Ba Mich Jesus u Wan’ e Pi Mich Rok Jehovah, Fa?

BA T’UF NI NGE MICH JESUS U WAN’UY

Anthony: Ke uw rogom Tim? Rib manigil ni kud mada’gow bayay.

Tim: Kug felfelan’ ni kad mada’gow.

Anthony: Baaray reb e Wulyang ko Damit nge Awake! ni kab beech ni kug fek ni ngam beeg. Gu manang ni ga ra felfelan’ ko pi article ni bay riy.

Tim: Kammagar. Kug felfelan’ ni ke yag ni nga mub e daba’ ya bay ban’en ni gu baadag ni nggu fithem riy.

Anthony: Mang e re n’ir?

Tim: Fa binem e rran ni ug nonow be’ ni gamow nga maruwel, mug weliy ngak murung’agen e pi babyor ney ni ga ma pi’ ngog nge rogon nrib fel’ e pi thin ni bay riy. Machane, me yog ngog ni dab kug beeg e pi babyor ney ya Pi Mich Rok Jehovah e de mich Jesus u wan’rad. Riyul’ e re n’em? Ku gog ngak ni yay ni migid ni gadow ra mada’ ma gu ra fithem ko re n’ey.

Anthony: Kug felfelan’ ngay ni kam fith e re n’ir ngog. Mab manigil ni ngam fith e en ni ke pi’ e babyor ngom. Bin riyul’ riy e faanra ga baadag ni ngam nang e n’en nib mich u wan’ be’ mab fel’ ni ngam fith.

Tim: Aram e n’en ni gu be lemnag.

Anthony: Bin riyul’ riy e Pi Mich Rok Jehovah e ba mich Jesus u wan’rad. Mab mich u wan’mad ni faan gamad ra maruweliy e michan’ romad ngak Jesus ma ra yag e yafas ni manemus ngomad.

Tim: Gu be lemnag nib mich Jesus u wan’um, machane nap’an ni yog e cha’ nem ni gamow ma maruwel u taabang nde mich Jesus u wan’um, ma aram e ke maruwar u wan’ug. Gu be lemnag ni dawor da weliyew murung’agen e re n’em nib fel’ rogon.

Anthony: Rayog ni nggu dag boch e thin nu Bible ngom ni be tamilangnag feni rib ga’ fan ni ngan maruweliy e michan’ rodad ngak Jesus? Ireray boch e thin nu Bible nib ga’ ni ma fanay e Pi Mich Rok Jehovah u nap’an e machib.

Tim: Arrogon.

Anthony: Som’on e ba fel’ ni ngad guyew reb e thin ni yog Jesus ni bay ko John 14:6. Pi thin ney e boch ban’en ni weliy Jesus nge reb e apostal rok. Be gaar e re thin ney: “Me fulweg Jesus ngak ni gaar, ‘I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.’” Rogon ni be tamilangnag e re thin nir, mang e bin nib puluw e kanawo’ me yag ni ngan yan ngak e En Chitamangiy?

Tim: U daken Jesus.

Anthony: Arrogon. Ireray e n’en nib mich u wan’ e Pi Mich Rok Jehovah. Am son nggu fithem: Bochan ni kam nang murung’agen e pi n’en nib t’uf ni ngad rin’ed ku Got, ere nap’an nra meybil be’, ma susun u daken mini’ e nge meybil riy?

Tim: U daken fithingan Jesus.

Anthony: Arrogon. Aram fan ni gu ra meybil ma gu ma meybil u daken fithingan Jesus. Ma urngin e Pi Mich Rok Jehovah e aram e n’en ni yad ma rin’.

Tim: Rib manigil ni kug nang e re n’ey.

Anthony: Ku reb e thin u Bible ni gadow ra weliy murung’agen e bay ko John 3:16. Re thin ney e rib ga’ fan, ma boor e girdi’ ni yad ma yog ni aram reb e Gospel. N’en ni be yip’ fan e re n’ey e gubin ban’en u murung’agen e yafos rok Jesus u nap’an ni immoy u roy e fayleng nge rogon e machib ni i tay, e bay rogon ko re thin nem. Dabisiy ni ga baadag ni ngam beeg e re thin ney.

Tim: Rayog. Be gaar: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”

Anthony: Kammagar. Kaam rung’ag e re thin ney?

Tim: Arrogon, ke yoor yay ni kug rung’ag e re thin ney, ba ga’ ni gu ma guy ni kan gabdiy ko yungi n’en nrayog ni nge guy e girdi’.

Anthony: Re thin ney e ba ga’ ni yooren e girdi’ e manang. Ga ra beeg nib fel’ rogon, ma ga ra guy e n’en ni be yog Jesus. I yog ni bochan nib t’uf e girdi’ rok Got ma ireray fan nrayog e yafos ni manemus ngodad machane mang e n’en nib t’uf ni ngad rin’ed?

Tim: Ba t’uf ni ngad maruweliyed e michan’.

Anthony: Arrogon. Ba ga’ ni ngad maruweliyed e michan’ rodad ngak Jesus Kristus ni ir e bin nganni’ i Fak Got. Bochan ni ke mich Jesus u wan’uy, ma re n’ey e ke bing e kanawo’ u rogon ni nge yag e yafos ni manemus ngodad, ma ireray e n’en ni be weliy ko page 2 ko re magazine ney. Fan fare Wulyang ko Damit e nge “mon’ognag e michan’ rodad ngak Jesus Kristus, ni yim’ ni bochan e nge yag e yafas ni manemus ngodad, ma ir e be gagiyeg e chiney ni ir e Pilung u Gil’ilungun Got.”

Tim: Arrogon. Fare magazine ni kug pi’ ngom e be micheg nib mich Jesus u wan’ e Pi Mich Rok Jehovah.

Anthony: Arrogon.

Tim: Ere, mang fan ni ma yog e girdi’ nder mich Jesus u wun’med?

Anthony: Dabisiy ni boor fan ni ma yog e girdi’ e re n’em. Boch e girdi’ e yad ma yog nde mich Jesus u wan’ e Pi Mich Rok Jehovah ni bochan ni aram e pi n’en nib ga’ ni ma yog boch e girdi’. Fa aram e n’en ni ma yog e padrey ara reb e tayugang’ ko teliw rorad.

Tim: Gu ma lemnag ni dabisiy ni ma yog boch e girdi’ nder mich Jesus u wun’med ni bochan e gimed ma yog ni gimed e Pi Mich Rok Jehovah, ma gathi Pi Mich Rok Jesus.

Anthony: Sana ku ireram reb i fan.

Tim: Mang fan ni gimed ma weliy murung’agen Jehovah ni gubin ngiyal’?

“NGAN TAYFAN FITHINGAM NIB THOTHUP”

Anthony: Reb i fan nib mich u wan’mad nib ga’ fan ni ngan fanay fithingan Got ni aram Jehovah e bochan ni aram e n’en ni rin’ Jesus ni Fak. Ngad guyew ko uw rogon ni ke pi’ Jesus e athamgil nga laniyan’ pi gachalpen ni ngar meybilgad. Re n’ey e bay ko Matthew 6:9. Rayog ni ngam beeg e re thin ney?

Tim: Rayog. “Chitamangimad ni ga bay u tharmiy: Ngan tay fan fithingam nib thothup.”

Anthony: Kammagar. Kad guyed ni ke yog Jesus ni ngan tayfan fithingan Got nib thothup. Mang fan ni ke yog Jesus e re n’em?

Tim: Dagnang ko mang fan.

Anthony: Sana rayog ni ngkud guyew yugu reb e thin nu Bible ni ku rayog ni nge tamilangnag e re n’ey. Fare thin ni gu be lemnag e bay ko Acts 2:21, ni be gaar: “Cha’ nra pining fithingan Somol ni nge ayuweg e ra fos.” Ere, chiney e kug nang nib m’agan’um ngay ni faanra nge yag e yafas ni manemus mab t’uf ni ngan pining fithingan Jehovah, maku dabisiy ni manang Jesus e re n’ey.

Tim: Arrogon.

Anthony: Ere, bochan ni kan pithigdad ko denen nge yam’, ma ireram reb i fan nib ga’ fan ngak Jesus ni nge nang pi gachalpen fithingan Got ma ngaur rogned. Maku ireram fan ni gamad ma weliy murung’agen Jehovah ni gubin ngiyal’. Gamad manang nib ga’ fan ni ngan weliy fithingan Got ngan nang, ma gamad be ayuweg e girdi’ ni ngkur pininged e re ngachal nem.

Tim: Machane yugu aram rogon nde nang e girdi’ fithingan Got ara ra fanayed, ma nap’an ni yad ra weliy murung’agen Got ma kar nanged ko mini’ e yad be weliy murung’agen.

Anthony: Sana riyul’ e re n’ir ni ga be yog. Machane bochan ni ke yog Got fithingan ngodad, ma ke n’igin ni nge mom ngodad ni ngad chugurgad ngak.

Tim: Mang fan e re n’ir ni ka mog?

Anthony: Mu lemnag e re n’ey: De t’uf ni ngad nanged fithingan Moses. Rayog ni kemus ni ngad nanged ni ir e en ni ruw raba’nag fare Red Sea, ara ir e en nni pi’ fa Ragag i Motochiyel ngak. Ku taareb rogon ngak Noah, mang fan nib ga’ fan ni ngan nang fithingan? Rayog ni kemus ni ngan nang ni ir e en ni ke toy fare arke, maku ir e en ni ke ayuweg chon e tabinaw rok nge fapi gamanman ni nge dab ra m’ad. Ku arrogon Jesus Kristus ni ku rayog ni ngad lemnaged ni kemus ni ke yib u tharmiy nga but’ ni nge yim’ ni fan ko denen rodad, fa?

Tim: Gu be lemnag ni arrogon.

Anthony: Machane Got e ke n’igin ni ngad nanged fithingan urngin e pi girdi’ nem. Ya faan gad ra nang fithingan e pi girdi’ nem, ma pi n’en ni ur rin’ed e ra riyul’ u wan’dad. Ma yugu aram rogon ndawor da mada’naged chon Moses nge Noah ara Jesus, machane bochan ni kad nanged fithingrad ma aram fan ni ke riyul’ u wan’dad.

Tim: Da ug lemnag ni aray rogon, machane riyul’ e re n’ir!

Anthony: Maku ireram reb i fan ni gubin ngiyal’ ni ma fanay e Pi Mich Rok Jehovah fithingan Got. Gamad baadag ni nggu ayuweged e girdi’ nge gel e michan’ rorad ngak Jehovah Got, ya ir Be’ nib riyul’ nrayog ni ngad chuchugurgad ngak. Maku gamad manang ni n’en ni rin’ Jesus e bay rogon ko yafos ni manemus nrayog ngodad. Sana bfel’ ni ngkud guyew taareb e thin u Bible nra tamilangnag e re n’ey.

Tim: Rayog.

Anthony: Som’on e kad beegew e John 14:6, ni be yog Jesus ni ir e ‘kanawo’, me ir e tin riyul’, me ir e yafos.’ Ere ngkud sulow nga tomur ngad beegew boch e thin ni bay ko John 14:1. Rayog ni ngam beeg e n’en ni yog Jesus u tungun e re thin nem?

Tim: Rayog. Be gaar: “Mpagedan’med ngak Got, mi ki gimed pagan’med ngog.”

Anthony: Kammagar. Ere uw rogon u wan’um, ga be lemnag nib gaman ni faanra kemus ni nge mich Jesus u wan’uy, fa kub t’uf ni nge mich Jehovah u wan’uy?

Tim: Danga’. Ya be yog Jesus ni yow l’agruw nib t’uf ni nge mich u wan’dad.

Anthony: Arrogon. Gu manang nib m’agan’um ngay ni gathi kemus ni nga nog nib mich Got nge Jesus u wan’uy. Riyul’ nib t’uf ni nge gubin ngiyal’ ni ngad ngongolgad ni be m’ug riy nib mich Jesus nge Jehovah u wan’dad.

Tim: Arrogon.

Anthony: Machane, uw rogon ni nge dag be’ nriyul’ nib mich Jesus nge Got u wan’? Sana rayog ni ngad weliyew murung’agen e re n’ir ko yay ni migid.a

Tim: Bfel’ e re n’ir ni ka mog.