on ko fol Bible ni tabinaw. Rogon ni yog Juan ni be’ nu Mexico e gaar, “Yira tang u m’on ko fol Bible ma ma fal’eg lanin’mad.” Girdien e tabinaw rok e yad ma mel’eg e tang nib puluw ko n’en ni yira fil e re nep’ nem.

Boch e girdi’ e yad ma beeg bang ko Bible u taabang. Rayog ni ngan thilyeg rogon fare fol Bible ni aram e ra reb i girdien fare tabinaw mab thil e en ni ngan beeg murung’agen u Bible. Reb e matam nu Sapan e yog ni gaar, “Som’on mab mo’maw’ rog ni nggu beeg e Bible rog ni aram rogon.” Machane, fa gal pagel ni fak e yow be felfelan’ ni yow be guy e gallabthir rorow ni yow be felfelan’ ko fol Bible ni yad be tay u taabang. Boch e tabinaw e yad ma yan u yaan boch ban’en u Bible. Roger ni be’ nu South Africa ni l’agruw e pagel ni fak e yog ni gaar, “Piin bitir e ba ga’ ni yad ma pirieg boch ban’en u Bible nder yag ni nge tiyan’ e piin gallabthir ngay.”

Ku reb e ban’en nrayog ni nge rin’ reb e tabinaw nib thil e rayog ni ngar fal’eged yaan fare arke rok Noah ara ngar ngongliyed yaan e tempel rok Solomon. Pi n’ey ni yira rin’ e ba t’uf ni ngan fal’eg i gay murung’agen, ma yira felfelan’ ngay. Bod reb e buliyel nu Asia ni lal e duw rok ni ur moyed e gallabthir rok nge titaw rok u lan reb e singgil ko naun rorad ni yad be fal’eg e board game ara ba mit e gosgos ni bay rogon ko milekag ni tay Paul. Yugu boch e tabinaw e kar fal’eged e board game ni bay rogon ko pi n’en ni buch ko fare babyor ko Exodus. Donald ni be’ nu Togo ni 19 e duw rok e yog ni gaar, “Ra ug thilyeged rogon e fol Bible ni gamad ma tay ma gamad ma felfelan’ nib gel.” Gur, rayog ni ngam lemnag reb e ban’en nrayog ni ngam rin’ed chon e tabinaw rom u taabang ya nge yag nim felfelan’gad ko fol Bible ni tabinaw?

BA T’UF NI NGAN FAL’EG ROGOY

Yugu aram rogon ni faan yira thilyeg e pi n’en ni yira fil u nap’an e fol Bible ni tabinaw ma rayog ni nge felfelan’ chon e tabinaw ngay, machane faanra nge yib angin mab t’uf ni ngan fal’eg rogoy. Yu ngiyal’ e ba mo’maw’ ko piin bitir ni ngar pared nga but’ ngar motoyilgad nib n’uw nap’an, ere ba ga’ fan ko fare matam ni nge fal’eg i lemnag e n’en ni ngan fil min fal’eg rogoy nib fel’ rogon. I yog reb e matam ni gaar, “Faan gu ra fal’eg rogog, ma gubin girdien e tabinaw rog nra fel’ rogorad ko fare study.” Reb e matam ni be’ nu Chiyamen e ma yog ngak girdien e tabinaw rok ko mang e yira fil u lan e pi wik ni bay nga m’on. Reb e matam nu Benin ni nel’ e bitir rok e ma yoloy boch e deer ni ir e ra fith ngak girdien e tabinaw rok ni bay rogon ko DVD ni ke mel’eg ni yad ra yaliy ko fol Bible ni tabinaw rorad. Riyul’, ni faan yira fal’eg rogoy ma ra yib angin e fol Bible ngak gubin girdi’ u lan e tabinaw.

Faan ra nang chon e tabinaw e pi n’en ni yad ra fil u m’on riy, ma rayog ni ngar weliyed u m’on, ma yad ra par ni yad ba pasig ngay. Ma faanra gubin chon e tabinaw ni bay ban’en nib milfan ngorad ni ngar rin’ed, ma yad urngin ni yad ra lemnag nriyul’ ni kan yarmiy e re fol Bible ni tabinaw nem ni fan ngorad.

NGAN ATHAMAGIL NGAUN RIN’ NI GUBIN E WIK

Yooren e tabinaw e kar pirieged nib mo’maw’ ngorad ni ngar ted e fol Bible ni tabinaw ni gubin e wik.

Boch e gallabthir e ba t’uf ni ngar fanayed boor e tayim ni ngar maruwelgad ya nge yag e tin nib t’uf ko tabinaw. Bod reb e matam u Mexico ni ma chuw u tabinaw rok ko nel’ e kolok ni kakadbul, ma dar ma sul nga tabinaw nge mada’ ko meruk e kolok ni blayal’. Maku bay yu ngiyal’ nib t’uf ni ngan thilyeg e rofen ni yima tay e Fol Bible ni Tabinaw ni bochan e ra yib e circuit overseer ara ngan tay e district convention.

Yugu aram rogon, machane ba t’uf ni ngad ted e fol Bible ni tabinaw. Lois ni be’ nu Togo ni ragag nge taareb e duw rok e weliy feni ga’ fan e re n’ey ngak chon e tabinaw rok ni gaar: “Yugu aram rogon ni bay yu ngiyal’ ni gamad ma tabab ko fol Bible nib sagaal machane da gur ma paged.” Ere, aram fan ni bay boch e tabinaw ni yad ma tay e fol Bible ni tabinaw u tabolngin e wik. Faanra ke yib reb e magawon nib tomgin, ma rayog ni ngkur thilyeged e rofen ni yad ma tay e fol Bible riy.

Mang fan e re yaram ney ni yima yog e “fol Bible” ni tabinaw ngay? Bochan ni ireray bang ko liyor rodad ku Jehovah. Urngin girdien reb e tabinaw e rayog ni ngar ‘pininged e sorok’ ngak Jehovah u gubin e wik. (Hos. 14:2, ftn.) Urngin chon e tabinaw ni ngar felfelan’gad ko fol Bible ni tabinaw ni yad ma tay ya ‘felfelan’ ni ma pi’ Somol ngorad e bay i pi’ gelngirad.’​—Neh. 8:9, 10.