Ìgbà Kan Ń Bọ̀ Tí Ò Ní Sí Ìkórìíra Mọ́!
Tá a bá tiẹ̀ mú ìkórìíra kúrò lọ́kàn wa, kò sí bá a ṣe lè fipá mú àwọn èèyàn tó wà láyìíká wa láti yí ìwà wọn padà. Torí náà, wọ́n á ṣì máa fìyà jẹ àwọn aláìmọwọ́mẹsẹ̀. Báwo wá ni ìkórìíra ṣe máa dópin?
Jèhófà Ọlọ́run nìkan ló lè fòpin sí ìkórìíra, tó bá sì fòpin sí i, a ò ní gbúròó ẹ̀ mọ́ láé. Bíbélì jẹ́ ká mọ̀ pé ohun tí Ọlọ́run máa ṣe gẹ́lẹ́ nìyẹn.—Òwe 20:22.
ỌLỌ́RUN MÁA MÚ OHUN TÓ Ń FA ÌKÓRÌÍRA KÚRÒ PÁTÁPÁTÁ
1. SÁTÁNÌ ÈṢÙ. Ọlọ̀tẹ̀ ni Sátánì, òun ló sì wà nídìí báwọn èèyàn ṣe ń kórìíra ara wọn lónìí. Ọlọ́run máa pa Sátánì run, títí kan gbogbo àwọn tó lẹ́mìí ìkórìíra bíi tiẹ̀.—Sáàmù 37:38; Róòmù 16:20.
2. AYÉ TÍ ÈṢÙ Ń DARÍ. Ọlọ́run máa mú ìwà ibi kúrò, á sì pa gbogbo àwọn ẹni ibi run, irú bí àwọn olóṣèlú jẹgúdújẹrá àtàwọn aṣáájú ẹ̀sìn tí wọ́n ń ṣe ohun tó mú káwọn èèyàn kórìíra ara wọn. Ọlọ́run tún máa fòpin sí gbogbo ètò ìṣòwò táwọn èèyàn dá sílẹ̀ kí wọ́n lè gba tọwọ́ àwọn aráàlú.—2 Pétérù 3:13.
3. ÀÌPÉ WA. Bíbélì sọ pé gbogbo àwa èèyàn la ti jogún àìpé, ìdí nìyẹn tá a fi ń hùwà tí ò dáa, tá a sì ń ronú lọ́nà tí kò tọ́ nígbà míì. (Róòmù 5:12) Àìpé yìí ló tún ń mú ká di àwọn èèyàn sínú, ká sì kórìíra wọn. Ọlọ́run máa bá wa mú gbogbo ohun tí àìpé ti fà kúrò, ìyẹn á sì mú ká borí ẹ̀mí ìkórìíra títí láé.—Àìsáyà 54:13.
BÍBÉLÌ JẸ́ KÁ MỌ̀ PÉ ÌGBÀ KAN Ń BỌ̀ TÍ Ò NÍ SÍ ÌKÓRÌÍRA MỌ́
1. KÒ NÍ SÍ ÌWÀ ÌRẸ́JẸ MỌ́. Ìjọba Ọlọ́run láá máa ṣàkóso ayé. Ọ̀run ni Ìjọba náà á ti máa ṣàkóso, á sì fòpin sí ìwà ìrẹ́jẹ títí láé. (Dáníẹ́lì 2:44) Kò ní sí ẹ̀tanú mọ́, ṣe ni gbogbo àwọn tó wà láyé máa nífẹ̀ẹ́ ara wọn. Ọlọ́run á sì ṣàtúnṣe gbogbo ohun tí ìwà ìrẹ́jẹ ti fà.—Lúùkù 18:7.
2. GBOGBO ÈÈYÀN MÁA WÀ NÍ ÀLÀÁFÍÀ. Ogun tàbí ìwà ipá ò ní máa fa ìyà fáwọn èèyàn mọ́. (Sáàmù 46:9) Ayé á tura nígbà yẹn, torí gbogbo èèyàn ló máa jẹ́ èèyàn àlàáfíà.—Sáàmù 72:7.
3. ÀWỌN ÈÈYÀN Á MÁA GBÉ AYÈ TÍTÍ LÁE PẸ̀LÚ ÌFỌ̀KÀNBALẸ̀. Gbogbo àwọn tó bá ń gbé ayé máa nífẹ̀ẹ́ ara wọn dénú. (Mátíù 22:39) Àwọn èèyàn ò ní máa ní èrò òdì síra wọn, kò sì ní sẹ́ni táá máa rẹ̀wẹ̀sì torí àwọn ohun tó ti ṣẹlẹ̀ kọjá. (Àìsáyà 65:17) Gbogbo èèyàn á ti bọ́ lọ́wọ́ ìkórìíra nígbà yẹn, inú wọn á sì “máa dùn jọjọ nínú ọ̀pọ̀lọpọ̀ àlàáfíà.”—Sáàmù 37:11.
Ṣó wù ẹ́ kó o wà níbẹ̀ nígbà tí gbogbo nǹkan yìí bá ṣẹlẹ̀? Ká sòótọ́, ọ̀pọ̀ èèyàn lónìí ló ti jẹ́ káwọn ìlànà Bíbélì ran àwọn lọ́wọ́ láti borí ìkórìíra. (Sáàmù 37:8) Ohun táwọn Ẹlẹ́rìí Jèhófà tó wà kárí ayé ń ṣe nìyẹn. Bó tiẹ̀ jẹ́ pé àṣà wọn àti ibi tí wọ́n ti tọ́ wọn dàgbà yàtọ̀ síra, wọ́n wà níṣọ̀kan, wọ́n sì nífẹ̀ẹ́ ara wọn bí ọmọ ìyá.—Àìsáyà 2:2-4.
Ó máa wu àwọn Ẹlẹ́rìí Jèhófà láti jẹ́ kó o mọ àwọn nǹkan tí wọ́n ti kọ́ nípa béèyàn ṣe lè fara dà á tí wọ́n bá ṣàìdáa sí i. Kẹ̀rẹ̀kẹ̀rẹ̀, ohun tó o kọ́ á ràn ẹ́ lọ́wọ́ láti máa borí ìkórìíra, wàá sì máa nífẹ̀ẹ́ àwọn èèyàn. Wàá tún kọ́ bó o ṣe lè máa hùwà tó dáa sáwọn èèyàn, títí kan àwọn tó kórìíra ẹ àtàwọn tó dà bíi pé wọn ò mọyì ẹ. Èyí á jẹ́ kó o máa láyọ̀, ìwọ àtàwọn èèyàn á sì túbọ̀ máa mọwọ́ ara yín. Ju gbogbo ẹ̀ lọ, wàá mọ ohun tó o lè ṣe kó o lè wà nínú Ìjọba Ọlọ́run níbi tí kò ti ní sí ìkórìíra mọ́ títí láé.—Sáàmù 37:29.