‘Thlarau Vainam’ Ṭha Tein Hmanhg
“Thlarau nih an pek mi hna vainam caah Pathian bia kha i lak u.”—EFE. 6:17.
1, 2. Pennak kong thanhtu a herh caah zeidah kan tuah awk a si?
JESUH nih mi zapi thlaraulei bawmh an herh a hmuh caah a zultu kha hitin a ti hna: “Rawl ṭuan awk cu tampi a um ko, sihmanhsehlaw a ṭuantu ding cu tlawmte lawnglawng an si. Cucaah rawlṭuan uktu bawi sinah cun, rawl ṭuantu tam deuh a thlah hna nakhnga, thla va cam tuah u.” Jesuh nih chim men lawng si loin a ṭuan. Mah bia a chim dih in “lamkaltu ah a thimmi hleihnih kha a auh hna” i phungchimnak ah a thlah hna asiloah “rawl ṭuan” a fial hna. (Matt. 9:35-38; 10:1, 5) A hnuah Jesuh nih ‘a dang sawm sarih kha a thim hna’ i mah rian ṭuan awkah “pahnih pahnih in a thlah” hna.—Luka 10:1, 2.
2 Tuchan zongah Pennak thanhtu a herh tuk. 2009 rianṭuannak kum ah vawlei pumpi ah Ruahnolhnak ah aa pummi 18,168,323 an si. Mah cu Jehovah Tehte a simi nambar nakin nuai 10 leng a tam deuh. Lo rawl cu ṭuan awkah an hmin tuk cang. (Johan 4:34, 35) Cucaah rawlṭuantu an tam nakhnga thlacam in hal awk a si. Asinain kan thlacam ning bantukin zeitindah kan tuah khawh? Pennak kong chimnak le zultu siternak rian ah teima in kan i tel lioah hmualngei deuh in phung a chim khomi sinak in kan tuah khawh.—Matt. 28:19, 20; Mar. 13:10.
3. Hmualngei deuh in phung a chimmi si awkah Pathian thlarau nih zeitindah biapi bik in a kan bawmh?
3 Pathian thlarau nih “Pathian bia cu ralṭha ngai in” chim awk a kan bawmh ning kha hmasa capar ah kan i ruah cang. (Lam. 4:31) Mah thlarau nih khan phungchim thiam awkah a kan bawmh khawh. Phungchimnak ah hmualngei deuh in chim khawhnak lam pakhat cu Jehovah timhpiakmi hriamnam ṭha bik Baibal ca ṭha tein hman a si. Baibal cu thiang thlarau lamhruainak in ṭialmi a si. (2 Tim. 3:16) A chung bia cu Pathian bia an si. Cucaah phungchimnak ah Baibal ṭha tein kan hman tikah thiang thlarau lamhruainak in kan chim a si. Baibal zeitindah hman awk a si i ruah hlan ah ṭhawnnak a ngeih ning kha zoh u sih.
‘Pathian Bia cu A Ṭhawng’
4. Baibal chung Pathian bia nih mi kha zeitindah a thlen khawh?
4 Baibal ah a ummi Pathian bia cu a ṭhawng tuk. (Heb. 4:12) Langhternak in chim ahcun Baibal bia cu minung nih an sermi zei bantuk vainam nakhmanh in a har deuh, hliahcang le thlek an i tonnak tiang in a cheu khawh. Baibal biatak cu minung pakhat chunglei bik tiang a phan i a chunglei lungthin zei bantuk a si a langhtermi a ruahnak le a lungthin cawlcanghnak tiang in a pemh. Baibal biatak cu a ṭhawn caah mi pakhat kha a thlen khawh taktak. (Kolose 3:10 rel.) A si, Pathian Bia nih minung nunning a thlen khawh.
5. Zei lam hna in dah Baibal nih lam a kan hruai, a phichuak zeidah a si?
5 Cun khuazei hmanh ah hmuh khawh lomi fimnak Baibal ah a um. A har i aa tuai ngaimi vawlei ah zeitindah nun awk a si mi a bawmmi bia tampi a um. Baibal cu atu kalnak lam lawng si lo in hmailei lam tiang ceunak a pemi a si. (Salm 119:105) Harnak zeitindah tuah ding asiloah hawikom, nuamhsaihnak, rian, hnipuan ti bantuk i thim tikah tampi a kan bawmh. (Salm 37:25; Ptb. 13:20; Johan 15:14; 1 Tim. 2:9) Baibal phunglam kan zulh tikah mi he kan i rem. (Matt. 7:12; Fil. 2:3, 4) Lam mei a ummi ah mi pakhat a kal tikah lam hlat a hmuh khawh bantukin Baibal lamhruainak kan zulh ahcun biakhiahnak kan tuahmi caan sau ca a ṭhat kha kan hmuh lai. (1 Tim. 6:9) Pathian aa tinhmi hmailei kong zong Baibal nih a chimchung i Pathian tinhmi ningin nun awkah a kan bawmh. (Matt. 6:33; 1 Johan 2:17, 18) Mi pakhat cu Pathian phunglam ning in a nun ahcun a nunnak cu sullam a ngei lai.
6. Thlarau raldohnak ah Baibal cu zeitluk ṭhawnnak a ngeimi dah a si?
6 Thlarau raldohnak ah Baibal cu ṭhawnnak a ngeimi hriamnam a si zong ruat hmanh. Paul nih Biabal chung bia kha ‘thlarau vainam’ tiah a auh. (Efesa 6:12, 17 rel.) Baibal chung bia ṭha tein kan chim tikah mi kha Satan uknak tang in luat awk a bawmh hna. Mah vainam nih mi kha hrawk loin nunnak tu a pek. Vainam kha ṭha tein hmanthiam awkah kan i zuam awk a si lo maw?
Hmaan tein Hmang
7. ‘Thlarau vainam’ ṭha tein hmanthiam awk cawn cu zeicah a biapit?
7 Ralkap pakhat cu hriamnam ṭha tein hmanthiam awkah a cawn hnu lawngah raldohnak ah ṭha tein a hman khawh lai. Thlarau raldohnak ah kan hmanmi ‘thlarau vainam’ hmannak zongah cuticun a si ve. “A rian a zahpi lomi, Pathian biatak hmaan tein mi a cawnpiaktu saya bantukin Pathian hnatlaknak kha na hmuh khawh nakhnga fakpi in i zuam” tiah Paul nih a ṭial.—2 Tim. 2:15.
8, 9. Baibal nih zeidah a chim hngalh awkah zeinihdah a kan bawmh lai? Tahchunhnak in chim.
8 Phungchimnak ah ‘biatak hmaan tein mi cawnpiak’ awkah zeinihdah a kan bawmh lai? Baibal bia mi kan chimh hna hlan ah kanmah kan lungfian hmasa a hau. Cucaah Baibal cang pakhat a hnuhmai ummi bia kha ṭha tein zoh a hau.
9 Baibal cang pakhat ṭha tein hngalhthiam awkah a cungtang ca cang hna zoh zong a herh. Tahchunhnak pakhat cu Galati 5:13 ah hmuhmi Paul bia hi a si. Hitin aa ṭial: “Ka u le ka nau hna, nannih cu luat ding in kawhmi nan si. Asinain cu luatnak cu nan pumsa duhnak ca i caan ṭha men ah khan hmang hlah u. Pakhat le pakhat kha dawtnak in nan rian tu i bawm u.” Hika ah Paul nih zei luatnak kong dah a chimmi a si? Sualnak le thihnak, a hmaanlomi zumhnak asiloah a dang pakhatkhat chung in luatnak a chimmi a si maw? ‘Nawlbia nih a chuahpimi chiatsernak chungin luatnak’ kong a si kha Paul chimmi a hnuhmai bia nih a langhter. (Gal. 3:13, 19-24; 4:1-5) Khrihfa luatnak kong a chimmi a si. Mah luatnak kha mansung ah a chiami cu dawtnak in pakhat le pakhat an i bawm. Annih cu mi thangchiatnak le i sik, bia i alnak ah an i tel lo.—Gal. 5:15.
10. Baibal cang a sullam hmaan hngalh awkah zeidah kan ruah awk a si, mah kha zeitindah hmuh khawh a si?
10 ‘A hnuhmai ummi bia’ caah bia sullam aa khatmi ah “hnulei sining, umtuning, . . . pawngkam ummi” aa tel. Baibal cang pakhat a sullam hmaan hngalhthiam awkah a ṭialtu ahodah a si, zeitikah dah zei bantuk thil umtuning ah a ṭial ti bantuk kha ruah awk a si. Mah Baibal ca zeicaah ṭial a si le a si khawh ahcun mah chan lio an nunphung, ziaza le biaknak hngalhnak zong nih a kan bawmh khawh.a
11. Baibal cang fianter tikah zeidah i ralrin awk a si?
11 ‘Biatak hmaan tein mi cawnpiaknak’ ah Baibal chung biatak hmaan tein chim lawng in a za lo. Baibal hman tikah ṭhihphaihnak a si lo nakhnga i ralrin awk a si. Satan nih a tukforh lioah Jesuh nih a tuah bantukin biatak runven awkah Biabal cang kan hman khawh nain mi ṭhihphaihnak ah hman awk a si lo. (Deut. 6:16; 8:3; 10:20; Matt. 4:4, 7, 10) Lamkaltu Piter ralrin pekmi hi kan zulh awk a si: “Nan lungthin chungin Khrih kha upat u law nan Bawi ah ser u. Ruahchannak nan ngeihmi kong kha, kan chim tuah u, an ti mi hna an um ahcun, zeitik caan paoh i chim kho ding in timh ciate in um zungzal u. Cun cu bantukin nan chim tikah nemnak le hmaizahnak in chim u.”—1 Piter 3:15, 16.
12, 13. Zei bantuk “ralhruang fekfek” dah Baibal nih a hrawh khawh? Tahchunhnak in chim.
12 Baibal biatak hmaan tein mi cawnpiak tikah zei ṭhatnak dah kan hmuh? (2 Korin 10:4, 5 rel.) Mitlinglo minung fimnak a langhtermi a hmaanlomi zumhnak, mi a hrawkmi ziaza le ruahnak hna a simi “ralhruang fekfek” kha Baibal biatak nih a hrawh khawh. ‘Pathian hngalhnak he aa ralchanhmi’ zei lungput paoh hlawt awkah Baibal kha kan hman khawh. Mi kha an ruahnak Baibal biatak ning in si awk kan bawmh hna tikah Baibal cawnpiakmi kan hman khawh.
13 India ah a ummi kum 93 a simi nu kong hi tahchunhnak ah zoh hmanh. A ngakchiat lio in mikir cawnpiaknak a zummi a si. Ramdang a ummi a fapa he cakuat in Baibal a cawn tikah Jehovah le a biakam kong lungtho in a cohlan i a zumh. Asinain mikir kong cawnpiaknak kha a lung ah a um tuk caah a fapa nih mithi kong he aa tlai in ca a kuat tikah a cohlang lo. Hitin a ti: “Ca na ka kuatmi chung Baibal biatak kha ka hngalthiam lo. Biaknak dihlak nih minung pum chung ah a thi kholomi pakhat a um tiah mi an cawnpiak. Minung a thih tikah mah hmuh khawhlomi kha a dang pum ah voi 8,400,000 tiang a kir ṭhan tiah ka zumh zungzal. Mah cu zeitindah a palh khawh lai? Biaknak tam deuh cu a palh hnga maw?” Thlarau vainam nih cu bantuk ralhruang fek zumhnak kha a hrawk kho lai maw? Mah kong kha Baibal in an i ruah chap i zarh tlawmpal ah hitin ca a ṭial: “Atu cu thihnak kong biatak kha ka hngalhthiam cang. Thawhṭhannak caan ah kan dawtmi a thimi hna he kan i tong ṭhan lai ti ka hngalh caah ka lung aa lawm tuk. A rauh hlan ah Pathian Pennak a ra lai tiah kaa ruahchan.”
Lemnak caah Hmang
14. Phungchimnak ah mi lem timi cu zeidah a si?
14 Phungchimnak ah Baibal hmualngei in hman awkah Baibal cang rel lawng in a za lo. Paul nih a ‘lem’ hna bantukin kan tuah awk a si. (Lamkaltu 19:8, NW, 9; 28:23 rel.) ‘Lem’ timi cu “mahlei ṭan awkah forh” tinak a si. Lemmi pakhat cu “a cohlanmi thil pakhat kha a zumh tuk.” Mi pakhat kha Baibal cawnpiakmi a cohlan nakhnga kan lem tikah mah cawnpiakmi kha zum in kanmah lei ṭan awkah kan forh a si. Cucaah kan chimmi kong a hmaan kha kan bia a ngaimi lung fiang lak in chimh a hau. Mah cu a tanglei bantukin kan tuah khawh.
15. Baibal upat ding in dairek lungthin pekter kha zeitindah tuah khawh a si?
15 Baibal upat awkah dairek in lungthin pekter. Baibal cang pakhat rel lai ah Pathian hmuh ning hngalh a biapit kha zohter. Biahalnak tuah law innngeitu nih bia an leh hnuah hitin chim, ‘mah kongah Pathian hmuhnak zoh u sih.’ Asiloah ah hitin hal, ‘mah kongah Pathian nih zeidah a chim?’ Baibal cang kha cuticun na chim tikah Baibal hi Pathian sin in a rami a si na langhter a si i innngeitu kha Baibal upat awkah na bawmh a si. Pathian a zum ko nain Baibal cawnpiakmi ṭha tein a hngallomi phungchimh tikah cu bantukin tuah cu a biapi tuk.—Salm 19:7-10.
16. Baibal cang kha aa tlakmi in fianter awkah zeinihdah an bawmh lai?
16 Baibal cang rel lawng si loin fianter. Paul nih a kong pakhat kha ‘Cathiang in a langhter i a fianter’ tawn. (Lam. 17:3) Baibal cang pakhat ah a biapimi pakhat leng in a um caah nan i ruah liomi kong he aa pehtlaimi lawng fianter. A biapimi biafang chim ṭhan asiloah biahalnak tuahnak nih mah kha hngalh awkah a bawmh lai. Cun Baibal cang sullam kha fianter. Fianter dih hnuah hi Baibal cang hi amah he zeitindah pehtlaihnak a ngeih hmuh thiam awkah bawm.
17. An zumh nakhnga zeitindah Baibal in na ruah khawh hna?
17 An zumh nakhnga Baibal in ruah hna. Paul nih lungtak in nawlnak le sullam a ngei ngaimi bia hmang in ‘Cathiang chung bia kha a ruah’ hna. (Lam. 17:2, 4) Paul bantukin innngeitu lungtongh awkah i zuam. Siaherhnak na ngeih a langhtermi aa tlakmi biahalnak hmang in an lungchung ummi kha “than” i zuam. (Ptb. 20:5) An sining bak in chim kha hrial. Pakhat le pakhat bia i ruahnak cu a fiangmi le sullam ngeimi siter. An lung a tlinter hngami a dang kong zong in fianter. Na chimmi cu Baibal ah hrambunhmi a si awk a si. Baibal cang pakhat rel hnuah a biapimi ṭha tein fianter le tahchunhnak he chim cu Baibal cang pahnih, pathum rel thluahmah nakin a ṭha deuh. A hmaan a langhtertu thil dang hna hmannak zong in na “chimmi cu hmual a ngei” lai. (Ptb. 16:23) Khuacaan ahcun a konglam fianter chap awkah hlathlainak tuah a hau men lai. A cunglei a kong chimmi kum 93 a simi nu nih a thi kholomi thlarau cawnpiaknak zeicah hi tluk in a karh kha hngalh a duh. Mah zumhnak khuazei in dah aa thawk le biaknak tam deuh ah zeitindah a luh hngalhnak nih mah kong Baibal cawnpiakmi kha cohlan awkah a bawmh.b
Ṭha tein Hmang Peng
18, 19. Zeicah ‘thlarau vainam’ cu ṭha tein kan hman peng awk a si?
18 “Vawlei hi atu bang in cun saupi a um ti lai lo” tiah Baibal nih a ti. Miṭhalo cu a ṭha lo chin lengmang khan an um. (1 Kor. 7:31; 2 Tim. 3:13) Cucaah ‘thlarau vainam Pathian bia’ hmang in “ralhruang fekfek” kha ngol loin hrawh cu a biapi.
19 Pathian Bia, Baibal kan ngei i a hmaan lomi cawnpiaknak hrawh awk le lungthin ṭha a ngeimi hna lungtongh awkah a ṭhawngmi Pathian bia hman cu lunglawmh awk a va si dah! Mah thawngṭha tluk in a ṭhawngmi a um lo. Cucaah Pathian pekmi rian Pennak kong chimnak ah thlarau vainam kha ṭha tein hman awkah kan si khawh chung i zuam hna u sih.
[A Tanglei Fianternak]
a Baibal cauk hnulei sining hngalh awkah a a ṭha bikmi bawmtu cu “All Scripture Is Inspired of God and Beneficial,” Insight on the Scriptures, le Vennak Innsang ah a ummi “Jehovah Bia Cu A Nung” timi capar an si.
b Kan Thih tikah Zeiahdah Kan Can? [Mirang] brochure, cahmai 5-16 zoh.
Zeidah Na Hngalh?
• Pathian Bia cu zeitluk in dah a ṭhawn?
• Zeitindah ‘biatak hmaan tein mi cawnpiak’ khawh a si?
• “Ralhruang fekfek” bantuk kha Baibal nih zeitindah a tuah khawh?
• Phungchimnak ah mi na lem thiamnak kha zeitindah na ṭhanchoter khawh?
[Cahmai 12 Rinli Kulh/Hmanthlak]
Baibal hmang in lem khawh ning
▪ Baibal kha upatter
▪ Baibal cang fianter
▪ An zumh nakhnga Baibal in ruah hna
[Cahmai 11 hmanthlak]
‘Thlarau vainam’ ṭha tein hmanthiam awk cawng