Ашәҟәы Аатра ԥхьаҟатәи ҳаԥсҭазаара иазкны иаҳәо

1. Иарбан алхроу ауаа зегь иҟарҵар рыхәҭоу?

ИАХЬА ауаа зегьы алхра ҟарҵароуп: адунеи зегь напхгара азура азин змоу Иегова иган ааныркылоу, иаӷа цәгьа Аҩсҭаа иган ааныркылоу. Даҽа мҩак ыҟаӡам. Уи аӡбара ауп изхьыԥшу наӡаӡа ҳанхалоу-ҳнымхалоу (Матф. 25:31—33, 46). Асимволтә бызшәала иаҳҳәозар, гәыкала Анцәа имаҵ зуа ауаа «арыцҳара ду» аан еиқәхарц азы адырга рыҭазаауеит (Аат. 7:14; Иез. 9:4, 6). Аха агыгшәыг адырга змазаауа ықәгахоит (Аат. 14:9—11).

2. а) Ҳгәы зызҭарҵозеи Ауриацәа рахь 10:35—39 иану ажәақәа? б) Ишԥаҳацхраауеи ашәҟәы Аатра?

² Шәаԥхьа Ауриацәа рахь 10:35—39. Шәара Иегова иган аанкылара шәыӡбазар, уи ҟәыӷароуп. Ҳәарада, уажәшьҭа егьырҭгьы идеилшәыркаар шәҭахуп даргьы уи аҩыза алхра ҟарҵар зрыхәҭоу. Уи аҿы ашәҟәы Аатра шәыцхраауеит. Уаҟа Иегова иаӷацәа ирыхьуа аҳәоит, насгьы инапхгара гәыкала иадгыло ирзыԥшу аԥсҭазаара бзиа аӡбахә ануп. Ари ихадоу аҵабырг ҳдыруазароуп. Избанзар уи Иегова анаҩсгьы гәыкала имаҵ аура ҳгәазҭанаҵоит, насгьы уи ҳхы иархәаны ауаа ииашоу алхра аҟаҵара ҳрыцхраалоит.

3. Еилҳаргозеи ари астатиаҿы?

³ Ари астатиаҿы ҩ-зҵаарак рҭак ҳауеит: 1) Иарбан ԥсҭазаароу Анцәа иара инапхгара иадгыло ирызирхиаз? насгьы 2) Ирзыԥшузеи ашәҟәы Аатраҿы зыӡбахә ҳәоу агыгшәыг ҟаԥшь аган аанызкыло?

АНЦӘА ГӘЫКАЛА ИЗЫҞОУ АУАА ИРЗЫԤШУ АԤСҬАЗААРА

4. Ивагыладаз Иисус ажәҩан аҿы Иоанн иибаз абара аҟны?

⁴ Апостол Иоанн ибараҿы ҩ-гәыԥк ауаа ибеит. Урҭ Иегова иган ааныркылеит, насгьы ҳамҭас наӡаӡатәи аԥсҭазаара роуит. Актәи агәыԥ — уи Иисус ажәҩан аҿы напхгара ицзуло роуп. Дара адгьыл аҟынтә иалхуп, насгьы 144 000-ҩык ыҟоуп (Аат. 7:4; 14:3, 4). Урҭ жәҩантәи ашьха Сион аҿы Иисус ивагылоуп (Аат. 14:1). Уи Аҳра адгьыл напхгара азнаулоит (Аат. 5:9, 10).

5. Ирыхьуазеи иаарласны 144 000-ҩык рҟынтә иаанхаз?

⁵ Иаҳхысыз ашәышықәсақәа рыбжьара Иегова зықьҩыла ақьырсианцәа иԥшьоу адоуҳала иалиххьеит (Лука 12:32; Рим. 8:17). Урҭ рҟынтә аҵыхәтәанынӡа Иегова гәыкала изыҟаз ажәҩан ахь ицахьеит. Апостол Иоанн излеиҳәаз ала, аҵыхәтәантәи амшқәа раан 144 000-ҩык доуҳала иалху ақьырсианцәа рҟынтә адгьыл аҿы иаанхо маҷхоит (Аат. 12:17). Арыцҳара ду иалагаанӡа урҭ ақьырсианцәа аҵыхәтәантәи зыԥсы ҭоу «Анцәа имҳәыр» раархахоит (Аат. 7:2, 3). Анаҩс арыцҳара ду аан аамҭак иалагӡаны урҭгьы ажәҩан ахь игахоит, насгьы Иисус напхгара ицрулоит (Матф. 24:31; Аат. 5:9, 10).

6, 7. а) Иарбан гәыԥу иҵегьы Иоанн иибаз, насгьы иаҳдыруазеи уи агәыԥ иазкны? б) Избан Аатра 7-тәи ахы доуҳала иалху ақьырсианцәа рзы, насгьы «ҵҩа змамыз» ажәлар рзы аинтерес заҵоу?

⁶ Анаҩс Иоанн даҽа гәыԥк ибеит. Уи «ҵҩа змамыз» ажәлар ҳәа азиҳәеит. Дара ԥхьаӡашьа рымамызт (Аат. 7:9, 10). Аха иаҳдыруазеи урҭ ауаа ирызкны? Иоанн иҩит: «Арҭ — алахьеиқәра ду ахьтә иаауа роуп. Рымаҭәа-ҩыҭәа ршәыхны ирыӡәӡәеит, Асыс ашьала идрышҳаит» (Аат. 7:14). «Ҵҩа змамыз» уи ажәлар адгьыл аҿы аԥсҭазаара иалагәырӷьо инхалоит (Аԥсал. 37:9—11, 27—29; Ажәам. 2:21, 22; Аат. 7:16, 17).

⁷ Ашәҟәы Аатра 7-тәи ахаҿы ажәҩан аҿы напхгара зуло, насгьы адгьыл аҿы наӡаӡа инхало рыӡбахә ануп. Шәхы жәбома шәара уи «афотосахьаҿы»? Ҳшәыҳәоит, уи шәхаҿы иаажәгала. Ажәала иузҳәом урҭ аҩгәыԥкгьы ианаамҭаз Иегова иган ахьааныркылаз шаҟа еигәырӷьало! Еилаҳкаауазеи иҵегьы ашәҟәы Аатра аҟынтә арыцҳара ду иазкны? (Матф. 24:21).

АНЦӘА ИАӶАЦӘА ИРЫХЬУА

8. Ишԥалаго арыцҳара ду, насгьы иҟарҵозеи реиҳараҩык ауаа?

⁸ Ҳазхысыз астатиа аҟынтә ишеилаҳкааз еиԥш, иаарласны аҳәынҭқаррақәа амцдинхаҵарақәа зегь аазырԥшуа Вавилон ду иақәлоит (Аат. 17:16, 17). Убас арыцҳара ду иалагоит. Иҟалозеи нас? Ауаа еижәыланы Иегова ишаҳаҭцәа реизарақәа рахь идәықәлома? Ашәҟәы Аатра 6-тәи ахы излаҳәо ала, мап. Иуадаҩхо урҭ аамҭақәа рзы Иегова имаҵ зымуа ауаа аполитикатә, насгьы акоммерциатә организациақәа рҿы аҽыҵәахырҭа иашьҭалоит, избанзар урҭ ашьхақәа реиԥш иӷәӷәоушәа ргәы иаанагалоит. Урҭ ауаа Анцәа Иаҳра аган ааныркылаӡом, убри аҟынтә Иегова иаӷацәа ракәны иԥхьаӡоит (Лука 11:23; Аат. 6:15—17).

9. Избан арыцҳара ду аан Иегова имаҵзуҩцәа зегьы изрылукаало, насгьы иарбан лҵшәоу уи иаанаго?

⁹ Арыцҳара ду аан гәыкала иҟоу Иегова имаҵзуҩцәа зегьы ирылукаалоит. Дара заҵәык ракәхоит адгьыл аҿы Анцәа Иегова имаҵ зуло, насгьы «агыгшәыг» аган аанызымкыло (Аат. 13:14—17). Уи Иегова иаӷацәа рыԥсахы еибанаркуеит. Убри аҟынтә амилаҭқәа ркоалициа адунеи ахьынӡа-наӡааӡо Анцәа имаҵзуҩцәа ирықәлоит. Уи ақәылара Абиблиаҿы Магог аҟынтә Гог иқәылара ахьӡуп (Иез. 38:14—16).

10. Иҟаиҵозеи Иегова ижәлар ианрықәлалак? (Аатра 19:19—21).

¹⁰ Иҟаиҵозеи убасҟан Иегова? Иезекииль Иегова иажәақәа иҩит: «Сара сыԥсахы еибакуеит» (Иез. 38:18, 21—23). Аатра 19-тәи ахы уи еиҳа инеиҵыхны иалацәажәоит. Гог Анцәа ижәлар данрықәлалак, Иегова ижәлар ихьчарц, насгьы иаӷацәа нирҵәарц азы Иисус дааишьҭуеит. Иара ивагылазаауеит «жәҩантәи ар», даҽакала иуҳәозар гәыкала Анцәа изыҟоу амаалықьцәа, насгьы 144 000-ҩык (Аат. 17:14; 19:11—15). Ишԥеилго уи аибашьра? Иегова иҿагыло аорганизациақәеи ауааи иҟамызшәа иқәгахоит! (Шәаԥхьа Аатра 19:19—21.)

АИБАШЬРА АШЬҬАХЬ АЧАРА

11. Иарбан хҭысу ашәҟәы Аатра иану ахҭысқәа хзыркәшо?

¹¹ «Ҳара Армагеддон ҳхаҳгеит!» «Иегова иаӷацәа зегь шықәигаз схаҭа избеит!» Ҳхаҿы иааҳгар ҳалшоит адгьыл аҿы Иегова имаҵзуҩцәа уи шаҟа еигәырӷьало. Аха иҟалозеи уи аамҭазы ажәҩан аҿы? Зегьы Вавилон ду ақәгара еигәырӷьалоит. Аха иҟоуп еиҳагьы агәырӷьара рзаазго иҷыдоу хҭыск (Аат. 19:1—3). «Асыс ԥҳәыс [дааигоит]»— уи ашәҟәы Аатра иану ахҭысқәа хнаркәшоит (Аат. 19:6—9).

12. Ианбаҟало Асыс иԥҳәысаагара? (Аатра 21:1, 2).

¹² Ианбаҟало Асыс иԥҳәысаагара? 144 000-ҩык рхыԥхьаӡара хаҭәааны ажәҩан аҿы ианеизгахо аибашьра Армагеддон алагамҭазы ауп. Ҳәара аҭахума, усҟан ачара аура иаамҭахом. (Шәаԥхьа Аатра 21:1, 2.) Убри аҟынтә Асыс иԥҳәысаагара Армагеддон ашьҭахь ауп ианыҟало, Анцәа иаӷацәа зегь анықәгахалак ашьҭахь (Аԥсал. 45:3, 4, 13—17).

13. Ҵакыс иамоузеи Асыс иԥҳәысаагара?

¹³ Ҵакыс иамоузеи Асыс иԥҳәысаагара? Ачара арԥыси аӡӷаби ҭаацәаракны еиднакылоит. Убас еиԥш аҳ Иисус Христоси «иҭаца» — 144 000-ҩыки аӡәкны иҟалоит. Убас 1 000 шықәса адгьыл иахагылазаауа иҿыцу анапхгара шьақәыргылахоит (Аат. 20:6).

УБЛА ХЫЗКУА АҚАЛАҚЬИ ԤХЬАҞАТӘИ ШӘЫԤСҬАЗААРЕИ

14, 15. Ишԥаарԥшу 144 000-ҩык Аатра 21-тәи ахаҿы? (Шәахәаԥш ацәаҿы иану асахьа.)

¹⁴ Анаҩс Аатра 21-тәи ахаҿы 144 000-ҩык доуҳала иалху ақьырсианцәа Иерусалим ҿыц захьӡу убла хызкуа ақалақь ԥшӡа еиԥш иаарԥшуп (Аат. 21:2, 9). Уи ақалақь «жәаҩа уасхыр, жәаҩа хырӷәӷәарҭа ирықәгылан, урҭ ирнын Асыс Апостолцәа жәаҩаҩык рыхьӡқәа» (Аат. 21:10—14; Еф. 2:20). Шәхаҿы ишәзаагома Иоанн урҭ ауасхырқәа данрыхәаԥшуаз шаҟа игәы хыҭ-хыҭуаз! Урҭ руак аҿы иара ихьӡ анын. Шаҟа ҳаҭыр дуузеи уи!

¹⁵ Иерусалим ҿыц еиԥшу даҽа қалақьк ыҟаӡам. Уи аганқәа зегь еиҟароуп. Ақалақь ихадоу амҩа ахьы цқьа иалхуп. Уи жәаҩа гәашә аман, «дара зегьы хаз-хазы иҟоу бырлашқәан». Аҭӡамцқәеи ашьаҭеи зыхә ҳаракыз ахаҳәқәа рыла ичаԥан (Аат. 21:15—21). Иоанн ақалақь аҿы аныҳәарҭа дашьҭан, аха уи уа иҟамызт. Избанзар 144 000-ҩык Иегова иааигәара иҟазаауеит (Аур. 7:27; Аат. 22:3, 4). Иоанн иҩит: «Убраҟа ԥшьаныҳәарҭак гыланы исымбеит, избан акәзар уа ԥшьаныҳәарҭас иҟоу — Зегьзку Иҳақәиҭу Анцәеи Асыси роуп. Ақалақь амреи амзеи рылашара аҭахӡамызт, избанзар Анцәа ихьӡ-иԥша иарлашон, Асыс — цәымзалашаран иакын» (Аат. 21:22, 23).

16. Ирзыԥшузеи ауаа Анцәа Иаҳра Зқьышықәсатәи анапхгара аан?

¹⁶ Доуҳала иалху ақьырсианцәа Иерусалим ҿыц ианазхәыцуа ргәы хыҭ-хыҭуеит. Аха уи ақалақь иазку аԥааимбаражәа адгьыл аҿы анхаразы агәыӷра змоугьы ргәы ҟанаҵоит. Зқьышықәсатәи анапхгара аан Иерусалим ҿыц адгьыл аҿы аԥсахрақәа рацәаны иҟанаҵоит. Урҭ убриаҟара ирацәазаауеит дара «аԥсҭазааратә ӡиас» ҳәа рызҳәоуп. «Аӡиас аҩ-ԥшаҳәак рхықәқәа рҟны аԥсҭазааратә ҵла[қәа] гылан», насгьы «ауааԥсыра рзы ихәышәтәыган» (Аат. 22:1, 2). Усҟан адгьыл аҿы инхало ауаа аԥсҭазаара бзиа рымазаауеит. Анцәа гәыкала изыҟазаауа ауаа хәыҷы-хәыҷла инаӡахоит. Аԥсҭазаараҿы уаҳа ачымазареи, ахьааи, агәырҩеи ҟалаӡом (Аат. 21:3—5).

17. Инхалода адгьыл аҿы Анцәа Иаҳра Зқьышықәсатәи анапхгара аан? (Аатра 20:11—13).

¹⁷ Инхалода адгьыл аҿы Анцәа Иаҳра Зқьышықәсатәи анапхгара аан? Зегь раԥхьа иргыланы урҭ Армагеддон аҿы еиқәхо ауааи адунеи ҿыц аҿы ииуа ахәыҷқәеи роуп. Уи адагьы, Аатра 20-тәи ахаҿы иԥсхьоу рыԥсы шҭало атәы ануп. (Шәаԥхьа Аатра 20:11—13.) Зыԥсы ҭалода? «Ауаа бзиақәа», даҽакала иуҳәозар, иԥсхьоу Анцәа имаҵзуҩцәа, насгьы «ауаа цәгьақәа», даҽакала иуҳәозар, Иегова иӡбахә аилкаара иахьымӡаз (Аус. 24:15; Иоанн 5:28, 29, АдҾ). Аха уи иаанагаӡом Зқьышықәсатәи анапхгара аан ауаа зегьы рыԥсы ҭалоит ҳәа. Иегова имаҵ аура зҭахымыз ауаа рыԥсы ҭеиҵаӡом. Дара уи аҩыза алшара шрымазгьы рхы иадмырхәаӡеит. Убри аҟынтә џьанаҭ дгьыл аҿы наӡаӡатәи аԥсҭазаара роуӡом (Матф. 25:46; 2 Фес. 1:9; Аат. 17:8; 20:15).

АҴЫХӘТӘАНТӘИ АԤЫШӘАРА

18. Иҟалозеи 1 000 шықәсатәи анапхгара анҵәамҭазы?

¹⁸ 1 000 шықәса рынҵәамҭазы адгьыл аҿы инхало ауаа зегьы наӡахоит. Адам игәнаҳа иаанагаз аԥхасҭа зегь ықәгахоит (Рим. 5:12). Усҟан ауаа зегьы инаӡоу аԥсҭазаара роуеит, убри азоуп Абиблиаҿы урҭ рыԥсы ҭалоит ҳәа зҳәоу (Аат. 20:5).

19. Хықәкыс иамоузеи аҵыхәтәантәи аԥышәара?

¹⁹ Аҩсҭаа Иисус дышԥишәозгьы, уи Иегова гәыкала дшизыҟоу шьақәирӷәӷәеит. Уажәшьҭа шәааи Христос Зқьышықәсатәи инапхгара анҵәамҭа ҳхаҿы иааҳгап. Шәара шәнаӡоуп, Аҩсҭаа ихы дақәиҭуп, насгьы даҽазныкгьы ауаа ԥишәартә алшара имоуп (Аат. 20:7). Шәгәы ишԥаанаго, ишәылшома шәаргьы уи шәиҿагылар? Ҳара зегьы уи азҵаара аҭак аҟаҵара алшара ҳауеит. Аҵыхәтәантәи аԥышәара аан Анцәа гәыкала ишизыҟоу аазырԥшуа ауаа зегьы наӡаӡатәи аԥсҭазаареи ахақәиҭреи роуеит (Рим. 8:21). Аха Иегова иҿагыло ауааи, Аҩсҭааи, адемонцәеи наӡаӡа иқәгахоит (Аат. 20:8—10).

20. Иарбан цәаныррақәоу ашәҟәы Аатра иану аԥааимбаражәақәа реилыргара ишәызцәырнагаз?

²⁰ Ишәгәаԥхама Аатра захьӡу «афотосахьа» ахәаԥшра? Шәгәы ҟанаҵама уа шәхы ахьыжәбаз? Ҳәарада, ауаа Иегова иган аанкылара ҳрыцхраалар ҳҭахуп. Убасҟан даргьы ҳаргьы Абиблиа аҵыхәтәантәи ашәҟәаҿы зыӡбахә ану аԥааимбаражәақәа рынаӡара ҳалахәызаауеит (Аат. 22:17). Арҭ астатиақәа рыбзоурала аԥхьаҟа иҟалараны иҟоу ахҭысқәа ибзианы ҳхаҿы иааҳгеит, насгьы апостол Иоанн иеиԥш иаҳҳәоит: «Амин. Уаҳзааи, Иҳақәиҭу Иисус!» (Аат. 22:20).