Ran Àwọn Afọ́jú Lọ́wọ́ Kí Wọ́n Lè Mọ Jèhófà
1. Báwo ni Jésù ṣe fi ìyọ́nú hàn sí àwọn afọ́jú?
1 Ọjọ́ díẹ̀ péré ló kù tí wọ́n máa pa Jésù. Bó ṣe ń kúrò ní ìlú Jẹ́ríkò, àwọn afọ́jú méjì kan tó ń ṣagbe ké jáde sí i pé: “Olúwa, ṣàánú fún wa!” Bó tilẹ̀ jẹ́ pé àwọn àdánwò tí Jésù máa tó kojú ló gbà á lọ́kàn gan-an, ó dúró, ó ní kí wọ́n wá, ó sì la ojú wọn. (Mát. 20:29-34) Báwo la ṣe lè tẹ̀ lé àpẹẹrẹ ìyọ́nú tí Jésù ní sí àwọn afọ́jú?
2. Báwo la ṣe lè wàásù fún afọ́jú tá a bá rí níbi tí àwọn èèyàn pọ̀ sí?
2 Máa Ṣaájò Wọn: Tó o bá pà dé afọ́jú bóyá níbi táwọn èèyàn pọ̀ sí, sọ orúkọ rẹ fún un kò o sì ṣaájò rẹ̀. Torí pé àwọn èèyàn kì í sábà kà wọ́n sí, ẹni náà lè kọ́kọ́ máa fura sí ọ. Àmọ́, ojúlówó ìfẹ́ tó o bá fi hàn sí i àti bó o ṣe yọ̀ mọ́ ọn lè fí i lọ́kàn balẹ̀. Má ṣe gbàgbé pé ìṣòro ojú tí àwọn kan ní yàtọ̀ sí ti àwọn míì, ìyẹn sì lè pinnu ibi tó o máa ran onítọ̀hún lọ́wọ́ dé. Lẹ́yìn tó bá ti ṣaájò ẹni náà tàbí tó o ṣe ìrànlọ́wọ́ fún un, o lè wá sọ fún pé o máa ń kọ́ àwọn èèyàn lẹ́kọ̀ọ́ Bíbélì. O lè ka ẹsẹ Ìwé Mímọ́ kan fun un, irú bíi Sáàmù 146:8 tàbí Aísáyà 35:5, 6. Tí ẹni náà bá lè ka ìwé àwọn afọ́jú, béèrè pé ṣé ó máa fẹ́ gba ìtẹ̀jáde kan tá a ṣe fún àwọn afọ́jú tó máa jẹ́ kó mọ̀ sí i nípa Bíbélì. Ó sì tún lè bá a wa àwọn ìtẹ̀jáde tá a gbohùn wọn sílẹ̀ jáde lórí ìkànnì jw.org/yo. Tí kọ̀ǹpútà rẹ̀ bá ní ètò orí kọ̀ǹpútà kan tó máa ń ka ohun tó wà lójú kọ̀ǹpútà síta, ìyẹn screen reader, ó máa jẹ́ kó gbádùn àwọn àpilẹ̀kọ tó wà lórí ìkànnì jw.org/yo àti àwọn ìtẹ̀jáde tó ṣeé wà jáde ní ẹ̀dà RTF (Rich Text Format).—Wo àpótí tá a pe àkọlé rẹ̀ ní “Ohun Tó O Lè Ṣe Láti Ran Afọ́jú Lọ́wọ́.”
3. Báwo la ṣe lè wá àwọn afọ́jú ní ìpínlẹ̀ ìwàásù wa?
3 Máa Wá Àwọn Afọ́jú: A kì í sábà rí àwọn afọ́jú nígbà tá a bá ń wàásù láti ilé-dé-ilé, torí pé ọ̀pọ̀ lára wọn kì í fẹ́ bá àwọn èèyàn tí wọn ò mọ̀ rí tó wá bá wọn nílé sọ̀rọ̀. Torí náà, ó gba ìsapá gidi láti ‘wá wọn kàn’ ká lè wàásù fún wọn. (Mát. 10:11) Ǹjẹ́ o mọ ẹnì kan tí ẹ jọ ń ṣiṣẹ́ tàbí ọmọ iléèwé rẹ kan tó jẹ́ afọ́jú? Lo ìdánúṣe, kó o bá wọn sọ̀rọ̀. Tí ilé ẹ̀kọ́ àwọn afọ́jú bá wà ní ìpínlẹ̀ ìwàásù yín, o lè lọ fún wọn ní àwọn ìtẹ̀jáde wa tá a ṣe fún àwọn afọ́jú, ìyẹn Braille, kí wọ́n kó wọn sí yàrá ìkówèésí wọn. Ǹjẹ́ o mọ ẹnì kan tí ará ilé rẹ̀ kan jẹ́ afọ́jú? Ǹjẹ́ àwọn àjọ kan wà ní ìpínlẹ̀ ìwàásù yín tí wọ́n ń pèsè ìrànwọ́ fún àwọn afọ́jú tàbí tí wọ́n ní ilé tí wọ́n gba àwọn afọ́jú sí? Ṣàlàyé fún àwọn ará ilé ẹni náà, olùgbàlejò ilé iṣẹ́ náà tàbí olùdarí ilé iṣẹ́ náà pé àwa Ẹlẹ́rìí Jèhófà fẹ́ ran àwọn afọ́jú lọ́wọ́, a sì fẹ́ máa fún wọn ní àwọn ìtẹ̀jáde tá a ṣe fún àwọn afọ́jú tàbí àwọn ìtẹ̀jáde tá a gbohùn wọn sílẹ̀. Fi ìlérí Ọlọ́run tó wà nínú Bíbélì hàn án, jẹ́ kó mọ̀ pé Ọlọ́run máa fòpin sí ìṣòro ojú pátápátá. O tún lè fi fídíò kan tó wà lórí ìkànnì hàn án. A pe àkọlé rẹ̀ ní “Ọpẹ́lọpẹ́ Rẹ̀ Lára Mi.” Ó sọ nípa ọkùnrin afọ́jú kan tó jàǹfààní nínú Bíbélì tá a ṣe fún àwọn afọ́jú. Tó o bá ṣàlàyé ìdí tó o fi wá, àǹfààní lè ṣí sílẹ̀ fún ọ láti bá àwọn afọ́jú tó wà níbẹ̀ sọ̀rọ̀.
4. Kí la rí kọ́ nínú ìrírí Janet?
4 Arábìnrin afọ́jú kan tó ń jẹ́ Janet lọ sí ilé kan tí àwọn afọ́jú ń gbé. Ọ̀dọ́bìnrin kan ló kọ́kọ́ bá sọ̀rọ̀. Janet sọ fún un pé: “Jésù la ojú àwọn afọ́jú ká lè mọ̀ ohun tó máa ṣe fún gbogbo àwọn afọ́jú lọ́jọ́ iwájú.” Àwọn méjèèjì jọ ka Ìṣípayá 21:3, 4, lẹ́yìn náà Janet ṣàlàyé bí Ìjọba Ọlọ́run á ṣe mú ìlérí tí wọ́n kà yìí ṣẹ. Obìnrin náà kọ́kọ́ dákẹ́ lọ, ó wá sọ pé: “Mi ò tíì gbọ́ irú ọ̀rọ̀ yìí rí látẹnu afọ́jú bíi tèmi. Ọ̀pọ̀ èèyàn tí kì í ṣe afọ́jú gbà pé ohun tó mú kí ẹnì kan di afọ́jú ni pé onítọ̀hún tàbí àwọn baba ńlá rẹ̀ ti ṣe nǹkan burúkú kan nígbà kan.” Janet wá fi ìlujá tó ń ṣí ìwé Bíbélì Fi Kọ́ni ránṣẹ́ sí obìnrin náà lórí Íńtánẹ́ẹ̀tì, ní báyìí ẹ̀ẹ̀mejì lọ́sẹ̀ ló ń kọ́ obìnrin náà lẹ́kọ̀ọ́ Bíbélì.
5. Bó tilẹ̀ jẹ́ pé a ò lè la ojú àwọn afọ́jú bíi ti Jésù, àwọn ìbùkún wo la máa rí tá a bá fi hàn pé a nífẹ̀ẹ́ àwọn afọ́jú?
5 Lóòtọ́, a ò lè la ojú àwọn afọ́jú bíi ti Jésù, àmọ́ a lè ṣèrànwọ́ fún gbogbo àwọn tí ọlọ́run ètò àwọn nǹkan yìí ti fọ́ èrò inú wọn lójú, títí kan àwọn afọ́jú. A lè ràn wọ́n lọ́wọ́ kí wọ́n lè lóye òtítọ́ Ọ̀rọ̀ Ọlọ́run. (2 Kọ́r. 4:4) Jésù la ojú àwọn afọ́jú méjì náà nítòsí ìlú Jẹ́ríkò torí pé ‘àánú wọn ṣe é.’ (Mát. 20:34) Bíi ti Jésù, táwa náà bá fi hàn pé a nífẹ̀ẹ́ àwọn afọ́jú, èyí á jẹ́ ká lè kọ́ wọn lẹ́kọ̀ọ́ nípa Jèhófà, ẹni tó máa fòpin sí ìṣòro ojú títí láé.