Mú Kí Iṣẹ́ Òjíṣẹ́ Rẹ Sunwọ̀n Sí I—Bó O Ṣe Lè Wàásù ní Ìpínlẹ̀ Tí Wọ́n Ti Ń Ṣiṣẹ́ Ajé

Ìdí Tó Fi Ṣe Pàtàkì: Torí pé ọ̀pọ̀ wákàtí làwọn èèyàn fi ń ṣiṣẹ́, ohun tó dáa jù tá a lè ṣe láti sọ̀rọ̀ nípa Ìjọba Ọlọ́run fún wọn ni pé ká lọ wàásù fún wọn níbi iṣẹ́ wọn. A máa ń gbádùn iṣẹ́ ìwàásù níbi táwọn èèyàn ti ń ṣiṣẹ́ ajé, ó sì máa ń méso rere jáde torí pé a máa ń rí àwọn èèyàn bá sọ̀rọ̀ dáadáa, àwọn tó ń tajà sì máa ń bọ̀wọ̀ fún àwọn tó bá ya ìsọ̀ wọn torí pé ojú oníbàárà ni wọ́n fi ń wò wọ́n. Ká lè ṣe àṣeyọrí, ó yẹ́ ká máa lo ìfòyemọ̀, ká sì máa múra lọ́nà tó bójú mu. (2 Kọ́r. 6:3) Torí náà, alábòójútó iṣẹ́ ìsìn gbọ́dọ̀ máa bójú tó bá a ṣe ń ṣiṣẹ́ sí ní ìpínlẹ̀ tí wọ́n ti ń ṣiṣẹ́ ajé àtàwọn akéde tó lọ ń wàásù níbẹ̀.

Bó O Ṣe Lè Ṣe É:

Múra ọ̀rọ̀ ṣókí tó o máa sọ sílẹ̀. Tá a bá gba àkókò àwọn tó ń tajà ju bó ṣe yẹ lọ, wọ́n lè má fún wa láyè mọ́ láti bá wọn sọ̀rọ̀ nígbà míì.
Ìgbà tí ọwọ́ àwọn tó ń tajà kì í fi bẹ́ẹ̀ dí ni kó o lọ sọ́dọ̀ wọn, ó lè jẹ́ ìgbà tí wọ́n ṣẹ̀ṣẹ̀ ṣí ṣọ́ọ̀bù wọn.
O lè kọ́kọ́ bá ọ̀gá àwọn tó ń tajà sọ̀rọ̀. Jẹ́ ọlọ́yàyà, kí o sì yá mọ́ni. O lè sọ pé: “Kì í fi bẹ́ẹ̀ rọrùn láti bá àwọn èèyàn nílé, ìdí nìyí tá a fi wá rí yín níbi iṣẹ́.” Má ṣe sọ̀rọ̀ púpọ̀, kó o sì fún un ní ìwé àṣàrò kúkúrú, ìwé ìròyìn tàbí ìtẹ̀jáde míì. Torí kí wọ́n má bàa rò pé ńṣe ni àwa náà ń tajà, ó máa dáa pé ká má ṣe sọ̀rọ̀ nípa ọrẹ, àyàfi tí wọ́n bá béèrè nípa bá a ṣe ń rí owó ṣe iṣẹ́ ìwàásù tá à ń ṣe.
Tí ọ̀gá àwọn tó ń tajà náà bá jẹ́ ẹni tí ara rẹ̀ yá mọ́ọ̀yàn, tọrọ àyè lọ́wọ́ rẹ̀ láti bá àwọn òṣìṣẹ́ rẹ̀ sọ̀rọ̀ ní ṣókí. Ohun tó máa dáa kó o ṣe láwọn ibi ìtajà kan ni pé kó o fi àwọn ìwé kan sílẹ̀ tí wọ́n á máa kà nígbà tí ọwọ́ wọn bá dilẹ̀.
Máa lo ìfòyemọ̀, kó o sì ṣe ohun tó bá ipò kọ̀ọ̀kan mu. Bí àpẹẹrẹ, tí onítọ̀hún bá ń bá oníbàárà rẹ̀ sọ̀rọ̀ tàbí tí ọwọ́ rẹ̀ bá dí, dúró dìgbà tí ọwọ́ rẹ̀ bá dilẹ̀ kó o tó bá a sọ̀rọ̀.

Gbìyànjú Èyí Lóṣù Yìí:

Nígbà Ìjọsìn Ìdílé yín tó ń bọ̀, ẹ ṣe ìdánrawò ọ̀nà ìgbọ́rọ̀kalẹ̀ ṣókí tẹ́ ẹ máa lò tí ẹ bá ń wàásù ní ìpínlẹ̀ tí wọ́n ti ń ṣiṣẹ́ ajé.