Կրնա՞ք Եհովան Աւելի Փառաբանել Ապրիլ Ամսուան Ընթացքին

¹ Սաղմոսերգու Դաւիթ սրտագին փափաք ունէր Եհովան ընդունելի կերպով փառաբանելու, հետեւաբար ան ըսաւ. «Շատ պիտի գոհանամ Տէրոջմէն իմ բերնովս ու շատերուն մէջ պիտի օրհնեմ զանիկա»։ (Սաղմ. 109։30) Ապրիլը ընտիր ժամանակ մըն է ‘անոր գովաբանութիւնները աւելցնելու’, մեր մասնակցութիւնը աւելցնելով դաշտի ծառայութեան։ (Սաղմ. 71։14) Կը ծրագրէ՞ք այն շատերուն մէջ ըլլալ որոնք ասիկա կ’ընեն միանալով օժանդակ ռահվիրաներու շարքին։

² Հիմա Ծրագրեցէք. Առակաց 21։5–ը մեզ կը վերյիշեցնէ. «Աշխատասէր մարդուն ծրագիրները իրաւամբ առատութիւն կը բերեն»։ Ասիկա կը պահանջէ որ հարցը աղօթքով Եհովայի ներկայացնէք, ձեր ծրագիրներուն մէջ զինք առաջին տեղը դնելով։ (Առ. 3։5, 6) Ետքը, մօտէն քննեցէք ձեր ընթացիկ յայտագիրը որոշելու համար թէ ո՛ւր վերաճշդումներ կարելի է մտցնել, որպէսզի ծառայութեան յատկացնէք որպէս միջին օրը երկու ժամ։ Ուրիշ գործունէութիւններէ ‘ժամանակը ծախու առնելը’ ձեզի թոյլ պիտի տայ որ աւելի ժամանակ յատկացնէք քարոզչական գործին։—Եփ. 5։16

³ Հաղորդակցեցէք ու Համագործակցեցէք. Պօղոս առաքեալ խօսեցաւ կարգ մը անհատներու մասին որոնք ‘զօրացնող օգնութիւն’ մըն էին իրեն, իր ծառայութիւնը կատարելու համար։ (Կող. 4։11, ՆԱ) Ձեր ծրագիրներուն մասին խօսեցէք ուրիշներու հետ որոնք կը փափաքին օժանդակ ռահվիրաներ ըլլալ Ապրիլին։ Անոնց աջակցութիւնն ու ընկերակցութիւնը կրնան փոխադարձ հոգեւոր օգուտներ բերել։ Ծառայութեան տեսուչը կրնայ ձեզի օգնել եթէ հարցումներ ունիք ծառայութեան կարգադրութիւններուն կամ աշխատելիք թաղամասին մասին։

⁴ Ընտանիքին մէջ համագործակցութիւնն ու աջակցութիւնը կրնան օգնել անդամներուն որ օժանդակ ռահվիրաներ ըլլան։ Թերեւս հարկ ըլլայ որ տան գործերը առժամապէս տարբեր կերպով բաժնուին։ Նաեւ, այդ պարտականութիւնները ձեռք առնելու յայտագիրը թերեւս պէտք է փոփոխութեան ենթարկել։ Ընտանիոք խօսակցիլը այս կարիքներուն մասին կրնայ օգտակար ըլլալ ձեր նպատակին հասնելու։ Լաւ հաղորդակցութիւնն ու համագործակցութիւնը յաջողութեան բանալին են։

⁵ Դրական Տեսակէտ մը Պահպանեցէք. Շուտով զանց մի ընէք օժանդակ ռահվիրայութեան մասնակցիլը աննպաստ պարագաներու պատճառաւ։ Դպրոցական պատանիներ, գործէ քաշուած անհատներ, զաւակներ ունեցող տանտիկիններ, լիաժամ աշխատող հայրեր, բոլորն ալ ուրախութեամբ զոհողութիւն ըրած են որպէսզի օժանդակ ռահվիրաներ ըլլան Ապրիլին։ Անոնք կը համաձայնին սաղմոսերգուին հետ թէ «ուղիղներուն կը վայլէ օրհնութիւն երգել», եւ շատ դժուար բան չեն սեպած պահանջուած յաւելեալ ջանքը որպէսզի 60 ժամ յատկացնեն ծառայութեան։ (Սաղմ. 33։1) Եթէ չէք կրնար ծառայել որպէս օժանդակ ռահվիրայ մը, ինչո՞ւ ուրախութեան չմասնակցիք աւելցնելով ձեր գործունէութիւնը որպէս ժողովքի հրատարակիչ մը։

⁶ Շատերու համար, Ապրիլին օժանդակ ռահվիրայութիւնը ոտնաքար մը եղած է կանոնաւոր ռահվիրայական ծառայութեան։ Իրենց ծառայութիւնը աւելցնելով, անոնք նկատած են որ կանոնաւոր ռահվիրայական գործին անցնիլը շատ դիւրին է։

⁷ Այո, Ապրիլին եղանակը նպաստաւոր է աստուածպետական աւելցած գործունէութեան համար։ Ցերեկուան յաւելեալ ժամերը թոյլ կու տան աւելի վկայելու առաւօտուն եւ իրիկուան կանուխ ատենը։ Կ’ուզենք մեր լաւագոյնը ընել մեր Աստուածը՝ Եհովան՝ փառաբանելու։ Ապրիլին օժանդակ ռահվիրայ ըլլալը ընտիր կերպ մըն է մեր երախտապարտութիւնը յայտնելու անոր անարժան ողորմութեան շատ մը արարքներուն համար։