Bá A Ṣe Lè Jẹ́rìí Nípa Lílo Àwọn Ohun Tá A Fi Ń Pàtẹ Àwọn Ìwé Wa

Ó ti wá ṣe kedere báyìí pé lílo àwọn ohun tó ṣeé tì kiri tàbí tábìlì láti pàtẹ àwọn ìwé wa jẹ́ ọ̀nà tó gbéṣẹ́ gan-an láti jẹ́rìí, torí pé ó ń mú kí àwọn tó fẹ́ mọ òtítọ́ wá kẹ́kọ̀ọ́ òtítọ́. (Jòh. 6:44) Torí náà, a gba àwọn alàgbà níyànjú láti ṣètò iṣẹ́ ìwàásù ní àwọn ibi tí èrò pọ̀ sí ní ìpínlẹ̀ ìwàásù ìjọ wọn. Níwọ̀n bó ti jẹ́ pé àwọn ohun tá a fi ń pàtẹ àwọn ìwé wa yìí ṣeé tì kiri, kì í sábà pọn dandan pé ká lọ tọrọ àyè lọ́wọ́ àwọn aláṣẹ. Àwọn wo ló kúnjú ìwọ̀n láti kópa? Àwọn akéde tó ní ìjìnlẹ̀ òye, tí ìmúra wọn máa ń buyì kúnni àtàwọn akéde tó mọ bí èèyàn ṣe ń fọ̀rọ̀wérọ̀ dáadáa. Àwọn àbá tó tẹ̀ lé e yìí á ran àwọn tó bá máa lọ́wọ́ nínú irú ìjẹ́rìí yìí lọ́wọ́ kí wọ́n lè túbọ̀ ṣàṣeyọrí.

Ohun tó yẹ ká ṣe:

Jẹ́ ọlọ́yàyà kó o sì múra tán láti ran àwọn tó ń kọjá lọ́wọ́. Àwọn akéde kan máa ń rẹ́rìn-ín músẹ́, wọ́n á sì fi ọ̀yàyà kí àwọn èèyàn. Tí ẹnì kan bá ń wo àwọn ìwé tá a pàtẹ náà bó ṣe ń kọjá lọ, o lè sọ pé, “Ẹ lè mú èyí tó bá wù yín.”
Má ṣe jìnnà síbi tó o pàtẹ àwọn ìwé náà sí, bẹ́ẹ̀ ni kó o má ṣe sún mọ́ ọn jù. Láwọn ibì kan, àwọn akéde máa ń ṣàṣeyọrí tí wọ́n bá sún díẹ̀ kúrò níbi tí wọ́n pàtẹ sí. Àwọn míì ti rí i pé táwọn ò bá jìnnà sí àtẹ náà, àwọn tó ń kọjá lọ lè máà fẹ́ dúró, torí náà wọ́n máa ń sún kúrò nídìí àtẹ náà dáadáa, wọ́n á wá dúró dìgbà tí ẹnì kan bá dúró síbi àtẹ náà kí wọ́n tó lọ síbẹ̀. Tí ẹnì kan bá lọ síbi àtẹ náà, gbìyànjú láti bá a sọ̀rọ̀, o lè bi í pé, “Ǹjẹ́ o ti ronú nípa ìbéèrè yẹn rí?”
Bó bá ti lè ṣeé ṣe tó, máa lo Bíbélì léraléra.
Ṣàlàyé bá a ṣe ń kọ́ àwọn èèyàn lẹ́kọ̀ọ́ Bíbélì fún ẹnikẹ́ni tó bá gba ìtẹ̀jáde tá a fi ń kọ́ni lẹ́kọ̀ọ́ Bíbélì, irú bíi ìwé Bíbélì Fi Kọ́ni. Fi fídíò náà Kí Nìdí Tó Fi Yẹ Kó O Kẹ́kọ̀ọ́ Bíbélì? hàn án lórí ẹ̀rọ alágbèéka rẹ.
Tó bá ṣeé ṣe, gba àdírẹ́sì àwọn tó bá fìfẹ́ hàn. Tó bá jẹ́ pé kì í ṣe ìpínlẹ̀ ìwàásù yín ni onítọ̀hún ń gbé, kọ ọ̀rọ̀ kún fọ́ọ̀mù Padà-Lọ-Ṣèbẹ̀wò (S-43), kó o sì tètè fún akọ̀wé ìjọ yín.

Ohun tí kò yẹ ká ṣe:

Má ṣe bínú, má ṣe é ní ọ̀ranyàn fún àwọn èèyàn láti gba ìwé wa, má sì ṣe dúró ti tábìlì tàbí ohun tó ṣeé tì kiri náà bí ẹ̀ṣọ́.
Má ṣe wo ọ̀nà ìjẹ́rìí yìí bíi pé ńṣe la kàn fẹ́ pín àwọn ìwé wa fáwọn èèyàn. Nígbà tá a bá wà lẹ́nu iṣẹ́ òjíṣẹ́, àfojúsùn wa ni pé ká bẹ̀rẹ̀ sí í kọ́ àwọn èèyàn lẹ́kọ̀ọ́ Bíbélì. Torí náà, ó yẹ ká gbìyànjú láti máa bá àwọn èèyàn fọ̀rọ̀wérọ̀.
Má ṣe dúró síwájú àtẹ náà, má sì ṣe jẹ́ kí ọ̀rọ̀ tí ìwọ àti ẹnì kejì rẹ ń sọ gbà ọ́ lọ́kàn. Tó bá pọn dandan pé kó o gba ìpè tàbí kó o pe ẹnì kan lórí fóònù rẹ, ohun tó máa dára jù ni pé kó o sún kúrò níbi àtẹ náà.
Má ṣe bá àwọn tí kò nífẹ̀ẹ́ sí iṣẹ́ wa jiyàn. Tí ẹnì kan tí kò nífẹ̀ẹ́ sí iṣẹ́ wa bá bẹ̀rẹ̀ sí í bá ẹ fa wàhálà, ó lè pọn dandan pé kó o lọ síbòmíì.