Kan Fil Rogon Ni Ngan Rin’ E Tin Nib M’agan’ Jehovah Ngay

“Mu fil rogon ngog ni nggu rin’ e tin nib m’agan’um ngay, ya gur e Got rog.”​—PSALM 143:10.

1, 2. (a) Wuin e susun ni ngan fil ban’en ngodad, ma mang fan? (b) Mang fan ni ri baga’ fan ni nge fil Jehovah ban’en ngodad?

U gubin e rran ni be par be’ nib fas ma rayog ni ngan fil ban’en nib fel’ ngak. Aram rogom maku arrogon yugu boch e girdi’. Machane mang e ma buch u nap’an nra yim’ be’? Dabiyog ni ngan fil ban’en ngak ma dabiyog ni nge nang fan ban’en. Be tamilangnag e Bible ni piin ni kar m’ad e “dariy e chi n’en ni yad manang.” Dariy e llowan’ u Sheol ni low ko yam’. (Eklesiastes 9:5, 10) Faanra er rogon me ere mm’ay fan ni ngan fil ban’en nge yoor e llowan’ fa? Aram e ngan tor ko pi n’en ni kan fil ngodad nge uw rogon ni gad ra maruweliy e re llowan’ nem.

² Faanra ke mus ni tin nu fayleng ban’en e kan fil ngodad ma aram e dariy e athap rodad ko gabul nge langleth. Machane kan falfalan’ ya bokum milyon e girdi’ u gubin e nam e yibe fil ngorad e tin nib m’agan’ Got ngay ma yad be athapeg e yafas ni manemus. Fan ni yad ma athapeg e re n’em ya Jehovah e be fil ban’en ngorad ma ir Tapgin e llowan’ ni ma pi’ e yafas.​—Psalm 94:9-12.

3. (a) Mang fan ni yima yog ni Jesus e bin som’on e student rok Got? (b) Mang e kan micheg ni Jehovah e ra fil ban’en ko girdi’, ma mang wenegan nra yib riy?

³ Bin som’on e student rok Got e aram e bin nganni i Fak, ma kan fil ngak ni nge rin’ e tin nib m’agan’ Got ngay. (Proverbs 8:22-30; John 8:28) Ma aram me tamilangnag Jesus ni Chitamangin e ra fil ban’en ngak bokum i bokum e girdi’. Ma mang e be athapeg e piin ni ke fil Got ban’en ngorad? I gaar Jesus: “Pi profet e ra yoliyed ni lungurad, Got e bayi machibnag urngin e girdi’. Urngin e piin nrung’aged e thin ko en ni Chitamangiy me mit e tin ni ke yog ngorad e bay ra bad ngog . . . Nggog e tin riyul’ ngomed: ni en ni kug mich u wan’ e ke yog e yafos ndariy n’umngin nap’an ngak.”​—John 6:45-47.

4. Uw rogon ma bokum milyon e girdi’ e be un ko machib nib thothup, ma mang e yad be athapeg?

⁴ Pi thin nem ni yog Jesus e ke fek ko Isaiah 54:13, ma kan nog ngak e ppin rok Got ni be yip’ fan Zion nu tharmiy. Ma re thin ko profet nem e bay fan ko piin ni pi fak e re ppin nem ni aram fa 144,000 i gachalpen Jesus Kristus ni kan dugliyrad ko kan ni thothup. Boch e pi fak nem nib spiritual e ka yad ba fas e chiney ma yad be mon’eg e machib u gangin e fayleng. Ma aram e bay bokum milyon e girdi’ ni yad ba “ulung nib baga’” ni be fil Jehovah ban’en ngorad ma be yib angin ngorad. Yad ba lingagil ya rayog ni nggura filed ban’en ma dabkura m’ad biid. Uw rogon? Ya rayog ni ngar magaygad nib fas u nap’an fare “gafgow nib baga’” ni be chugur iyib ma rayog ni ngar pared u paradis u fayleng ndariy n’umngin nap’an.​—Revelation 7:9, 10, 13-17.

Ngan Ga’nag Fan ni Ngan Rin’ e Tin nib M’agan’ Got Ngay

5. (a) Mang kenggin e thin ko duw ni 1997? (b) Susun uw rogon u wan’dad e pi muulung ko Kristiano?

⁵ Nap’an e 1997 ma boor ko 80,000 e ulung u gangin e fayleng ma Pi Mich Rok Jehovah e ra fl’eg i lemnag e tin som’on e thin ko Psalm 143:10 ni begaar: “Mu fil rogon ngog ni nggu rin’ e tin nib m’agan’um ngay.” Aram kenggin e thin ko duw ni 1997. Pi thin nem e ran tay nib lingagil u lan e pi Kingdom Hall ma ra pugurannag ngak e girdi’ ni aram e gin nth’abi fel’ ni ngan fil e tirok Got ban’en riy. Nap’an ni gad ra un ko pi walagdad ko pi muulung ni nge fil fare Sensey nib Ga’ ban’en ngodad, ma rayog ni ngad lemnaged ni bod e en ni ke yoloy e psalm ni ke gaar: “Gu falfalan’ nnap’an ni lungurad ngog: ‘Nga darod ko naun rok Jehovah.’”​—Psalm 122:1; Isaiah 30:20.

6. Mang thin ni yog David ni gad ma un ngay?

⁶ Arrogon, gad ba adag ni ngan fil ngodad rogon ni ngad rin’ed e tin nib m’agan Got ngay ma gathi tin nib m’agan’ e toogor rodad ngay ni fare Moonyan’ fa tin nib m’agan’ e girdi’ ngay. Ere ngad boded David ni ma tay fan Got ma ma liyor ngak ma ma pigpig ngak ya ke gaar: “Yi gur e Got rog. Rib fel’ e kan ni thothup rom; ma nge pow’iyeg nggu un ko gin nib mat’aw.” Dabun David ni nge un ko piin ni ma malulfith l’iginrad, ma ba adag ni nge par ko gin ni yima liyor ku Jehovah riy. (Psalm 26:4-6) Kan ni thothup rok Got e ke pow’iy e yan rok David ma aram e ke yog ni nge par ko kanawo’ nib mat’aw.​—Psalm 17:5; 23:3.

7. Uw rogon ni ke ayuweg e kan ni thothup rok Got e ulung ko Kristiano?

⁷ Jesus Kristus ni ir David ni Ga’ e ke micheg ko pi apostal ni fare kan ni thothup e ra fil urngin ban’en ngorad ma ra yibnag ngan’rad urngin e tin ni ke yog ngorad. (John 14:26) Ka nap’an Pentekost iyib ngaray ma be tamilangnag Jehovah iyan e “tin nib toar i fan e thin rok” ni bay ko Thin Rok. (1 Korinth 2:10-13, NW) Ke rin’ e re n’ey u daken e piin ni ke yog Jesus ni yad “fare tapigpig nib yul’yul’ mab gonop.” Yad ma pi’ e ggan nib spiritual ni yibe weliy u lan e pi ulung ko girdien Got u gangin e fayleng.​—Matthew 24:45-47.

Nap’an e Pi Muulung Rodad ma Yibe Fil e Tin nib M’agan’ Jehovah Ngay

8. Mang fan nib baga’ fan ni ngan un ko Watchtower Study?

⁸ Baga’ ni yima fil e pi motochiyel ko Bible u nap’an e muulung ni Watchtower Study u gubin e wik ko ulung. Ma ma ayuwegdad ngad athamgilgad ko pi magawon ko par. Ma ka bay yugu boch e muulung ma yibe fil e thin ko profet ko Bible ara boch e thin nib spiritual mab riyul’. Ri boor ban’en ni gad be fil ko pi muulung nem! U boor e binaw ma kari sug lan e Kingdom Hall ko girdi’ u nap’an e pi muulung nem. Machane bay boch e binaw ni be lich iyan oren e girdi’ ni ma un ko muulung. Mang e ga be lemnag ko mang fan e re n’em? Sana boch e girdi’ e be pag ni maruwel rorad e be talegrad ndabkura uned ko muulung ni “nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak” fa? Fa boch e girdi’ e boor e awa ni yad ma tay ko fafel fa mayal t.v. ma aram e dabiyog ni ngar uned ko urngin e muulung fa? Ngam lemnag e thin ni kan thagthagnag ni bay ko Hebrews 10:23-25. Gad be “guy ni Chirofen ni bay yib Somol riy e be chugur” me ere gathi rib baga’ fan ni ngad muulungad u taabang ni ngad filed ban’en nib thothup fa?

9. (a) Uw rogon nra ayuwegdad fare Service Meeting ko machib? (b) Susun uw rogon u wan’dad ni ngan machibnag e girdi’?

⁹ Ban’en nib mil fan ngodad e ngad pigpiggad ku Got ni gadad e pi tamachib. Fare muulung ni Service Meeting e be fil ngodad rogon ni ngad rin’ed e re n’ey ma bay angin riy. Gad ma fil ko uw rogon ni ngad nonad ko girdi’, nge n’en ni gad ra weliy, nge mang e gad ra rin’ nfaanra ba adag be’ e machib, nge n’en ni gad ra rin’ nfaanra togopuluw e girdi’ ko thin ni gad ma wereg. (Luke 10:1-11) Yima tay e re muulung ney u gubin e wik ma yibe demonstratnag boch ban’en nrayog ni ngad rin’ed ma aram e ke fl’eg rogodad ni ngad machibnaged e girdi’ u mit e tabinaw iyan ngu kanawo’, nge parking lot, nge bus, nge skojo, nge kantin nge ofis, nge skul. Gad be yog ku Got e pi thin ney ni gaar: “Mu fil rogon ngog ni nggu rin’ e tin nib m’agan’um ngay,” me ere bpuluw ni gubin ngiyal’ ma ngad folgad ko n’en ni yog e Masta rodad ni gaar: “Nge gal raamed u p’eowchen e girdi’, ya ngar . . . rogned e sorok ngak e Chitamangimed ni bay u tharmiy.”​—Matthew 5:16.

10. Uw rogon nrayog ni ngad ayuweged e ‘piin ni ba adag e machib’?

¹⁰ Ma pi muulung nem ko ulung e be fil ngodad ni ngad ayuweged e girdi’ ngar manged pi gachalpen Jesus. Nap’an ni kad pirieged be’ ni ba adag e machib fa kad pied e babyor ku be’ ma susun ni ngad sulod ngak ma gad nameg ni ngad tababnaged e Bible study. Taareb rogon e re n’em ko n’en ni rin’ e pi gachalpen ni ‘kar pired rok be’ ni ba adag e machib’ ni fan ni ngar filed ngorad e pi n’en ni tay Jesus chilen. (Matthew 10:11, NW; 28:19, 20) Bay boor boch ban’en ni ma ayuwegdad riy ni bod fa ke babyor ni Knowledge That Leads to Everlasting Life ere ke bung rogodad ni ngad lubeged e machib rodad nib fel’ rogon. (2 Timothy 4:5) Nap’an ni ngam un ko muulung ni Service Meeting nge Theocratic Skul u gubin e wik ma ga athamgil ni ngam nang fan e n’en ni yibe weliy nge mu’ ma ga fanay ni ngam pining e sorok ku Got ni gur reb e pi tamachib ni ke bung rogom, ma ga be rin’ e tin m’agan’ Got ngay.​—2 Korinth 3:3, 5; 4:1, 2.

11. Uw rogon ni dag boch e girdi’ ni ke michan’rad ko pi thin ni bay ko Matthew 6:33?

¹¹ Mm’agan’ Got ngay ni “nguuda m’oneged u wan’dad e gagiyeg rok Got nge tin nib mat’aw ban’en.” (Matthew 6:33, NW) Mu fithem, ‘Uw rogon ni nggu fol ko re n’ey nfaanra thingar gu un ko maruwel [ara ani mabgol rog] ma dabkiyog ni nggu un ko urngin e muulung?’ Piin nib ilal ko tirok Got ban’en e ra weliy ko ani ga’ u tabon e maruwel rorad u morngaagen. Bay reb e pioneer ni ke weliy ko ani ga’ ko maruwel ni ba t’uf ni nge un ko pi muulung u gubin e wik ere dabkun pi’ e maruwel ngak ko ngiyal’ nem. Ma ke fel’ u wan’ fa ani ga’ ko maruwel. Ma ba adag ni nge nang ko mang e ma buch u nap’an e pi muulung nem ere ke fith ko rayog ni nge un ngay. Mu rom ma kan announcenag u morngaagen reb e muulung ni district convention ni bay un ta’ nga m’on. Ma aram me un ko re convention nem ko reb e rran. Mang e ga be fil ko re n’ey?

Pi Gallabthir ni Ma Fol rok Got e Ma Fil e Tin nib M’agan’ Jehovah Ngay ko Bitir Rorad

12. Susun mang e nge rin’ e piin gallabthir u fithik’ e gum’an nge yul’yul’ ni ngar filed ko bitir rorad ni ngar rin’ed e tin nib m’agan’ Jehovah ngay?

¹² Pi muulung ko ulung nge pi convention e gathi ke mus ni aram e tin nra fil rogon ni ngan rin’ e tin nib m’agan’ Got ngay. Piin gallabthir ni ma fol rok Got e kan tay chilen ngorad ni ngar skulnaged, mar fonownaged, mar chugliyed e pi bitir rorad ni ngar pininged e sorok ku Jehovah mar rin’ed e tin nib m’agan’ ngay. (Psalm 148:12, 13; Proverbs 22:6, 15) Ngan rin’ e re n’ey ma ba t’uf ni nge un e pi bitir rodad ni ba achig ko pi muulung ya rayog ni ngar ‘motoyilgad mar filed ban’en’ riy’ maku uw rogon ni ngan fil e thin nib thothup ngorad u tabinaw? (Deuteronomy 31:12; 2 Timothy 3:15) Boor e tabinaw ni kar yul’yul’gad mar tababnaged i fil e Bible u taabang, machane ke munmun ma dakun rin’. Aram e n’en ni buch ngomed fa? Kam lemnag ni kayigi pag rogon ni kan motochiyelnag ni ngam filed e Bible u taabang u gubin ngiyal’ fa kam lemnag ni dabi m’ag ngomed? Yugu demtrug ko mang ma gimed e gallabthir e nga mu bieged e thin ni bay ko The Watchtower ko August 1, 1995 ko pi ariticle ni “Our Rich Spiritual Heritage” nge “The Rewards of Persistence.”

13. Mang angin nra yib ko pi tabinaw nfaanra yad ra poy e daily text?

¹³ Yibe pining e pi tabinaw ni ngar filed fare babyor ni Examining the Scriptures Daily u gubin e rran. Manigil ni ngan poy e thin riy min weliy boch, machane kub fel’ ni ngan tamilangnag e thin riy min weliy ko uw rogon ni ngan fol riy. Susun, faanra yibe fil e thin ko Efesus 5:15-17, ma rayog ni ngan lemnag ko uw rogon ni ngar ‘gayed rogon ni ngar maruwelgad ngay ni fan ko tin nib fel’’ ma aram e ngar gayed rogon ni ngar filed e Bible, mar uned ko machib nib full-time mar fl’eged e n’en ni kan nog ngorad ko ulung. Arrogon, rayog ni nge puruy e tabinaw u morngaagen e daily text ma aram min “guy rogon ni ngan nang e n’en nib m’agan’ Jehovah ngay ni ngan rin’.”

14. Rogon ni yog ko Deuteronomy 6:6, 7 ma susun uw rogon ni nge skulnag e piin gallabthir e pi bitir rorad, ma mang e ba t’uf riy?

¹⁴ Piin gallabthir e thingara yul’yul’gad ngar machibnaged e pi bitir rorad. (Deuteronomy 6:6, 7) Machane gathi ke mus ni ngar fonownaged yad fa ra tay chilen boch ban’en ngorad. Ya ba t’uf ko ani matam nge ani matin ni ngar motoyilgad ngorad, ma aram mi yad nang ko mang e ba t’uf ni ngar weliyed ngorad fa ngar tamilangnaged, fa ngar sulod nga daken. U reb e tabinaw ni Kristiano ma ma fith e gallabthir ko bitir rorow ni ngar fithed boch e deer u morngaagen e pi n’en ni dawori tamilang u wan’rad fa be magawon lanin’rad ngay. Ere kar nangew ni reb e bitir rorow ni pagal mab fel’ yangaren e dawori tamilang u wan’ ni dariy tabolngin Jehovah. Ere ke fanay e gallabthir rok e thin ni bay ko boch e babyor ko Watch Tower Society mar dagew ngak ni ku arrogon e tayim nge space ma dariy tabolngin. Ma aram me tamilang u wan’ facha’. Ere faanra bay e deer ko bitir rom ma ga fulweg nib tamilang mu fanay e thin ko Bible ma ga ayuwegrad ngar nanged ni rayog e falfalan’ ngorad ni ngar filed rogon ni ngar rin’ed e tin nib m’agan’ Got ngay. Ku mang boch ban’en ni be fil e girdi’ rok Got​—ni piin fel’ yangaren nge piin nib ilal​—ko ngiyal’ ney?

Yibe Fil ni Un T’ufegey Nge Rogon ni Un Cham

15. Uw rogon ni ran skengnag rogon ni ba t’uf rodad e pi walagdad?

¹⁵ Gad be fil e n’en ni tay Jesus chilen ni ‘ke fil Got ngodad rogon ni nguuda pired nib t’uf bagadad rok bagadad.” (1 Thessalonika 4:9) Nap’an ni dariy e magawon rodad ma gad ma lemnag ni rriyul’ nib t’uf rodad urngin e pi walagdad. Machane nge diin u nap’an ni sum e magawon u thildad be’ fa ke kireban’dad ni bochan ban’en ni yog fa ban’en ni rin’ reb e Kristiano? Aram e ngiyal’ ni yibe skengnag e t’ufeg rodad. (Mu taarebnag ko 2 Korinth 8:8.) Mang e be fil e Bible ngodad ni ngad rin’ed? Reb e ngad athamgilgad ni ngad daged e t’ufeg nib elmirin. (1 Peter 4:8) Ere dabda lemnaged e tin ni gad ba adag ma dabda puwan’gad ni bochan ban’en ni yugu dariy fan, ma dabda pared ni yugu gad be lemnag e kireb ni kan rin’ ngodad, ya susun ni ngad athamgilgad ni ngad paged e t’ufeg nge upunguy boor e denen. (1 Korinth 13:5) Gad manang ni aram e n’en nib m’agan’ Got ngay, ya aram e n’en ni be fil e Thin Rok.

16. (a) Miti mang cham e yibe fil ko pi Kristiano? (b) Uw rogon e talin e cham rodad?

¹⁶ Boor e girdi’ e dabra lemnaged nib peth e t’ufeg ko cham, machane yibe fil ngodad e re n’em, ma yugub mit e cham. I nang David ni thingari fil Jehovah ngak rogon ni nge un ko cham, ma ngiyal’ nem ma ba muun ngay ni nge cham ko pi toogor rok Israel. (1 Samuel 17:45-51; 19:8; 1 Kings 5:3; Psalm 144:1) Ma uw rogon e cham ni gad be tay ko ngiyal’ ney? Talin e cham rodad e gathi talin e cham nu fayleng. (2 Korinth 10:4) Ya cham rodad e ba spiritual, ma ba t’uf rodad e talin e cham nib spiritual. (Efesus 6:10-13) U daken e Thin Rok nge ulung rok ma ma fil Jehovah ngodad rogon ni ngad gelgad ko cham nib spiritual.

17. (a) Mang boch ban’en ni ma fanay Moonyan’ ni nge chafegdad? (b) Bay e gonop riy ni ngad siyeged e mang?

¹⁷ Ba sasalap Moonyan’ ma ma wawliydad ko pi n’en ko fayleng nge pi apostate nge pi tatogopuluw ko thin riyul’ ni fan ni nge chafegdad ngad tedan’dad ko tin yugu dariy fan. (1 Timothy 6:3-5, 11; Titus 3:9-11) Ma gowa manang ni dabiyog ni nge gel ngodad ko togopuluw nib tamilang me ere ma guy rogon ni nge n’igin ngad wargad ma gad gun’gun’ ma gad fith boch e deer ni yugu dariy fan, ma dariy rogon ko tin nib spiritual ban’en. Susun ni ngad pared ni gad e salthaw ni be changar, ma aram e gad ra poy e riya’ ni aram rogon ni bod rogon ni gad ma poy e togopuluw ni ma yib nga p’eowchedad.​—1 Timothy 1:3, 4.

18. Uw rogon ni dabkuda pared ni gad be yan nga tabon lanin’dad?

¹⁸ Dabda m’oneged e pi n’en ni ba adag e girdi’ fa tin ni be nameg e pi nam. U daken e kanawo’ ni tay Jesus ma ke fil Jehovah ngodad ni thingar dabda pared ni gad be yan nga tabon lanin’dad ya ngad pared ni gad be yan ngan’ Jesus Kristus ma gad par ni fan ni ngad rin’ed e tin m’agan’ Got ngay. (2 Korinth 5:14, 15) Kafram ma kad pared ni gad be rin’ boch ban’en nib pag rogon ma dariy fan e motochiyel u wan’dad, ma gad be adbey e tayim rodad. Re fayleng ney nib kireb e ma un ko mur nib pag rogon, nge muun rum ni yibe tagengig riy, nge ngongol ndangal. Machane chiney ma yibe fil ngodad ni ngad rin’ed e tin nib m’agan’ Got ngay, me ere gad ba falfalan’ ni gad be par nib dar ko re fayleng ney fa? Ere nguud uned ko cham nib spiritual ma ngad siyeged i un ko pi ngongol nib alit ko fayleng.​—1 Peter 4:1-3.

Yibe Fil Ngodad Rogon nra Yib Angin Ngodad

19. Mang angin nra yib ngodad nfaanra ran fil ngodad ni ngad rin’ed e tin nib m’agan Jehovah ngay ma gad fol riy?

¹⁹ Baga’ fan ni ngad nanged ni ra yib angin ngodad ni faanra gad ra fil rogon ni ngad rin’ed e tin nib m’agan’ Jehovah ngay. Ma thingarda athamgilgad riy ma ngad tedan’dad ngay ni ngad filed ban’en nge mu’ ma gad fol ko n’en ni ke yog Got u daken e en ni Fak ngu daken e Thin Rok, ngu daken e ulung rok. (Isaiah 48:17, 18; Hebrews 2:1) Faanra gad ra yodoromnag ma aram e ra gelnagdad ma gad ra par nib mudugil ko ngiyal’ ney nib kireb nge ngiyal’ nga m’on ni ra bod ni ke yib e yoko’. (Matthew 7:24-27) Mus ko chiney ma ma felan’ Got ngodad ni ngad rin’ed e tin nib m’agan ngay ma aram mab mutrug ni ra fulweg taban e meybil rodad. (John 9:31; 1 John 3:22) Ma gad ra nang e bin riyul’ e falfalan’.​—John 13:17.

20. Mang e ngad fl’eged i lemnag u nap’an ni gad ra guy fare thin ni kenggin e duw ni 1997?

²⁰ Nap’an e 1997 ma rayog ni ngad sulod nga daken e pi thin ko re duw ney ni bay ko Psalm 143:10 ni begaar: “Mu fil rogon ngog ni nggu rin’ e tin nib m’agan’um ngay.” Ma nap’an ni gad be fol ko re n’ey ma ngad ted ba ngiyal’ ni ngad fl’eged i lemnag u morngaagen e pi n’en ni ke pi’ Got ngodad ni fan ni nge fil ban’en ngodad. Ma ngad fl’eged i lemnag e pi thin nem me k’aringdad ni ngad folgad riy, ma dabda paged talin ni “en nra rin e tin nib m’agan’ Got ngay e ra par nib fos ndariy n’umngin nap’an.”​—1 John 2:17.

Uw Rogon ni Ngam Fulweg?

◻ Mini’ ko ngiyal’ ney e yibe skulnagrad ni ngar rin’ed e tin nib m’agan Jehovah ngay?

◻ Susun mang e gad ra rin’ u nap’an e duw ni 1997 ni bochan e pi thin ni bay ko Psalm 143:10?

◻ Uw rogon ni yibe fil ngodad ni ngad rin’ed e tin nib m’agan Jehovah ngay?

◻ Mang e ba t’uf ni nge rin’ e pi gallabthir ni Kristiano ni ngar filed ban’en ko pi bitir rorad?