Mú Kí Iṣẹ́ Òjíṣẹ́ Rẹ Sunwọ̀n Sí I—Máa Bẹ̀rẹ̀ Ìjíròrò Lọ́nà Àìjẹ́-Bí-Àṣà

Ìdí Tó Fi Ṣe Pàtàkì: Tá a bá ń wàásù láti ilé délé, a kì í sábà bá ọ̀pọ̀ èèyàn nílé. Àmọ́, ó ṣeé ṣe ká pàdé wọn nígbà tá a bá wọ ọkọ̀ èrò, tá a bá wà nílé ìwòsàn, ní àkókò ìsinmi lẹ́nu iṣẹ́ tàbí ní ilé ìwé àti láwọn ibòmíì. Ìfẹ́ Jèhófà ni pé kí gbogbo èèyàn láǹfààní láti gbọ́ ìhìn rere Ìjọba Ọlọ́run. (1 Tím. 2:3, 4) Àmọ́, ká tó lè wàásù, a gbọ́dọ̀ máa lo ìdánúṣe láti bẹ̀rẹ̀ ìjíròrò.

Bá A Ṣe Lè Ṣe É:

Máa ṣe àṣàyàn. Ǹjẹ́ ẹni náà ṣe tán láti bá ẹ sọ̀rọ̀ tó sì fẹ́ gbọ́ ohun tó o fẹ́ sọ? Ṣé ipò tí ẹni yẹn wà máa jẹ́ kẹ́ ẹ lè jọ fara balẹ̀ fọ̀rọ̀ wérọ̀? Àwọn akéde kan máa ń kọ́kọ́ wo ojú ẹni náà, wọ́n á sì rẹ́rìn-ín músẹ́ sí i. Tó bá rẹ́rìn-ín músẹ́ sí wọn pa dà, wọ́n á wá bẹ̀rẹ̀ sí í bá a fọ̀rọ̀ wérọ̀.
Gbàdúrà ṣókí ní ìdákẹ́jẹ́ẹ́ kó o lè fi ìgboyà sọ̀rọ̀.—Neh. 2:4; Ìṣe 4:29.
Tó o bá fẹ́ bẹ̀rẹ̀ ìjíròrò, sọ ọ̀rọ̀ ṣókí, bóyá kó o kí ẹni náà. Nígbà tí Jésù ń bá obìnrin ará Samáríà kan sọ̀rọ̀, kò fi ọ̀rọ̀ nípa Ìjọba Ọlọ́run bẹ̀rẹ̀ ìjíròrò rẹ̀. (Jòh. 4:7) Nígbà míì, a lè bẹ̀rẹ̀ ìjíròrò nípa gbígbóríyìn fún ẹni tá a fẹ́ bá sọ̀rọ̀. O lè sọ pé: “Ọmọlúwàbí làwọn ọmọ yín yìí o!” Ọ̀nà míì tó o tún lè gbà bẹ̀rẹ̀ ìjíròrò ni pé kó o béèrè ìbéèrè, o lè bi ẹni náà pé: “Ǹjẹ́ ẹ gbọ́ ìròyìn tí wọ́n sọ lálẹ́ àná?”
Bí ìjíròrò náà bá ti bẹ̀rẹ̀, wá bí wàá ṣe mú ìhìn rere wọnú ọ̀rọ̀ rẹ, àmọ́ má ṣe fi ìkánjú sọ ọ́. Kàkà bẹ́ẹ̀, jẹ́ kí ìjíròrò náà wá látọkàn wá. O tún lè sọ ọ̀rọ̀ kan tó máa fa ẹni náà lọ́kàn mọ́ra, táá sì mú kó béèrè ìbéèrè torí pé ó fẹ́ mọ púpọ̀ sí i. Bí àpẹẹrẹ, tí ìjíròrò náà bá dá lórí ọ̀rọ̀ ìdílé, o lè sọ pé: “Mo ní àwọn ìsọfúnni kan tó wúlò gan-an lórí ọ̀rọ̀ ọmọ títọ́.” Tó bá jẹ́ pé kókó inú ìròyìn kan lo fẹ́ gbé ọ̀rọ̀ rẹ kà, o lè sọ pé: “Lẹ́nu àìpẹ́ yìí, mo ka àwọn ìròyìn ayọ̀ kan tó dá lórí bí ayé yìí ṣe máa dáa.” Má ṣe rẹ̀wẹ̀sì tí ìjíròrò náà kò bá yọrí sí rere.
Máa mú àwọn ìwé àṣàrò kúkúrú dání tàbí ìwé ìkẹ́kọ̀ọ́ míì tí wàá fún ẹni tó nífẹ̀ẹ́ sí ọ̀rọ̀ rẹ.

Gbìyànjú Èyí Lóṣù Yìí:

Gbìyànjú láti bá ó kéré tán, ẹnìkan jíròrò lọ́nà àìjẹ́-bí-àṣà lọ́sọ̀ọ̀sẹ̀.